1. Wetin e mean to fear God, and why e dey important make we get this fear?

TRUE Christians no only love God, but they still de fear God. Some people fit de think say, ‘How we go fear person wey we love?’ But the fear wey we go talk about for here dey different and special. When we say person de fear God, this one mean say the person get deep respect for God. The person no want do wetin go make Jehovah vex because e no want spoil e friendship with Jehovah.​—Ps. 111:10; Prov. 8:13.

2. From wetin King David talk for Psalm 86:11, which two things we go talk about?

² Read Psalm 86:11. When you think about wetin dey that Bible verse, you go see say King David really know say e dey important to get deep respect for Jehovah. Make we talk about how we fit do wetin David talk for e prayer. We go first talk about some reasons why we suppose get deep respect for the name of God. Then, we go talk how we fit show say we de really respect that name for the way we de live our life.

3. Which experience go don make Moses continue to get deep respect for the name of God?

³ When Moses dey one mountain, e see the glory of Jehovah de pass. How you think say Moses feel? Insight on the Scriptures talk say this thing go don make Moses wonder, and e fit be say this kind thing never happen to anybody before  Jesus come this earth. E fit be say the next thing wey Moses hear, na angel talk-am. Bible talk say: “Jehovah, Jehovah, God wey get pity, e get soft-heart, e no de vex quick-quick, na only truth e de talk and e love no de fail, e de show love wey no de fail to thousands of people, e de forgive mistake and sin.” (Ex. 33:17-23; 34:5-7) And Moses fit don remember that experience when e use the name Jehovah. So we no surprise as Moses later warn Israel people say make they get deep respect for this wonderful name.​—Deut. 28:58.

4. Wetin fit help us respect Jehovah more?

⁴ When we de think about the name Jehovah, make we still think about the kind person wey e be. Make we think about the different-different character wey e get. For example, e de always do the correct thing, e get power, sense, and e de show love. When we de think about all this character and other ones wey Jehovah get, e de make us respect Jehovah more-more.​—Ps. 77:11-15.

5-6. (a) Wetin the name of God mean? (b) As e dey for Exodus 3:13, 14 and Isaiah 64:8, how Jehovah de make wetin e want happen?

⁵ Wetin we know about the meaning of the name of God? Plenty professor agree say the name Jehovah fit mean “E De Make to Become.” This meaning make us remember say nothing fit stop wetin Jehovah want do; e fit do anything wey e want. How Jehovah de do this one?

⁶ Number one, Jehovah de make e self be anything wey e need to be, so that wetin e want go happen. (Read Exodus 3:13, 14.) Plenty times, our books de tell us make we de think about this wonderful meaning wey describe the kind person wey Jehovah be. Number two, Jehovah fit make e servants be anything wey they need to be so that they fit worship-am and do wetin e want. (Read Isaiah 64:8.) Jehovah de use this two ways do  anything wey e want. Nothing fit stop Jehovah make e no do wetin e want.​—Isa. 46:10, 11.

7. How we fit make our respect for Jehovah deep pass as e dey now?

⁷ We fit make the respect wey we get for Jehovah deep pass as e dey now, if we de think about wetin e don do and wetin e don make us fit do. For example, when we think about all the fine-fine things wey Jehovah make, this one de make us get fear for Jehovah. (Ps. 8:3, 4) And when we think about wetin Jehovah don make us to be so that we go fit do wetin e want, our respect for Jehovah go de grow. So we suppose really get deep respect for the name Jehovah! Everything about the kind person wey Jehovah be, the things wey e don do, and wey e go do, dey inside that name.​—Ps. 89:7, 8.

8. From wetin dey Deuteronomy 32:2, 3, wetin Jehovah want make e servants do with e name?

⁸ Just before Israel people enter Promise Land, Jehovah teach Moses one song. (Deut. 31:19) Then Moses go teach Israel people this song. (Read Deuteronomy 32:2, 3.) When we think about wetin dey verse 2 and 3, e clear say Jehovah no want make they hide e name, or treat the name like say e too holy to call. Jehovah want make everybody know e name! Na really special thing for Israel people to hear as Moses de teach them about Jehovah and e wonderful name! The thing wey Moses teach them make their faith strong and encourage them. This one just be like when rain de fall small-small ontop plant to help them grow. How we fit make sure say the way we de teach dey like that?

9. Wetin we fit do to make Jehovah name dey holy?

⁹ When we de preach, make we use Bible show people say the name of God na Jehovah. We fit give them our books, show them videos, and other things wey we get for Internet wey talk about Jehovah. For work, school, or when we de travel, we fit see chance talk about this God wey we love and the kind person wey e be. We fit tell them about the better things wey Jehovah go do for us and the earth. And when they hear this things, they fit see for the first time say Jehovah get strong love for us. As we de tell people the truth about Jehovah the God wey we love, we de make e name dey holy. We de help people see say they don teach them plenty lie about God. The things wey we de teach people for Bible good for them, and na the best.​—Isa. 65:13, 14.

10. Why we no go only teach our Bible students the things wey God want make they do?

¹⁰ When we de study with our Bible student, e good make we help them know the name of God and de use-am. Make we still help them know the kind person wey Jehovah really be. You think say we go fit do this one if we only de teach them the way Jehovah want make they live their life and e laws? Better student fit learn the laws for Bible and even like them. But the student go obey Jehovah because e love Jehovah? Remember say, Eve know the law of God, but e no really love God; and na so Adam still be. (Gen. 3:1-6) So we must do pass just to teach people the things wey God want make they do.

11. When we de teach our students the laws of God, how we fit help them love the God wey give the laws?

¹¹ We de always benefit from the things  wey Jehovah want make we do. (Ps. 119:97, 111, 112) But our students fit no see-am like that unless they understand say Jehovah give us this laws because e love us. So we fit ask our student say: “Why you think say God talk say make e people do this one but make they no do this other one? Wetin that one teach us about the kind person wey e be?” If we help our students think about Jehovah and start to get real love for e name, na that time we go fit touch their heart. Our students no go only love the laws of God but they go still love the God wey give the laws. (Ps. 119:68) Their faith go de strong and they go fit endure any problem wey they go face.​—1 Cor. 3:12-15.

12. One time, how David no fear Jehovah with e complete heart, and wetin that one cause?

¹² One important thing wey King David talk for Psalm 86:11 na: “Make my heart to be one.” When David dey alive, e see say no be easy thing to serve God with complete heart, or one heart. One time wey e dey the top of e house, e see the wife of another man de bath. You think say that time David fear God with e complete heart? David know the law for Bible wey talk say: “Make e no hungry you to take the wife of another man.” (Ex. 20:17) But, e clear say David continue to look. For inside e heart, e want the woman and e still want do wetin Jehovah like. Even as David don love and fear Jehovah for many years, e do wetin e body want. Because of that one, David do some bad things. This one spoil the name of Jehovah. And other people wey no do anything really suffer from this thing wey David do, even e own family.​—2 Sam. 11:1-5, 14-17; 12:7-12.

13. How we know say David get complete heart again?

¹³ Jehovah correct David, and e get good friendship with Jehovah again. (2 Sam. 12:13; Ps. 51:2-4, 17) David remember the trouble wey happen when e no fear God with complete heart. We fit still write the thing wey David talk for Psalm 86:11 as: “Help me make my heart no divide.” Jehovah help David get complete heart again? Yes. We know this one because after, Bible talk about David as man wey “e heart . . . complete with Jehovah e God.”​—1 Ki. 11:4; 15:3.

14. Wetin we need to ask ourself, and why?

¹⁴ The example of David de encourage  us. But the serious sin wey e do na still warning for us today. Whether we just start to serve Jehovah or we don de serve Jehovah for many years, we need to ask ourself say, ‘I de reject all the things wey Satan de do to make me stop to serve Jehovah with complete heart?’

15. How the fear of God fit help us when we see something wey fit make us think things about sex?

¹⁵ For example, if you see something for television or Internet wey fit make you start to think things about sex, wetin you go do? E dey easy to tell yourself say the picture or film no really show naked people. But you no think say na something wey Satan want use make you stop to get complete heart? (2 Cor. 2:11) That picture fit be like axe wey we de use divide big wood. When person first use the axe nack the wood, e no go divide at once. But na after person don nack the wood plenty times, the wood go divide. Na the same thing de happen when we see picture wey fit make us think things about sex. The bad result fit no show at once. But as time de go, person wey de look this kind picture fit sin against Jehovah. So no just de allow anything make e enter your heart! Continue to do your best so that you go fear the name of God with all your heart!

16. When temptation come, which questions we suppose ask ourself?

¹⁶ Apart from this kind pictures, Satan still de use other things de tempt us. Wetin you go do when this one happen? E dey easy to think say this things no too bad. For example, we fit think say: ‘But, they no go disfellowship me if I do-am, so e no really dey serious.’ This kind thinking no correct at all. E good if we ask ourself questions like: ‘Satan de try to use this temptation to make me no get  complete heart? If I do the bad things wey my body want, I go spoil the name of Jehovah? If I do the thing wey my body want, e go make me near God or spoil my friendship with God?’ De think about this kind questions. Pray make God give you sense to tell yourself the truth. (Jas. 1:5) This one fit really help you reject temptation the way Jesus reject-am when e tell Satan say: “Comot for here, Satan!”​—Matt. 4:10.

17. Why e good make our heart complete? Give example.

¹⁷ E good make our heart complete, or be one. Think-am say the players for one football team no de cooperate with each other. Some of the players want praise for only theirself, some of them no want follow the rules for the game, and other players no de respect the coach at all. You think say this kind team fit win any match? But when team dey as one, they go fit succeed. Your heart fit be like team wey dey as one if wetin you de think, wetin you want, and how you de feel agree with wetin Jehovah like. Remember say Satan no just want make you get complete heart. Satan want make e hard you to leave wetin your body want and make e no easy for you to do wetin Jehovah want. But you need your heart to dey complete so that you go fit serve Jehovah. (Matt. 22:36-38) No ever allow Satan divide your heart!

18. As Micah 4:5 talk, wetin you don make up your mind to do?

¹⁸ Make you pray to Jehovah like David, say: “Make my heart to be one to fear your name.” Do everything wey you fit do to follow this prayer for your life. Make up your mind say everyday, whether for big thing or small thing, your decision go show say you de really fear Jehovah and get deep respect for e holy name. If we de do this one, e go make people praise the name of our God, Jehovah. (Prov. 27:11) And all of us go fit join prophet Micah talk say: “We go support the name of Jehovah our God forever and ever.”​—Mic. 4:5.