“Obu nabire ndi kurwana na muzara wange nkamuniga omwika gwayenda kubura; nkaba ndi kwenda kumwita.”—Paul.

“Omu ka ninkunda kunyiga na hakuba hatariho enshonga eyatuma cabaho. Ninyatagura ebintu byona, nk’ebizaniso, ninga ebi ndi kuba nyine omu ngaro mbyata aha nsi.”—Marco.

Nitubasa kuba tutakahikwagaho embera nk’ezo. Konka twena hariho obwire obu kwerinda kiri kubasa kutugumira. Eco nikibasika ahabw’okuba omuntu w’okubanza Adamu akaturaga ekicumuro. (Rom 5:12) Nka Paul na Marco, abamwe nibabugana ekizibu ekiri kubashaba kwereka omutwarize g’okwerinda. Abandi nikibasa kubagumira kurinda emitekatekere yabo. Ecokureberaho: Nibabasa kuba bari kutura nibatekateka aha bintu ebiri kubatinisa ninga shi ebiri kubamara amani. Abandi bo nikibasa kubagumira kwerinda ebikorwa by’obushambani, ninga kukoresa ebitaburabwonko.

Abatari kubasa kwerinda omu nyehurira zabo, omu bi bari kwetenga, n’omubi bari kukora nibabasa kweyita. Konka nitubasa kwerinda kuhikwaho ako kabi. Tuta shi? Turi kwereka omucwe g’okwerinda. Kugira ngu ebyo tubihikeho tushemerire kwebuza ebi bibuzo bishatu: (1) Okwerinda ni enki? (2) Ahabw’enki kwereka ogo mutwarize kiri kikuru? (3) Ni bata oku turi kubasa kwereka ogo mutwarize nka gumwe omu byana by’omwika? (Gal 5:22, 23) Reka tushwijume eki tushemerire kukora twareba twaza kubura omutwarize g’okwerinda.

Omuntu oyine omutwarize g’okwerinda tari kukora ecamwijamu cona. Ahobwe, omu bi ari kugamba n’omu bi ari kukora byona, nareba yaba biri kuhimbisa Ruhanga.

Yesu akatwereka eki okwerinda kiri kumanyisa. Bibuli negira ngu: ‘Ku yajumirwe, tiyabagarurira, ku yabonabonesibwe, tiyabahayira, kureka akehayo ahari Ogo ocwa emanja z’amazima.’ (1 Pet 2:23) Yesu akagumizamu kwereka omucwe g’okwerinda kuhisya n’obu abangi beye bamuhanikire aha kiti. (Mat 27:39-44) Nambwenu akereka omucwe g’okwerinda obu abebembezi b’amadini babire bari kumubuza ebibuzo byingi kugira ngu bamugeze barebe ku ari kubasa kugamba ebintu bibi. (Mat 22:15-22) Kandi akatuteraho ecokureberaho kirungi obu Abayudaaya babire baza kumutera amabare. Omu mwanya g’okubatwariza kubi, ‘Yesu akabeshereka kandi yashohora omuri hekalu.’—Yoh 8:57-59.

Mbehi tituri kubasa kutoreza ecokureberaho ca Yesu? Buzima nitubasa kukikora. Entumwa Petero akahandika ngu: ‘Kristo akabonabonesibwa aha bwanyu, yabasigira ecokureberaho, ngu mutore omuhanda ogu yarabiremu.’ (1 Pet 2:21) N’obu tutahikirire nitubasa kutoreza ecokureberaho ca Yesu c’okwerinda. Ahabw’enki kwereka ogo mutwarize kiri ec’omugasho?

Kugira ngu Yehova atwikirize tushemerire kugira omutwarize g’okwerinda. N’obu twakuba tumazire obwire buringwa turi kuhereza Yehova omu bwesigwa, nitubasa kuferwa obunywani bwitu na we twaba tutari kwerinda omu bi turi kukora n’omu bi turi kugamba.

Tekateka ahari Musa owabire ‘ari omucurezi, okukira abantu bona ab’omu nsi’ omuri obwo bwire. (Kub 12:3) Bwanyima y’obwire buringwa Musa ari kwehanganira Abaisraeli, izoba rimwe akabura okwerinda. Akanyiga obu bamwetombitire babuzire amizi. Akabagambira kubi ari kugira ngu: ‘Muhurire, imwe bagomi mwe; tubihire amizi omuri oru rukiri?’—Kub 20:2-11.

Mazima Musa akaremwa kwerinda. Akaremwa kuhimbisa Yehova ahabw’eco cokutangaza eki yabire yakora. (Zab 106:32, 33) Eco kikatuma Yehova atamwikiriza kuhika omu ihanga eryaraganisibwe. (Kub 20:12) Mazima Musa akefuza ahabw’okubura okwerinda.—Bir 3:23-27.

Eco nikitwegesa ki? N’obu twakuba tumazire obwire buringwa omu mazima, titushemerire kugambira kubi abari kutuhakanisa ninga shi abari kwetenga empinduka. (Efe 4:32; Kol 3:12) Mazima n’obu twakuba tukuzire hine obu okwehangana kiri kubasa kutugumira. Konka ogume oyijuke eki turi kwegera ahari Musa. Titushemerire kushisha obunywani obu twine na Yehova ahabw’okubura okwerinda. Ni enki eki turi kubasa kukora ngu twereke ogo mutwarize mukuru?

Shaba omwika oguri kwera. Ahabw’enki? Ahabw’okuba okwerinda ni kimwe omu byana by’omwika; kandi Yehova naha omwika oguri kwera abagumushaba. (Luk 11:13) Yehova natuha amani agu turi kwetenga birabire aha mwika oguri kwere. (Fil 4:13) Nambwenu nitubasa kwereka endijo mitwarize y’ebyana by’omwika nka rukundo, ahabw’okuba netuma twayereka omutwarize g’okwerinda.—1 Kor 13:5.

Yerinde ekintu cona ekiri kubasa kukuzibira kugira omutwarize g’okwerinda. Ecokureberaho: Yerinde embuga mbi z’ahari intaneti n’emizano mibi. (Efe 5:3, 4) Mazima, tushemerire kwerinda ekintu cona ekiri kutuma twakora ekibi. (Enf 22:3; 1 Kor 6:12) Ecokureberaho: Omuntu owu kiri kugumira kwerinda ebikorwa  by’obushambani ashemerire kumaririra kwerinda kushoma ebitabo n’okureba vidiyo eziri kubushagika.

Nikibasa kutugumira kuta omu nkora obwo buhabuzi. Konka ku turi kutaho amani, Yehova nayija kutuha amani agu turi kwetenga ngu twerinde. (2 Pet 1:5-8) Nayija kutukwasa kurinda ebitekateko byitu, ebigambo byitu n’ebi turi kukora. Nitwesiga ku Paul na Marco, abu tugambireho omu kutandika bayegire kurinda ekiniga cabo. Nambwenu tekateka ahari mwenetata owabuzire okwerinda avugire emotoka, eco kikatuma atayikirizingana n’abandi. Akakora ki? Akagamba ngu: “Nkaba ninshaba burizoba. Nkashwijuma ekicweka ekiri kugamba aha kwerinda kandi nakwata omu mutwe enyiriri eziri kubasa kunkwasa. N’obu hahwire emyaka myingi nkikozire, na hati buri kasheshe ninyeyijusa ekigendererwa cange c’okuguma nturize. Kandi ningenda kare kugira ngu nyerinde kwiruka.”

Hariho obu turi kuremwa kwereka omutwarize g’okwerinda. Eco ku kiri kubaho nitubasa n’okuremwa kubigambira Yehova omu shara. Konka obwo ni bwo bwire bw’okushaba munonga. Noba oshemerire kuhika Yehova ahonaho birabire omu shara. Mushabe akusasire, akuyambe, kandi akukwase kumaririra kutakora endijo nshobe nk’eyo. (Zab 51:9-11) Otaritekateka ngu Yehova tari kuhurira eshara yawe. (Zab 102:17) Entumwa Yohaana akatwijusa ku eshagama y’Omwana wa Ruhanga ‘eri kutwozyaho ebibi byona.’ (1 Yoh 1:7; 2:1; Zab 86:5) Oyijuke ku Yehova ari kushaba abahereza beye okusasira abandi. Obwe rero twesigire kimwe ku burijo ari kuba ayetegwire kutusasira.—Mat 18:21, 22; Kol 3:13.

Yehova kikamushasha obu Musa yaremirwe kwereka omutwarize g’okwerinda. Konka nabwe, Yehova akamusasira. Kandi Ekigambo ca Ruhanga nikigamba ahari Musa ku yabire ari omushija oyine okwikiriza owu tushemerire kutoreza. (Bir 34:10; Heb 11:24-28) Yehova tarikiririze Musa kutaha omu ihanga eryaraganisibwe, konka nayija kumuha amagara agatahwaho omuri Paradiso omu nsi. Nambwenu twaguma tutire omutima aha magara agatahwaho, nikituma twayereka omutwarize g’okwerinda.—1 Kor 9:25.