“Malacongisay kako ato pasadakan a kaka, misaˈicelan ako miˈmec ko liˈel ningra, sapipatayaw sanay kako cingranan itiya.”—Pawlo

“Itini kako i lomaˈ narikayay a maketer, patelas sanay mifahkol to daofng.”—Maker

Cowa ka hatini a pakidem kita alatek, kawra latekay cangoˈotay ko miˈimeray no tamdaw, samanen mirocokay ko tamdaw to raraw ni Atam. (Loma 5:12) Roma tamdaw malecaday ci Pawloan aci Makeran, pasangaray miˈimer to keter no niyah. Roma tamdaw pasangaray miˈimer to harateng no niyah, haharateng sanay to katalawan anca katoledan nangra a demak. O roma tamdaw halilasangay, miselipay to etok, anca patelasay a madadiˈi to tao.

O roma tamdaw cowa pakaˈimer to harateng no niyah, coos no tireng ato waywayan, telocto kaadayayan ko kaˈorip. Ano palahad kita to miˈimeray a ˈicel, cato ko mamahaen ko teloc. Dotoc, milengo kita to tolo salicay: (1) O maanan ko miˈimeray? (2) Hano kalimlaan ko miˈimeray? (3) O miˈimeray masalalomaˈay no ‘minaroˈan no fangcalay saocor,’ sasamaan kita palahad toniya capeling hani? (Kalatiya 5:22, 23) Salikor wa milengoho kita, ano fahal sa malahdaw ko miˈimeray ita, sasamaan ko hademak hani?

Iraay ko miˈimeray ˈicel a tamdaw cowa ka fahfah a dademak, miˈimeray cingra to sowal ato waywayan noniyah, ho ngaˈay pakahemek to Kawas.

Wa ngaˈay kita mikitini i tireng ni Yis mihapinang to samanay ko miˈimeray a tamdaw. Sowal no Fangcalay Cudad: ‘Makapoˈi cingra cowa ka pacoli, taharoray cowa ka patalaw to tamdaw, paiken hananay ko niyah i moecelay ko pisawkit a Tatapangan.’ (1 Pitiro 2:23) Tiya katawaen a likafen no tamdaw ci Yis i pisemseman a hecek i, paihkalay to miˈimeray a ˈicel. (Matay 27:39-44) Iˈayaw, sapaorafaw ko ˈaˈideman no pihakelongan cingranan, masinanotay ko pipacaˈof ningra to salicay nangra. (Matay 22:15-22) O mangolaway a Yutaya tamdaw sapitekolaw tano fokeloh cingraanan, cowa ka picoˈay cingra canranan, ‘milaliway, miliyas to fangcalay sefi’ cingra.—Yohani 8:57-59.

Wa ngaˈay kita malecad ci Yisan ira ko miˈimeray a ˈicel han? Sowal no tarokos ci Pitiro: “Taharorayay ci Kristo pakayni tamowanan, miterek to taˈarawan namo, ho ngaˈay kamo mikelec a mikotod to pasaripaˈan ningra.” (1 Pitiro 2:21) Soˈlin cowa ko mamalecad kita ci Yisaan a malefot, kawra o ngangaˈay kita mikelec a mikotod to pasaripaˈan ningra, misarocod a palahad to miˈimeray. Mihaen to demak hano masakalimlaan hani?

Misaaliay kita to miˈimeray, ngaˈ ngaˈay milifok to pihayda ni Yihofa. Soˈlin halafinayto kita madimadi  matayal saki Kawasan, ano eca piˈimer kita to sasowalen ato waywayan no niyah, o mamalahdaw ko kalawidang Cingranan alatek.

Haratengen ko tinakoan ni Mosi. Itini lintad ningra, cingra ‘mikikakaay ko pisapoener to polong a tamdaw.’ (Saˈosi 12:3) Pinaay poloˈ miheca, padotocay cingra mihadidi to ngaliwngiw no Israil tamdaw. Ikor miliyaway ngaliwngiw ko Israil tamdaw awa ko nanom, tada maketeray ci Mosi itiya, pakidemay ko pirikec cangranan: ‘Kapitengil, kamo o mitowakangay a tamdaw! O nipaciecian namo kami a milongoc saka, pakayni han niyam tonini a ˈongcoy ko pipasadak to nanom a pananom i tamowanan han?’—Saˈosi 20:2-11.

Itini saroero, cowa pakaˈimer ci Mosi to keter. Roma i, midemakay ci Yihofa to kasapaan pananom to Israil tamdaw, kawra cowa panokayen ni Mosi ko kasapaan ci Yihofaan. (ˈOlic 106:32, 33) Telocto, cowa pacomoden ni Yihofa ci Mosi i Mikiˈokan a Pala. (Saˈosi 20:12) Ikorto maedeng makesemay ci Mosi toniya demak alatek.—Limoˈot 3:23-27.

Mananamay ita ko maanan hani? Soˈlin halafinayto kita a midoko to Kawas, ano misaali to sasalofen ko tao ato pakararaw ko tao kitaanan i, cowa ka ngaˈay pasowal to awaay ko ngodo a sowal. (Ifiso 4:32; Kolosay 3:12) Ano matoˈas to kita i, pakayni ka tatiih no tireng malahdaway ko mihadidiay no latekay. Kawra o haharatengen ita ko tinakoan ni Mosi. Cowa ko caciharateng kita pakayni ka lahdaw no miˈimeray to cecay liyad, mapakadito ko madimadiay a ngangan no niyah. Mihaenay, o sasamaan kita a palahad toniya kalimlaan a capeling hani?

Mitolon micangacang to fangcalay saocor. Hano mihaen to demak hani? Samanen o miˈimeray o minaroˈan no fangcalay saocor, hanaca makahiay ci Yihofa pafeli to fangcalay saocor i micangacangay Cingraanan a tamdaw. (Luka 11:13) Pakaynian ni Yihofa i fangcalay saocor a patongal to miˈimeray a ˈicel ita. (Filipi 4:13) Wa ngaˈayho Cingra padama kitaanan palahad to romaroma capeling no fangcalay saocor, tinakoen o olah, o olah wa ngaˈay patongal to miˈimeray ˈicel ita.—1 Korinto 13:5.

Liyasen ko mamilowan to sapiˈimer a ˈicel a demak. Tinakoen, mamisinanot to tatiihay ko lalakaw a wangcan ato lawla a kamok. (Ifiso 5:3, 4) O cecay demak ano mamikayhid kitaanan a mararaw, o tatanektek kita a minaˈay. (Taneng 22:3; 1 Korinto 6:12) Tinakoen, ano  pasangaray ko tamdaw a miˈimer to coos no tireng, sangaˈayay aka minengneng to makakaolahay a cudad ato ika.

Sapitooraw to fafekangay sapaini a midemak cowa ko madoloay alatek, kawra ano mihadak kita to ˈicel, o papadamaen ni Yihofa kita. (2  Pitiro 1:5-8) Wa ngaˈay padama Cingra kitanan miˈimer to harateng ato waywayan no niyah. O masowalay i fafekang ci Pawlo aci Maker mafanaˈayto miˈimer to keter no niyah. Iraayho ko cecay salikaka, parakat cingra to paliding i salakat marariday maketer, malacongisayho to tao. Ikor samanayto ko demak ningra hani? Sanay cingra: “Micangacangay kako to romiˈamiˈad ci Yihofaan. Micekiway kako to pakayniay miˈimeray a lalakaw, miharatengayho to papadama takowanan a sinael. Soˈlin halafinayto kako a misaˈicel, kawra tahanini, ˈayaw no misatapang matayal to papacem patalipaˈelalay to niyah mitafo to rihadayay. Ano matatelek to tao masasoˈaraw i, ranikayay kako a masadak, mihaen cato ka fahfah ko demak.”

Latekay malahdaway ko sapiˈimer a ˈicel ita alatek, ikorto mangodoay ko harateng a mitolon ci Yihofaan. Kawra oha mamitongal a mitolon toniya tatokian. Tangsol a micangacang to sasodod ato sapadama ni Yihofa, misetek to falocoˈ ecato piliyaw a mararaw. (ˈOlic 51:9-11) Soˈliˈlin ko falocoˈ ita micangacang to sasodod no Kawas, cowa ko mamisakahmaw Cingra to satolon ita. (ˈOlic 102:17) Patalipaˈelalay ko tarokos ci Yohani kitanan, o ˈirang ni Yis wa ngaˈay ‘mikorac to kihcod a raraw ita.’ (1 Yohani 1:7; 2:1; ˈOlic 86:5) Ano palimoˈotay ci Yihofa to sikawdan Ningra padadotoc a misodod to tao, wa ngaˈay pakasoˈlin kita to mamihaen ko demak Ningra.—Matay 18:21, 22; Kolosay 3:13.

Itini i kohkoh ci Mosi malahdaway ko miˈimeray to cecay liyad, cowa ka hemek ci Yihofa. Ikor misododan ni Yihofa ci Mosi, itini Fangcalay Cudad somowal to o taˈarawan no pakasoˈlinay falocoˈ cingra. (Limoˈot 34:10; Hipray 11:24-28) Soˈlin cowa pacomoden ni Yihofa ci Mosi i Mikiˈokan a Pala, kawra o papatikol cingra maˈorip i Lakoing, ira ko toki ningra milifok to tahadaˈocay a ˈorip. Ano padadotoc kita palahad to miˈimeray a capeling, wa ngaˈay kita milifok to makapahay hanoikor.—1 Korinto 9:25.