“Hea do adong tondongku na mambahen jut rohakku. Pittor hupokkik ma ibana. Naeng hupamate do ibana.”​—Paul.

“Mura do au muruk di jabu. Sipata olo do au muruk holan alani parsoalan na gelleng. Pittor husegai do sude barang na adong di jabu.”​—Marco.

Ra, dang sappe songon si Paul dohot si Marco hita tikki muruk. Alai, sude do hita makkilala sipata maol do lao mangorom diri. Alana hita manean dosa sian si Adam. (Rom 5:12) Adong do halak na maol mangorom diri tikki muruk songon si Paul dohot si Marco. Adong do na maol mangendalihon pikkiranna. Sai torus do dipikkirhon akka na mambahen nasida gabe mabiar jala marmetmet ni roha. Jala adong do muse na maol mangorom diri asa unang mangulahon na rorang, minum alkohol manang mamakke narkoba.

Boi do gabe susa hita molo dang boi taorom pikkiratta, pakkataiotta dohot parniulaotta. Alai boha carana asa unang sappe songon i hita? Ikkon marlatik do hita asa boi mangorom diri. Alani i saonari taulas ma tolu sukkun-sukkun on: (1) Aha do lapatanna mangorom diri? (2) Boasa porlu hita mangorom diri? (3) Ala tarmasuk do parange on “parbue ni tondi parbadia”, boha carana asa boi hita mangorom diri? (Gal. 5:22, 23) Dung i taulas ma aha na ikkon taulahon molo dang marhasil hita mangorom diri.

Halak na mangorom diri dang pittor mangoloi aha na adong di rohana. Diorom ibana do pakkataionna dohot parniulaonna, asa unang mambahen haccit roha ni Debata.

Dipatudu Jesus do songon dia ibana mangorom diri. Didok di Bibel, “Tingki dileai ibana, ndang dibalos ibana mangaleai. Tingki marsitaonon ibana, ndang diancam ibana halak na mambahen sitaonon i. Alai dipasahat do dirina tu Debata na tigor manguhumi.” (1 Ptr. 2:23) Boi do Jesus mangorom dirina tikki dileai akka musuna ibana di hau partinaonan. (Mat. 27:39-44) Andorang so i, boi do ibana mangorom diri tikki dijebak akka pemimpin agama asa makkatahon na sala. (Mat. 22:15-22) Jala boi do ibana mangorom diri tikki muruk halak Jahudi jala didangguri batu tu ibana! Dang olo Jesus mambalos. ‘Martabuni do Jesus jala laho ma ibana sian bagas joro i.’​—Joh. 8:57-59.

Boi do tatiru Jesus? Boi. Didok apostel Paulus, “Kristus pe marsitaonon do alani hamu. Ditadingkon do sitiruon tu hamu asa diihuthon hamu bogas ni patna.” (1 Ptr. 2:21) Nang pe dang sempurna hita, boi do hita maniru Jesus asa mangorom diri. Alai boasa rikkot mangorom diri?

Ikkon boi do hita mangorom diri asa las roha ni Jahowa. Nang pe nungnga leleng hita gabe sisomba Jahowa, boi do gabe sega parale-aleotta  tu Ibana molo dang boi takendalihon pakkataion dohot parniulaotta.

Parrohahon ma pengalaman ni si Musa. Didok Bibel, “[ullambok] do ibana sian saluhut jolma na di atas tano on.” (4 Mus. 12:3) Nungnga marpulu taon ibana sabar mangadopi halak Israel na jugul. Alai di sada tikki hea ma ibana dang boi mangorom dirina. Muruk do ibana tikki marungut-ungut halak Israel ala dang adong aek. Didok ibana do tu nasida, “Bege hamu ma ale angka jolma na tangkang! Tung ingkon sian batu on ma paruaronnami aek di hamu?”​—4 Mus. 20:2-11, Bibel siganup ari.

Dang boi si Musa mangorom diri. Dang dipasangap ibana Jahowa na parohon aek tu nasida. (Ps. 106:32,33) Alani i, dang diloas Jahowa si Musa masuk tu Tano na Dijanjihon. (4 Mus. 20:12) Ra sahat tu na mate pe, manolsoli do si Musa ala dang boi ibana mangorom dirina.​—5 Mus. 3:23-27.

Aha do parsiajaranna tu hita? Manang sadia leleng pe hita nungnga gabe sisomba Jahowa, molo adong halak na mambahen haccit rohatta manang molo adong halak na porlu tapasingot, unang ma tadok hata na so denggan tu nasida. (Eps. 4:32; Kol. 3:12) Tutu, lam matua hita lam maol do asa sabar. Alai taingot ma si Musa. Dang olo hita gabe sega parale-aleotta tu Jahowa saleleng on holan ala so boi hita mangorom diri. Jadi aha do na ikkon taulahon asa boi hita mangorom diritta?

Martangiang ma mangido tondi parbadia. Boasa? Alana mangorom diri tarmasuk do i parbue ni tondi. (Luk. 11:13) Jala dilehon Jahowa do tondi parbadiana tu akka halak na mangido tu Ibana. Marhite tondi parbadiana, dilehon Jahowa do tu hita gogo asa boi mangorom diri. (Plp. 4:13) Boi do muse urupanna hita patuduhon akka parbue ni tondi na asing, songon holong. Boi do on mambahen hita lam mura asa mangorom diri.​—1 Kor. 13:5.

Pasiding ma manang aha pe na mambahen hita lam maol mangorom diri. Misalna, pasiding ma situs web manang hiburan na patuduhon ulaon na rorang. (Eps. 5:3, 4) Jala ikkon tapasiding do manang aha pe na boi mambahen hita tarela-ela lao mangulahon na sala. (Poda 22:3; 1 Kor. 6:12) Contohna, molo mura-mura do sasahalak tarela-ela lao mangulahon seks na so patut, ikkon pasidingonna do bukku  manang film na jotjot patuduhon ulaon sisongon i.

Maol do ra tahilala mangulahon akka cara on. Alai, molo marsitutu hita, lehonon ni Jahowa ma tu hita gogo asa boi mangorom diri. (2 Ptr. 1:5-8) Urupanna do hita asa boi taorom pikkiratta, pakkataiotta, dohot parniulaotta. Songon contoh ni si Paul dohot si Marco na dipaboa nakkin, ujungna marsiajar do nasida asa unang be gabe halak na kasar. Pikkirhon ma muse contoh ni sahalak donganta bawa on. Tikki mamboan mobil ibana, jotjot do ibana muruk jala sappe marbadai dohot supir na asing. Aha do na diulahon ibana? Didok ibana, “Lam jotjot do au martangiang ganup ari. Huparsiajari ma artikel na mangulas taringot mangorom diri. Jala huingot ma akka ayat di Bibel na boi mangurupi au. Ganup manogot sai hupaingot do dirikku asa toktong lambok, jala marsitutu do au mangulahon on saleleng martaon-taon. Jala tibu ma au lao asa unang gabe buru-buru au di pardalanan.”

Sipata, olo do ra dang boi taorom diritta. Tikki masa i, olo do gabe maila hita martangiang tu Jahowa. Alai sasittongna di tikki sisongon i ma hita ikkon unjotjot mangido pangurupion ni Jahowa. Alani i, pittor martangiang ma hamu. Pangido ma asa disalpuhon hasalaanmuna. Pangido ma pangurupionna jala marsitutu ma asa unang mangulahon hasalaan i muse. (Ps. 51:11-13) Unang ma didok rohamu dang ditangihon Jahowa tangiangmuna i. (Ps. 102:18) Ingot ma hata ni apostel Johannes na mandok, “Ias ma hita sian sude dosa bahenon ni mudar ni anakna.” (1 Joh. 1:7; 2:1; Ps. 86:5) Ingot ma dipangido Jahowa do hita asa sai rade manalpuhon hasalaan ni halak na asing. Alani i, pos ma rohatta sai rade do tong Jahowa manalpuhon hasalaanta.​—Mat. 18:21, 22; Kol. 3:13.

Dang lomo roha ni Jahowa tikki dang boi si Musa mangorom dirina di padang belantara. Alai, disalpuhon Jahowa do hasalaanna i. Jala didok do di Bibel, ikkon tatiru do si Musa ala togu haporseaonna. (5 Mus. 34:10; Heb. 11:24-28) Tutu, dang diloas Jahowa si Musa masuk tu Tano na Dijanjihon, alai lao paheheonna do haduan si Musa asa mangolu di Paradeiso salelengna. Boi do dapotta pasu-pasu na sarupa molo marsitutu hita asa toktong mangorom diri.​—1 Kor. 9:25.