“I kare ma watta mo ocako lweny kweda, amako dwane ci acako deye matek. Onongo amito neke woko.”​—Paul.

“Ki gang, onongo akeco oyotoyot adada kadi bed nongo pe atye ki tyen lok ma atir me keco. Onongo aturo kom, toi, ki gin mo keken ma anongo.”​—Marco.

Pol pa wan pe wager calo jo aryo ma kiloko i komgi malo-ni. Kadi bed kit meno, wan ducu wanongo ni tek me jukke kenwa kare mogo. Tye kit man pien walako bal ki bot laco mukwongo Adam. (Rom. 5:12) Jo mogo, calo Paul ki Marco, ginongo ni tek adada me diyo kinigagi. Jo mukene ginongo ni pe yot me juko tam maraco. Gibedo ka lwodo jami ma keligi lworo nyo turo cwinygi. Jo mukene doki ginongo tek me diyo mitigi me timo tim tarwang, mato kongo wa i labyel kweri, nyo tic ki yadi calo jayigi-ni.

Jo ma pe gijuko tamgi, mitigi, nyo ticgi gitwero balo kwogi woko. Ento watwero gwokke ki i pekki magi. Nining? Ki dongo kit me jukke ken. Me konyowa timo meno, kong dong wanyamu lapeny adek magi: (1) Jukke ken obedo ngo? (2) Pingo jukke ken pire tek? (3) Watwero dongo kit man ma tye i kin “nyig ma nyak pi cwiny maleng” nining? (Gal. 5:22, 23) I nge meno, wabinyamo gin ma watwero timo ka i kare mogo jukke ken loyowa woko.

Ngat ma jukke kene pe ye cobo miti maraco ma bino i cwinye. Me ka meno, en jukke ki i loko lok nyo timo jami i yo ma pe yomo cwiny Lubanga.

Yecu onyutiwa gin ma jukke ken kwako. Baibul waco ni: “I kare ma dano guyete en pe oyetogi. I kare ma en oneno can, pe oburo dano; ento omine kene bot ngat ma ngolo kop atir.” (1 Pet. 2:23) Yecu ojukke kene i kare ma lungala gubedo ka ngale ma kigurre i kom yat. (Mat. 27:39-44) Con kong en ogwokke adada i lokke i kare ma lutela dini ma kitgi raco gutemo bite wek ginong bal i lokke. (Mat. 22:15-22) Dok en pud dong oweko lanen maber i kare ma Lujudaya ma gukeco gukwanyo got wek gicelle woko! Me kaka dok iye marac, “Yecu okanne, ci okato woko ki i ot pa Lubanga.”​—Jon 8:57-59.

Tika watwero lubo lanen pa Yecu? Watwero lubone olo. Lakwena Petero ocoyo ni: “Kricito bene yam oneno can piwu, oweko botwu lanen maber me aluba, wek wulub kore.” (1 Pet. 2:21) Kadi bed watye ki roc, watwero lubo lanen pa Yecu me jukke ken macok. Pingo pire tek ni watim meno?

Omyero wajukke kenwa ka wamito ni Jehovah cwinye obed yom i komwa. Kadi bed  dong watiyo pi Jehovah pi kare malac, watwero balo watwa kwede ka pe wajukke kenwa i ticwa nyo lokwa.

Tam kong i kom Moses, ma onongo “mwol makato dano ducu ma onongo yam gitye i wi lobo-ni” i kare meno. (Wel 12:3) I nge kanyo nguru pa Luicrael pi mwaki mapol, i nino mo acel jukke ken oloyo Moses woko. Kiniga omake matek i kare ma dok dano gucako nguru pi can pii. En oloko ki gero bot jo magi kun waco ni: “Dong wuwiny ba, wun lujemo-ni. Wumito ni wan wakel pii nia ki i pata got man piwu?”​—Wel 20:2-11.

Moses pe otwero diyo kinigane. En pe omiyo deyo bot Jehovah macalo Ngat ma omiyo pii man i yo me tango meno. (Jab. 106:32, 33) Macalo adwogine, Jehovah pe oye ni Moses odony i Lobo ma Kiciko Pire. (Wel 20:12) Moses nen calo okoko ange wa i nino tone pingo pe ejukke kene.​—Nwo. 3:23-27.

Pwony ango ma wanongo? Kadi bed dong warii i ada pi mwaki mapol, pe omyero walok labongo woro bot jo ma guwango iwa nyo ma gimito tira. (Ep. 4:32; Kol. 3:12) Tye lok ada ni ka wawoto ki tii, kerowa me diyo cwinywa bene woto ki dok piny. Ento wi opo i kom Moses. Pe wamito ni wabal nying maber ma watye kwede bot Jehovah pien pe wabedo ki kero me jukke kenwa kicel mo. Ento watwero dongo kit ma pire tek man nining?

Leg pi cwiny maleng. Pingo? Pien jukke ken tye i kin nyig ma nyak pi cwiny maleng, dok Jehovah miyo cwiny mere bot jo ma gilege pire. (Luka 11:13) Jehovah miniwa kero ma wamito me jukke ken kun tiyo ki cwiny mere maleng. (Pil. 4:13) En bene twero konyowa me dongo nyig mukene ma nyak pi cwiny maleng calo mar, ma konyowa me dongo kit me jukke ken.​—1 Kor. 13:5.

Gwokke ki i kom gin mo keken ma twero weko pe ijukke keni. Me labolle, gwokke ki kabedo mogo me Intanet kacel ki galowang me tim macilo. (Ep. 5:3, 4) Ki lok ada, omyero wagwokke ki i gin mo keken ma twero bitowa me timo bal. (Car. 22:3; 1 Kor. 6:12) Me labolle, ngat ma tye ki goro me  poto i tim me tarwang oyotoyot myero ogwokke pe me kwano bukke nyo neno vidio ma nyuto lok i kom mit.

Watwero nongo ni lubo tira meno tek. Ento ka waketo tek, Jehovah biminiwa kero ma mitte me jukke kenwa. (2 Pet. 1:5-8) En bikonyowa me doro tamwa, lok ma waloko, ki gin ma watimo. Gin mutimme i kom Paul ki Marco, ma kiloko i komgi con-ni, moko meno. Gin ducu gupwonye me diyo kinigagi. Nen kong labol pa omego mo ma onongo maro keco oyotoyot ka tye ka dwoyo mutoka, dok i kare mogo daa ki ludwo mutoka mukene. En otimo gin ango? En owaco ni: “Alego matek nino ducu. Dok akwano pwony mapatpat i kom jukke ken kun bene amako i wiya tyeng mogo me Baibul ma twero konya. Kadi bed dong atute me timo man pi mwaki mapol, pud anongo ni pire tek adada me cako nino ducu ki miti me bedo ma cwinya opye mot. Dok ka atye ki yub me rwatte ki ngat mo, aa con wek pe arune.”

I kare mogo, jukke ken loyowa woko. Ka meno otimme, lewic twero makowa ma weko wawinyo ni pe wapore me lega bot Jehovah. Ento meno aye kare ma mitte ni waleg matek loyo. Pi meno, leg bot Jehovah cutcut. Kwa kicane, yeny kony ki bote, dok imok tammi pe me nwoyo bal acel-lu. (Jab. 51:9-11) Jehovah pe bicayo lega ma ilego ki cwinyi ducu pi kicane. (Jab. 102:17) Lakwena Jon opoyo wiwa ni remo pa Wod pa Lubanga “lwoko bal ducu woko ki i komwa.” (1 Jon 1:7; 2:1; Jab. 86:5) Wi opo ni Jehovah waco ki luticce ni omyero gutim kica ki luwotgi kare ki kare. Pi meno, watwero bedo ki gen ni en bitimiwa kica.​—Mat. 18:21, 22; Kol. 3:13.

Jehovah cwinye pe obedo yom i kom Moses i kare ma Moses pe ojukke kene i dye tim. Kadi bed kit meno, Jehovah otime kica. Dok Lok pa Lubanga tito ni Moses obedo laco ma lagen ma omyero walub lanenne. (Nwo. 34:10; Ibru 11:24-28) Jehovah pe oye ni Moses odony i Lobo ma Kiciko Pire, ento En biweko Moses bedo i lobo Paradic ki gen me kwo pi naka. Wan bene watwero bedo ki gen meno ka wayelle me dongo kit me jukke ken.​—1 Kor. 9:25.