“Nyandôm wem wada a bi suu me sañ, me gwel nye i joo, me kahal ôm nye bikut. Me bé le me nol nye.”​—Paul.

“I ngéda me yé ndap, me mbéna unup, to ba mboñ bé me jam. Me ñôbôs gwom ikété ndap, gwom bi mintuk bi boñge, hiki yom i yé me bisu.”​—Marco.

Bebek le bés d’a boñ bé kiki Paul bo Marco. Ndi ngim mangéda hiki wada wés a yé a bana ndutu i gwel nyemede, inyule Adam a bi lôôs bés béba. (Rôma 5:12) Kiki Paul bo Marco, ngim bôt i mpam bé i gwel bomede. Bape ba njôs mahoñol mabe. Ba nlôôha kon woñi, tole ba nlôôha hoñol mandutu map. Bape ba njôs ngôñ i malal ma nyega, lihiua, tole hibañga.

I bet ba nwas le mahoñol mabe ni ngôñ ibe bi yoña bo, ba ñôbôs niñ yap. Ndi, di nla keñgle mandutu ma. Lelaa? Ibale di gwé hôtnyuu. Inyu bana i lem ini, di timbhe mambadga maa mana: (1) Hôtnyuu we kii? (2) Inyuki i yé nseñ? (3) Lelaa di nla bana i lem ini, i i yé ikété “litam li mbuu”? (Galatia 5:22, 23) I mbus d’a tehe kii di nla boñ ibale di nyimbe le di yé di nimis hôtnyuu ngim mangéda.

Mut a gwé hôtnyuu a ñunup bé hiki ngéda ba nsuu nye. Ndi a mboñ biliya le maboñok mé ni bibuk gwé bi unbaha bañ Djob.

Yésu a bi unda bés kii ba nsébél le hôtnyuu. Bibel i nkal le: “I ngéda ba bé sol nye, a bé timbhe bé sol inyu sol. I ngéda a bé son njonok, a bé han bé mut, ndi a bé ti nyemede i moo ma Nu a nkéés ni telepsép.” (1 Pétrô 2:23) Yésu a bi unda hôtnyuu i ngéda baoo bé ba bé nol nye, ki a yé ikété njiiha. (Matéô 27:39-44) A bi unda ki hôtnyuu i mbuma ñañ i ngéda baéga base ba bi noode tinde nye i pot jam li téé bé. (Matéô 22:15-22) A bi unda ki ndémbél i hôtnyuu ngéda Lôk Yuda i bi bada ngok inyu ôm nye! Iloole a boñ bo béba, “Yésu a [bi] solop, a nyodi mu témpel.”​—Yôhanes 8:57-59.

Baa di nla nigle Yésu? Ñ, di yé le di noode nigle nye. Ñôma Pétrô a tila le: “Kristô a bi son njonok inyu nan, a yigle bé ndémbél le ni odop yaga mu mabal mé.” (1 Pétrô 2:21) To hala kii di yé bikwéha bi bôt, di nla odop mu mabal ma Yésu, inyu nigle hôtnyuu yé. Umbe nseñ di ga kôs?

Inyu lémél Yéhôva, di nlama bana hôtnyuu. To ibale di ngwélél Yéhôva nano a yé ngandak nwii, di nla ôbôs maada més ni nye ibale di nyoñ bé yihe ni bibuk gwés, yak ni maboñok més.

Kiki hihéga, Môsi a “bééna suhulnyuu iloo bôt bobasôna hana ’isi” i ngéda yé. (Ñanga bôt 12:3) A bi hônba njelel i bon ba Lôk Israel nwii ndi nwii, ndi kel yada, a bi nimis hôtnyuu. A bi unbene bo i ngéda ba bi témb ba kahal tjelel inyu jam li malép. A bep pôdôs bo, a kal le: “Emblana ni, a bôt ba ndogop; baa d’a pémhene bé malép munu liaa lini?”​—Ñanga bôt 20:2-11.

Môsi a bi gwel bé nyemede. A bi unda bé litén le Yéhôva nyen a bé boñ le malép ma pam. (Tjémbi 106:32, 33) Inyu hala nyen Yéhôva a bi neebe bé le, a jôp i Hisi hi Likak. (Ñanga bôt 20:12) Ngéda Môsi a bé bebee ni nyemb, i jam li li bi lama tééñga nye ngandak.​—Ndiimba Mbén 3:23-27.

Kii hala a niiga bés? To ibale di yé Mbôgi Yéhôva hala a yé ngandak nwii, di bep bañ pôdôs lôk kéé ngéda i ñunbaha bés, to ngéda di nyéñ kodol bo. (Éfésô 4:32; Kôlôsé 3:12) I yé mbale le, i ngéda di ñun, i bana hôtnyuu i nkahal lédél bés. Ndi di hoñol ndémbél i Môsi. Di yé le di ôbôs nson di nsélél Yéhôva nwii ndi nwii, ndik inyule di nimis hôtnyuu. Kii di nla boñ inyu bana i lem ilam ini?

Bat Yéhôva mbuu mpubi. Inyuki? Inyule hôtnyuu i yé lem yada mu litam li mbuu, ni le ngéda di mbat Yéhôva mbuu wé a nti bés wo. (Lukas 11:13) Ni njel mbuu wé, Yéhôva a nla ti bés ngui i mbéda bés. (Filipi 4:13) A nla yak hôla bés i bana bilem bi litam bi mbuu bipe kiki gwéha, bi bi nhôla bés i bana hôtnyuu.​—1 Korintô 13:5.

Keñgle mam ma nla boñ le u nimis hôtnyuu. Kiki hihéga, keñgle bisit bi internet ni mintuk mi mi ñunda mam mabe. (Éfésô 5:3, 4). Di nlama tjél mam momasôna ma nla tinde bés i boñ béba. (Bingéngén 22:3;  1 Korintô 6:12) Kiki hihéga, ibale mut a njôs ngôñ malal ma nyega, a nlama keñgle bikaat ni gwom gwobisôna bi mpôdôl maada ma bôda ni bôlôm.

Di yé le di bana ndutu i noñ maéba mana. Ndi ibale di mboñ biliya, Yéhôva a ga ti bés ngui i gwel bésbomede. (2 Pétrô 1:5-8) A ga hôla bés i tat mahoñol més, bibuk gwés, ni maboñok més. Paul bo Marco ba di mbôk pôdôl, ba bi pam i boñ hala, ba bi boñ biliya i gwel bomede. Mankéé numpe a bé béna unup i ngéda a bé luk matôa, a nomlak ni baluk matôa bape. Kii i bi hôla nye? “Me bé soohe ngandak hiki kel. Me bi nigil bikaat bi bi bé pôdôl hôtnyuu, me tééda ngandak minlôñ mi Bibel. Tolakii nano a yé ngandak nwii le me mboñ biliya i bana hôtnyuu, hiki kel, ilole me mpam, me mbigda le me nlama gwel memede. Me mboñ ki biliya i hoo nyodi i ndap inyu boñ le me bana bañ mindañ ni baluk matôa bape.”

I nla pam ngim mangéda le di boñ béba. I ngéda hala a mpémél bés, di yé le di wo nyuu i soohe Yéhôva. Ndi ha ngéda i nyen di nlama soohe ngandak. Jon, mu manut ma, soohe Yéhôva. Yemhe nye le a nwéhél we, bat mahôla, boñ ki biliya le u kwo ha bañ i nlélém béba. (Tjémbi 51:11-13) Yéhôva a ga kôm bé we mbus, a ga emble masoohe moñ. (Tjémbi 102:18) Ñôma Yôhanes a mbigdaha bés le matjél ma Man Nyambe “ma mpubus bés inyu bibéba gwobisôna.” (1 Yôhanes 1:7; 2:1; Tjémbi 86:5) Bigda le Yéhôva a niiga bagwélél bé le ba nwéhlak ngéda yosôna. Jon di yé nkwoog nkaa le yak nye a nwéhél bés.​—Matéô 18:21, 22; Kôlôsé 3:13.

Yéhôva a bi unup ngéda Môsi a bi hañ hôtnyuu i ñoñ. Ndi to hala a bi nwéhél nye. Bañga i Djob i mpôdôl yak Môsi kiki ndémbél ikeñi i hémle. (Ndiimba Mbén 34:10; Lôk Héber 11:24-28) Yéhôva a bi neebe bé le Môsi a jôp i Hisi hi Likak, ndi Môsi a ga niñ i Paradis hana ’isi ni botñem i niñ boga. Yak bés di nla kôs bisai bi, ibale di mboñ biliya i bana i lem ilam ini le hôtnyuu.​—1 Korintô 9:25.