“Whenue hẹnnumẹ ṣie de tẹ́ avùn do na mi, n’finyọ́n vẹ́go-kàn na ẹn bọ gbigbọ glo e. N’jlo na hù i.”—Paul.

“To whégbè, n’nọ wula na numadinu de poun wutu. N’nọ hányán nudepope he alọ ṣie plá, núzinzan họmẹ tọn wẹo kavi aihundanu lẹ.”—Marco.

Mí sọgan nọma nọ yì jẹ obá mọnkọ mẹ. Ṣigba, mímẹpo wẹ e nọ vẹawuna to whedelẹnu nado dava míde. Ehe nọ yinmọ titengbe na mí dugu ayilinlẹn mape tọn sọn sunnu tintan lọ Adam dè wutu. (Lom. 5:12) Taidi Paul po Marco po, e nọ vẹawuna mẹdelẹ taun nado dava homẹgble yetọn. E sọgan nọ vẹawuna mẹdevo lẹ nado dava linlẹn yetọn lẹ. Yé nọ to nulẹnpọn do nuhe nọ dobuna yé lẹ ji kavi linlẹn agọ̀ lẹ nọ saba dotukla yé. Podọ, e sọgan nọ vẹawuna mẹdevo lẹ nado nọavùnte sọta ojlo fẹnnuwiwa zanhẹmẹ tọn, ahàn sinsinyẹn kavi amasin adínọ lẹ ṣiṣizan.

Mẹhe ma nọ dava linlẹn, ojlo po nuyiwa yetọn lẹ po lẹ sọgan hẹn ogbẹ̀ yede tọn gble. Ṣigba, mí sọgan dapana kọdetọn mọnkọ. Gbọnna? Gbọn awuwiwlena mawazẹjlẹgo dali. Nado jẹ yanwle enẹ kọ̀n, mì gbọ mí ni gbadopọnna kanbiọ atọ̀n ehelẹ: (1) Etẹwẹ mawazẹjlẹgo zẹẹmẹdo? (2) Naegbọn e do yin dandan? (3) Nawẹ mí sọgan wleawuna jẹhẹnu ehe he yin adà “sinsẹ́n gbigbọ tọn” de gbọn? (Gal. 5:22, 23) Enẹgodo, mí na gbadopọnna nuhe mílọsu sọgan wà, eyin e wá jọ bọ mí gboawupo nado do mawazẹjlẹgo hia.

Mẹhe yin mawazẹjlẹgonọ ma nọ wà nuhe wá ayiha mẹ na ẹn poun. Kakatimọ, e nọ payi ma nado dọho kavi yinuwa to aliho he na hẹn homẹgble Jiwheyẹwhe mẹ.

Jesu do nuhe mawazẹjlẹgo bẹhẹn hia mí. Biblu dọmọ: “To whenuena yè to zunzun in, ewọ lọsu ma zunmẹ. To whenuena ewọ to yaji, e ma gblọn-adán, ṣigba e ze ede do alọmẹ na Mẹlọ he nọ yí dodo do dawhẹ.” (1 Pita 2:23) Jesu do mawazẹjlẹgo mọnkọ hia to whenue e to yatin ji bọ nukundiọsọmẹtọ etọn lẹ to ṣinṣàn ẹn kò. (Mat. 27:39-44) Ojlẹ de jẹnukọn, e ko duto ede ji to aliho ayidego tọn mẹ to whenue nukọntọ sinsẹ̀n tọn agọjẹdomẹtọ lẹ tẹnpọn nado domọwle e to hodidọ etọn mẹ. (Mat. 22:15-22) Podọ lehe ewọ yinuwa do to whenue Ju he to homẹgble ji delẹ ze zannu lẹ nado dlan do e yin apajlẹ de na mí! Kakati nado yiahọsu, “Jesu whlá ede bo tọ́n sọn tẹmpli lọ mẹ.”—Joh. 8:57-59.

Be mí sọgan hodo apajlẹ Jesu tọn ya? Mí sọgan wàmọ jẹ obá de mẹ. Apọsteli Pita dọmọ: “Klisti lọsu jiya na mì, bo ze apajlẹ de dai na mì, na mì nido hodo afọdòmẹ etọn lẹ pẹkipẹki.” (1 Pita 2:21) Mahopọnna dọ mí yin mapenọ, mí sọgan hodo apajlẹ mawazẹjlẹgo he Jesu dohia tọn pẹkipẹki. Naegbọn e do yin dandan dọ mí ni wàmọ?

Mí dona nọ do mawazẹjlẹgo hia nado mọ nukundagbe Jehovah tọn. Eyin mí tlẹ ko to Jehovah sẹ̀n po nugbonọ-yinyin po na ojlẹ dindẹn, mí sọgan hẹn haṣinṣan mítọn hẹ ewọ gble eyin mí ma nọ payi nuyiwa po hodidọ mítọn lẹ po go.

Lẹnnupọndo Mose he “yin homẹmimiọnnọ hugan to mẹhe tin to aigba nukunmẹ lẹpo mẹ” to ojlẹ etọn mẹ ji. (Sọh. 12:3) To whenue Mose ko doakọnna lewuwu Islaelivi lẹ tọn po homẹfa po na owhe susu godo, e wá yinuwa po wazẹjlẹgo po. E gblehomẹ to whenue yé gọjẹ lewu ji na osin whèdo yé wutu. E wadán do akọta lọ ji dọmọ: “Todin, mì dotoai, mì atẹṣitọ lẹ! Be míwlẹ ni hẹn osin tọ́njẹgbonu na mì sọn osé ehe mẹ wẹ?”—Sọh. 20:2-11.

Mose gboawupo nado duto ede ji. E ma na gigo Mẹlọ he wà azọ́njiawu bọ osin do tọ́njẹgbonu, yèdọ Jehovah. (Salm. 106:32, 33) Taidi kọdetọn de, Jehovah ma na ẹn dotẹnmẹ nado biọ Aigba Pagbe tọn lọ ji. (Sọh. 20:12) Kakajẹ gbeegbe Mose kú, ayihaawe ma tin dọ e vẹna ẹn taun dọ e ma dava homẹgble etọn.—Deut. 3:23-27.

Etẹwẹ ehe plọn mí? Eyin mí tlẹ ko to nugbo lọ mẹ na ojlẹ dindẹn, mí ma dona nọ dọho po mẹmasi po gbede na mẹhe hẹn homẹgble mí kavi do hudo mẹplọnlọ tọn lẹ. (Efe. 4:32; Kol. 3:12) Nugbo wẹ dọ dile owhe mítọn to jijẹ e ji, e sọgan nọ vẹawuna mí to whedelẹnu nado fahomẹ. Amọ́ flin apajlẹ Mose tọn. Mí ma na jlo gbede dọ nuyiwa wazẹjlẹgo tọn nukunwhiwhe kleun de tọn ni hẹn sinsẹ̀nzọn he mí ko wà po nugbonọ-yinyin po na owhe susu lẹ gble. Etẹwẹ mí sọgan wà nado wleawuna jẹhẹnu titengbe enẹ?

Nọ biọ gbigbọ wiwe to odẹ̀ mẹ. Etẹwutu? Na mawazẹjlẹgo yin adà sinsẹ́n gbigbọ Jiwheyẹwhe tọn de, podọ Jehovah nọ na gbigbọ etọn mẹhe to bibiọ ẹ lẹ. (Luku 11:13) Gbọn gbigbọ etọn gblamẹ, Jehovah sọgan na mí huhlọn he mí do hudo etọn. (Flp. 4:13) E sọgan sọ gọalọna mí nado wleawuna adà sinsẹ́n gbigbọ lọ tọn devo lẹ, taidi owanyi, ehe na zọ́n bọ mí na nọ do mawazẹjlẹgo hia dogọ.—1 Kọl. 13:5.

Nọ dapana nudepope he gán dekanpona mawazẹjlẹgo towe. Di apajlẹ, nọla na nọtẹn Intẹnẹt tọn po aihundida he bẹ walọyizan ylankan hẹn lẹ po. (Efe. 5:3, 4) Na nugbo tọn, mí dona dapana nudepope he sọgan sisẹ́ mí nado wà nuylankan. (Howh. 22:3; 1 Kọl. 6:12) Di apajlẹ, e sọgan  biọ dọ mẹhe e nọ vẹawuna nado de ayiha sọn fẹnnuwiwa zanhẹmẹ tọn ji de ni dapana owe po sinima he bẹ nuyiwa owanyi didohia tọn hẹn lẹ po.

Mí sọgan mọdọ e vẹawu nado yí ayinamẹ ehe do yizan mẹ. Ṣigba, eyin mí dovivẹnu, Jehovah na na mí huhlọn he sin hudo mí do nado nọ duto míde ji. (2 Pita 1:5-8) E na gọalọna mí nado nọ dava linlẹn, hodidọ po nuyiwa mítọn lẹ po. Di apajlẹ, Paul po Marco po he yin nùdego jẹnukọn wá plọn nado nọ duto adi zogbe yetọn ji. Sọ lẹnnupọndo mẹmẹsunnu de ji he nọ saba gblehomẹ to whenue e to mọto kùn, bo tlẹ sọ nọ dọjlẹ hẹ mẹlẹ. Etẹwẹ gọalọna ẹn? E dọmọ: “N’nọ hodẹ̀ vivẹvivẹ egbesọegbesọ. N’gbadopọnna hosọ he dọhodo mawazẹjlẹgo ji lẹ bosọ plọn wefọ Biblu tọn he yọ́n-na-yizan lẹ do tamẹ. Dile n’tlẹ ko to ahidi hẹ nuhahun ehe na owhe susu lẹ, e gbẹ́ nọ yin alenu na mi nado bẹ azán dopodopo jẹeji po yanwle lọ po nado dava dee. Podọ, eyin n’jei fide, n’nọ yawu jẹ aliji, ma nado wá to whlẹndo ji.”

To whedelẹnu, mí gán gboawupo nado dava míde. Eyin enẹ jọ, winyan sọgan hù mí nado dọnsẹpọ Jehovah to odẹ̀ mẹ. Ṣigba, ojlẹ enẹ mẹ wẹ mí do hudo dẹ̀hiho tọn te hugan. Enẹwutu, hodẹ̀ hlan Jehovah to afọdopolọji. Vẹvẹna ẹn nado jona we, dín alọgọ etọn bo magbe ma nado sọ jai jẹ nuṣiwa dopolọ mẹ. (Salm. 51:9-11) Jehovah ma na gbẹkọ odẹ̀ ahundopo tọn he a hò nado biọ lẹblanu etọn go. (Salm. 102:17) Apọsteli Johanu flinnu mí dọ ohùn Visunnu Jiwheyẹwhe tọn “nọ klọ́ mí wé sọn ylando lẹpo mẹ.” (1 Joh. 1:7; 2:1; Salm. 86:5) Flindọ Jehovah biọ to devizọnwatọ etọn he to aigba ji lẹ si nado nọ jonamẹ whlasusu. Enẹwutu, mí sọgan kudeji dọ ewọ na wà nudopolọ na mílọsu.—Mat. 18:21, 22; Kol. 3:13.

Homẹ Jehovah tọn ma hùn to whenue Mose gboawupo nado do mawazẹjlẹgo hia to ojlẹ de mẹ to danfafa ji. Etomọṣo, Jehovah jona ẹn. Podọ Ohó Jiwheyẹwhe tọn dọ dọ Mose yin apajlẹ yise tọn ayidego tọn. (Deut. 34:10; Heb. 11:24-28) Jehovah ma dike na Mose nado yì Aigba Pagbe tọn ji, amọ́ E na na ẹn dotẹnmẹ nado biọ Paladisi aigba ji tọn lọ mẹ po todido lọ po nado nọgbẹ̀ kakadoi. Mílọsu sọgan duvivi todido dopolọ tọn eyin mí to vivẹnudo zọnmii nado wleawuna jẹhẹnu titengbe ehe, yèdọ mawazẹjlẹgo.—1 Kọl. 9:25.