“Dihang nag-away mi sa akong ig-agaw, ako siyang gituok. Gusto nako siyang patyon.”​—Paul.

“Sa balay, dali kaayo kong masuko bisag way igong rason. Gub-on nako ang furniture, dulaan, bisan unsa nga akong magunitan.”​—Marco.

Dili tingali ta mohimog ingon niana. Pero usahay, kitang tanan maglisod sa pagpugong sa atong kaugalingon. Ang pangunang hinungdan niini mao ang atong napanunod nga pagkadili-hingpit gikan sa unang tawo, si Adan. (Roma 5:12) Ang uban, sama ni Paul ug Marco, maglisod pagpugong sa ilang kasuko. Naa poy uban nga maglisod pagkontrol sa ilang hunahuna. Pananglitan, magsige silag hunahuna bahin sa mga butang nga makapahadlok nila o makapaluya sa ilang buot. Ang uban sab maglisod sa pagsukol sa tendensiya nga mohimog seksuwal nga imoralidad, mag-abusog alkoholikong ilimnon, o magdroga.

Kon dili pugngan sa usa ang iyang hunahuna, tinguha, ug panggawi, mahimong madaot ang iyang kinabuhi. Pero malikayan nato kana. Sa unsang paagi? Pinaagi sa pagpaningkamot nga magpugong sa kaugalingon. Aron matabangan ta, hisgotan nato ang tulo ka pangutana: (1) Unsa ang pagpugong sa kaugalingon? (2) Nganong importante kini? (3) Sa unsang paagi mabatonan nato kining hiyasa nga usa ka bahin sa “bunga sa espiritu?” (Gal. 5:22, 23) Dayon atong hisgotan kon unsay atong mahimo kon usahay dili ta makapugong sa atong kaugalingon.

Kon ang usa ka tawo dunay pagpugong sa kaugalingon, dili niya patumanan ang iyang gibati. Pugngan niya ang iyang kaugalingon sa pagsulti ug paghimog mga butang nga dili makapalipay sa Diyos.

Gipakita ni Jesus kon unsay buot ipasabot sa pagpugong sa kaugalingon. Ang Bibliya nag-ingon: “Dihang siya giinsulto, wala siya mobalos ug insulto. Dihang siya nag-antos, wala siya manghulga, apan gisalig niya ang iyang kaugalingon sa Usa nga nagahukom sa matarong nga paagi.” (1 Ped. 2:23) Si Jesus nagpugong sa iyang kaugalingon dihang gibiaybiay siya samtang gibitay sa estaka sa pagsakit. (Mat. 27:39-44) Una pa niana, nagpakita siyag talagsaong pagpugong sa kaugalingon dihang gipangutana siya sa mga lider sa relihiyon aron pangitaag sayop. (Mat. 22:15-22) Ug pagkanindot sa iyang gipakitang ehemplo dihang ang nasuko nga mga Hudiyo namunit ug bato aron batoon siya. Imbes mobalos, “si Jesus mitago ug migawas sa templo.”​—Juan 8:57-59.

Masundog ba nato si Jesus? Oo. Si apostol Pedro misulat: “Ang Kristo nag-antos alang kaninyo, nga nagbilin kaninyog sulondan aron sundon ninyo pag-ayo ang iyang mga tunob.” (1 Ped. 2:21) Bisag  dili ta hingpit, makahimo ta sa pagsundog sa ehemplo ni Jesus ug makapakitag pagpugong sa kaugalingon. Nganong importante nga ato nang himoon?

Kinahanglan nga magpugong ta sa kaugalingon aron mapalipay nato si Jehova. Bisag dugay na tang nag-alagad kang Jehova, mahimong madaot ang atong relasyon kaniya kon dili ta magpugong sa atong ginasulti ug ginabuhat.

Konsideraha si Moises, nga “mapainubsanon kaayo labaw kay kang bisan kinsa sa yuta” niadtong panahona. (Num. 12:3) Human sa daghang tuig nga pagpailob sa mga reklamo sa mga Israelinhon, si Moises wala na makapugong. Nasuko siya dihang nangreklamo na pod sila nga kulang ang tubig. Gisultihan niyag sakit ang mga tawo: “Paminaw mong mga rebelyoso! Gusto ba gyod mong magpagawas mig tubig gikan aning dakong bato?”​—Num. 20:2-11.

Wala makontrol ni Moises ang iyang kaugalingon. Wala niya pasidunggi si Jehova sa milagrosong pagtagana ug tubig. (Sal. 106:32, 33) Tungod niana, wala siya pasudla ni Jehova sa Yutang Saad. (Num. 20:12) Posible nga gibasolan kana ni Moises hangtod sa iyang kamatayon.​—Deut. 3:23-27.

Unsay atong makat-onan? Bisag dugay na ta sa kamatuoran, dili gyod ta mosultig sakit niadtong nakapalagot nato o niadtong kinahanglang tul-iron. (Efe. 4:32; Col. 3:12) Tinuod, samtang magkatigulang ta, usahay gamay na tag pasensiya. Pero hinumdomi si Moises. Dili gyod nato gustong madaot ang atong maayong rekord sa pag-alagad tungod sa usa ka higayon nga wala ta makapugong sa kaugalingon. Sa unsang paagi maugmad nato ang pagpugong sa kaugalingon?

Pag-ampo nga hatagan kag balaang espiritu. Ngano? Tungod kay ang pagpugong sa kaugalingon usa ka bahin sa bunga sa espiritu sa Diyos, ug si Jehova mohatag sa iyang espiritu niadtong nangayo niini. (Luc. 11:13) Pinaagi sa balaang espiritu, si Jehova makahatag kanato sa kusog nga atong gikinahanglan. (Filip. 4:13) Matabangan sab ta niya sa pagpalig-on sa ubang bahin sa bunga sa espiritu, sama sa gugma, nga makatabang nato sa pagpakitag pagpugong sa kaugalingon.​—1 Cor. 13:5.

Likayi ang bisan unsa nga makapahuyang sa imong pagpugong sa kaugalingon. Pananglitan, likayi ang mga website ug kalingawan nga nagpasiugdag sayop nga binuhatan. (Efe. 5:3, 4) Sa  pagkatinuod, kinahanglan natong likayan ang bisan unsa nga makatental nato sa paghimog daotan. (Prov. 22:3; 1 Cor. 6:12) Pananglitan, ang usa nga dunay kahuyangan sa seksuwal nga kahugawan modesisyon tingali nga maglikay gyod sa romantikong mga libro ug salida.

Tingali maglisod ta sa pagpadapat niini nga tambag. Pero kon maningkamot ta, hatagan ta ni Jehova ug kusog nga atong gikinahanglan aron makapugong ta. (2 Ped. 1:5-8) Tabangan ta niya sa pagkontrol sa atong hunahuna, sinultihan, ug binuhatan. Ingong pamatuod, si Paul ug Marco nga gihisgotan ganina, nakakat-on sa pagkontrol sa ilang kasuko. Konsideraha sab ang usa ka brader nga pirmeng mawad-ag pailob samtang magdrayb, ug makakita pa ganig away. Unsay iyang gihimo? “Kinasingkasing kong mag-ampo kada adlaw. Gitun-an nako ang mga artikulo bahin sa pagpugong sa kaugalingon ug nagmemorya kog makatabang nga mga teksto. Bisag daghang tuig na kong naningkamot, pahinumdoman gihapon nako ang akong kaugalingon kada buntag sa pagpabiling kalmado. Ug sayo kong molakaw aron di ko magdali.”

Usahay, dili ta makapugong. Dihang mahitabo nâ, maulaw kaayo tang moampo kang Jehova. Pero mao nang panahona nga kinahanglan gyod tang moampo. Busa duola dayon si Jehova. Hangyoa siya nga pasayloon ka, pangayoa ang iyang tabang, ug magmadeterminado nga dili na himoon pag-usab ang maong sayop. (Sal. 51:9-11) Dili balewalaon ni Jehova ang imong kinasingkasing nga pag-ampo nga kaluy-an ka. (Sal. 102:17) Si apostol Juan nagpahinumdom kanato nga ang dugo sa Anak sa Diyos ‘naghinlo kanato gikan sa tanang sala.’ (1 Juan 1:7; 2:1; Sal. 86:5) Hinumdomi nga gisugo ni Jehova ang iyang tawhanong mga alagad nga padayong magpasaylo. Busa makasalig ta nga mao pod nay iyang himoon kanato.​—Mat. 18:21, 22; Col. 3:13.

Si Jehova wala malipay dihang kas-a si Moises wala makapugong sa iyang kaugalingon didto sa kamingawan. Pero, gipasaylo siya ni Jehova. Ug ang Pulong sa Diyos nag-ingon nga si Moises maayo kaayong ehemplo sa pagpakitag pagtuo. (Deut. 34:10; Heb. 11:24-28) Wala pasudla ni Jehova si Moises sa Yutang Saad, pero Iyang papuy-on siya sa paraisong yuta ug hatagag paglaom nga mabuhi sa walay kataposan. Ingon ana sab ang atong paglaom kon padayon natong ugmaron kining importanteng hiyas, ang pagpugong sa kaugalingon.​—1 Cor. 9:25.