“Lebuh petunggal ngiga laya enggau aku, aku nyau nyekal iya. Aku ka munuh iya.”—Paul.

“Ba rumah aku jampat ringat taja pan nadai kebuah. Aku ngempaska utai ba rumah, utai ayam anak aku, enggau nama-nama aja ke ditemu aku.”—Marco.

Mayuh ari kitai enda mangah baka Paul enggau Marco. Tang bisi maya kitai tusah deka nagang diri. Tu ketegal kitai ngembuan pengingin ti bedosa ari mensia ti keterubah, iya nya Adam. (Rom. 5:12) Baka Paul enggau Marco, sekeda orang tusah deka nagang pengeringat diri. Ke bukai tusah deka nagang runding laban suah berunding ke utai ti ngenakutka tauka utai ke ulih ngelemika sida. Iya ke bukai tusah deka nagang diri ari ngereja ulah seks ti kamah, ngirup ai bisa, tauka salah guna dadah.

Barang sapa ke enda ulih nagang runding, pengingin, sereta ulah, sida deka mai penusah ba diri empu. Tang kitai ulih nyeliahka nya. Baka ni? Kitai ngemansangka kualiti nagang diri. Kena ngereja tu, aram kitai berandauka tiga iti tanya: (1) Nama reti nagang diri? (2) Nama kebuah nya beguna? (3) Baka ni kitai ulih ngemansangka kualiti tu, iya nya siti ari ‘buah roh kudus’? (Gal. 5:22, 23) Udah nya, kitai deka berandauka utai ke ulih digaga enti sema kitai kekadang enda ulih nagang diri.

Orang ke nagang diri enda nitihka ati. Iya enda nyebut tauka ngereja utai ke ngemediska ati Petara.

Jesus teladan ti manah ba ulah nagang diri. Bup Kudus bisi madah: ‘Lebuh iya dikeduan, iya enda malas. Lebuh iya diperinsa, iya enda ngemba orang, tang iya nyerahka diri ngagai Petara ke ngakim ngena pengelurus.’ (1 Pet. 2:23) Maya Jesus dipantang ba tiang perinsa, iya ulih nagang diri lebuh dikeleseka munsuh. (Mat. 27:39-44) Iya mega nagang diri lebuh tuai pengarap nguji deka manjuk iya ngena jaku iya empu. (Mat. 22:15-22) Lalu lebuh sekeda orang Judah deka nuku iya enggau batu, Jesus enda malas tang iya “belalai lalu pansut ari Rumah Sembiang.”—Jhn. 8:57-59.

Ulih kitai neladan Jesus? Ulih. Rasul Peter nulis: ‘Kristus udah mega merinsa ngarika kita, ninggalka siti teladan ke kita, ngambika kita nitihka singkang iya.’ (1 Pet. 2:21) Taja pan enda sempurna, kitai ulih neladan Jesus ba ulah nagang diri. Nama kebuah beguna kitai ngereja nya?

Kitai patut ngembuan kualiti nagang diri ngambika Jehovah lantang ati. Taja pan kitai  udah lama nyembah Jehovah, kitai mega ulih lenyau kaul enggau Iya enti enda ulih nagang diri ba ulah tauka jaku.

Peratika chunto Moses. Maya jeman iya, “nadai orang ke baruh agi ati ari iya di dunya.” (P-pau. 12:3) Betaun-taun Moses enggau sabar mendingka jaku mutap ari orang Israel. Tang bisi sekali, iya enda ulih nagang diri lalu ringat enggau sida. Maya nya sida mutap ketegal ai enda chukup. Enggau kasar Moses nyaut sida: “Pendingka aku diatu, kita ke seruran angkat ngelaban; kati kita ngasuh kami mansutka ai ari batu tu ke kita?”—P-pau. 20:2-11.

Moses enda mujur nagang diri. Iya enda meri mulia ngagai Jehovah ke udah meri ai nengah kereja ajih. (Mas. 106:32, 33) Asil iya, Jehovah enda ngemendarka Moses tama ngagai Menua ti Udah Disemaya. (P-pau. 20:12) Nyentukka pengujung idup iya, Moses tentu nesal ketegal enda ulih nagang diri.—U-dat. 3:23-27.

Nama ulih dipelajarka kitai? Taja pan kitai udah lama ba pemendar, kitai enda patut kasar jaku lebuh orang ngemediska ati kitai tauka lebuh kitai patut meri jaku lalau. (Eps. 4:32; Kol. 3:12) Lebuh kitai mansang tuai sereta enda bepengerai, kekadang kitai tusah deka sabar. Tang kingatka pasal Moses. Kitai enggai kaul ti manah enggau Jehovah rusak ketegal kitai enda ulih nagang diri. Baka ni kitai ulih ngemansangka kualiti tu?

Besampi minta roh kudus. Nama kebuah? Laban kualiti nagang diri nya sebagi ari buah roh kudus Petara lalu Jehovah meri roh kudus Iya ngagai sida ke minta. (Luk. 11:13) Nengah roh kudus, Jehovah meri kitai pengering ngambika ulih nagang diri. (Plp. 4:13) Iya mega nulung kitai ngembuan kualiti ti bukai ari buah roh kudus baka pengerindu, ke ulih nulung kitai senang agi nagang diri.—1 Kor. 13:5.

Seliahka sebarang utai ke ngasuh kitai tusah deka nagang diri. Kitai enda tau enda nyeliah ari sebarang utai ke ngasuh kitai ngereja penyalah. (J-lam. 22:3; 1 Kor. 6:12) Ambika chunto, laman web sereta pemerindang ke mandangka ulah ti salah. (Eps. 5:3, 4) Seiku  orang ke tusah deka nagang diri bekaul enggau ulah seks ti kamah engka patut nyeliahka diri ari macha novel tauka wayang romantik.

Kitai engka tusah deka nitihka jaku lalau tu. Taja pia, enti kitai enggau naka ulih ngereja nya, Jehovah deka meri kitai pengering kena nagang diri ba runding, jaku, sereta ulah. (2 Pet. 1:5-8) Tu ulih dipeda ari Paul enggau Marco ke disebut ba pun artikel. Seduai iya ulih nagang diri lalu enda agi jampat ringat. Perundingka mega seiku menyadi lelaki ke suah ringat lebuh deriba. Iya indah belaya enggau deriba ke bukai. Nama digaga iya? “Aku besampi enggau bebendar ninting hari. Aku macha artikel pasal nagang diri sereta ngingatka ayat Bup Kudus ti ulih nulung aku. Taja pan udah betaun aku ngemansangka kualiti tu, aku suah ngingatka diri patut nagang diri ninting hari. Enti bisi pengawa, aku mupuk tumu agi ngambika enda beguai-guai.”

Bisi maya kitai enda ulih nagang diri. Lebuh nya nyadi, kitai engka malu deka besampi ngagai Jehovah. Tang tu meh maya kitai patut besampi ngagai Iya. Minta Iya ngampun sereta nulung nuan, lalu tetapka juluk ati enda ngereja penyalah nya agi. (Mas. 51:9-11) Jehovah deka ningaka sampi nuan. (Mas. 102:17) Rasul John ngingatka kitai pasal darah Anak Petara ke “nuchi kitai ari semua dosa.” (1 Jhn. 1:7; 2:1; Mas. 86:5) Enti Jehovah ngasuh bala nembiak Iya sedia ngampun pangan diri, kitai ulih andal Iya mega sedia deka ngampunka kitai. —Mat. 18:21, 22; Kol. 3:13.

Lebuh Moses enda ulih nagang pengeringat diri ba menua puang, Jehovah enda lantang ati enggau iya. Taja pia, Jehovah ngampunka iya. Bup Kudus madahka, Moses nya seiku lelaki ke tetap ati ti ulih ditunda kitai. (U-dat. 34:10; Heb. 11:24-28) Taja pan Jehovah enda ngemendarka Moses tama ngagai Menua ti Udah Disemaya, tang Iya deka mai Moses idup ba dunya Paradais lalu bisi peluang idup belama iya. Kitai mega ulih nerima peluang ti sama enti kitai bebendar ngemansangka kualiti nagang diri.—1 Kor. 9:25.