1. მუს ნიშნენს ღორონთიშ შიშ დო მუშენ რე აუცილებერ თეცალ შიშ უღდან თინეფს, მიდგას იეჰოვა უჸორს?

ჩქი მიჸორა ღორონთ დო თეწკუმა ართო, თიშ შიშ ხოლო მიღუნა. ნამთინექ შილებე იფიქრას, ნამდა თე ჟირ მუდგარენ ართიანს ოწინააღმდეგ. მარა თე შიშ პანიკურ შიშის ვა ნიშნენს. თე სტატიას გუვარჩიენთ გვალო შხვანერ შიშის. თინეფს, მიდგას ღორონთიშ თეცალ შიშ უღნა, თიწკუმა მოწიწებას დო დიდ პატიცემას გიმირჩქინანა. ჩქი ვა მოკონა, გურ ვუწყუნუათ ზეციერ მუმას დო თეშნერო ღორონთწკუმა ჩქინ მეგობრობას ვეცილათ (ფსალმ. 111:10; იგავ. 8:13).

2. ფსალმუნიშ 86:11-იშ თანახმათ, ნამ ჟირ საკითხის გუვარჩიენთ?

² წეკითხით ფსალმუნიშ 86:11. არგამათ ვორწყეთ, ნამდა მეფე დავითის ჯგირო არჩქილედ, მუსხით მნიშვნელოვან რე ღორონთიშ შიშ. მორთ გუვარჩუათ, მუჭო შემლებნა თი სიტყვეფიშ გიმორნაფა, ნამუთ დავითიქ ღორონთიშ შთაგონებათ ჭარჷ. დუდშე ქობძირუნთ, მუშენ ოკო მიღდან ღორონთიშ სახელიშ მოწიწებულ შიშ. თეშ უკულ გუვარჩიენთ, მუჭო შემლებნა ირდღაშიან ცხოვრებას ვოძირათ, ნამდა მიღნა ღორონთიშ სახელიშ მოწიწებულ შიშ.

3. ნამ შემთხვევა მეხვარებუდ მოსეს, გავითარკო ღორონთიშ სახელიშ მოწიწებულ შიშ?

³ დეფიქრით, მუს იგინანდჷ მოსე, მუჟამსით გამოქვაბულს რდუ დო ხილუას ქოძირ, მუჭო მიკორთჷ იეჰოვაშ დიდებაქ. „წმინდა წერილეფიშ ორკვიებელს“ ჭარჷ, ნამდა „თენა რდუ არძაშე დიდებულ  მოვლენა, მუნერით ქრისტეშ დედამიწაშა მოულაშახ, მითინს ვა უძირ“. მუჭოთ იძირენ, მოსექ ანგელოზშე მირჩქილუ თე სიტყვეფ: „იეჰოვა, იეჰოვა მოჭყოლოფე, შხვეფიშ გაჭირებაშ გურშა მიმაღალარ დო ხეთეშე ვერისხებუნ ფერ ღორონთ რე, ხვეიანო გიმირჩქინანს სიჯგირას დო ირიათო ასრულენს მუშ სიტყვას; ანთასეფშო გიმირჩქინანს სიჯგირას, პატიენს დაშებულს, უდუჯერებუობას დო ცოდვას“ (გამ. 33:17—23; 34:5—7). ალბათ, ირო, მუჟამსით მოსე შინანდჷ იეჰოვაშ სახელს, თე შემთხვევა გაშინედ. ვა რე გასაკვირ, ნამდა უმოს გვიანო მოსექ ისრაელეფ გაფრთხილ, უღდესკო ღორონთიშ დიდებულ სახელიშ შიშ (კან. 28:58).

4. ღორონთიშ ნამ თვისებეფშე დაფიქრება ემოფშანა მოწიწებათ თიშ მიმართ?

⁴ მუჟამსით გიმიბრინუანთ ღორონთიშ სახელს, ჯგირ იჸუაფ, თიშე ხოლო დეფიფქრათ, მუნერ პიროვნება გერე თე სახელიშ უკახლე. ოკო დეფიფქრათ ღორონთიშ თვისებეფშე, მუნერ ძალიერ, ბრძენ, სამართლიან დო მოჸოროფე რე თინა. თე დო შხვა თვისებეფშე დაფიქრება, მოწიწებათ ემოფშანა ღორონთიშ მიმართ (ფსალმ. 77:11—15).

5, 6. ა) მუ რე ღორონთიშ სახელიშ მნიშვნელობა? ბ) მუჭოთ გამოსვლაშ 3:13, 14-ის დო ესაიაშ 64:8-ს ჭარჷ, მუჭო ასრულენს იეჰოვა მუშ ნებას?

⁵ მუ მიჩქნა ღორონთიშ სახელიშ მნიშვნელობაშ გურშენ? ბრელ მარკვიებელ ოთანხმ თის, ნამდა სახელ იეჰოვა ნიშნენს „გინართინუანს“. თენა გუმოშინანა, ნამდა იეჰოვაშ ნებაშა მუთუნს ვეწარინე დო თის შეულებ გაკეთას თინა, მუთ მუს ოკო. მუჭო ორთჷ ღორონთ თეს?

⁶ იეჰოვა გინირთუ თით, მუთ მუშ განზრახვაშ შეიოსრულებერო რე საჭირო (წეკითხით გამოსვლაშ 3:13, 14). ჩქინ პუბლიკაციეფს ხშირას გუმოშინანა, დეფიფქრათ ღორონთიშ პიროვნებაშ თე დიდებულ მხარეშე. იეჰოვას მუშ არასრულყოფილ მსახურეფ ხოლო შეულებ გინაშქვას თით, მუთ მუშ განზრახვაშ შეიოსრულებერო რე საჭირო (წეკითხით ესაიაშ 64:8). თეშნერო, იეჰოვა მუშ ნებას ასრულენს. თიშა მუთუნს ვაცილებე მუშ განზრახვაშ შესრულებას (ეს. 46:10, 11).

7. მუჭო შემლებნა იეჰოვაშ მიმართ მარდულობაშ გავითარება?

 ⁷ იეჰოვაშ მიმართ მარდულობაშ გავითარება თით შემლებნა, ნამდა იფიფქრათ თი ირფელშე, მუთ ჩქინ გურშენ უკეთებ დო მუდგაშ კეთებაშ ძალა მუჩეს. მაგალთო, მუჟამსით თი ირფელშე ფიფქრენთ, მუთ იეჰოვაქ დიდებულო გაჭყჷ, გურ თიშ მიმართ მოწიწებულ შიშით ემაფშაფნა (ფსალმ. 8:3, 4). მუჟამსით ფიფქრენთ, თიშ გურშენ, მუნერ პიროვნებათ გინმოშქვეს იეჰოვაქ, ნამდა შემალებესკო თიშ ნებაშ შესრულებაქ, ღორონთიშ დიდ პატიცემას ვავითარენთ. ღორონთიშ სახელ მართალო მოწიწებას მირჩქინანა! თიშ სახელშა მიშურს ჩქინ ზეციერ მუმაშ პიროვნება, ირფელ, მუთ თის უკეთებ დო ირფელ, მუდგას მომავალს გაკეთენს (ფსალმ. 89:7, 8).

8. მუჭოთ კანონიშ 32:2, 3-შე იძირე, მუშ სურვილ უღჷ იეჰოვას მუშ სახელწკუმა დაკავშირებით?

⁸ ისრაელეფიშ აღთქმულ დიხაშა მიშულაშახ, იეჰოვაქ ობირეშიშ სიტყვეფ გეგნოჩ მოსეს (კან. 31:19). მოსექ თე ობირეშ ხალხის ქუდაგურუ. კანონიშ 32:2, 3-შე არგამათ იძირე, ნამდა იეჰოვას ვაკო მუშ სახელ ფულირ რდას დო ადამიანეფქ თიცალ წმინდათ მირჩქინან, ნამდა შურო ვა შინუან თინა (წეკითხით). ღორონთიშ სურვილ რე, ნამდა თიშ სახელ მუშ არძა მოაზროვნე ქმნილებას უჩქუდას! მუშმადიდა პატი რდუ ისრაელეფშო, ნამდა დიგურუესკო იეჰოვაშ გურშენ დო თიშ დიდებულ სახელშენ! თინა, მუთ მოსექ დაგურუ, გამანგარენდჷ თინეფიშ რწმენას დო თიცალ გამომაცოცხლებერ იჸუაფუდ თინეფშო, მუჭოთ ჭვემა მცენარეეფშო. მუჭო შემლებნა დებრწმუნათ, ნამდა თი მეთოდეფს ხოლო, ნამდგას ხალხშა ჭეშმარიტებაშ ოგურაფალო გიმიბრინუანთ, თეცალ შედეგ მოუღ?

9. მუჭო ვუნწყუნთ ხეს ღორონთიშ სახელიშ განწმენდას?

⁹ კარდოკარ ვარდა სტენდით მსახურებაშ დროს ჩქი შემლებნა ხალხის ბიბლიაშე ქუვოძირათ ღორონთიშ სახელ, იეჰოვა. თეწკუმა ართო, შემლებნა მივარზუათ თინეფს პუბლიკაციეფ, ნამუთ იეჰოვას განადიდენს დო ქუვოძირათ თეცალ ვიდეოეფ დო სტატიეფ ჩქინ ვებგვერდშე. სამუშას, სკოლას ვარდა მოგზაურობაშ დროს, ჩქი შემლებნა ბგორათ სიტუაციეფ, ნამდა ქობრაგადუათ ჩქინ საჸოროფო ღორონთიშ დო თიშ გურშენ, მუთ თის მოწონს. მუჟამსით თინეფს, მიდგას შეფხვადუთ, ვოხვარუთ ქიგეგან მუ მიზან უღჷ მოჸოროფე ღორონთის კაცობრიობა დო დედამიწაწკუმა დაკავშირებით, შილებე თინეფქ პირველო დეფიქრან, მუზმათ მანგარო უჸორს იეჰოვას ადამიანეფ. შხვეფს მოჸოროფე მუმაშე მეტიშ გაგებას ქიმვეხვარებუთ-და, ღორონთიშ სახელიშ განწმენდას შევუნწყუნთ ხეს თი ტყურეფშე, ნამუთ იეჰოვაშ გურშენ რე გოსიმაფილ. თინა, მუდგას ჩქი ვოგურუანთ ადამიანეფს ბიბლიაშე, თინეფშო გამომაცოცხლებერ რე (ეს. 65:13, 14).

10. მუშენ ვა რე დასაბაღ ბიბლიაშ მაგურაფალშა იეჰოვაშ კანონეფიშ დოგურაფა?

¹⁰ მუჟამსით ბიბლიაშ გურაფეფს ვატარენთ, მოკონა ბიბლიაშ მაგურაფალეფს მივეხვარათ, უჩქუდან დო გიმირინუან ღორონთიშ სახელ. თეწკუმა ართო, მოკონა, მივეხვარათ თინეფს, ჯგირო გეჩინებაფუან იეჰოვა. ქორენო შეიოლებერ თეშ კეთება თინეფშა ხვალე იეჰოვაშ მითითებეფიშ, ნორმეფიშ დო წესეფიშ დოგურაფათ? ჯგირ ბიბლიაშ მაგურაფალქ, შილებე ქიდიგურუას იეჰოვაშ კანონეფ დო აფასენდას თინეფს. მარა დემორჩილებუნო ბიბლიაშ მაგურაფალ იეჰოვას ჸოროფათ? ვაგგოჭყორდან, ნამდა ევას უჩქუდ ღორონთიშ კანონ, მარა ვართ თის დო ვართ ადამს ვა უჸორდეს თე კანონიშ მიმაჩამალ (დაბ. 3:1—6). თაშ ნამდა, ბიბლიაშ მაგურაფალეფს ხვალე ღორონთიშ სამართლიან მოთხოვნეფ დო ნორმეფ ვარინ, მეტ მუდგარენ ოკო ვოგურუათ.

11. მუჟამსით ღორონთიშ კანონეფს დო ნორმეფს ვოგურუანთ, მუჭო შემლებნა მივეხვარათ ბიბლიაშ მაგურაფალეფს ქოძირან, მუჭო ვუჸორთ თე კანონეფიშ მუმაჩამალს?

¹¹ იეჰოვაშ მოთხოვნეფ დო ნორმეფს ირო  ჯგირობუა მოუღ ჩქინდა (ფსალმ. 119:97, 111, 112). მარა ბიბლიაშ მაგურაფალეფქ შილებე ვემეხვადან თეს, ონდო ვა ძირნა, ნამდა იეჰოვაშ კანონეფიშ უკახლე ჸოროფა გერე. ათეშენ, ქობკითხათ ბიბლიაშ მაგურაფალეფს: „მუჭო ფიქრენქ, მუშენ თხულენს ღორონთ მუშ მსახურეფშე თაშ მოქციებას, ვარდა თეშ კეთებაშე დუდიშ შეკებას?“ მუს ბგებულენთ თავრეშე, თიშ პიროვნებაშ გურშენ?“. ბიბლიაშ მაგურაფალეფს იეჰოვაშ გურშენ ფიქრის დო თიშ დიდებულ სახელიშ ჸოროფაშ გავითარებას ქიმვეხვარებუთ-და, თეშნერო უმოსო ქინვანჭუთ თინეფიშ გურს. თინეფ ხვალე კანონეფს ვარინ, თე კანონეფიშ მუმაჩამალს ხოლო ქიჸოროფუანა (ფსალმ. 119:68). თინეფიშ რწმენა უმოსო გემანგარებ დო ქუგურზუ გამოცდეფს (1 კორ. 3:12—15).

12. მუჭო გირთჷ დავითიშ გურქ დო მუ შედეგიქ მაჸუნ თეს?

¹² ფსალმუნიშ 86:11-ის ბკითხულენთ „მთლიან გურ ქომუჩ“. მეფე დავითიქ თე სიტყვეფ ღორონთშე შთაგონებათ ჭარჷ. თიქ მუშ ცხოვრებაშე ქოძირ, მუნერ ადვილო შილებე გურქ გირთას. ართშა თინა სასახლეშ ბანს რდუ, მუჟამსით ქოძირ შხვა კოჩიშ ოსურ, ნამუთ იბონუნდჷ. მთლიან რდუო თე დროს დავითიშ გურ დოვარ გორთილ? თის უჩქუდ იეჰოვაშ კანონ: „ვა გოკოდას სქან ჯიმაშ ოსურ“ (გამ. 20:17). მარა, მუჭოთ იძირენ, თიქ გაგრძელ ჯინა. თიშ გურქ ჟირო გირთჷ, მუშენდა ქოთ ბათ-შებაშე ფიქრენდჷ დო ქოთ იეჰოვას ოკოდ ასიამოვნუკო. თიშ უმკუჯინუო, ნამდა დავითის უჸორდჷ იეჰოვა დო თიშ შიშ უღუდ, თიქ გეიაჸუნ მუშ არასწორ სურვილს. თექ დავითის ბრელ გლახა მუდგარენ ოკეთებაფუ. მუშ საქციელით, თიქ იეჰოვაშ სახელს შეურაცხყოფა მიორინუ დო თეწკუმა ართო, ბრელ უდანაშაულო ადამიან, თინეფ შქას მუშ ოჯახიშ წევრეფ ხოლო დაზარალ (2 სამ. 11:1—5, 14—17; 12:7—12).

13. სოვრეშე მიჩქნა, ნამდა დავით კინ მთლიან გურით ომსახურუდ იეჰოვას?

¹³ იეჰოვაქ დასაჯ დავით; თიქ მინანუ დო ჯგირ ურთიერთობა აღადგინ იეჰოვაწკუმა (2 სამ. 12:13; ფსალმ. 51:2—4, 17). დავითის შუდჷ თი განსაცდელეფ დო სირთულეეფ, მუდგაქ თიშ გურიშ გორთუალას მაჸუნ. ფსალმუნიშ 86:11-ის ინოჭარილ დავითიშ სიტყვეფქ, შილებე თაშ ხოლო ითარგმნას: „გორთილ ვარენ ფერ გურ ქომუჩ“. ქიმეხვარუო იეჰოვაქ დავითის, უღუდკო მთლიან გურ, შხვა სიტყვეფით ქოფთქუათინ, გორთილ ვარენ ფერ გურ? ქო, მუშენდა ღორონთიშ სიტყვა დავითის მიშინუანს, მუჭოთ კოჩის, ნამუთ „მთელ გურით . . . რდუ იეჰოვაწკუმა, მუშ ღორონთწკუმა“ (1 მეფ. 11:4; 15:3).

14. მუ ოკო ბკითხათ ჩქინ დუდის დო მუშენ?

¹⁴ დავითიშ მაგალით ქოთ გურშა ელამკინანა დო ქოთ მაფრთხილენა. თიშ სერიოზულ  ცოდვა გუმაფრთხილებერ რე ღორონთიშ თანამედროვე მსახურეფშო. ჩქი ვა მოკონა დავითიშ შეცდომა გემეობრათ. ვა უღჷ მნიშვნელობა, ამარდე დიბჭყით ღორონთიშ მსახურება დოვარ ბრელ ხან რე ვომსახურუთ თის, საჭირო რე, ჩქინ დუდის ბკითხათ: ქუვოწინააღმდეგუქო სატანას, ნამუთ ოცად, გორთას ჩქიმ გურ?

15. მუჭო შეულებ ღორონთიშ შიშის ჩქინ დაცვება, მუჟამსით ვორწყეთ უზნეო გამოსახულებას?

¹⁵ მაგალთო, მუჭო მიქციებუთ, მუჟამსით ტელევიზორს ვარდა ინტერნეტის ორწყეთ თიცალ მუდგარენს, მუგდაქ შილებე უზნეო სურვილეფ გოირჩქინან? შილებე იფიქრათ, ნამდა თე სურათ ვარდა ვიდეო ვა რე პორნოგრაფია. მარა შილებენო თენა სატანაქ თქვან გურიშ გართალო გეგმირინუას? (2 კორ. 2:11). თეცალ გამოსახულება მოგენს რკინაშ ფსალს, ნამდგას დიდ ჯიკიშ შქას აკაჸათამალო ირინუანა. დუდშე ფსალიშ ჭკირუნსინ ფერ პიჯ ჭიჭეთ ნწკირუნს ჯიკის, მარა მუჟამსით ტომბას ინმურს ჯიკშა, შქას აკაჸათანს თის. შილებენო უზნეო კადრიქ ჩქინწკუმა ფსალიშ ჭკირუნსინ ფერ პიჯცალო ქიმოქმედას? თიცალ მუდგარენიშ ჯინაქ, მუთ ართ მეჯინათ მუთუნ გლახას ვემიღანს, შილებე გორთას პიროვნებაშ გურ, სერიოზულ ცოდვაშა ქიმიჸონას დო ღორონთიშ ართგურობა მიოდინაფუას. თაშ ნამდა, თიცალ მუთუნს ვემეჩათ თქვან გურს ადგილ, მუთ გლახაშა ქიმეიჸუნანა! ვადინუათ მთლიან გურ, ნამდა ღორონთიშ სახელიშ შიშ გიღდან!

16. მუ კითხვეფ ოკო დუსვათ ჩქინ დუდის, მუჟამსით ცდუნებაშ წოხლე გივორეთ?

¹⁶ სატანა უზნეო გამოსახულებეფიშ გარდა, ხოლო ბრელ მუდგარენს გიმირინუანს, ნამდა არასწორო მიფქცუათ. მუს ვორთუთ თეცალ დროს? თე დროს ადვილ რე, იფიფქრათ, ნამდა თაშ მოქციება გლახა საქციელ ვეჸი. მაგალთო, შილებე იფიფქრათ, ნამდა თენა სერიოზულ ცოდვა ვა რე, მუშენდა თეს გუვაკეთენთ-და, კრებაშე ვა გებრიცხებუთ. მარა თეცალ აზროვნება  არასწორ რე. უჯგუშ იჸუაფ ჩქინ დუდის ბკითხათ: სატანა თეთ ხომ ვაცად გორთას ჩქიმ გურ? არასწორ სურვილეფს გევაჸუნუქ-და, თენა ღორონთიშ სახელს შეურაცხყოფას ხომ ვემიორინუანს? თეცალ მოქციება ღორონთწკუმა უმოსო დუმაახლოვენსო დოვარ დუმაშორენს თის? ქიფიქრით თეცალ კითხვეფშე. ლოცვას ღორონთის სიბრძნე ქოთხით, ნამდა ალალას ქუპასუხათ თე კითხვეფს (იაკ. 1:5). თენა დაიცვენა დო მიგეხვარებნა, ნამდა მტკიცას ქეშეხვადათ ირნერ ცდუნებას დო იესოცალო თქუათ: „ჩემეთხი სატანა!“ (მათ. 4:10).

17. მუშენ ვა უღჷ გორთილ გურს ფას? ქიმიჸონით მაგალით.

¹⁷ გორთილ გურს ფას ვა უღჷ. წერმიდგინით, ნამდა სპორტულ გუნდიშ წევრეფ ართიანწკუმა ვა თანამშრომლენა. ნამთინე ხვალე მუშ დუდიშ განდიდებას ოცად, შხვეფ წესეფს ვამორჩილნა დო ნამთინე უპატიცემლოთ ოქცუ მწვრთნელს. ნაკლებ შანს რე, ნამდა თეცალ გუნდიქ ლაჸაფ მიგას. თეშ გინაწონს, თი გუნდის, ნამუშ წევრეფ ართიანწკუმა თანამშრომლენა, მოგებაშ მეტ შანს უღჷ. თქვან გურ თეცალ წარმატებულ გუნდის აგურუ, მუჟამსით თქვან ფიქრეფ, გრძნობეფ დო ემოციეფ იეჰოვაშ მოთხოვნეფიშ შესაბამის იჸუაფ. რშუდან, სატანას მანგარო ოკო, გორთას თქვან გურ. თის ოკო, ნამდა თქვან ფიქრეფ, სურვილეფ დო ემოციეფ გენესხვავებდას იეჰოვაშ მოთხოვნეფშე. მარა იეჰოვას ემსახურათინ, თქვან გურ გორთილ ვარინ მთლიან ოკო რდას (მათ. 22:36—38). დღას ვემეჩათ სატანას საშვალება, გორთას თქვან გურ!

18. მუჭოთ მიქაშ 4:5-ის ჭარჷ, მუ გაფნა გინოჭყვიდილ?

¹⁸ დავითცალო ლოცვას ქოთხით იეჰოვას: „მთლიან გურ ქომუჩ, ნამდა სქან სახელიშ შიშ მიღდას“. ირფელ გაკეთით, ნამდა თე ლოცვაშ თანახმათ იცხოვრათ. გინოჭყვიდილ გაფდან, ნამდა ირდღაშიან ცხოვრებას, ჭიჭე დოვარ დიდ გადაწყვეტილებეფიშ მეღებაშ დროს ქაძირუათ, ნამდა იეჰოვაშ წმინდა სახელიშ მოწიწებულ შიშ გიღნა. თეშნერო, მუჭოთ ართ-ართ იეჰოვაშ მოწმე, განადიდენთ ღორონთიშ სახელს (იგავ. 27:11). შედეგო, წინასწარმეტყველ მიქაცალო, არძას შემალებენა ფთქუათ: „ჩქი იეჰოვაშ, ჩქინ ღორონთიშ სახელით გილეფშათ იჸი ირიათო, სადღამუშოთ“ (მიქ. 4:5).