1. Ana kumjogopa Mlungu kukusagopolela chichi, soni ligongo chichi kuli kwakusosekwa mnope kwa ŵandu ŵakusamnonyela Yehofa?

AKLISTU ŵasyesyene akusamnonyela Mlungu soni akusamjogopaga. Kwa ŵane, yeleyi mpaka ayiwone kuŵa yakusawusya. Woga watukusaka kukambilanawu uli wapajika soni uli wakulekangana ni watukusakola patusimene ni chindu chakogoya. Kumjogopa Mlungu kuli kumchimbichisya mnope jwalakwe nambosoni kumpikanila. Ŵandu ŵakusamjogopa Mlungu akusaŵambala kutenda yindu yampaka yijonanje unasi wawo ni jwalakwe.—Sal. 111:10; Mis. 8:13.

2. Mwakamulana ni maloŵe ga Daudi ga pa Salimo 86:11, ana chitukambilane yindu yiŵili yapi?

² Aŵalanje Salimo 86:11 pa maloŵe gamwiŵanda. * Pakuganichisya maloŵega, mpaka ajitichisye kuti Mwenye Daudi jwamanyililaga kusosekwa kwakumjogopa Mlungu. Kwende tulole mwampaka tukamulichisye masengo maloŵe gakusalilidwa gaŵalembile Daudiga. Chandanda, chitulole magongo gagakusatutendekasya kuti tulichimbichisyeje mnope lina lya Mlungu. Kaneko chitukambilane mwampaka tutendeleje yeleyi lisiku lililyose.

3. Ana ni chakutendekwa chapi chachamkamuchisye Mose kuti alichimbichisyeje mnope lina lya Mlungu?

³ Aganichisye mwaŵapikanile Mose. Musagamisi, jwalakwe wawuweni uchimbichimbi wa Yehofa uli mkupita. Yaŵayiweni Moseyi, yaliji yakusimonjesya mnope kwa mundu jwalijose. Mose jwapikene lilayika lilimkuŵecheta kuti, “Yehofa, Yehofa, Mlungu jwachanasa,  jwangatumbila chitema, jwachinonyelo chisyesyene soni jwa usyesyene. Jwakulosya chinonyelo chisyesyene kwa ŵandu masawusande, jwakululuchila yakulepela soni yakulemwa.” (Eks. 33:17-23; 34:5-7, NWT) Komboleka kuti Mose jwakumbuchilaga yayatendekweyi pandaŵi jilijose jaŵakamulichisyaga masengo lina lyakuti Yehofa. Yili yangasimonjesya kuti kaneko Mose ŵakalamwisye Aisalaeli kuti ‘ajogopeje lina lyakuchimbichikwa ni lyakutesya wogali.’—Det. 28:58.

4. Ana chichi champaka chitukamuchisye kuti tumchimbichisyeje mnope Yehofa?

⁴ Patukuganichisya ya lina lyakuti Yehofa, tukusosekwa ganichisyasoni mwaŵelele jwalakwe. Tukusosekwa kumbuchilaga ndamo syakwe mpela machili, lunda, chilungamo, soni chinonyelo. Kuganichisya ndamo syelesi soni ndamo sine syakwete, mpaka kutukamuchisye kuti tumchimbichisyeje mnope.—Sal. 77:11-15.

5-6. (a) Ana lina lya Mlungu likusagopolela chichi? (b) Mwakamulana ni Ekisodo 3:13, 14, soni Yesaya 64:8, ana Yehofa akusayikombolekasya chamtuli yeleyi?

⁵ Ana tukusamanyilila yamtuli yakwamba ngopolelo ja lina lya Mlungu? Ŵalijiganye ya Baibulo ŵajinji akusajitichisya kuti lina lyakuti Yehofa likusagopolela kuti “Akusatendekasyaga.” Ngopoleloji jikusatukumbusya kuti pangali champaka chimlepelekasye Yehofa kutenda yakusaka. Ana yeleyi mpaka yikomboleche chamtuli?

⁶ Yehofa akusatendekasya yindu kutendekwa mwakuŵa chilichose champaka asache jwalakwejo pakusaka kukwanilisya chakulinga chakwe. (Aŵalanje Ekisodo 3:13, 14.) Mabuku getu gakusatulimbikasya kuti tukusosekwa ganichisyaga mnope mwaŵelele Mlungu. Yehofa mpaka ŵatendekasyesoni ŵakutumichila ŵakwe ŵangali umlama kuŵa chilichose chakusaka jwalakwe, kuti amtumichileje soni kwanilisya chakulinga chakwe. (Aŵalanje Yesaya 64:8.) Pakutenda yeleyi, Yehofa akusatendekasya kuti chakulinga chakwe chikwanilichikwe. Pangali chindu champaka chimlepelekasye jwalakwe kukwanilisya chakulinga chakwe.—Yes. 46:10, 11.

7. Ana mpaka tutende wuli kuti twayamichileje mnope Atati ŵetu ŵakwinani?

⁷ Mpaka tulosye kwayamichila Atati ŵetu ŵakwinani, mwaganichisya yindu yakusatendaga  soni yakusatukunda kuti tutendeje. Mwachisyasyo, patukuganichisya yindu yosope yaŵapanganyisye Mlungu, tukusaŵaga ŵakuyamichila mnope yosope yatesile jwalakwe. (Sal. 8:3, 4) Soni patukuganichisya yindu yatukamuchisye Yehofa kuti tukomboleje kutenda yakusaka jwalakwe ni patukusamyamichila mnope. Kusala yisyene tukusosekwa kulichimbichisya lina lyakuti Yehofa. Linali likusapwatikapo mwaŵelele Atati ŵetu, yindu yatesile, nambosoni yindu yachachitenda msogolo.—Sal. 89:7, 8.

8. Ana pa Detulonomo 32:2, 3 pakusalosya chamtuli mwakusaliwonela Yehofa lina lyakwe?

⁸ Aisalaeli mkanaŵe kwinjila m’chilambo chaŵasalile Mlungu kuti chachapa, Yehofa ŵamsalile Mose kuti alembe nyimbo. (Det. 31:19) Myoyo, Mose jwasosekwaga kwajiganya ŵanduwo nyimbojo. (Aŵalanje Detulonomo 32:2, 3.) Patukuganichisya maloŵe ga mundime 2 soni 3 palilembali, yikusawonechela chenene kuti Yehofa akusasakaga kuti lina lyakwe limanyiche, soni kuti lili lyapenani mwamti tukusosekwa kulikolangaga. Jwalakwe akusasaka kuti yakupanganyidwa yosope yimanyilileje lina lyakweli. Kusala yisyene, chaliji chindu chakusimonjesya kwa Aisalaeli kumpikana Mose ali mkwajiganya yakwamba lina lya Yehofa. Yaŵajiganyisye Moseyi, yalimbikasisye chikulupi chawo mwakulandana ni mwayikusasangalalila yakumela pajiyiche ula. Ana mpaka tutende wuli kuti m’wejisoni twajiganyeje ŵane mpela mwaŵatendele Mose?

9. Ana mpaka tukamuchisye chamtuli kuswejesya lina lya Yehofa?

⁹ Patukulalichila kunyumba ni nyumba kapena kumalo kwakusimanikwa ŵandu ŵajinji, mpaka tukamulichisye masengo Baibulo jetu pakwalosya ŵandu lina lisyesyene lya Mlungu lyakuti Yehofa. Mpaka twape mabuku, mafidiyo soni yindu yine yayikusasimanikwa pa webusayiti jetu, yayikusamchimbichisyaga Yehofa. Chinga tuli kumasengo, kusukulu, kapena paulendo, mpaka tukole upile wakuŵecheta yakwamba Mlungu jwetu soni mwakusatendela yindu. Mpaka twasalilesoni jemanjaji yakwamba yindu yakusimonjesya yachachitutendela Yehofa. Jemanjajo papikene yeleyi mpaka ayiwone kuti Yehofa akusatunonyela mnope. Patukwasalila yisyesyene yakwe yakwamba Atati ŵetu, tukusaŵa kuti tukuswejesya lina lyakwe. Tukusaŵasoni tuli mkusisya yaunami soni yachipongwe yaŵele ŵandu ali mkumŵechetela Yehofa. Yindu yatukusajiganya ŵandu kutyochela m’Baibulo yikusaŵa yakusangalasya soni yakamuchisya kwa jemanjaji.—Yes. 65:13, 14.

10. Ligongo chichi gamba kumjiganya mundu malamusi ga Mlungupe nganikuŵa kwakwanila?

¹⁰ Patukutendesya majiganyo ga Baibulo, tukusasakaga kwakamuchisya ŵakulijiganya Baibulo ŵetu kuti alimanyilileje lina lya Mlungu soni kuti alikamulichisyeje masengo. Kupwatika pelepa, tukusasakaga kuti jemanjaji ammanyilileje Yehofa mwakwanila. Ana yeleyi mpaka yikomboleche naga tukusagambaga kwajiganya malangiso gakusapeleka Mlungu, ndamo syakwe soni malamusi gakwe? Mundu jwambone jwakusasachilila kulijiganya, mpaka alijiganye malamusi ga Mlungu ni kutanda kuganonyela. Nambo ana jwakulijiganyaju chachimpikanila Yehofa ligongo lya kumnonyela? Tukumbuchileje kuti Adamu ni Hawa ŵagamanyililaga malamusi ga Mlungu, nambo nganamnonyelaga juŵapeleche malamusigo. (Gen. 3:1-6) Myoyo, tukusosekwa kutenda yejinji kupunda gamba kwajiganya ŵandu ndamo syachilungamo syakusasaka Mlungu soni malamusi gakwe.

11. Patukwajiganya ŵandu ya malamusi ga Mlungu soni ndamo syakwe, ana mpaka twakamuchisye chamtuli kuti amnonyeleje juŵapeleche malamusigo?

¹¹ Malamusi ga Yehofa soni ndamo syakusasaka jwalakwe sikusaŵaga syambone kwa m’weji. (Sal. 119:97, 111, 112) Nambo jwakulijiganya Baibulo nganaŵa amanyilile yeleyi mpaka ali ayiche pakupikanichisya kuti Yehofa ŵatupele malamusigo ligongo lya kutunonyela. Myoyo tukusosekwa kum’wusya jwakulijiganya Baibulo jwetu  kuti, “Ana ligongo chichi Mlungu akusiŵasalila ŵakutumichila ŵakwe kuti atende yindu ayi, kapena kwalekasya kuti akatendaga yindu ayi? Nambi yeleyi yikusatusalilaga yamtuli pakwamba mwaŵelele jwalakwe?” Naga tuli mkwakamuchisya ŵakulijiganya Baibulo ŵetu kuti aganichisyeje ya Yehofa soni kulinonyela lina lyakwe, ni kuti tuchayika pamtima. Yeleyi yichakamuchisya ŵakulijiganya Baibulo ŵetu kuti akagambaga kuganonyela malamusi ga Mlungu, mmalo mwakwe amnonyelejesoni juŵapeleche malamusigo. (Sal. 119:68) Yeleyi mpaka yikamuchisye kuti chikulupi chawo chikule soni kuti akombole kupilila yakusawusya yiliyose yampaka asimane nayo.—1 Akoli. 3:12-15.

12. Ana Daudi jwalepele chamtuli kola mtima wangagaŵikangana, soni ana yeleyi yakwete yakuyichisya yamtuli?

¹² Maloŵe gakusosekwa mnope gagali pa Salimo 86:11, gali gakuti “ambe mtima wangagaŵikangana.” Mwenye Daudi ni juŵasasalidwe kulemba maloŵega. Pa umi wakwe jwalakwe ŵayiweni kuti yili yangasawusya kuti mtima wa mundu uŵe wagaŵikangana. Pandaŵi jine Daudi ali mkwenda penani pa nyumba jakwe, ŵam’weni jwamkongwe jwa asyene ali mkoga. Ana tujile kuti pandaŵiji Daudi jwakwete mtima wamtuli? Jwalakwe jwamanyililaga lilamusi liŵapeleche Yehofa lyakuti, “Mkakumbila ŵakongwe ŵajenu.” (Eks. 20:17) Nambope jwalakwe jwagambaga kumlolechesyape jwamkongwejo. Kaneko mtima wakwe waliji paŵili. Jwalakwe ŵasakaga kumsangalasya Yehofa nambosoni ŵamsakaga Betiseba. Atamose kuti Daudi ŵamnonyelaga soni kumjogopa Yehofa kutandila kalakala, nambope jwatesile yindu mwakulinonyela. Yeleyi yikulosya kuti jwalakwe ŵatesile yindu yakusakala mnope soni yasakesye mbili ja Yehofa. Yajwatesileyi, yatendekasisye kuti ŵandu ŵane ŵangaleŵa awe soni yayikasisye yakusawusya mwiŵasa mwakwe.—2 Sam. 11:1-5, 14-17; 12:7-12.

13. Ana tukumanyilila chamtuli kuti mtima wa Daudi waŵelesoni wangagaŵikangana?

¹³ Ligongo lyakuti Yehofa ŵamjamwiche Daudi, yakamuchisye kuti aŵe najo paunasi wambone. (2 Sam. 12:13; Sal. 51:2-4, 17) Daudi jwakumbuchilaga yakusawusya yaŵasimene nayo ligongo lyakola mtima wagaŵikangana. Mwamti pa Salimo 86:11 pana maloŵe gakwe gakuti, “Ambe mtima wangagaŵikangana.” Ana Yehofa ŵajanjile yaŵaŵendile Daudiyi? Elo, mwamti kaneko Yehofa ŵamkolasile Daudi kuti jwaliji mundu ‘jwakulupichika kwa Ambuje Mlungu.’—1 Ayi. 11:4; 15:3.

14. Ana tukusosekwa kuliwusya chiwusyo chapi, soni ligongo chichi tukusosekwa kutenda yeleyi?

¹⁴ Chisyasyo cha Daudi chikusatulimbikasya nambosoni kutukalamusya. Ulemwa wekulungwa waŵatesile jwalakwe ukusiwakalamusya ŵakutumichila ŵa Mlungu masiku agano. Chinga  tutandite kumtumichila Yehofa pamkaŵapa, kapena twatandite kalakala, tukusosekwa kuliwusya kuti, ‘Ana ngusaŵambala yitega ya Satana, yampaka yindendekasye kutenda chakulemwa?’

15. Ana kumjogopa Mlungu mpaka kutukamuchisye chamtuli patuyiweni yiwulili yakulimbikasya ndamo syakusakala?

¹⁵ Mwachisyasyo, ana akusatenda wuli pachiweni chiwulili pa TV kapena pa Intaneti champaka chatendekasye kuganichisya yindu yakusakala? Mpaka yiŵe yangasawusya kuganisya kuti chiwulilicho kapena fidiyojo ngajikulosya yindu yakuŵagula. Nambo ana yeleyo nganiyiŵa yilosisye kuti ni yakukamulichisya masengo Satana pakusaka kuti atende ulemwa? (2 Akoli. 2:11) Chiwulilicho mpaka chiŵe mpela macheka gakukamulichisya masengo mundu pakatanya chitela chekulungwa. Mundujo akusatanda kata chitelacho panandipanandi. Kaneko pakupitilisya kata ni machekago chitelacho chikusamalichika kukatika. Kulolela yindu yatukuganisya kuti nganiyiŵa yakusakala ndaŵi sine mpaka kumtendekasye mundu kuti amlemwechesye Yehofa. Myoyo aŵambaleje kwinjisya yindu yakusakala mumtima. Soni amjogopeje Yehofa ndaŵi syosope.

16. Ana patusimene ni yakulingwa tukusosekwa kuliwusya yiwusyo yapi?

¹⁶ Kupwatika pa yiwulili yakulimbikasya chikululu, Satana akusakamulichisyasoni masengo matala gejinji pakusaka kutulinga kuti tutende yakusakala. Ana tukusatenda wuli patusimene ni yakulingwayi? Yili yangasawusya ganisya kuti yindu yeleyi nganiyiŵa yakusakala. Mwachisyasyo, mpaka tutande kuganisya kuti, ‘Atamose ndili ndesile yeleyi nganaŵa andyosisye mumpingo, mwamti nganiyiŵa yakogoya mnope.’ Kaganisye keleka kali kakogoya mnope. Mpaka tutende chenene kuliwusya yiwusyo mpela ayi, ‘Ana Satana akukamulichisya masengo chakulingwa chelechi kuti ndende chakusakala? Naga ngukunda kutenda chakulemwechekachi, ana ngayitendekasya kuti lina lya Yehofa linyosyedwe? Ana yeleyi chiyindendekasye kuti mbe paunasi wambone ni Mlungu, kapena chiyijonanje unasi wangu ni jwalakwe?’  Akusosekwa kuganichisya yiwusyo yeleyi. Aŵendeje lunda kwa Yehofa kuti akombole kwanga yiwusyoyi mwakuwona mtima. (Yak. 1:5) Kutenda yeleyi kuchakamuchisya kuti aŵambale kutenda yindu yakulemwecheka. Soni kuchakamuchisya kuyikana yakulingwa mwamachili mpela mwaŵatendele Yesu pajwaŵechete kuti, “Mtyoche apa, Satana!”—Mat. 4:10.

17. Ligongo chichi kola mtima wagaŵikangana nganikuŵa kwambone? Apeleche chisyasyo.

¹⁷ Kusala yisyene, kola mtima wagaŵikangana nganikuŵa kwambone. Agambe ganisya kuti m’timu ja mpila ŵandu ŵakwe ngakukamulana. Ŵane akwamba kusaka kuti ŵandu ŵalapilile basi, soni ŵane ngakusaka kuputa mpilawo mwakuya malamusi gakwe. Nambosoni ŵajinji ngakumchimbichisya kochi jwawo. Mpaka yiŵe yakusawusya kuti timu jeleji jiwine. Nambo mwakulekangana ni yeleyi, timu jele ŵandu ŵakwe akusakamulana jikusawina mwangasawusya. Mtima wawo mpaka ulandane ni timu jeleji, naga yakusaganisya soni yakusakumbila yikusakamulanaga ni kumtumichila Yehofa. Akumbuchileje kuti Satana akusasaka kuti mtima wawo uŵeje wegaŵikangane. Jwalakwe akusasaka kuti nganisyo syetu soni yatukusakumbila, yiŵeje yakutindana ni yakusasakaga Yehofa. Myoyo, akusosekwa kuwutendekasya mtima wawo kuti uŵe wangagaŵikangana ni chakulinga chakuti amtumichileje Yehofa. (Mat. 22:36-38) Akakunda kuti Satana atendekasye kuti mtima wawo uŵe wagaŵikangana.

18. Mwakamulana ni maloŵe ga pa Mika 4:5, ana asimichisye kutenda chichi?

¹⁸ Am’ŵendeje Yehofa mpela mwaŵatendele Daudi pajwatite, “Ambe mtima wangagaŵikangana kuti nalijogope lina lyawo.” Alinjelinjeje kuti atendeje yindu mwakamulana ni lipopeloli. Lisiku lililyose, alolechesyeje kuti yindu yakusasagula chinga yamwana kapena yekulungwa yikulosya kuti akusachimbichisya mnope lina lyeswela lya Yehofa. Mpela jwa Mboni sya Yehofa, pakutenda yeleyi, chachitendekasya kuti Yehofa akole mbili jambone. (Mis. 27:11) Soni wosopewe tuchikombola kuŵecheta maloŵe mpela gaŵaŵechete Mika kuti, “Tuchijenda m’lina lya Yehofa Mlungu jwetu mpaka kalakala.”—Mik. 4:5, NWT.