“Idi inapanak ti kasinsinko, binekkelko ken kayatko a patayen.”—Paul.

“Idiay balay, uray nagbassit la a banag, makaungetakon. Agibarsakak iti muebles, ay-ayam, wenno aniaman a maiggamak.”—Marco.

Mabalin a saantayo met a kasta. Ngem no dadduma, marigatantayo amin a mangkontrol iti bagitayo. Natawidtayo ngamin ti tendensiatayo nga agbasol manipud iti umuna a tao a ni Adan. (Roma 5:12) Kas kada Paul ken Marco, marigatan ti dadduma a mangkontrol iti pungtotda. Mabalin a marigatan met ti dadduma a mangkontrol iti panunotda. Sangkapanunotda dagiti pagbutbutnganda wenno masansan a mariribukanda gapu iti negatibo a pampanunotenda. Adda met dagidiay marigatan a mangkontrol iti tarigagayda nga agbartek, agdroga, wenno agaramid iti seksual nga immoralidad.

Mabalin a madadael ti biag dagidiay saan a mangkontrol iti panagpampanunot, tarigagay, ken aramidda. Ngem maliklikantayo dayta. Kasano? Babaen ti panangpatanor iti panagteppel. Tapno maaramidtayo dayta, usigentayo ti tallo a saludsod: (1) Ania ti panagteppel? (2) Apay a napateg dayta? (3) Kasanotayo a mapatanor dayta a kualidad, a maysa nga aspeto ti “bunga ti espiritu”? (Gal. 5:22, 23) Kalpasanna, usigentayo dagiti mabalintayo nga aramiden kadagiti situasion a saantayo a makapagteppel.

Ti managteppel dina pagustuan ti amin a tarigagayna. Imbes ketdi, lapdanna ti bagina nga agsao wenno agaramid iti kagura ti Dios.

Impakita ni Jesus ti kaipapanan ti panagteppel. Kuna ti Biblia: “Idi nain-insulto, saanna a sinubadan iti insulto. Idi agsagsagaba, saan a nagipangta, no di ket intalekna ti bagina iti Daydiay mangukom a sililinteg.” (1 Ped. 2:23) Nagteppel ni Jesus idi pinagang-angawan dagiti bumusbusor bayat a nakalansa iti kayo a pagtutuokan. (Mat. 27:39-44) Sakbay dayta, impakitana ti naisangsangayan a panagteppel idi pinagsaludsodan dagiti lider ti relihion tapno mapagsaoda iti pangtiliwanda kenkuana. (Mat. 22:15-22) Nagsayaat met ti ulidanna idi nagpidut dagiti makapungpungtot a Judio iti bato a panguborda kenkuana! Imbes nga agibales, “naglemmeng ket rimmuar iti templo.”—Juan 8:57-59.

Kabaelantayo kadi a tuladen ti ulidan ni Jesus? Wen, no ikagumaantayo. Insurat ni apostol Pedro: “Nagsagaba a mismo ni Kristo para kadakayo, a nangibati iti ulidan tapno surotenyo a naimbag dagiti addangna.” (1 Ped. 2:21) Uray imperpektotayo, kabaelantayo a suroten a naimbag ti panagteppel nga inyulidan ni Jesus. Apay a masapul nga aramidentayo dayta?

Kasapulantayo ti agteppel tapno magun-odantayo ti pabor ni Jehova. Uray nabayagtayon  nga agserserbi a simamatalek ken Jehova, mabalin a madadael ti pannakigayyemtayo kenkuana no ditay kontrolen ti tigtignay ken panagsasaotayo.

“Ni Moises idi ti kaemmaan iti amin a tao iti rabaw ti daga.” (Num. 12:3) Adu a dekada nga inan-anusan ni Moises dagiti reklamo dagiti Israelita. Ngem maysa nga aldaw, saan a nakapagteppel. Nakapungtot idi nagreklamoda manen gapu ta awan ti danum. Makaung-unget nga imbagana kadagiti tattao: “Dumngegkayo, dakayo a rebelde! Kayatyo kadi nga ikkandakayo iti danum manipud iti daytoy a bato?”—Num. 20:2-11.

Saan a nakontrol ni Moises ti bagina. Dina inted ken Jehova ti dayaw kas ti nangpaadda iti danum babaen ti maysa a milagro. (Sal. 106:32, 33) Gapu iti dayta, saan nga impalubos ni Jehova a makastrek ni Moises iti Naikari a Daga. (Num. 20:12) Posible a nagbabawyan ni Moises inggat’ tungpal biagna ti dina panagteppel.—Deut. 3:23-27.

Ti maadaltayo? Uray nabayagtayon a Saksi, ditay pulos agsao nga awan daydayawna kadagidiay mangsair kadatayo wenno kadagidiay masapul a mailinteg. (Efe. 4:32; Col. 3:12) Agpayso a bayat a lumaklakay ken bumakbakettayo, mabalin a bumassit ti aanusantayo no dadduma. Ngem laglagipentayo ni Moises. Ditay pulos kayat a madadael ti nabayagen a rekord ti matalek a panagserbitayo ken Jehova gapu laeng ta ditay nakapagteppel. Kasanotayo a mapatanor dayta a napateg a kualidad?

Ikararagmo ti nasantuan nga espiritu. Apay? Gapu ta ti panagteppel ket maysa nga aspeto ti bunga ti espiritu ti Dios, ket ipaay ni Jehova ti espirituna kadagidiay agdawdawat kenkuana. (Luc. 11:13) Babaen ti espiritu ni Jehova, maipaayna ti bileg a kasapulantayo. (Fil. 4:13) Matulongannatayo met a mangpatanor iti dadduma pay nga aspeto ti bunga ti espiritu, kas iti ayat, a makatulong kadatayo tapno nalaklakatayo a makapagteppel.—1 Cor. 13:5.

Liklikam ti aniaman a mangpakapuy iti panagteppelmo. Kas pagarigan, liklikam dagiti website ken paglinglingayan a mangitampok kadagiti dakes nga aramid. (Efe. 5:3, 4) Kinapudnona, masapul a liklikantayo ti aniaman a mangsulisog kadatayo nga agaramid iti dakes. (Prov. 22:3; 1 Cor. 6:12) Kas pagarigan, ti maysa a tao nga adda tendensiana nga agaramid iti seksual nga immoralidad masapul nga interamente a  liklikanna dagiti libro ken pelikula maipapan iti romansa.

Mabalin a marigatantayo a mangsurot iti dayta a balakad. Ngem no agreggettayo, ikkannatayo ni Jehova iti bileg a kasapulantayo tapno makontroltayo ti bagitayo. (2 Ped. 1:5-8) Tulongannatayo a mangkontrol iti panagpampanunot, panagsasao, ken ar-aramidtayo. Kas pammaneknek, nasursuro da Paul ken Marco, a nadakamaten, a kontrolen ti kinamanagpungpungtotda. Usigentayo met ti maysa a kabsat a masansan a pumudot ti ulona bayat nga agmanmaneho nga uray la makiapa. Ania ti inaramidna? Imbagana: “Sipapasnek nga agkarkararagak iti inaldaw. Ad-adalek dagiti artikulo maipapan iti panagteppel ken ikabkabesak dagiti makatulong a teksto iti Biblia. Uray adun a tawen nga ar-aramidek dayta, makatulong latta no kada agsapa, palagipak ti bagik nga agbalinak a kalmado. No adda papanak, nasapaak met a pumanaw tapno saanak nga agap-apura.”

No dadduma, ditay makapagteppel. No mapasamak dayta, mabalin a mabaintay unayen nga agkararag ken Jehova. Ngem dagita a gundaway nga ad-adda a kasapulantayo ti agkararag. Isu nga agkararagka a dagus ken Jehova. Ipakaasim a pakawanennaka, tulongannaka, ken pagreggetam a saanen a maulit dayta a kamali. (Sal. 51:9-11) Dimo panunoten a saan a denggen ni Jehova ti napasnek a panagpakaasim. (Sal. 102:17) Ipalagip kadatayo ni apostol Juan a ti dara ti Anak ti Dios “ti mangdalus kadatayo iti amin a basol.” (1 Juan 1:7; 2:1; Sal. 86:5) Laglagipem nga ibagbaga ni Jehova kadagiti adipenna a kanayonda koma a mangpakawan, isu a masiguradotayo a kasta met ti aramidenna kadatayo.—Mat. 18:21, 22; Col. 3:13.

Saan a naragsakan ni Jehova idi saan a nakapagteppel ni Moises idiay let-ang. Ngem pinakawan ni Jehova ket imbaga ti Sao ti Dios a ni Moises ket nagsayaat nga ulidan ti kinamatalek. (Deut. 34:10; Heb. 11:24-28) Saan nga impalubos ni Jehova a makastrek ni Moises iti Naikari a Daga, ngem adda namnamana nga agbiagto nga agnanayon iti Paraiso a daga. Maaddaantayo met iti kasta a namnama no kanayon nga ikagumaantayo a patanoren ti napateg a kualidad a panagteppel.—1 Cor. 9:25.