1. ¿Ambe arhikuekasïni chénharhini Tata Diosïni ka andisï jukaparhakue eskaksï ísï uáka imecha engaksï xénchajka Jeobani?

KRISTIANUECHACHI xénchasïnga Tata Diosïni, peruchi ístu chénharhisïnga. Jamberiksï máru uandajti, nénachi uá májku tiempu jimbo úni ini tsimani ambe. Peruchi no uandaxaka eskachi jatsiska para chérhini Tata Diosïni. Engachi uandajka eskachi jatsiska para chénharhini, arhikuekaxakachi eskachi jatsiska para mintsita jingoni janhanharhini. Imecha engaksï janhanharhijka, nóksï uékasïndi imani ambe úni enga imecheri Táti auandarhu anapu no jaiapanhintajka, jimbokaksï kánikua jukaparharasïnga ambakiti pájperakua ma jatsini imani jingoni (Sal. 111:10; Prov. 8:13). Ju je exeni ambe arhikuekasïni chénharhini Tata Diosïni.

2. ¿Ambe tsimani ambechi exea ini jorhenguarhikua jimbo enga Salmo 86:11 uandajka?

² (Arhinta je Salmo 86:11). Ambe enga i karakata uandajka, xarhatasïndi eska rei Dabidi kurhangusïrenga andisï xáni jukaparhakue chénharhini Tata Diosïni. Ju je exeni nénachi uá úni ambe enga rei Dabidi uandapka espiritu santu jimbo. Orhetachi exeaka uánikua ambe engachi jimbo jatsika para kánikua janhanharhini Tata Diosïri nombrini. Ka tátsekuachi exeaka nénachi uá pauani pauani xarhatani eskachi janhanharhisïnga.

3. ¿Ambe nitamakuarhispi Moisesi enga úpka eska janhanharhipiringa Tata Diosïri nombrini?

³ Ju je eratseni na enga pʼikuarherapka Moisesi jini Orebi juáta jimbo jiáni enga kʼerendarhu ísï jápka ka jánhaskakua ma jimbo  exeni na enga imeri orhepani jimbo nitamani japka Jeobaeri tʼíntskua. Libru Perspicacia para comprender las Escrituras uandasïndi eska ambe enga Moisesi nitamakuarhipka ima jurhiatikua, jamberi nóteru nema nitamakuarhiptia ini ambe ante de Jesusi Echerirhu jurhani. Jeoba, ánjelini ma úraspti para ini ambe arhini Moisesini: “Jeoba, Jeoba, Tata Diosï uékpiti ma ka pʼamojpiti, enga ióndajka ikiani ka enga para méntkisï uékpijka ka jurhimbitini ka enga xénchaajka uánikuechani, enga puákuntajka imani enga no sési ambe újka, imani enga no janhanharhijka leini ka imani enga kʼamanharhintajka” (Éx. 33:17-23; 34:5-7). Méni enga úrenga Jeobaeri nombrini, jamberi Moisesi miántendi imani ambe. Jimbosï tátsekua arhiapti israelitechani, engaksï jindepka Tata Diosïri ireta, eskaksï janhanharhipiringa ini nombrini enga xáni sési jáxeka ka kʼéri ambeni (Deut. 28:58).

4. ¿Ambejtsïni jarhuataa parachi sánderu janhanharhini Jeobani?

⁴ Engachi Jeobaeri nombrini eratsejka, sési jarhasti eskachi eratsentaaka na enga jásïka ima. Jatsiskachi para miáni eska ima uinhapitiska, jánhastiska, jurhimbitiska ka uékpitini. Eratsentani i ambe ka máteru ambakiti ambe enga Jeoba xarhatajka, uáti eskachi sánderu janhanharhiaka (Sal. 77:11-15).

5, 6. a) ¿Ambe arhikuekasïni Jeobaeri nombri? b) Eska na uandajka Éxodo 3:13, 14 ka Isaías 64:8, ¿ambe úsïni Jeoba paraka úkuarhiaka ambe ma?

⁵ ¿Ambe arhikuekasïni Tata Diosïri nombri? Uánikua jorhenatichaksï uandasïndi eska Jeobaeri nombri, jamberi arhikuekasïnga “ima úsïndi eska iámindu ambe úkuarhiaka”. I ambejtsïni miátantasïndi eska no ma ambe úsïnga ójkutani Jeobani para úni ambe enga ima uéjka ka eska ima úsïnga eska úkuarhiaka ambe ma. ¿Néna úsïni ísï úni?

⁶ Ma ambe enga újka, jindesti eska ima niárasïnga jindeni ambe enga xáni uétarhiaka paraka úkuarhiaka ambe enga ima uéjka (arhinta je Éxodo 3:13, 14). Juchari publikasionicharhu, somenchi pʼímarhinhasïnga parachi eratsentani na enga Jeoba niárajka jindeni ambe enga ima uéjka. Ístu, nájkirukachi Jeobaeri marhuarhicha kʼamanharhintstika, úsïndi eskachi niáraka jindeni ambe enga uétarhijka parachi marhuakuni ka úni ambe enga ima uéjka (arhinta je Isaías 64:8). Ini ambe úparini, Jeoba úsïndi eska úkuarhiaka  ambe enga ima uéjka. No ma ambe úsïndi ójkutani paraka úkuarhiaka ambe enga Jeoba eratsetini jaka úni (Is. 46:10, 11).

7. ¿Ambejtsïni jarhuataa parachi sánderu kʼéri ambe exeni ka janhanharhini juchari Táti auandarhu anapuni?

⁷ ¿Ambejtsïni jarhuataa parachi sánderu kʼéri ambe exeni ka janhanharhini juchari Táti auandarhu anapuni? Eratsentani ambe enga úkia ka na engajtsïni jarhuatakia parachi úni ambe ma. Por ejemplu, ískuchi pakarasïnga engachi eratsentajka ambe enga Jeoba xáni kueraaka (Sal. 8:3, 4). Ka engachi eratsentajka na engajtsïni Jeoba jarhuatakia parachi úni ambe enga ima uéjka, niárasïngachi kánikua janhanharhini. Ísïsti, Jeobaeri nombri kʼéri ambesti. Arhikuekasïndi iámindu ambe enga ima jindeka, ambe enga xáni úkia ka ambe enga xáni uáka (Sal. 89:7, 8).

8. Eska na uandajka Deuteronomio 32:2, 3, ¿ambe uékasïni Jeoba eskachi uáka imeri nombri jingoni?

⁸ Engaksï israelitecha inchani jámenguia Echerirhu engaksï Aiaminhapka, Jeoba pirekua ma jorhendaspti Moisesini ka arhispti eska jorhendapiringa iretani (Deut. 31:19). Engachi eratsentajka ambe enga arhijka ma parti i pirekueri, exesïngachi eska Jeoba no uékasïnga eskachi jískaaka imeri nombrini, níjtu eskachi no úraaka jimboka jukari pímbinhasïska (arhinta je Deuteronomio 32:2, 3). Ima uékasïndi eska iámindu kʼuiripu míteaka imeri nombrini. Para israelitecha kʼéri kóntperata máespti enga Moisesi jorhendaapka Jeobaeri ambe ka imeri nombriri enga xáni kʼéri ambeka. Ambe engaksï jorhenguarhipka, uinhaperantaaspti ka sési pʼikuastantaani, ísï komueska janintserani jarhani jimesïsï enga xuxunhandeka. ¿Ambechi uá úni parachi juchari jorhentperakua jingoni májkueni jarhuataani kʼuiripuechani?

9. ¿Nénachi jarhuajpisïni paraka Jeobaeri nombri pímbinhasïntaaka?

⁹ Engachi aianhpini jámaaka kʼumanchikuecharhu o xanharisï, ju je úrani Bibliani para jorhendaani kʼuiripuechani eska Tata Diosï arhinhasïnga Jeoba. Ístuchi uáka úni eska Jeoba kʼéri ambe arhinhaaka engachi íntspiaska publikasionichani, exerpiani ambakiti bideuechani ka arhini kʼuiripuni eska exeaka juchari pájina Internetiri. Engachi ánchikuarhitarhu jauaka, eskuelarhu o nani uéjkichi nirani jarhani, ju je jánguarhintani aianhpini juchari Tata Diosïri ambe ka na enga jásïka ima. Ju je aianhpini ambakiti ambe enga ima uáka juchantsïni jimbo ka ístu Echeri jimbo. Engaksï kʼuiripuecha kurhauaka ini ambe, jamberiksï jiáni uénaati exeni na engajtsïni xáni xénchajka Jeoba. Méni engachi jurhimbikua ambe jorhentpijka juchari Táti uékpitiri, pímbinhajkuntasïngachi imeri nombrini. Ka xarhatasïngachi eska no ísïska ima chkuanderakua ambe enga uándanhajka imeri ambe. No jarhasti máteru ambe enga xáni sési pʼikuastantaajka kʼuiripuechani ka eska ambe enga Biblia jorhentpijka (Is. 65:13, 14).

10. Engachi Bibliaeri ambe jorhentpijka, ¿andichisï no jatsi para solu jorhentpini ambe enga Tata Diosï juramujka?

¹⁰ Engachi Bibliaeri ambe jorhentpijka, uékasïngachi jarhuatani kʼuiripuni para míteni ka úrani Jeobaeri nombrini. Peruchi ístu uékasïnga eskaksï sési míteaka na enga jásïka Tata Diosï. ¿Uáchi ini ambe úni engachi solu jorhentpiska ambe enga Tata Diosï juramujka eskachi uáka ka na engachi jatsika para jámani? Jamberi nómbe. Jamberi ambakiti jorhenguarhiri ma uáti míteni ambe enga juramujka Tata Diosï ka exeni eska sési jarhaska ambe enga ima juramujka. Peru ¿kurhajchaa Jeobani jimboka xénchasïnguia? Ju je miáni ambe enga Eba úpka. Ima mítespti Tata Diosïri juramukuani, peru no xénchasïrendi Jeobani mintsita jingoni ka ístuchi májkueni ambe uáka uandani Adaniri ambe (Gén. 3:1-6). Ísï jimbo, no solu uétarhisïndi eskachi jorhentpiaka ambe engajtsïni Tata Diosï juramuchijka.

11. Aparte de jorhentpiani Jeobaeri juramukuechani, ¿nénachi uá jarhuataani jorhenguarhirichani paraksï niárani xénchani Jeobani?

¹¹ Jeobaeri juramukuechaksï ambarhatisti ka marhuachesïndijtsïni (Sal. 119:97, 111, 112). Peru  jorhenguarhiri jiáni niáraati ini ambe ísï exeni enga na kurhanguakia eskajtsïni Jeoba uékperakua jimbosï juramuchijka ambe ma. Ísï jimbo, úpiringachi kurhamarhini: “Nári exesïni, ¿andijtsïnisï Tata Diosï arhijki eskachi uáka ambe ma ka máteru ambe nómbe? ¿Ambekini jorhendasïni i ambe Tata Diosïri?”. Engachi jarhuataaka paraka ima Jeobani eratseaka ka xénchani imeri nombrini enga xáni kʼéri ambeka, sánderuchi mintsitarhu niárakuaka. Ini ambe úparini, ima no solu jukaparharauati juramukuechani, sino ístu xénchaati Jeobani (Sal. 119:68). Niáraati sánderu mintsikani Jeobani ka uáti tekaantani enga tsʼéjkukuechani jatsiauaka (1 Kor. 3:12-15).

12. a) ¿Ambe úspi eska Dabidi niárapiringa no iámu mintsita jingoni chénharhini Jeobani? b) ¿Ambe úkuarhispi imani ambe jimbo?

¹² Ambe enga rei Dabidi karapka Tata Diosïri jarhuajperata jimbo ixú Salmo 86:11 jimbo, kánikua jukaparhakuesti: “Ú eskani iámu mintsita jingoni janhanharhiaka chíti nombrini”. Imeri irekuarhu, exespti na enga ma sóntku niárajka no iámu mintsita jingoni kurhajchani Tata Diosïni. Ma xanhari, iótakuarhu jarhaspti imeri kʼumanchikuarhu ka jima uératini exespti eska jikuaxapka Bat-Seba enga máteru acheetiri témbepka. ¿Néna jarhaspi Dabidiri mintsita? ¿Iámu mintsita jingoni chénharhixapi Jeobani o nómbe? Dabidi mítespti arini Tata Diosïri juramukuani: “Asï tsiti máteru acheetiri uarhiitini” (Éx. 20:17). Peru ima méntku jarhaspti exeni Bat-Sebani. Nóteru iámu mintsita jingoni chénharhixaptia Jeobani. Ima uékasïrendi jatsini imani uarhiitini. Peru ístu uékasïrendi kurhajchani Jeobani. Nájkiruka ióni xénchapkia ka ístu janhanharhini Jeobani, Dabidi úspti ambe enga ima uékapka. Ka indeni ambe jimbo niáraspti kánikua no sési jásï ambe úni. No sési pakataspti Jeobaeri nombrini ka kánikua no sési úkuaspti kʼuiripuechani engaksï no kulpa jatsipka, asta imeri familiani (2 Sam. 11:1-5, 14-17; 12:7-12).

13. ¿Nénachi míteski eska Dabidi ménderu úspka iámu mintsita jingoni marhuakuni Jeobani?

¹³ Jeoba jurhimberantaspti Dabidini ka ima ménderu úspti ambakiti pájperakua ma jatsini imani jingoni (2 Sam. 12:13; Sal. 51:2-4, 17). Dabidi no méni mirikurhispti na enga xáni no sési nitamakuarhipka ka uandanhiatechani enga niárapka jatsiani enga ísï no iámu mintsita jingoni chénharhipka Jeobani. Ambe enga ima uandapka Salmo 86:11 jimbo, ístu arhikuekasïndi: “Íntskurini mintsita ma enga no tsimani ambe jimbo antsitakuarhiaka”. ¿Mókukuntaspi Jeoba? Jo, jimboka sánderu orhepani Biblia uandasïnga eska Dabidi iámu mintsita jingoni marhuakuspka Jeobani, imeri Tata Diosï (1 Rey. 11:4; 15:3).

14. ¿Ambechi jatsiski para kurhamarhikuarhini ka andi?

¹⁴ Dabidiri ejemplujtsïni kánikua uinhaperantasïndi, peru ístujtsïni jorhendasïndi ambe  engachi no jatsika para úni. Jatsipiringachi para eratsentani andisï Dabidi no sési ambe niátapi. No arhiparini engachi ióni o sánititu páni jaka Jeobani marhuakuni, jatsiskachi para kurhamarhikuarhini: “¿Jánguarhintaxaki orhepani uérani paraka Noambakiti no uáka eska juchiti mintsita tsimani ambe jimbo antsitakuarhiaka?”.

15. ¿Nénajtsïni uá kuájchakuni janhanharhini Tata Diosïni engachi ikichakueni jásï imajeni ma exeaka?

¹⁵ Por ejemplu, ¿ambechi úsïni engachi exejka telebisionirhu o Internetirhu o pelikula ma jimbo enga uérajka ambe ma enga uáka úni eskachi ísku jándikueri ambe eratseni jauaka? Jamberichi úpiringa eratseni eska inde ambe no ísku jándikueri ambeska. Peru, ¿úpirini Noambakiti úrani jarhani indeni ambe parachi no iámu mintsita jingoni janhanharhini Jeobani? (2 Kor. 2:11). I ambe sáno májkuenisti komueska jacha ma enga nema úrajka para chkari arhakuni. Jamberi sánhani arhiati arhakuni ka ísï jámani, chkari niáraati arhukurhini. Uákachi terukutantani jacha ma jingoni ini ikichakueni járhati imajenichani. Jamberi uénani jámani, uáti ísï xarharani eska no no sési jarhaska exeani ini járhati imajenicha, joperu sóntkuksï uáti eskachi no sési jásï ambe niátaaka ka únksï eskachi nóteru jatsiakia ambakiti pájperakua ma Jeoba jingoni. Ísï jimbo, ju je no jurajkuni eska juchari mintsitarhu ikichakueni jásï ambe jauaka. Ju je jánguarhintani parachi iámu juchari mintsita jingoni janhanharhini Jeobaeri nombrini.

16. ¿Ambechi jatsiski para kurhamarhikuarhini engachi tsʼéjkukua ambe jatsiaka?

¹⁶ Noambakiti no solu ikichakueni járhati imajenichani úraasïndi para úni eskachi no sési ambe niátaaka, ístujtsïni uánikua ambe jingoni tsʼéjkusïndi. ¿Ambechi úsïni? Jamberichi úpiringa eratseni ka uandani: “No xáni no sési ambe niátaaka, no expulsarinhaaka engani ini ambe úska”. Kánikua no sési jarhasti ísï eratseni. Sánderu sésisti arini ambe kurhamarhikuarhini: “¿Úraxaki Noambakiti ini ambe para úni eskani no iámu mintsita jingoni janhanharhiaka Jeobani? ¿No sési pakataa Jeobaeri nombrini engani ikichakueni jásï  ambe úska? ¿I ambe uá eskani sánderu andarhieraaka Jeobani o eskani jurajkuaka?”. Ju je ini kurhamarhikuechani eratseantani. Ju je kómarhini Jeobani eskajtsïni íntskuaka jánhaskakua parachi úni jurhimbitku mókuantaani ini kurhamarhikuechani (Sant. 1:5). Ísï úni, kánikuajtsïni kuájchakuati. Jarhuataatijtsïni parachi no no sési ambe niátani ka májkuenchi uandani eska Jesusi enga uandapka: “Késtakuchirini Satanasi” (Mat. 4:10).

17. ¿Náki ejemplu xarhatasïni eska no sési jarhaska no iámu mintsita jingoni marhuakuni Jeobani?

¹⁷ No sési jarhasti engachi no iámu mintsita jingoni janhanharhiska Jeobani. Ju je eranhaskani eska ma ekipurhu anapuecha engaksï futboli chʼanajka, nóksï úsïnga sési pájperani. Máruksï uékasïndi eskaksï imechajku kʼéri ambe exenhaaka, máteruechaksï no uékasïndi sési chʼanani ka máteruechaksï no janhanharhisïndi imani enga arhistakuajka. No xáni seguruesti eska ekipu ma enga ísï jámajka niáraaka andani chʼanakua ma jimbo. Sánderu sési nikupirindi ekipuni ma enga márku ánchikuarhijka. Ka juchari mintsita ísïuati eska i ekipu engachi iámu eratsekua ka mintsita jingoni marhuakuska Jeobani. Ju je miáni eska Noambakiti kánikua tsitipiringa engachi no iámu mintsita jingoni marhuakupiringa Jeobani. Uékasïndi eskachi úkua jukanchaaka úni ambe enga Jeoba uéjka, imani ambe jimbo engachi jucha tsitijka. Engachi uéjka marhuakuni Jeobani, jatsiskachi para iámu mintsita jingoni ísï úni (Mat. 22:36-38). Ju je no méni jurajkuni eska Noambakiti uáka eskachi no iámu mintsita jingoni marhuakuaka Jeobani.

18. Eska na arhijka Miqueas 4:5, ¿ambechi eratsetixaki úni?

¹⁸ Ju je kómarhini Jeobani májkueni eska Dabidi: “Ú eskani iámu mintsita jingoni janhanharhiaka chíti nombrini”. Ka ju je jánguarhintani ísï úni. Ka eska ima ambe engachi erakujka úni, no arhiparini sini sapichitu ambeski o kʼéri ambeeni, xarhataaka eskachi mintsita jingoni janhanharhisïnga Tata Diosïri pímbinhasï nombrini. Engachi ísï úska, jukanchaakachi para arhinhani eskachi Jeobaeri testigueska (Prov. 27:11). Ka iáminduechachi uáka májkueni uandani eska profeta Mikeasi: “Juchachi Jeobaeri nombri jimbo jámaaka enga juchari Tata Diosïka para méntkisï” (Miq. 4:5).