1. Zwi amba mini u ofha Mudzimu nahone ndi ngani Vhakriste vha tshi tea u mu ofha?

VHAKRISTE vha a funa Mudzimu na u mu ofha. Vhaṅwe vha vhona zwi sa konadzei u funa Mudzimu na u mu ofha. U ofha hune ra khou amba ngaho hafha a si hune ha ita uri muthu a tshuwe na u tetemela. Vhathu vhane vha ofha Mudzimu vha a mu ṱhonifha zwi tshi bva mbiluni. A vha ṱoḓi u ita naho tshi tshini tshine tsha nga tshinya vhushaka havho na Khotsi avho wa ṱaḓulu.—Ps. 111:10; Mir. 8:13.

2. Ri ḓo amba nga ha zwithu zwifhio zwivhili zwo ambiwaho nga Khosi Davida kha Phisalema 86:11?

² Vhalani Phisalema 86:11. Enea maipfi a kona u ri sumbedza zwavhuḓi uri Khosi Davida o vha a tshi pfesesa uri ndi zwa ndeme u ofha Mudzimu. Kha ri ambe nga ha nḓila ine ra nga shumisa ngayo zwe Davida a zwi ṅwala. Tshithu tsha u thoma tshine ra ḓo amba nga hatsho ndi uri ndi ngani zwi zwa ndeme u ṱhonifha dzina ḽa Mudzimu. Tsha vhuvhili, ri ḓo amba nga ha uri nḓila ine ra tshila ngayo i nga sumbedza hani uri ri ṱhonifha Mudzimu.

3. Ho itea mini kha Mushe zwe zwa ita uri a dzule a tshi ṱhonifha dzina ḽa Mudzimu?

³ Humbulani uri Mushe o ḓipfa hani musi e bakoni a tshi khou vhona vhugala ha Yehova vhu tshi khou fhira. Zwenezwo ndi zwithu zwe zwa vha zwi sa athu u vhonwa nga muthu.  Mushe o pfa muruṅwa a tshi amba maipfi a tevhelaho: “Yehova, Yehova, Mudzimu wa u khathutshela na u pfela vhuṱungu, a sa ṱavhanyi u sinyuwa na a re na lufuno luhulu lu sa shanduki, u dzulela u amba ngoho, ane a sumbedza lufuno lu sa shanduki kha vha zwigidi, ane a hangwela vhukhakhi na vhutshinyi na tshivhi.” (Ek. 33:17-23; 34:5-7) Mushe a nga vha o vha a tshi humbula zwenezwo zwithu musi a tshi amba nga ha Yehova. Ndi ngazwo o tsivhudza Vhaisiraele uri vha “ofhe heḽi dzina ḽa vhugala na ḽi ofhisaho.”—Dot. 28:58.

4. Ndi mini zwine zwa nga ita uri ri ṋaṋe u ṱhonifha Yehova?

⁴ Musi ri tshi humbula nga ha dzina ḽa Yehova ri tea u dovha ra elekanya nga ha uri ndi muthu-ḓe. Ri tea u humbula uri u na maanḓa, u na vhuṱali, u haṱula nga nḓila yo teaho na uri u a ri funa. U humbula nga ha zwenezwo zwithu na zwiṅwe zwi ḓo ita uri ri mu ṱhonifhe vhukuma.—Ps. 77:11-15.

5-6. (a) Dzina ḽa Mudzimu ḽi amba mini? (b) U ya nga Ekisoda 3:13, 14 na Yesaya 64:8, Yehova u ita hani uri zwithu zwi vhe hone?

⁵ Dzina ḽa Mudzimu ḽi amba mini? Vhagudi vhanzhi vha tenda uri dzina ḽa Mudzimu Yehova ḽi amba uri “U Ita Uri Zwi Vhe Hone.” Zwenezwo zwi ri thusa u vhona uri a hu na tshine tsha nga thivhela Yehova u ita zwine a khou ṱoḓa u zwi ita na uri a hu na tshine tsha nga mu balela. U zwi ita hani?

⁶ Yehova u ita uri zwithu zwi vhe hone nga u vha zwine zwa ṱoḓea kha vhuimo vhuṅwe na vhuṅwe u itela u swikelela tshipikwa tshawe. (Vhalani Ekisoda 3:13, 14.) Kanzhi khandiso dzashu dzi ri ṱuṱuwedza uri ri humbule nga zwenezwi zwithu zwi mangadzaho. Yehova a nga dovha a ita uri vhashumeli vhawe vha re na tshivhi vha vhe zwine a ṱoḓa u itela u swikelela tshipikwa tshawe. (Vhalani Yesaya 64:8.) Yeneyi ndi nḓila ine Yehova a ita ngayo uri hu itwe zwine a funa. A hu na tshine tsha nga ita uri a si swikelele tshipikwa tshawe.—Yes. 46:10, 11.

7. Ndi mini zwine zwa nga ita uri ri takalele na u ṱhonifha Khotsi ashu wa ṱaḓulu nga ho engedzeaho?

 ⁷ U elekanya nga ha zwe Khotsi ashu wa ṱaḓulu a zwi ita na zwe a ri konisa zwone, zwi ḓo ita uri ri dzule ri tshi mu livhuwa. Sa tsumbo, musi ri tshi elekanya nga ha zwithu zwoṱhe zwe a sika, zwi ita uri ri mu ṱhonifhe. (Ps. 8:3, 4) Musi ri tshi elekanya nga ha nḓila ye a ri thusa ngayo uri ri ite zwine a ṱoḓa, ri a mu ṱhonifha. Ḓanu tou vhona uri ri tea u ṱhonifha hani dzina ḽa Yehova. Ḽi katela zwoṱhe zwine Khotsi ashu a vha zwone, zwe a zwi ita na zwine a ḓo zwi ita.—Ps. 89:7, 8.

8. U ya nga Dotoronomio 32:2, 3 Yehova u ṱoḓa vhashumeli vhawe vha tshi ita mini nga dzina ḽawe?

⁸ Yehova o gudisa Mushe luimbo musi Vhaisiraele vha sa athu u dzhena Shangoni ḽo Fhulufhedziswaho. (Dot. 31:19) Mushe o vha a tshi tea u funza vhathu lwonolo luimbo. (Vhalani Dotoronomio 32:2, 3.) Musi ri tshi elekanya nga vese 2 na 3, ri kona u zwi vhona uri Yehova ha ṱoḓi dzine ḽawe ḽi tshi dzumbiwa kana ḽi tshi dzhiiwa sa ḽine ḽa ila. U ṱoḓa vhathu vhoṱhe vha tshi ḓivha dzina ḽawe. Yo vha i ndugelo vhukuma kha Vhaisiraele u pfa Mushe a tshi funza nga ha Yehova na nga dzina ḽawe ḽikhethwa. Zwe Mushe a vha funza zwo vha khwaṱhisa na u vha ṱuṱuwedza sa mvula ya mibvumbi i tshi nela hatsi. Ri nga ita hani uri nḓila ine ra funza ngayo i vhe nga u ralo?

9. Ri nga shela hani mulenzhe kha u ita uri dzina ḽa Mudzimu ḽi itwe ḽikhethwa?

⁹ Musi ri tshi khou huwelela nnḓu nga nnḓu kana fhethu ha vhomuthumunzhi, ri nga shumisa Bivhili u itela u sumbedza vhathu dzina ḽa Mudzimu. Ri nga vha ṋea khandiso, u vha sumbedza vidio kana u vha sumbedza zwithu zwine zwa vha kha website yashu zwine zwa rendisa Yehova. Ri nga vhudza vhathu nga ha Mudzimu kana uri ndi muthu wa hani musi ri mushumoni, tshikoloni kana ro fara lwendo. Musi ri tshi vha vhudza nga ha zwithu zwavhuḓi zwine Yehova a ḓo zwi ita kha ḽifhasi na zwine a ḓo ri itela zwone, zwi nga ita uri vhenevho vhathu vha vhone uri Yehova u a ri funa. Musi ri tshi zwenezwo, ri ḓo vha ri tshi khou ita uri dzina ḽa Mudzimu ḽi itwe ḽikhethwa. Ri vha ri tshi khou phumula dzina ḽa Mudzimu matope na u thusa vhathu uri vha zwi vhone uri ndi kale vha tshi khou funzwa mazwifhi nga ha Yehova. Zwine ra funza vhathu ri tshi shumisa Bivhili, zwi a vha homolosa.—Yes. 65:13, 14.

10. Musi ri tshi gudisa vhathu Bivhili, ndi ngani ri tshi tea u ita zwi fhiraho u sokou vha gudisa milayo ya Mudzimu fhedzi?

¹⁰ Ri ṱoḓa uri vhagudiswa vhashu vha Bivhili vha ḓivhe na u shumisa dzina ḽa Yehova. Ri ṱoḓa u dovha ra vha thusa uri vha ḓivhe zwine dzina ḽawe ḽa amba zwone. Naa ri nga kona u zwi ita nga u sokou vha gudisa milayo fhedzi u itela u bva ngomu? Mugudiswa washu a nga guda na u funa milayo ya Mudzimu, fhedzi naa u ḓo mu thetshelesa nga nṱhani ha uri u a mu funa? Humbulani uri Adamu na Eva vho vha vha tshi ḓivha mulayo wa Mudzimu, fhedzi vho vha vha sa mu funi nga mbilu dzavho dzoṱhe. (Gen. 3:1-6) Ngauralo, ri tea u ita zwi fhiraho u sokou gudisa vhagudiswa vhashu milayo ya Mudzimu fhedzi.

11. Ri nga ita hani uri vhagudiswa vhashu vha fune Mudzimu musi ri tshi vha gudisa milayo yawe?

¹¹ Milayo ya Yehova i a ri vhuyedza. (Ps. 119:97, 111, 112) Fhedzi arali vhagudiswa vhashu vha sa koni u vhona uri Yehova o ri ṋea yeneyi milayo nga nṱhani ha uri u a ri funa, a vha nga vhoni uri i a ri vhuyedza. Ni nga vha vhudzisa uri: “Ni vhona u nga ndi  ngani Mudzimu a sa ṱoḓi ri tshi ita hezwi zwithu? Zwi ri gudisa mini nga ha Yehova?” Arali ra vha thusa u humbula nga ha Yehova na u funa dzina ḽawe, zwi nga vha kwama mbilu. Zwenezwi zwi ḓo ita uri vha fune Mudzimu, nṱhani ha u sokou funa milayo yawe fhedzi. (Ps. 119:68) Vha ḓo vha na lutendo lwo khwaṱhaho nahone vha ḓo kona u konḓelela musi vho sedzana na milingo.—1 Vhakor. 3:12-15.

12. Davida o kundelwa hani u ofha Yehova nga mbilu yawe yoṱhe, zwa vha na mvelelo dzifhio?

¹² Maipfi ane a ri “nga mbilu yanga yoṱhe” e a ṅwalwa nga Khosi Davida kha Phisalema 86:11 ndi a ndeme vhukuma. Davida o zwi vhona uri zwo leluwa u vha na mbilu yo fhandekanaho. Ḽiṅwe ḓuvha e nṱha ha ṱhanga, o ḓi ṱanzwa maṱo nga u sedza mufumakadzi wa muṅwe munna a tshi khou ṱamba. Mbilu yawe yo vha i hani nga tshenetsho tshifhinga? Naa o vha a tshi khou ofha Yehova nga mbilu yawe yoṱhe kana yo vha yo fhandekana? O vha a tshi ḓivha mulayo wa Yehova une wa ri: “U songo emula mufumakadzi wa muṅwe muthu.” (Ek. 20:17) Fhedzi a ḓi bvela phanḓa na u donolela maṱo. A vha na mbilu mbili, iṅwe i tshi ṱoḓa u takadza Yehova, iṅwe yo isa dzangalelo kha Batseba. Davida o ita phetho ya vhutsilu naho ho vha hu kale a tshi funa Yehova na u mu ofha, zwenezwo zwa ita uri a ite tshivhi. O nyadzisa dzina ḽa Yehova. A dovha a vhaisa na vhathu vhe vha vha vha si na mulandu, u katela na muṱa wawe.—2 Sam. 11:1-5, 14-17; 12:7-12.

13. Ri zwi ḓivha hani uri Davida o dovha a funa Yehova nga mbilu yawe yoṱhe?

¹³ Yehova o kaidza Davida nahone Davida a dovha a vha na vhushaka havhuḓi na Yehova. (2 Sam. 12:13; Ps. 51:2-4, 17) Davida o zwi vhona uri u vha na mbilu yo fhandekanaho zwi ita uri hu vhe na masiandoitwa a si avhuḓi. Maipfi a Davida a re kha Phisalema 86:11, a nga dovha a amba uri: “Nṋee mbilu i songo fhandekanaho.” Naa Yehova o thusa Davida uri a si vhe na mbilu yo fhandekanaho? Ee! Ngauri Ipfi ḽa Mudzimu ḽi ri o “shumela Yehova Mudzimu wawe nga mbilu yawe yoṱhe.”—1 Dzikhosi 11:4; 15:3.

14. Ri tea u ḓivhudzisa mini nahone ndi ngani?

¹⁴ Tsumbo ya Davida i ṱuṱuwedza na u tsivhudza vhathu vha Yehova ṋamusi. Hu sa londwi uri ri na tshifhinga tshingafhani ri tshi khou shumela Yehova, ri tea u ḓivhudzisa uri: ‘Naa ndi ḓo tendela Saṱhane a tshi ita uri ndi vhe na mbilu yo fhandekanaho?’

15. U ofha Yehova zwi nga ri tsireledza hani?

 ¹⁵ Sa tsumbo, ri ḓo ita mini arali ra vhona zwifanyiso kha TV kana kha Inthanethe zwine zwa nga ita uri ri humbule zwithu zwi songo kunaho? Zwi nga leluwa u ḓivhudza uri zwenezwo zwithu a si pornography. Fhedzi naa a si zwine Saṱhane a khou zwi shumisa u itela u fhandekanya mbilu yaṋu? (2 Vhakor. 2:11) Ri nga zwi fanyisa na munna ane a shumisa tshezela u itela u rema tshiguthe kana tsinde ḽa muri. U thoma nga ombela ṱhodzi ya yeneyo tshezela nga zwiṱuku nga zwiṱuku. Musi a tshi bvela phanḓa na u ombela yeneyo tshezela, tshiguthe tshi mbo ḓi fhanduwa. Zwifanyiso zwi karusaho maḓipfele a zwa vhudzekani zwi nga fanyiswa na ṱhodzi ya yeneyo tshezela. Arali muthu a lavhelesa zwenezwo zwifanyiso zwine zwa vhonala zwi si na khombo, nga u ya ha tshifhinga, a nga fhedzisela o ita tshivhi. Nga zwenezwo, ni songo tendela naho tshi tshini tshi songo kunaho tshi tshi dzhena mbiluni yaṋu. Dzulani ni tshi ofha Yehova nga mbilu yaṋu yoṱhe.

16. Ri tea u ḓivhudzisa mbudziso dzifhio musi ro sedzana na mulingo?

¹⁶ Saṱhane u na nḓila nnzhi dzine a ri linga ngadzo u itela uri ri ite vhuvhi, ha shumisi zwifanyiso zwi songo kunaho fhedzi. Ri nga ita mini? Zwo leluwa u vhuyafhedza ra ri zwenezwo zwithu a zwo ngo khakhea. Khamusi ri nga ri: ‘Ndi nga si bviswe tshivhidzoni nga u ita hezwi zwithu, zwi amba uri a si vhukhakhi vhuhulwane.’ Zwo khakhea u humbula nga yeneyo nḓila. Ri tea u ḓivhudzisa uri: ‘Naa Saṱhane u khou shumisa uyu mulingo u itela u fhandekanya mbilu yanga? Arali nda ita zwithu zwo khakheaho, naa ndi ḓo vha ndi sa khou ḓisa samba kha dzina ḽa Yehova? Naa izwi zwithu zwi ḓo ntsendedza tsini na Yehova kana zwi ḓo ntsendedza kule nae?’  Iḽani marambo a ṱhoho nga ha dzenedzi mbudziso. Rabelani, ni humbele uri Yehova a ni ṋee vhuṱali ha u dzi fhindula ni sa ḓifhuri. (Yak. 1:5) Zwi ḓo ni tsireledza. Zwi ḓo ita uri ni si wele mulingoni. Ni ḓo fana na Yesu we a ri: “Ṱuwa Saṱhane!”—Mat. 4:10.

17. Ndi ngani mbilu yo fhandekanaho i sa ri vhuyedzi nga tshithu? Ṋeani tsumbo.

¹⁷ Mbilu yo fhandekanaho a i vhuyedzi nga tshithu. Kha ri ri hu na thimu ine vhatambi vhayo a vha tou anḓana zwavhuḓi. Vhaṅwe vha ṱoḓa u vha vho mmboneni, vhaṅwe a vha tevhedzi milayo musi vha tshi tamba nahone vhaṅwe a vha ṱhonifhi mugudisi. Zwi a konḓa uri thimu yo tou raloho i wine. Fhedzi zwo leluwa uri thimu i re na vhuthihi i wine. Arali zwine na zwi humbula, zwine na zwi ṱoḓa na nḓila ine na ḓipfa ngayo i tshi tshimbidzana na zwine Mudzimu a ṱoḓa, mbilu yaṋu i nga fana na thimu ine ya wina. Ni songo hangwa uri Saṱhane o ḓiimisela u fhandekanya mbilu yaṋu. U ṱoḓa uri zwine na zwi humbula, zwine na zwi ṱoḓa na nḓila ine na ḓipfa ngayo zwi lwisane na zwine Yehova a zwi ṱoḓa. Fhedzi ni tea u vha na mbilu i songo fhandekanaho uri ni kone u shumela Yehova. (Mat. 22:36-38) Ni songo vhuya na tendela Saṱhane a tshi fhandekanya mbilu yaṋu!

18. Samusi zwo sumbedzwa kha Mika 4:5, no ḓiimisela u ita mini?

¹⁸ U fana na Davida, humbelani Yehova uri: “Ita uri ndi ofhe dzina ḽau nga mbilu yanga yoṱhe.” Ni finye dzi khwaṱhe u itela u tshila u tendelana na yeneyo thabelo. Ni ite vhungoho ha uri phetho dzaṋu dzoṱhe dzi sumbedza uri ni ṱhonifha dzina ḽa Yehova. Musi ni tshi ita nga u ralo ni ḓo vha ni tshi khou khavhisa dzina ḽa Ṱhanzi dza Yehova. (Mir. 27:11) Zwi ḓo ita uri ri ḓipfe nga nḓila ye muporofita Mika a ḓipfa ngayo musi a tshi ri: “Riṋe ri ḓo thetshelesa Yehova Mudzimu washu lini na lini.”—Mika 4:5.