Paul wa tja, “Indu omuramwandje tja uta otjirwa kuna ami, mbe mu kambura mosengo ne utu okumusina. Ami ee vanga okumuzepa.”

Marco wa tja, “Ami ponganda mbi pindika tjimanga nandarire kutja kape nepu esemba. Ami mbi teya oviṋa mondjuwo, ovinyandisiwa notjiṋa atjihe tji tja vazewa meke randje.”

Otjingi tjetu kaweṱe ovatwe tjimuna ovihorera vivari mbyo. Posi yokutja povikando tjiva irira ouzeu kweṱe atuhe okukara nomeritjaerero. Iho omena rokutja twa rumata ongaro youvi okuza komundu omutenga, Adam. (Rom. 5:12) Ovandu tjiva tjimuna Paul na Marco, ve kara nouzeu okuritjaera komazenge. Ku tjiva mape ya irira ouzeu okukara nomeritjaerero komeripura wawo. Otjotjihorera, owo ve ripura ohunga noviṋa mbi ve tirisa poo mbi ve wisa momuinyo. Nu ku varwe irira ouzeu okuritjaera korukatuko, okupurukisiwa i yomavinu omazeu poo okuungurisa ovipurukuse.

Imba mbe ha tjaere omeripura, ozonḓero novitjitwa vyawo ve riyetera oveni omihihamo mehupo. Posi yokutja matu yenene okuyepa ouzeu mbwo. Omomuano uṋe? Omokukara nomeritjaerero. Okutuvatera okutjita nao ngatu hungirire komapuriro yetatu nga: (1) Omeritjaerero otjikeṋa? (2) Ongwaye tji yeri omanahepero? (3) Matu yenene vi okukara notjikaṋena hi tji tji ri tjimwe ‘tjovihape vyOmbepo’? (Gal. 5:22, 23) Nu okuzambo matu ka tara kutja matu yenene okutjita vi indu povikando tjiva tji tu hi nomeritjaerero.

Omundu ngu nomeritjaerero ka hakahana okutoora omukambo kotjiṋa ngamwa atjihe. Nungwari u ri tjaera okuhungira, poo okutjita otjiṋa tji ma tji hihamisa Mukuru.

Jesus we tu raisira kutja okukara nomeritjaerero ku kamburira mo ye. Ombeibela i tja: “NEye tja yambururwa ka zirire ko nembo rondjambu; nu tja hihamisiwa ka tandere ko, nungwari wa undjire ku Ndjambi, ingwi omupangure omusemba.” (1 Petr. 2:23) Jesus wa raisa omeritjaerero otja ingo ovanavita na ye tjaave mu nyekerere indu tja ri komuti wondatumisire. (Mat. 27:39-44) Komurungu wa nao eye wa raisa omeritjaerero indu ovanane vozongamburiro tjaave kondjo okumupura omapuriro omengi okutjita kutja ma hungire oviṋa mbi heri vyo. (Mat. 22:15-22) Neye tjiri wa twapo otjihorera otjiwa indu otjimbumba tjOvajuda tji tja toora omawe okumuveta. Pendje nokuyarura mo ongore, “Jesus wa kaṱara na piti mOndjuwo ondjapuke ya Muhona.”—Joh. 8:57-59.

Hapo matu yenene okuhorera kotjihorera tja Jesus? Ii, matu yenene moviṱo tjiva. Omuapostele Petrus wa tjanga kutja, “Kristus omuini tjinga a hihamisirwa eṋe, nu tjinga e mu pa otjihorera kokutja eṋe mu yate mozondambo ze.” (1 Petr. 2:21) Nandarire kutja kaweṱe ohomonena matu yenene okuhorera kotjihorera tja Jesus tjomeritjaerero. Ongwaye tje ri ounanḓengu okutjita nao?

Kutja tu yakurwe i Jehova matu sokukara nomeritjaerero. Nandarire kutja twa karera Jehova oure woruveze orure, mape ya atu pandjara oupanga wetu kuna ye indu tji tu hi nokukara nomeritjaerero moviṋa mbi matu hungire na movitjitwa vyetu.

Ripura na Moses, ngwari ‘omurumendu omurisusuparise tjinene povandu avehe mba ri kombanda yehi’ moruveze ndwo. (Num. 12:3) Oure wozombura ozengi Moses aa puratene komaunaunino wOvaisrael nouretima posi yokutja eyuva rimwe eye wa pandjara omeritjaerero we. Indu tji va unauna rukwao ohunga nouhepe womeva eye wa pindika tjinene. Eye wa hungira nomapindi kuwo na tja: “Arikaneye, purateneye, vanahanḓu oweṋe! Indu matu mu pupisire omeva moruuwa ndwi are?”—Num. 20:2-11.

Moses wa pandjara okukara nomeritjaerero we. Eye ka yandjere ondjozikiro ku Jehova ngwa tjita ovihimise vyokuvepa omeva. (Eps. 106:32, 33) Kunao Jehova kena pe mu yandjera okuhita mehi ekwizikwa. (Num. 20:12) Moses mape ya wa hihamwa omutima okupandjara omeritjaerero oure womuinyo we.—Deut. 3:23-27.

Matu rihongere ko tjike? Nandarire kutja twa kara orure mouatjiri katu sokuhungira nokuhina ondengero ku imba mbu mave tu kurungisa poo imba mbu mave hepa omavyuriro. (Ef. 4:32; Kol. 3:12) Otja tji matu yende ama tu rire ovanene motjiwondo irira ouzeu okukara nomuretima. Posi yokutja ri zemburuka na Moses. Eṱe katu nokuvanga okuzunḓa ongaro yetu ombwa kuna Jehova mena rokuhina okuraisa omeritjaerero. Ovikwaye mbi matu sokutjita kutja tu kare notjikaṋena otjinanḓengu hi?

Ningira ombepo ondjapuke mongumbiro. Omena raye? Mena rokutja omeritjaerero itjimwe tjovihape vyombepo, nu Jehova u yandja ombepo ye ku imba mbu mave mu ningire. (Luk. 11:13) Okupitira mombepo ondjapuke, Jehova meku pe omasa ngu mo hepa kutja u kare nomeritjaerero. (Fil. 4:13) Eye wina meku vatere kutja u kare novihape vyarwe vyombepo tjimuna orusuvero ndu maru ku vatere okukara nomeritjaerero.—1 Kor. 13:5.

Yepa otjiṋa atjihe tji matji ku ngundiparisa okukara nomeritjaerero. Otjotjihorera, kara kokure notungovi nomanyando nge raisa oviṋa  ovivi. (Ef. 5:3, 4) Kombanda yanao, matu sokuyepa oviṋa avihe mbi mavi tjiti kutja tu tjite ouvi. (Omiano 22:3; 1 Kor. 6:12) Otjotjihorera omundu tje nanukirwa okutjita orukatuko ma ri re nawa tje hi nokulesa omambo poo okutarera ozomuvi nḓu maze tunduuza oviṋa mbyo.

Mape ya ari re ouzeu okuungurisa ondunge ndjo. Posi yokutja indu tji twa kondjo nomasa, Jehova me tupe omasa ngu matu hepa okukara nomeritjaerero. (2 Petr. 1:5-8) Eye metu vatere okukara nomeritjaerero momeripura, momambo na movitjitwa vyetu. Paul na Marco, mba tumunwa rukuru ve rihonga okukara nomeritjaerero kongaro yawo youtwe. Tara kotjihorera tjomurumendu omukambure potuingi ngwaa hakahana okuposa ku novahinge varwe. Eye wa tjita ye ohunga notjiṋa ho? “Ami ee kumbu okuza komutima eyuva arihe. Ami mba konḓonona otupa ohunga nomeritjaerero nu ee tjiwa omazeva wOmbeibela ngaa ye ndji vatere. Ami ngamba mbi rizemburukisa omuhuka omunene auhe kutja me sokukara noupore. Nu ami tji mbi nokoṋa ku mbi sokuyenda mbi hinga komurungu woruveze kutja e ha hakahana.”

Povikando tjiva mape ya atu ha kara nomeritjaerero. Indu tji pa kara nao mape ya atu ṱohoni okukumba ku Jehova. Posi yokutja indwo ooruveze ndu matu hepa okukumba nomasa. Kunao, hakahana okukumba ku Jehova. Ningira ondjesiro, paha ombatero, nu rimanena okuhina okutjita ondataiziro ndjo rukwao. (Eps. 51:9-11) O ripura kutja Jehova ke nokupuratena kongumbiro yoye otja indjo. (Eps. 102:17) Omuapostele Johanes u tu zemburukisa kutja ombinḓu yOmuna wa Mukuru “mai tu kohorora komauvi aehe.” (1 Joh. 1:7; 2:1; Eps. 86:5) Zemburuka kutja Jehova u raera ovakarere ve okutja ve isire aruhe. Kunao eṱe tu nongamburiro kutja eye wina metu isire.—Mat. 18:21, 22; Kol. 3:13.

Indu Moses tja pandjara omeritjaerero we mokuti onguza oruveze orusupi Jehova wa hihamwa omutima. Kombanda yaavihe Jehova we mu isira. Nu Embo ra Mukuru rihungira Moses otja ngwari nongamburiro onḓikame. (Deut. 34:10; Hebr. 11:24-28) Jehova kena pa yandjera Moses okuhita mehi ekwizikwa, posi yokutja eye ma ka yandjera Moses okuhupa moparadisa kombanda yehi nga aruhe. Eṱe wina matu ka muna omuinyo waaruhe indu tji matu ungura oukukutu okukara notjikaṋena otjinanḓengu hi, omeritjaerero.—1 Kor. 9:25.