1. Cossa vol dir temer a Dio, e parché che questo sentimento l’è importante par quei che i ama a Geovà?

I SEGHIDORI de Cristo i ama a Dio e i ga temor de Lu. Podemo pensar che sia de gaver paura, ma qua semo drio parlar de un temor difarente, che no’l ne assa con paura de Dio. Temer a Dio vol dir gaver profondo rispeto par Lu. Quando rispetemo a Dio, noantri ndemo far tuto el sforso par mai disgustar el nostro Pare o far qualcossa che pol pregiudicar la nostra amicìssia con Lu. — Sal. 111:10; Pro. 8:13.

2. Che due robe podemo imparar del Salmo 86:11?

² Ledi Salmo 86:11. * Quando ledemo quel che el Rè Davi el ga dito, vedemo che lu el catea che el temor de Dio l’è importante. Cossa che podemo imparar dele parole de Davi? Prima, ndemo imparar parché che l’è tanto importante gaver profondo rispeto par el nome de Dio. Dopo, ndemo veder come che podemo mostrar che ghemo profondo rispeto par el nome de Dio nela nostra vita.

3. Cossa che ga giutà Mosè a gaver profondo rispeto par el nome de Dio?

³ Come Mosè el se ga sentio quando lu l’era nte una caverna e el ga visto la glòria de Geovà passar davanti de Lu? In quela ocasion Mosè el ga scoltà una voce, che fursi la era de  un àngelo, che la disea: “Geovà, Geovà, un Dio che el ga misericòrdia e compassion, che l’è passiente, pien de amor leal e che el parla sempre la verità, che el mostra amor leal a miliari, che el perdona el sbàlio, la desobediensa e el pecato.” (Éso. 33:17-23; 34:5-7) El Estudo Perspicaz das Escrituras, el dise che questa la ze stata una speriensa maraveiosa, fursi la pi maraveiosa che un omo el ga bio vanti de Gesù Cristo vegner ala Tera. Quando Mosè el doperea el nome Geovà, fursi vegnea nela so mente quel che ghe gavea sucedesto. L’è stà par quela che dopo Mosè el ga dito ai israeliti par “temer questo nome glorioso, che el mèrita temor.” — Deu. 28:58.

4. Cossa che ne giutarà a rispetar a Geovà cada volta de pi?

⁴ Quando pensemo nel nome Geovà, ghemo de pensar anca nela persona che la ga questo nome. Noantri ghemo de meditar sora le qualità che Geovà el ga, come el poder, la giustìssia, la sabedoria e el amor. Pensar in queste qualità e in tante altre ne giutarà a rispetar a Dio cada volta de pi. — Sal. 77:11-15.

5-6. (a) Cossa che vol dir el nome Geovà? (b) Come che Geovà el realisa la so volontà de acordo con Ésodo 3:13, 14 e Isaia 64:8?

⁵ Cossa vol dir el nome Geovà? Tanti studiosi i ze de acordo che el nome de Dio vol dir “Lu el fà deventar”. Questo el ne fà capir che gnente pol fermar la volontà de Geovà. Se l’è dela so volontà che qualcossa suceda, la va suceder. Come cossita?

⁶ Tante dele nostre publicassion le dise che Geovà sempre realisa quel che Lu el vol. Ma come che el fà questo? Una maniera la ze che Lu el deventa quel che Lu el vol par realisar la so volontà. (Ledi Ésodo 3:13, 14. *) Nantra maniera la ze che Geovà el pol far i so servi,  umani imperfeti, deventar quel che Lu el vol par realisar la so volontà. (Ledi Isaia 64:8. *) De queste due maniere, Geovà el pol far che la so volontà la sìpia fata, e gnente pol fermarlo. — Isa. 46:10, 11.

7. Come che podemo far pi grando el rispeto par el nostro Pare selestial?

⁷ Noantri podemo far pi grando el nostro rispeto par Geovà, quando pensemo nele robe che Geovà el fà, nele robe che Lu el ne giuta a far e in quel che Lu ancora el farà. Par esémpio, gheto belche pensà in tute le robe bele che Geovà el ga creà? Questo ndarà farte restar tanto maraveià. (Sal. 8:3, 4) Anca te vè sentir profondo rispeto par Dio, quando te pensi sora quel che Lu el te ga fato deventar par realisar la so volontà. Alora, el nome Geovà e quel che el nostro Pare l’è, ne motiva a gaver profondo rispeto. Sicuro che el nome Geovà el mèrita profondo rispeto. — Sal. 89:7, 8.

8. Cossa che Geovà el pensa sora el so nome de acordo con Deuteronómio 32:2, 3?

⁸ Poco vanti dei israeliti ndar rento dela Tera Prometesta, Geovà el ga insegnà un càntico a Mosè. (Deu. 31:19) Geovà el ga mandà Mosè insegnar questo càntico ai israeliti. (Ledi Deuteronómio 32:2, 3. *) Quando noantri se fermemo par pensar nei versìcoli 2 e 3, podemo veder che Geovà no’l vol che el so nome el reste sconto. Anca Geovà no’l vol che le persone le pense che no se pol dir el so nome parché l’è massa sacro. Geovà el vol che tuti i cognossa el so nome! L’è stà un grando privilègio quando i israeliti i ga bio la oportunità de imparar sora Geovà e el so glorioso nome. Par via de quel che Mosè el ga insegnà al pòpolo, lori i se ga sentio pi animadi e incoraiadi, cossita come che resta le piante quando che vien do la piova. Quando insegnemo i altri podemo seghir questo esémpio.

9. Come che podemo giutar a santificar el nome Geovà?

⁹ Noantri giutemo a santificar el nome de Dio quando parlemo la verità sora lu, quando predichemo de casa in casa o in nantra oportunità. Dopera la Bìblia par mostrar che el nome de Dio l’è Geovà. Dopera anca el nostro site, le bele publicassion e i vìdei che i dà onor a Geovà. Nel to laoro, nela scola o quando te fè un viaio, dopera le oportunità par parlar sora el nostro amoroso Dio. Te pol giutar le persone a cognosser Geovà de una maniera difarente, quando ti te parli dele bele robe che lu el vol far par la umanità. Sicuro che quei che i impara questo i va restar animadi e incoraiadi. — Isa. 65:13, 14.

10. Parché che ghemo de giutar i studianti a amar a Geovà?

¹⁰ Quando che te sì drio far un stùdio bìblico, giuta el studiante a cognosser ben a Geovà e a doperar el so nome. Come che se fà questo? Sarà che basta el studiante sol saver una strissa de lege o de règole? Nò, l’è importante cognosser le lege de Dio. Ma se el studiante no’l impara a amar a Geovà, mai el se sentirà motivà a obedirlo. Ricòrdate de quel che ga sucedesto con Eva. Ela la cognossea la lege de Dio, ma no la amea de verità la persona che la ga dato la lege e con Adon l’è stato la medèsima roba. (Gén. 3:1-6) Par quela che ghe vol de pi de che sol insegnar le lege de Geovà ai studianti.

11. Quando insegnemo le lege de Geovà, come podemo giutar i studianti a amar quel che el ga dato queste lege?

 ¹¹ Le lege de Geovà le ze sempre bone par noantri. (Sal. 119:97, 111, 112) Par un studiante capir che le lege de Geovà le ze bone, el bisogna capir che el amor de Geovà l’è par de drio de queste lege. Alora, domanda al to studiante: “Parché che te cati che Geovà el domanda che noantri femo o nò questa roba? Cossa che questa lege la ne insegna sora Lu?” Se giutemo el studiante a pensar sora Geovà e gaver vero amor par el so nome, sarà pi fàcile amar a Geovà. (Sal. 119:68) La so fede la restarà pi forte e lu sarà bon de infrontar le dificoltà che vegnarà. — 1 Cor. 3:12-15.

12. Quando che Davi el ga assà de temer a Geovà con tuto el so cuor, e qual che l’è stà el resultado?

¹² Nel Salmo 86:11 el rè Davi el ga dito: “Giùtame a temer el to nome con tuto el me cuor.” Queste parole le ze tanto importante. Nela so vita, Davi el ga visto che l’è pròpio fadiga temer a Geovà con tuto el cuor. Una volta, Davi l’era nel posto pi alto dela so casa e el ga visto Bate-Seba, che la era la dona de nantro omo, drio bagnarse. Sarà che in quel momento Davi l’era drio temer a Geovà de tuto el so cuor? Davi el savea dela lege de Geovà: “No stà voler la dona de nantro omo.” (Éso. 20:17) Ancora cossita, pol esser che lu el ga continuà a vardar quela dona. Lu el gavea nel so cuor la voia de contentar a Geovà e anca de gaver quela dona. Savemo che Davi el amea a Geovà, ma ancora cossita el ga fato bruti sbali. I resultadi i ze stati che el ga sporcà el nome de Geovà, e el ga fato mal a altre persone, anca a persone dela so pròpia fameia. — 2 Sam. 11:1-5, 14-17; 12:7-12.

13. Come savemo che Davi el ga tornà servir a Geovà con tuto el so cuor?

¹³ Geovà el ga dissiplinà Davi, e lu el ga ricuperà la amicìssia con Lu. (2 Sam. 12:13; Sal. 51:2-4, 17) Lu el se ga ricordà de tuti i problemi e sofrimenti che i ze vegnesti quando lu no’l ga servio a Geovà con tuto el cuor. Sarà che Geovà lo ga giutà a servirlo con tuto el so cuor nantra volta? Sì, parché la Bìblia la dise che un tempo dopo, Davi el ga seità servir a Geovà con ‘tuto el so cuor’. — 1 Rè 11:4; 15:3.

14. Che domanda ghemo de farse, e parché?

¹⁴ El esémpio de Davi ne incoraia, ma anca el mostra che ne toca star atenti. Davi el ga assà che le voie sbaliade le ndesse rento nel so cuor, e questo pol suceder con noantri.  Sàtana el proa far de tuto par noantri no servir a Geovà con tuto el nostro cuor. Alora, no importa quanto tempo servimo a Geovà, l’è importante farse questa domanda: ‘Son drio mantégnerme firme contra le tràpole de Diaol?’

15. Se tememo a Dio, cossa ndaremo far se vedemo una imàgine sensual?

¹⁵ Par esémpio, quando che te vedi una imàgine sensual nela television o nela internet, cossa che te fè? Arquanti i dise che questo no l’è mia pornografia. Ma sarà che no l’è mia questa oportunità che Sàtana el dopera par spartir el nostro cuor? (2 Cor. 2:11) Pensa nte una ilustrassion: par verder un toco grando de legno, un omo el pol doperar una feramenta che la gàpie una ponta, come una cugna. El dopera la massa insieme cola cugna par far una sfesa nel legno, fin che el legno se spartisse. L’è questo che sucede cole imàgine sensuai nel nostro cuor. Nel scomìnsio pol esser una roba pìcola come la ponta de una cugna, ma in poco tempo pol spartir el nostro cuor e far noantri far un pecato. Cossita, no mantegnemo la nostra lealtà a Geovà. Par quela, no stà assar che le robe sbaliade le fae sfese nel to cuor. Continua a temer a Geovà con tuto el to cuor!

16. Che domande ghemo de farse quando infrontemo qualche tràpola del Diaol?

¹⁶ Ghen’è tante altre tràpole che Sàtana el dopera. Sarà che noantri pensemo cossita: ‘Mi no vao esser desassossià se fao questa roba, alora no l’è mia tanto sbalià cossita.’ Ma questo rassiossìnio pol inbroiarne. Alora, podemo domandarne: ‘Sarà che Sàtana no l’è drio doperar questo par spartir el me cuor? Cossa ndarà suceder se mi casco nela tràpola de Sàtana? Sarà che vao sporcar el nome de Geovà? Vao restar pi darente o pi distante  de Geovà?’ Pensa in queste domande. Domanda che Geovà el te dae sabedoria par far una anàlise sinsiera e onesta. (Tiago 1:5) Se te fè questo, sarà una granda protession par ti. Te gavarè la forsa par resister ale tentassion, come Gesù el ga fato. Lu el ga dito: “Via de qua Sàtana!” — Mat. 4:10.

17. Parché che un cuor spartio l’è sensa valor? Daghe un esémpio.

¹⁷ Un cuor spartio l’è sensa valor. Imagina una echipe de sporte che no i se vol mia ben. Ghen’è de quei che i vol sol farse veder, altri che no i vol obedir ale règole e altri che no i ga rispeto par el trenador. Saria fadiga par una echipe cossita vinser un giugo. Una echipe sol la ze bona de vinser se la ga union. Se pol far una comparassion cossita col nostro cuor. I nostri pensamenti, voie e emossion, i ga de esser intesi par servir a Geovà. No stà mia desmentegarte che Sàtana el vol spartir el to cuor. Lu el proa far che i nostri pensamenti, voie e emossion le vae contra quel che Geovà el vol che femo. Ma se volemo servir a Geovà ghemo de servirlo de tuto el cuor. (Mat. 22:36-38) Alora, no stà assar che Sàtana el spartisse el to cuor!

18. De acordo cole parole de Michea 4:5, qual che ga de esser la to dessision?

¹⁸ Domanda a Geovà el medèsimo che Davi el ga domandà: “Giùtame a temer el to nome con tuto el me cuor.” Fà el meio che te pol par viver de acordo con questa orassion. Dimostra che te ghè profondo rispeto par el Santo nome de Geovà nele dessision che te ghè de far, sìpia grande o pìcole. Se te fè cossita, te sarè una Testimònia de Geovà, che dà onor a questo nome. (Pro. 27:11) E un giorno tuti noantri podaremo dir come el profeta Michea: “Noantri seghiremo a Geovà, el nostro Dio, par sempre.” — Mic. 4:5.