Paul ko: “Loon dɔ, n’ balimamuso deen ye n’ darabɔ. An ye kɛlɛ daminɛ ani n’ y’a kaan dɛrɛ. N’ tun b’a fɛ k’a faga.”

Marco ko: “An ka soo, koo fitinin dɔrɔn, n’ tun be dimi. N’ tun mana fɛɛn o fɛɛn sɔrɔ, tulonkɛfɛnw lo wo, sigilan n’a ɲɔgɔnnaw lo wo, n’ tun b’u bɛɛ karikari.”

N’a sɔrɔ an fanba tɛ komi Paul ni Marco. Nka, a ka gwɛlɛ an bɛɛ ma k’an yɛrɛ minɛ tuma dɔw la. O kuun jɔnjɔn ye ko an ye jurumu sɔrɔ cɛɛn ye an faa Adama fɛ (Ɔrɔm. 5:12). I ko Paul ni Marco, dɔw tɛ se u dusu kɔrɔ. A ka gwɛlɛ dɔ wɛrɛw ma ka see sɔrɔ u ka miiriya juguw kan. Koo minw be siranya bila u la wala minw b’u fari faga, u be to ka miiri o la. N’a sɔrɔ a ka gwɛlɛ dɔw ma fana ka kakalayakow nege kɛlɛ, ka ban ka dɔrɔ min kojugu wala ka dɔrɔgi ta.

A ka ɲi an k’an yɛrɛ minɛ koo nunu na: an ka miiriyaw, an negelakow ani an ka kɛwalew. N’o tɛ, o be se k’an ka ɲɛnamaya nagasi. An be se k’an yɛrɛ tanga o ma cogo di? An k’an jija ka kɛ ni yɛrɛminɛli ye. Walisa k’an dɛmɛ k’o kɛ, an ka ɲiningali saba nunu jaabi: 1) Yɛrɛminɛli kɔrɔ ko di? 2) Mun na o jogo kɔrɔtanin lo? 3) Yɛrɛminɛli ye hakili senu deen faan dɔ ye. An be se ka kɛ n’o jogo ye cogo di? (Gal. 5:22, 23). O kɔ, an bena a filɛ an be se ka min kɛ n’an t’an yɛrɛ minɛ tuma dɔw la.

Mɔgɔ min b’a yɛrɛ minɛ, koo o koo be na a kuun na, a tɛ sin k’o kɛ. Nka, a b’a jija walisa a kana don Ala gasi la a ka kumaw n’a ka kɛwalew la.

Yezu y’a yira yɛrɛminɛli kɔrɔ ye min ye. Bibulu b’a fɔ ko: “U tun y’a nɛni tuma min na, a ma sɔn k’u nɛni. U tun b’a tɔɔrɔla tuma min na, a ma kumajugu fɔ u ye. Nga, a y’a ta to Ala ma dɔrɔn, ale min be kiti tigɛ ka tilen.” (1 Piyɛri 2:23). Yezu y’a yɛrɛ minɛ tuma min na a juguw tun b’a lɔgɔbɔra k’a to gwengwenyiri kan (Mat. 27:39-44). Ka kɔn o ɲɛ, diinan kuntigiw tun be fɛɛrɛ ɲinina k’a minɛ n’a yɛrɛ dalakuma ye, nka a y’a yɛrɛ minɛ kosɔbɛ (Mat. 22:15-22). Loon dɔ, Yahutu dɔw dimininba ye kabakuruw cɛ k’u be Yezu bon. Nka, a m’a yɛrɛ mɔnɛ bɔ. “A dogora ka bɔ Alabatosoba kɔnɔ.” O ye ɲɛyirali ɲuman ye yɛrɛminɛli koo la.—Zan 8:57-59.

An be se ka Yezu ladegi wa? An be se, hali n’an tɛ se k’o kɛ cogo dafanin na. Ciden Piyɛri y’a sɛbɛ ko: “Krista fana tɔɔrɔla aw kosɔn. A ye wale yira aw la, aw ka kan k’a [sennɔ] ta.” (1 Piyɛri 2:21). Hali n’an ye dafabaliw ye, an be se ka Yezu ka yɛrɛminɛli ladegi koɲuman. Mun na a kɔrɔtanin lo an k’o kɛ?

An ka ɲi ka kɛ n’o jogo ye walisa k’an koo diya Jehova ye. N’a sɔrɔ an be Jehova sago kɛra kantigiya la kabi wagatijan. Nka, n’an t’an yɛrɛ minɛ an ka kumaw n’an ka kɛwalew la, an be jɛnɲɔgɔnya min kɛra ni Jehova ye, o be se ka nagasi.

Musa ka wagati la, ale lo “tun ye mɔgɔmajiginin ye ka tɛmɛ mɔgɔw bɛɛ kan dugukolo kan.” (Nɔnb. 12:3). Israɛldenw tun be to ka ŋunuŋunu a kɔrɔ. A muɲuna saan caaman kɔnɔ. Nka loon dɔ, a ma se k’a yɛrɛ minɛ. A dimina tuma min na u y’a daminɛ ka ŋunuŋunu kokura sabu jii tun tɛ yen. Musa ye kuma gwɛlɛ fɔ u ma. A ko: “Aw mɔgɔmurutinin nunu, aw ye lamɛnni kɛ. An ka kan ka jii bɔ aw ye farakuru nin le kɔnɔ wa?”—Nɔnb. 20:2-11.

Musa ma se k’a yɛrɛ minɛ. A ma nɔɔrɔ la Jehova kan k’a yira ko Jehova lo ye kabako kɛ ka jii di jama ma (Zab. 106:32, 33). O kama, Jehova m’a to a donna layidu jamana kɔnɔ (Nɔnb. 20:12). A be komi Musa nimisara a ka ɲɛnamaya tɔɔ bɛɛ la sabu a ma se k’a yɛrɛ minɛ.—Deter. 3:23-27.

An be kalan juman lo sɔrɔ o la? Minw b’an dusu gwan wala minw ka kan ni kololi ye, an man ɲi ka kuma jugu fɔ u ma abada. An man ɲi k’o kɛ hali n’an be tiɲɛn sira kan kabi wagatijan (Efɛz. 4:32; Kɔlɔs. 3:12). Tiɲɛn lo ko n’an be kɔrɔla, a ka gwɛlɛ tuma dɔw la ka muɲu. Nka, an k’an hakili to Musa ka koo la. An be ni tɔgɔ ɲuman min ye Jehova ɲɛɛ kɔrɔ, an t’a fɛ abada k’o tiɲɛ sabu an ma se k’an yɛrɛ minɛ koo dɔ la. An be se ka kɛ n’o jogo kɔrɔtaninba ye cogo di?

Hakili senu deli Ala fɛ. Mun na do? Sabu yɛrɛminɛli ye Jehova ka hakili senu deen faan dɔ ye. Ka fara o kan, minw be hakili senu deli a fɛ, a b’o di u ma (Luka 11:13). An mako be fanga min na walisa ka kɛ ni yɛrɛminɛli ye, Jehova be se k’o di an ma hakili senu barika la (Ezayi 40:29). A be se k’an dɛmɛ fana ka kɛ ni hakili senu deen faan tɔɔw ye i n’a fɔ kanuya. Kanuya b’a to a be nɔgɔya an ma ka kɛ ni yɛrɛminɛli ye.—1 Kor. 13:5.

Koo o koo be se k’a to a be gwɛlɛya i ma ka kɛ ni yɛrɛminɛli ye, i mabɔ o la. Ɲɛyirali fɛ, site web ani ɲɛnagwɛko minw be kɛwale juguw yira, i mabɔ u la (Efɛz. 5:3, 4). Koo o  koo be se k’an lasun ka koo jugu kɛ, an k’an mabɔ o la (Talenw 22:3; 1 Kor. 6:12). Ɲɛyirali fɛ, ni kakalayakow nege ka teli ka mɔgɔ dɔ minɛ, n’a sɔrɔ o tigi ka ɲi ka ban pewu filimuw ni gafew la jarabikow be minw kɔnɔ.

Koo minw be se k’a to a be gwɛlɛya an ma ka kɛ ni yɛrɛminɛli ye, n’a sɔrɔ a man nɔgɔ an ma k’an mabɔ u la. Nka, n’an y’an jija kosɔbɛ, an mako be fanga min na walisa k’an yɛrɛ minɛ, Jehova bena o di an ma (2 Piyɛri 1:5-8). A bena an dɛmɛ an k’an yɛrɛ minɛ koo nunu na: an ka miiriyaw, an ka kumaw n’an ka kɛwalew. Paul ni Marco minw kofɔra ka tɛmɛ, olu ka koo b’o lo yira. U sera u dusu kɔrɔ. An ka balimacɛ dɔ ka koo lajɛ. N’a tun be mobili bolila, a tun ka teli ka dimi mobilibolila tɔɔw kɔrɔ. A yɛrɛ tun be sɔsɔli kɛ n’u ye. A ye mun lo kɛ o koo la? A ko: “N’ tun be delili kɛ o koo la kosɔbɛ loon o loon. Barokun minw be kuma yɛrɛminɛli koo la, n’ ye kelenna kan kɛ u kan. Vɛrise minw be se ka n’ dɛmɛ, n’ y’u to n’ hakili la. N’ be jijali kɛra kabi saan caaman walisa ka kɛ ni yɛrɛminɛli ye. O n’a ta bɛɛ loon o loon sɔgɔma, n’ bele b’a to n’ hakili la ko n’ ka ɲi ka banba walisa n’ dusu kana bɔ. Ni n’ ka ɲi ka taga yɔrɔ dɔ, n’ be bɔ joona walisa n’ kana kɔrɔtɔ kojugu.”

An tɛna se k’an yɛrɛ minɛ tuma dɔw la. N’o kɛra, n’a sɔrɔ an bena maloya kojugu ka Jehova deli. Nka, o wagati yɛrɛ lo la an ka ɲi ka delili kɛ kosɔbɛ. O la, sin ka Jehova deli. A ɲini a fɛ a ka yafa i ma ani a k’i dɛmɛ. I jija fana walisa i kana o fili kɛ tugun (Zab. 51:11-13). I be delili min kɛ ni kɔnɔgwɛ ye walisa a ka yafa i ma, a tɛna ban k’o lamɛn (Zab. 102:18). Ciden Zan b’an hakili sigi ko Ala Dencɛ “joli b’an ka hakɛw bɛɛ bɔ an na.” (1 Zan 1:7; 2:1; Zab. 86:5). An kana ɲinɛ ko Jehova b’a fɔ an ye ko an ka to ka yafa ɲɔgɔn ma. O la, an ka la a la ko ale fana bena to ka yafa an ma.—Mat. 18:21, 22; Kɔlɔs. 3:13.

Jehova dusu tiɲɛna tuma min na Musa ma se k’a yɛrɛ minɛ kongokolon kɔnɔ. Nka, a yafara a ma. Bibulu yɛrɛ b’a fɔ ko Musa ye kantigiya kɛ Ala ye kosɔbɛ ani ko an ka ɲi k’a ladegi (Deter. 34:10; Eburuw 11:24-28). Jehova m’a to Musa ka don layidu jamana kɔnɔ. Nka, a bena a to a be ɲɛnamaya kɛ alijɛnɛ kɔnɔ dugukolo kan fɔɔ abada. An fana be se ka kɛ n’o jigiya ye, n’an b’an jija ka kɛ ni yɛrɛminɛli ye, o min ye jogo kɔrɔtaninba ye.—1 Kor. 9:25.