“Kantu nha primu kumesa ta diskuti ku mi, N pega-l na piskós i N tenta foga-l. N krê mataba el.” — Polu.

“Na kaza, N ta xatiaba pa kalker kuza. N ta kebraba mobília, brinkedu ô kalker otu kuza ki N atxaba na nha frenti.” — Markus.

Nu pode ka txiga di faze kes kuza la. Má nos tudu, nu sabe ma alvês é difísil kontrola nos kabésa. Kel motivu prinsipal é pamodi nu erda pekadu di kel primeru ómi Adon. (Rom. 5:12) Sima Polu ku Markus, pa alguns algen é difísil kontrola ses raiba. Otus algen talvês ta atxa difísil kontrola kuzê ki es ta pensa. Es ta dexa medu toma kónta di es ô es ta pensa na kuza ki ta dizanima-s. Inda ten otus ki ta atxa difísil kontrola ses vontadi di faze konportamentu seksual mariadu, bebe dimás ô uza dróga.

Kes algen ki ka ta kontrola ses pensamentu, ses dizeju i kuza ki es ta faze, es pode kaba ku ses vida. Má nu pode ivita pa kel-li ka kontise. Modi? Nu ten ki dizenvolve kapasidadi di kontrola nos kabésa. Pa djuda-nu ten es kualidadi, kel artigu li ta ben responde três pergunta: (1) Kuzê ki siginifika kontrola nos kabésa? (2) Pamodi ki el é inportanti? (3) Modi ki nu pode ten es kualidadi ki ta faze párti di ‘frutu di spritu’? (Gál. 5:22, 23) Dipôs, nu sta ben odja kuzê ki nu pode faze si alvês nu ka konsigi kontrola nos kabésa.

Un algen ki ta kontrola se kabésa ka ta aji sen pensa. Má, el ta kontrola pa el ka fla ô faze kuzas ki Jeová ka gosta.

Jizus mostra-nu kuzê ki nu meste faze pa nu kontrola nos kabésa. Bíblia ta fla: ‘Kantu es ta insultaba el, el ka ta insultaba tanbê. Kantu el staba ta sufri, el ka ta amiasaba, má el ta ntregaba se kabésa na mô di Kel ki ta julga ku justisa.’ (1 Ped. 2:23) Jizus kontrola se kabésa di kel manera la kantu se inimigus faze-l trósa na staka di tortura. (Mat. 27:39-44) Antis di kel-li, tanbê el mostra ma el ta kontrolaba se kabésa dretu, kantu kes xéfi di relijion faze-l txeu pergunta pa tenta pô-l ta fla algun kuza mariadu. (Mat. 22:15-22) I el dexa un grandi izénplu kantu alguns judeu xatiadu panha pédra pa da-l ku el. Envês di diskonta, ‘Jizus sukundi i el sai di ténplu.’ — João 8:57-59.

Nu ta konsigi imita izénplu di Jizus? Sin, nu ta konsigi ti un limiti. Apóstlu Pedru skrebe: ‘Kristu sufri pa nhos, el dexa nhos un izénplu pa nhos sigi se pasus di manera fiel.’ (1 Ped. 2:21, nóta di rodapé) Anos é inperfetu, má nu pode sigi di pértu izénplu di Jizus i kontrola nos kabésa. Pamodi ki é inportanti nu ten kel kualidadi li?

Nu meste kontrola nos kabésa pa nu pode agrada Jeová. Sikrê dja nu ten txeu ténpu ta sirbi Jeová di manera fiel, nu pode perde nos amizadi ku el, si nu ka kontrola kel ki nu ta fla ô ki nu ta faze.

Odja izénplu di Muizés. Na se ténpu, el ‘éra di lonji kel ómi más mansu na meiu di tudu ómi na Téra.’ (Núm. 12:3) Dipôs di txeu ténpu ta aguenta ku paxénxa kexa di kes israelita, Muizés ka konsigi kontrola se kabésa. El fika xatiadu kantu povu torna reklama pamodi falta di agu. Ku raiba, el fla povu: ‘Nhos obi rebéldis! Nhos krê pa nu tra agu di es rótxa pa nhos?’ — Núm. 20:2-11.

Muizés ka konsigi kontrola se kabésa. El ka fla ma éra Jeová ki poi agu ta sai di rótxa através di un milagri. (Sal. 106:32, 33) Pur isu, Jeová ka dexa-l entra na kel téra ki el prometeba es. (Núm. 20:12) Talvês ti dia ki el móre, Muizés rapende pamodi el ka kontrola se kabésa na kel situason. — Deut. 3:23-27.

Kuzê ki nu ta prende? Sikrê dja nu ten txeu ténpu ta sirbi Jeová, nunka nu ka debe pâpia sen ruspetu ku un algen ki xatia-nu ô ki meste pa nu da-l un konsedju. (Efé. 4:32; Col. 3:12) É verdadi ki sima nu ta ba ta fika más bédju, alvês é difísil ten paxénxa. Má lenbra di Muizés. Nu ka krê straga nos bon nómi dianti di Jeová, sô pamodi nu ka konsigi kontrola nos kabésa na algun situason. Modi ki nu pode ten es kualidadi rei di inportanti?

Pidi spritu santu na orason. Pamodi? Pamodi kapasidadi di kontrola nos kabésa ta faze párti di frutu di spritu santu di Deus. I Jeová ta da se spritu pa kes algen ki pidi-l. (Luc. 11:13) Através di se spritu, Jeová pode da-nu kel forsa ki nu meste. (Fil. 4:13) Tanbê, el pode djuda-nu ten kes otu kualidadi ki ta faze párti di frutu di spritu, sima amor, ki pode djuda-nu kontrola nos kabésa. — 1 Cor. 13:5.

Ivita kalker kuza ki pode bira más difísil bu kontrola bu kabésa. Pur izénplu, fika lonji di kes site i diverson ki ta mostra konportamentu mariadu. (Efé. 5:3, 4) Na verdadi, nu meste ivita kalker kuza ki ta pô-nu ku vontadi di faze kuzas mariadu. (Pro. 22:3; 1 Cor. 6:12) Pur izénplu, si un algen sabe ma el ten tendénsia di faze konportamentu  seksual mariadu, el meste ivita kalker tipu di livrus i filmis romántiku.

Pode ser difísil sigi kel konsedju li. Má, si nu faze sforsu, Jeová ta da-nu forsa ki nu meste pa nu kontrola nos kabésa. (2 Ped. 1:5-8) El ta djuda-nu kontrola kes kuza ki nu ta pensa, ki nu ta pâpia i ki nu ta faze. Un próva di kel-li é Polu ku Marku, ki dja nu papiaba di es antis. Es prende kontrola ses manera di ser violéntu. Tanbê, odja izénplu di un irmon ki txeu bês ta fikaba xatiadu ku otus kondutor óras ki el ta konduziba, i ti el ta diskutiba ku es. Kuzê ki el faze pa el kontrola se kabésa? El fla: “N ta fazeba txeu orason tudu dia. N studa artigus ki ta papiaba sobri modi ki nu ta kontrola nos kabésa i N dikora alguns versíklu di Bíblia ki djuda-m. Mésmu ki dja pasa alguns anu ki N sta ta sforsa pa N midjora, tudu dia di palmanhan N ta lenbra nha kabésa ma N krê fika kalmu. I óras ki N ten un konpromisu, N ta sai di kaza más sédu. Asi N ta ivita fika xatiadu na tránzitu.”

Alvês nu pode ka konsigi kontrola nos kabésa. Óras ki kel-li kontise, talvês bu ta xinti txeu vergónha di faze orason pa Jeová. Má, é na kel óra la ki bu meste faze orason más txeu. Pur isu, faze orason pa Jeová lógu. Pidi-l pa el purdua-u, pa el djuda-u i sta disididu na ka faze mésmu éru. (Sal. 51:9-11) Ka bu pensa ma Jeová ka ta obi orason ki bu ta faze di korason pa el purdua-u. (Sal. 102:17) Apóstlu Juan ta lenbra-nu ma sangi di Fidju di Deus ta ‘linpa-nu di tudu pekadu.’ (1 João 1:7; 2:1; Sal. 86:5) Tanbê lenbra ma Jeová ta fla-nu pa nu púrdua kunpanheru sénpri. Si nu faze si, nu pode ten sertéza ma el ta faze mésmu kuza pa nos. — Mat. 18:21, 22; Col. 3:13.

Jeová fika tristi kantu Muizés ka kontrola se kabésa, na kel situason ki kontise na dizértu. Má simé, Jeová purdua-l. I Palavra di Deus ta fla ma Muizés é un di kes grandi izénplu di fé. (Deut. 34:10; Heb. 11:24-28) Jeová ka dexa Muizés entra na kel Téra ki el prometeba es. Má, el ta fika kontenti di ben resebe-l na Paraízu na Téra i da-l xansi di vive pa tudu ténpu. Tanbê, nu pode ten kel mésmu speransa si nu kontinua ta sforsa pa mostra kel kualidadi txeu inportanti ki é kontrola nos kabésa. — 1 Cor. 9:25.