Paul jilatajj akham sänwa: “Primojajj nayamp wal toqtaskäna ukhajja, nayajj kunkat katusaw qʼaptʼayäta. Jiwayañwa munayäta” sasa.

Marco jilatajj akham sarakïnwa: “Utajan kunas colerayakitänwa. Mueblenaksa, wawanakajan anatañanakapsa, kunatï qhanankkäna taqe ukanaksa qʼalwa tukjirïta” sasa.

Inas jiwasajj jupanakjam jan lurkstanti. Ukampis awisajj taqenitakiw colerampi jan atipayasiñajj chʼamakïspa. ¿Kunatsa? Adanan wawanakapjamajj taqeniw pantjasirïtanjja (Rom. 5:12). Kunjamtï Paul jilatatakisa, Marco jilatatakis colerampi jan atipayasiñajj chʼamakïnjja, yaqhanakatakis chʼamarakiwa. Sañäni, yaqhanakajj kun lurañtï ajjsarapki jan ukajj kunatï aynachtʼayki ukanak jan lupʼiñatakiw wal chʼamachasipjje. Yaqhepatakejj qʼañu juchanak lurañ jan munañasa, alcohol jan umañasa, jan drogasiñas wali chʼamawa.

Pensamientonakapampi munañanakapampi apnaqayasirinakasa, jan amuytʼasis kun luririnakasa jan walinakanwa uñjasipjjaspa. ¿Kunas ukar jan purtʼasiñatak yanaptʼistaspa? Munañasampi jan apnaqayasiñwa yateqañasa. Ukatakejj aka kimsa jisktʼanakat yatjjatañäni: 1) ¿Munañapampi jan apnaqayasir jaqejj kunjamasa? 2) ¿Kunatsa munañasampi jan apnaqayasiñajj wali wakiskiri? 3) Munañasampi jan apnaqayasiñajj ‘espíritu santon achupat’ maynïriwa, ukhamajj ¿kunsa munañasampi jan apnaqayasiñatak lursna? (Gál. 5:22, 23). Ukatjja, munañasampi jan apnaqayasiñajj chʼamäki ukhajj kunsa lursna ukwa yatjjataskarakiñäni.

Munañapampi jan apnaqayasir jaqejja, amuytʼasisapuniw kuns luri. Kunatï Diosar chuym ustʼaykaspa ukanak janiw parlkiti ni lurkarakisa.

Munañapampi jan apnaqayasir jaqejj kunjamasa ukjja, Jesusaw sarnaqatapamp uñachtʼayäna. Bibliajj akham siwa: “Arunakampi jiskʼachapjjäna ukhajja, janiw [Jesusajj] pachpa arunakamp kuttʼaykänti. Tʼaqesiskäna ukhasa, jupar tʼaqesiyirinakarojj janiw suytʼasikim sasin siskänti, jan ukasti cheqapar uñjiri Juezaruw confiyäna” sasa (1 Ped. 2:23). Diosan Yoqapajja, mä lawar warkkatatäkäna ukhamarak chuym ustʼayir arunakampi jupa contra parlapkäna ukhajja, munañapampi jan apnaqayasirïtapwa uñachtʼayäna (Mat. 27:39-44). Kunapachatï fariseonakajj ‘arunakapan pantjasiyañ munapkäna’ ukhas uk qhanwa uñachtʼayäna (Mat. 22:15-22). Ukatjja judionakajj wal colerasisin kʼupjañatak qalanak irtasipkäna ukhasa, “Jesusajj imantasjjänwa, templotsa mistjjarakïnwa” janiw jupanakat vengaskänti, ukajj wali yateqaskayawa (Juan 8:57-59).

¿Jiwasajj Jesusat yateqassnati? Jïsa. Apóstol Pedrojj akham sänwa: “Cristow jumanak laykojj tʼaqesïna, [...] jumanakarojj mä uñachtʼäwi jaytapjjtamjja, ukhamat jumanakajj wali amuyumpi kayup arkapjjañamataki” sasa (1 Ped. 2:21).  Pantjasirïkstansa munañasampi jan apnaqayasiñjja, Jesusat yateqasiñatakiw chʼamachassna. ¿Kunatsa uk lurañajj wali wakiskiri?

Jehová Diosar kusisiyañ munstan ukhajja, munañasampejj janiw apnaqayasiñasäkiti. Walja tiempos Diosar jan jitheqtas serviskstanjja, jan amuytʼasis kuns parlsna, luraraksna ukhajj janiw Diosan amigopäjjsnati.

Moisesat parltʼañäni, jupajj “llampʼu chuymani jaqënwa”. Janiw jupjamajj utjkänti (Núm. 12:3). Walja maranakaw israelitanakan quejanakap pacienciampi aguantäna. Ukampis israelitanakajj uma jan utjatapat mayamp quejasipjjäna ukhajja, jupanakatak wal colerasïna, coleramp atipayasisajj jupanakar akham sänwa: “Istʼapjjam Tatitu contra saytʼasir jaqenaka, ¿aka qarqatti uma [apsurapipjjäma]?” sasa (Núm. 20:2-11).

Jehová Diosajj mä milagro toqe israelitanakar uma churkäna ukhajja, Moisesajj coleramp atipayasitapatwa Diosar jan jachʼañchkänti (Sal. 106:32, 33). Ukham luratapatjja, Jehová Diosajj janiw Suma Oraqer mantaykänti (Núm. 20:12). Moisesajj colerampi atipayasitapat jiwañapkamaw arrepentispachäna (Deut. 3:23-27).

¿Kunsa ukajj yatichistu? Walja maranakas Diosar serviskstanjja, khitinakatï colerayapkistu jan ukajj khitinakatï cheqañchatäpjjañapäki ukanakarojj janipuniw jan respetomp parlañasäkiti (Efes. 4:32; Col. 3:12). Cheqas edadanëjjasajj paciencianïñajj chʼamakiwa. Ukampis Moisesat amtañaw yanaptʼistani. Walja maranak Diosar servitasjja, janiw munañasampi atipayasitas layku aptʼasiñ munktanti. Ukhamajj munañasampi jan apnaqayasiñatakejj ¿kunsa lursna?

Jehová Diosarojj espíritu santopwa mayisiñasa. ¿Kunatsa? Munañasampi jan apnaqayasiñajj espíritu santon achup taypinkarakiwa, ukhamasti khitinakatï espíritu santop Diosar mayipki ukanakarojj churiwa (Luc. 11:13). Espíritu santo toqew munañasampi jan apnaqayasiñatak Jehová Diosajj yanaptʼistani (Filip. 4:13). Yamas espíritu santon achup taypinkki uka cualidadanak uñachtʼayañatakiw yanaptʼarakistani. Ukanakat mayajj munasiñawa, ukaw munañasampi jan apnaqayasiñatak yanaptʼistani (1 Cor. 13:5).

Kunanakatï jan wali lurañar apkistaspa ukanakat jitheqtañasawa. Sañäni Internetansa kusistʼañanakansa jan wali lurañanakar  chʼamañchkistu ukanakat jitheqtañasawa (Efes. 5:3, 4). Cheqas kunanakatï jan walinak lurañar apkistaspa taqe ukanakatwa jitheqtañasa (Prov. 22:3; 1 Cor. 6:12). Sañäni, maynitï qʼañu jucha lurañanakar facilak purtʼasir jaqëchi ukhajja, chacha warmi munasiñ toqet parlir libronaksa peliculanaksa jan uñtañatakiw chʼamachasiñapa.

Inas uka ewjjtʼanakarjam lurañajj chʼamakïchispa. Ukampis jiwasatï chʼamachasiñänejja, Jehová Diosaw jan wali munañanakar atipañatak chʼam churistani (2 Ped. 1:5-8). Jupaw jan wali pensamientonakamp jan atipayasiñatak yanaptʼistani. Amuytʼasis parlañatakisa kun lurañatakis Jupaw yanaptʼarakistani. Paul ukat Marco jilatanakat qalltan parlaniwayktan ukanakarojja, Jehová Diosaw colerampi jan atipayasjjañatak yanaptʼäna. Yaqha jilatat parltʼañäni, jupajj auto apnaqkäna ukhajja mayni auto apnaqerinakatakejj wal colerirïna, awisajj toqesiñar kunaw purtʼasirïna. ¿Kunsa cambiañatak lurpachäna? Jupajj akham siwa: “Taqe chuymapuniw Jehová Diosar sapür orasirïta. Munañampi jan apnaqayasiñ toqet parlir qellqatanakwa liytʼarakirïta, kawkïr textonakas yanaptʼitaspäna ukanakwa yatsurïta. Walja maranakaw chʼamachasiskakta, jichhas sapa alwaw coleramp jan atipayasiñ amtampi sartta. Ukatjja, kawkir sarañas utjitu ukhajj tiempompiw sarjjta, ukhamatwa mayninakatak jan colerjjti” sasa.

Awisajj munañasamp atipayassnawa, ukatwa janis Jehová Diosar orasiñatak walëjjsna ukham amuyassna. Ukampisa uka horasaw Diosar jankʼak mayisiñasa. ‘Perdontʼita’ sasaw wal ruwtʼasiñasa, yanaptʼapsa mayisiñasarakiwa, ukatjja uka jucha jan mayamp lurañatakiw chʼamachasiñasa (Sal. 51:9-11). Taqe chuyma mayisiñäni ukhajja, Diosajj istʼistaniwa (Sal. 102:17). Apóstol Juanajja, Jesusan ‘wilapaw taqe juchanakasat qʼomachistu’ sasaw säna (1 Juan 1:7; 2:1; Sal. 86:5). Jehová Diosajj ‘walja kutiw perdonapjjañama’ sasaw sistu, janiw uk armañasäkiti. Ukhamasti Jupajj perdonarakistaniwa, taqe chuymaw ukar confiyañasa (Mat. 18:21, 22; Col. 3:13).

Moisesajj mä ratukis munañapamp atipayaschïnjja, Jehová Diosarojj janiw ukajj gustkänti. Ukampis perdonänwa. Moisesajj Diosar taqe chuym confiyiri jaqënwa sasaw Bibliajj qhanañchi, Moisesat yateqasiñasawa (Deut. 34:10; Heb. 11:24-28). Diosajj janis Moisesar Suma Oraqer mantaykchïnjja, paraison wiñay jakasiñapatakiw jutïrin jaktayani. Munañasampi jan apnaqayasiñatak chʼamachasiskakiñäni ukhajja, jutïrin wiñayaw paraison jakasiñäni (1 Cor. 9:25).