1. (a) Sapos ol man i pret long God, dispela bai stiaim ol long mekim wanem? (b) Sapos ol manmeri i laikim Jehova, wai na ol i mas pret long em?

OL KRISTEN i laikim God, na tu, ol i pret long em. Sampela manmeri i pilim olsem i no stret long laikim God na pret long em long seim taim. Tasol dispela pret i no wankain long pasin bilong pret long man nogut. Yumi bai stori long narapela kain pret. Dispela kain pret i save stiaim ol manmeri long daun tru long God na rispektim em. Ol i pas gut wantaim Papa bilong ol long heven, olsem na ol i abrusim ol pasin we inap bagarapim pasin pren namel long ol o mekim Papa i bel hevi.—Sng. 111:10; Prov. 8:13.

2. Taim yumi tingim tok bilong King Devit long Song 86:11, yumi bai stori long wanem 2-pela samting?

² Ritim Buk Song 86:11. Taim yu skelim ol dispela tok, yu inap luksave olsem King Devit i pilim tru olsem em i bikpela samting long yumi mas rispektim God. Yumi ken stori long olsem wanem yumi inap bihainim tok bilong Devit. Namba 1: Yumi bai skelim sampela risen bilong rispektim nem bilong God. Namba 2: Yumi bai stori long olsem wanem yumi inap soim olsem yumi daun tru long nem bilong God long olgeta samting yumi mekim.

3. Wanem ekspiriens i helpim Moses long rispektim tru nem bilong God?

³ Tingim hau Moses i bin pilim taim em i hait insait long hul bilong ston na em i lukim visen long glori bilong Jehova i kam abrusim em na i go. I no gat narapela man i bin lukim kain visen  olsem paslain long Jisas i kam daun long graun! Moses i harim ol dispela tok, em wanpela ensel i mekim: “Jehova, Jehova, em God i gat pasin marimari na pasin sori, em i no save belhat kwik na i pulap tru long gutpela pasin laikim na pasin i tru, em i save kamapim gutpela pasin laikim long planti tausen lain manmeri, na lusim rong na asua na sin bilong ol.” (Kis. 33:17-23; 34:5-7) Ating Moses i save tingim dispela ekspiriens taim em i kolim nem bilong Jehova. Olsem na bihain Moses i tok lukaut long ol manmeri bilong God, em lain Israel, olsem ol i mas “pret long dispela nem i gat glori na i narakain tru.”—Lo 28:58.

4. Yumi mas tingim tingim wanem ol pasin na dispela bai kirapim yumi long rispektim tru Jehova?

⁴ Taim yumi tingim dispela nem Jehova, i gutpela long yumi tingim Man i holim dispela nem. Yumi mas tingim ol pasin bilong em, olsem bikpela strong, savetingting, stretpela pasin, na pasin laikim. Taim yumi tingim ol dispela pasin na ol narapela pasin tu, dispela bai kirapim yumi long rispektim em moa yet.—Sng. 77:11-15.

5-6. (a) Nem bilong God i gat wanem mining? (b) Olsem Kisim Bek 3:13, 14 na Aisaia 64:8 i kamapim, olsem wanem Jehova i save mekim ol samting i kamap?

⁵ Nem bilong God i gat wanem mining? Planti saveman i wanbel olsem mining bilong nem Jehova em olsem “Em i Mekim i Kamap.” Dispela mining i kirapim yumi long tingim olsem i no gat wanpela samting inap stopim Jehova long kamapim laik bilong em, na em inap mekim ol samting i kamap. Hau na i olsem?

⁶ Jehova inap mekim olsem bikos em inap kamap wanem samting em i laik kamap bilong inapim ol samting em i tingting pinis long mekim. (Ritim Kisim Bek 3:13, 14.) Ol buk na nius bilong yumi i save kirapim yumi long tingim tingim dispela narapela kain pasin bilong God. Na tu, Jehova inap stiaim ol manmeri bilong em long kamap wanem wanem kain em i laikim bambai ol inap lotuim em na inapim samting em i tingting pinis long mekim. (Ritim Aisaia 64:8.) Long ol dispela rot, Jehova i save kamapim laik bilong em. I no gat wanpela samting inap stopim em long kamapim ol samting em i tingting pinis long mekim.—Ais. 46:10, 11.

7. Hau bai yumi inap kisim pasin bilong rispektim tru Papa bilong yumi long heven?

 ⁷ Yumi inap pilim moa yet ol pasin bilong Papa bilong yumi long heven sapos yumi tingim tingim ol samting em i bin mekim na ol samting em i stiaim yumi long mekim. Eksampel, taim yumi tingim tingim ol samting long kriesen, yumi pilim tru olgeta samting Jehova i bin mekim. (Sng. 8:3, 4) Na taim yumi tingim tingim ol samting Jehova i bin helpim yumi long mekim na bai i stret long laik bilong em, yumi kisim pasin bilong rispektim em. Dispela nem Jehova em i narapela kain tru! Dispela nem i makim olgeta pasin bilong Papa, na olgeta samting em i bin mekim, na olgeta samting em bai mekim.—Sng. 89:7, 8.

8. Olsem Lo 32:2, 3 i kamapim, Jehova i gat wanem tingting long nem bilong em?

⁸ Paslain stret long lain Israel i go insait long Graun Bilong Promis, Jehova i skulim Moses long ol tok bilong wanpela singsing. (Lo 31:19) Moses i mas skulim ol manmeri long dispela singsing. (Ritim Lo 32:2, 3.) Taim yumi tingim ol tok i stap long ves 2 na 3, yumi luksave olsem Jehova i no laik bai nem bilong em i stap hait, na ol man i no ken tambuim ol narapela long kolim dispela nem. Em i laik bai olgeta manmeri i save long nem bilong em! Em naispela blesing tru long ol manmeri inap harim Moses i skulim ol long Jehova na gutpela nem bilong Em! Ol dispela skultok i givim nupela strong long ol, na i kain olsem ren i pundaun long ol diwai, plaua, na gras. Hau bai yumi inap bihainim wankain pasin long wok tisa bilong yumi?

9. Olsem wanem yumi tu inap mekim holi nem bilong Jehova?

⁹ Taim yumi go long haus bilong ol manmeri o pablik ples na yumi autim tok, yumi ken yusim Baibel bilong yumi long soim ol manmeri long nem bilong God, Jehova. Yumi ken givim naispela buk o magasin, o soim gutpela vidio, na ol narapela samting long websait bilong yumi we i givim ona long Jehova. Taim yumi stap long ples wok, long skul, o yumi raun, yumi inap tokim ol narapela long God bilong yumi na ol pasin bilong em. Taim yumi tokim ol long samting em Jehova i tingting pinis long mekim long ol manmeri na long dispela graun, yumi skulim ol long samting em ol i no save long en. Taim yumi tokim ol long pasin tru bilong Papa bilong yumi, i olsem yumi mekim holi nem bilong God. Yumi helpim ol long luksave olsem ol lida i bin skulim ol long ol tok giaman na ol i bagarapim gutnem bilong Jehova. Yumi autim ol tok we i helpim ol manmeri na i givim nupela strong long ol.—Ais. 65:13, 14.

10. Yumi mas skulim Baibel sumatin long ol tok na ol stretpela lo bilong God, tasol wai na yumi mas mekim sampela samting moa?

¹⁰ Taim yumi mekim ol Baibel stadi, yumi laik helpim ol sumatin long save long nem bilong Jehova na yusim dispela nem. Na tu, yumi laik helpim ol long save long mining tru bilong dispela nem. Sapos yumi skulim ol long ol tok na lo bilong God, na stretpela pasin, yu ting dispela tasol bai helpim ol? Gutpela sumatin inap kisim save long ol lo bilong God, na laikim ol dispela lo. Tasol yu ting em bai laikim Jehova na bihainim tru tok bilong em? Tingim, Iv i save long lo bilong God, tasol em i no laikim tru God, em Man i bin givim ol lo; na Adam tu i no laikim tru God. (Stt. 3:1-6) So taim yumi skulim ol sumatin long ol tok na ol stretpela lo bilong God, yumi mas mekim sampela samting moa.

11. Taim yumi skulim ol sumatin long ol lo bilong God, hau bai yumi inap helpim ol long laikim tu God, em Man i givim ol dispela lo?

¹¹ Ol tok na ol lo bilong Jehova ol i gutpela samting tru bilong helpim yumi. (Sng. 119:97,  111, 112) Ol sumatin bai holim dispela tingting sapos ol i luksave olsem pasin laikim i kirapim Jehova long putim ol dispela lo. So yumi ken askim sumatin: “Yu ting i gat wanem risen na God i askim ol wokman bilong em long mekim wanpela samting o tambuim ol long mekim wanpela samting? Dispela lo i givim wanem skul long yumi long pasin bilong God?” Sapos yumi helpim ol sumatin long tingim Jehova na kisim pasin bilong laikim tru nem bilong em, yumi bai putim tok i go daun long bel bilong sumatin. Ol sumatin bai laikim God na ol bai laikim tu ol lo bilong em. (Sng. 119:68) Ol bai kamap strong long bilip na ol bai inap long sanap strong na winim ol bikpela hevi.—1 Kor. 3:12-15.

12. (a) Wanem samting i mekim na Devit i no givim bel olgeta long stap gut long God? (b) Laik nogut bilong Devit i kamapim wanem samting?

¹² Wanpela spesel tok i stap long Song 86:11 em “bel olgeta.” God i stiaim King Devit long raitim dispela tok. Devit i bin luksave olsem sapos man i no was gut, ol narapela samting inap pulim tingting bilong em na em i no inap givim bel olgeta long lotuim God. Wanpela taim em i stap antap long haus na em i lukim meri bilong narapela man i waswas i stap. Long dispela taim, yu ting Devit i holim wanpela tingting long bel olgeta o em i holim 2-pela tingting? Em i save long lo bilong Jehova: “Yupela i no ken mangalim meri bilong narapela man.” (Kis. 20:17) Tasol em i lukluk yet. Em i kisim 2-pela tingting; em i laik amamasim Jehova, na tu, em i laikim dispela meri, Batseba. Maski Devit i laikim tru Jehova na rispektim Em, em i bihainim laik nogut bilong em yet. Devit i mekim bikpela rong. Em i bagarapim nem bilong Jehova. Devit i bringim bikpela hevi long ol manmeri i no gat asua, na long famili bilong em yet.—2 Sml. 11:1-5, 14-17; 12:7-12.

13. Hau na yumi save olsem Devit i kisim gen pasin bilong givim bel olgeta long stap gut long God?

¹³ Jehova i stretim pasin nogut bilong Devit, olsem na Devit inap pas gut gen wantaim God. (2 Sml. 12:13; Sng. 51:2-4, 17) Devit i tingim bikpela hevi i kamap taim tingting bilong em i bruk na em i no givim bel olgeta long God. Yumi inap trensletim tok bilong em long Song 86:11 olsem: “Givim mi wanpela tingting tasol.” Yu ting Jehova i helpim Devit long mekim tingting bilong em i kamap wanpela tasol? Yes, Baibel i tok Devit i bin “givim bel olgeta long Jehova, God bilong em.”—1 Kin. 11:4; 15:3.

14. Yumi mas givim wanem askim long yumi yet? Bilong wanem?

¹⁴ Eksampel bilong Devit inap strongim yumi na stap tu olsem tok lukaut. Em i bin pundaun  long mekim bikpela rong, na dispela i stap olsem tok lukaut long ol wokman bilong God long nau. Maski yumi kirap nau tasol long mekim wok bilong Jehova o yumi mekim wok bilong em inap planti yia pinis, yumi mas askim yumi yet, ‘Mi wok long sakim ol samting em Satan i laik yusim bilong kirapim mi long kisim 2-pela tingting?’

15. Sapos yumi pret long God, hau bai dispela pasin inap helpim yumi taim wanpela piksa i kirapim yumi long kisim ol laik nogut?

¹⁵ Sapos wanpela piksa i kamap long TV o Intenet na i kirapim yu long kisim ol laik nogut, yu save mekim wanem? Yu inap kisim tingting olsem i no olgeta hap bilong dispela muvi o piksa i soim pasin doti. Tasol tingim, nogut Satan i yusim dispela muvi o piksa long kirapim yu long kisim 2-pela tingting? (2 Kor. 2:11) Dispela muvi o piksa i olsem tamiok em man i yusim long brukim traipela hap diwai. Pastaim, em i save tromoi sap bilong tamiok i go insait long hap diwai. Bihain em i save tromoi tamiok strong moa na bai sap bilong en i go daun insait moa, na hap diwai i save bruk. Ol piksa bilong pasin doti i olsem sap bilong tamiok. Maski sampela samting i luk olsem samting nating, ol inap kirapim kwik laik nogut bilong man long mekim sin, na tingting bilong em inap bruk nabaut, na em i no stap gut moa long God. So yu mas sakim olgeta kain samting we inap kirapim yu long kisim ol laik nogut! Oltaim yu mas holim wanpela tingting tasol long rispektim tru nem bilong Jehova!

16. Sapos traim i kamap, yumi mas givim wanem ol askim long yumi yet?

¹⁶ Satan i save yusim planti narapela samting tu long kirapim yumi long mekim rong. Yumi save mekim wanem? Yumi inap kisim tingting olsem ol dispela samting i no nogut olgeta. Eksampel, yumi inap tingting olsem: ‘Yea, mi no inap raus sapos mi mekim dispela samting, so em i no bikpela rong.’ Dispela tingting em i kranki olgeta. Mobeta yumi givim ol dispela askim  long yumi yet: ‘Nogut Satan i laik yusim dispela traim long kirapim mi long kisim 2-pela tingting? Sapos mi mekim rong, bai mi bagarapim nem bilong Jehova, o nogat? Dispela pasin bai kirapim mi long i go klostu moa long God, o mi bai stap longwe long em?’ Tingim tingim ol kain askim olsem. Beten askim God long givim savetingting na bai yu inap bekim stret ol dispela askim, na yu no ken giamanim yu yet. (Jems 1:5) Dispela bai lukautim yu. Yu bai inap long sanap strong na sakim traim, olsem Jisas i bin mekim taim em i tok: “Satan, yu klia!”—Mat. 4:10.

17. Wai na yumi no ken larim tingting bilong yumi i bruk nabaut? Stori long tok piksa.

¹⁷ Hevi inap kamap sapos yumi larim tingting bilong yumi i bruk nabaut. Tingim olsem ol memba bilong wanpela spots tim i no pas gut wantaim. Sampela i laik bai ol yet i kisim biknem, na sampela i no laik bihainim ol lo, na sampela i luk daun long trena bilong ol. Dispela kain tim bai i no inap tru long winim gem. Tasol sapos ol memba bilong tim i wok bung wantaim, ol bai winim gem. Yu inap stap olsem dispela tim sapos tingting, laik, na filings bilong yu i stap wanbel long lotuim Jehova. Tingim, Satan i laik bai tingting bilong yumi i bruk nabaut. Em i laik bai tingting, laik, na filings bilong yu i no stap wanbel long bihainim ol lo bilong Jehova. Tasol yu mas holim wanpela tingting tasol na bai yu inap lotuim Jehova. (Mat. 22:36-38) No ken larim Satan i mekim na tingting bilong yu i bruk nabaut!

18. Olsem Maika 4:5 i kamapim, yu strongim tingting long mekim wanem?

¹⁸ Beten askim Jehova long helpim yu, olsem Devit i bin mekim: “Kirapim mi long rispek long nem bilong yu long bel olgeta.” Putim mak long bihainim tok bilong dispela beten. Long olgeta wan wan de, strongim tingting olsem olgeta disisen bilong yu i mas soim olsem yu rispektim tru nem holi bilong Jehova, maski em liklik o bikpela disisen. Taim yu mekim olsem, yu bai givim biknem long Jehova bikos yu stap olsem Witnes bilong em. (Prov. 27:11) Na yumi olgeta bai wanbel long tok bilong profet Maika: “Mipela bai wokabaut long nem bilong Jehova, God bilong mipela, inap oltaim oltaim.”—Mai. 4:5.