“Mu ntangu mpangi’ani (cousin) kabatika mu kunwanisa, namufieta ha laka. Wabâ nani namuhonda.”​—Paul.

“Ku nzo mbo ndieri vulu bakaka nkesi, ntangu zakaka misamu mi ndieri bakila nkesi mia fioti kwa mieri. Mbo ndieri mwangasaka bima bia mu nzo ntiana buffet, jouet peleko tima ni tima tieri nani ha koko.”​—Marco.

Beto bansoni ka twena na miangu ko ntiana bifwani bio bia biole bi tuzonzele. Kâ, musamu wa mpasi wubâka kwe beto bansoni mu tizabirilaka. Tala ti misamu ni bo miena, ni mu bungu ti masumu ma Adame bakala dia ntete tabiarila. (Rom. 5:12) Bantu bakaka, ntiana Paul na Marco, mbo bamonaka wo musamu wa mpasi mu zabirila bifu biawu. Kwe bantu bakaka, kampe mbo wuvulu bâka musamu wa mpasi mu zabirila mabanza mawu. Mu tifwani, mbo batatamanaka mu banza misamu mi batâka bunkuta, peleko mabanza ma mbi mabazungasaka mutu. Bakaka mpe bê kô, kampe mbo bamonaka wo musamu wa mpasi mu telamana bunsuza, nwa kwa malavu mamingi, peleko nwa kwa bima bia ngolo.

Bô balembo zabirilaka mabanza mawu, nsatu zawu na nsalulu zawu balendi bebesa luzingu lwawu. Kâ tulendi sa keba mu lembo bwa mu mutambu wo. Ngano bwe? Tala ti tudingiri mu bâ na tifu tia tiyimina. Tazonzela biyuvu bitatu bitubakisa mu bâ na tifu tio: (1) Ngano tifu tia tiyimina ni nti? (2) Mu bungu dia nti tie mfunu? (3) Bwe tulendi sa mu bâ na tifu tio tie timosi tia bifu bia “mbutu ya mpeve”? (Nga. 5:22, 23) Ha manima, mbo tuzonzela bwe tulendi sa beto beni tala ti ntangu zakaka ka tubâka na tifu tia tiyimina ko.

Muntu wo we na tifu tia tiyimina, ntangu zazansoni ka sarilaka tita ko. Kâ, mbo katînaka mu zonza peleko mu yirika misamu mu mpila yilembo tâka Nzambi nsayi.

Yezu watusongela nsansa ya tifu tia tiyimina. Bibila mbo ditâka ti: ‘Yandi walembo tuka, bu beri mu tukaka. Wakorele mpasi, yandi kanîngi (kana); kâ watiyekole kwe Yandi fundisaka na buderede.’ (1 Pi. 2:23) Yezu wasarila tifu tia tiyimina mu ntangu mbeni zandi zeri mu seheselaka bu keri ha poto dia matimuna. (Mat. 27:39-44) Watoko sarila tifu tia tiyimina mu ntangu mfumu za mabundu zeri mu yulaka biyuvu biabingi ngatu bamubaka mu zonzolo’andi. (Mat. 22:15-22) Mpe ntia mpila tifwani kahana mu ntangu Bayuda bakaka beri mu nkesi batota matari mpe bamuzukumuna mo! Kani kakarisa, ‘Yezu waziezoka, waduka mu tempelo.’​—Za 8:57-59.

Ngano tulendi landa tifwani tia Yezu? Mbo tulenda tala ti tusariri ngolo. Ntumwa Piere watsoneka: ‘Kristo wamwisu mpasi, mu bungu dia beno, walusisiri mpe [tifwani ti lulanda].’ (1 Pi. 2:21) Ni bu sa ti bantu ba masumu twena, tulendi tomo landa tifwani tia Yezu mu musamu  wutariri tifu tia tiyimina. Mu bungu dia nti we mfunu tasarila bo?

Tufweti bâ na tifu tia tiyimina tala ti tuzololo Yehova katutambula. Ni bu sa ti tuka ntama tusarilaka Yehova na kwikama kwakwansoni, tulendi hombesa tindiku tieto na Yandi tala ti ka tusiri’â keba ko mu misamu mi tuyirikaka na mi tutâka.

Banza’eti Mose weri “wa kuluka yôka bantu babansoni ha mutoto” ba mbandu’andi. (Lut. 12:3) Tuka mvula zazingi, Mose mbo keri wâka maniongo ma bala ba Israele na luvivululu lwalwansoni. Kâ, lumbu timosi wakondo tifu tia tiyimina. Wabaka nkesi mu ntangu bala ba Israele bavutu dirila mamba. Na nkesi zazansoni watâ: “Wêno, beno lwe na bukolo! Ngano tufweti lu dukisila mamba mu tari di?”​—Lut. 20:2-11.

Mose walembana mu tiyimina. Ka hana mukembo kwe Yehova ko Yandi wamuhana bweso bwa sa timangu ti kadukisila mamba. (Mik. 106:32, 33) Ndandu ni ye? Yehova ka mu hana nzila ko mu kota ku Mutoto wa kani. (Lut. 20:12) Tuka buna tii ku kafwila, Mose watomo nionga mu bungu dia kondo kwa tifu tia tiyimina.​—Lub. 3:23-27.

Ntia malongi tulendi baka? Ni bu sa ti mu nzila ya matieleka tudiatilaka tuka ntama, kani kabwe ka tufweti’â tazonzaka na kondo kwa buzitu ko kwe bô batufwemesaka peleko kwe bantu ba bafweti sungika. (Efz. 4:32; Kol. 3:12) Wa matieleka, bu tununaka, mbo wuvulu bâka musamu wa mpasi mu vivirilaka. Kâ bambuka tifwani tia Mose. Kani kabwe ka tufweti’â tabebesa tindiku tieto na Yehova ko mu bungu ti ka tusongele’â tifu tia tiyimina ko. Kâ, bwe tulendi sa mu bâ na tifu tio tia mfunu?

Sambila mu baka mpeve santu. Mu bungu dia nti? Mu bungu ti tifu tia tiyimina timosi tia bifu bia mbutu ya mpeve tiena, mpe Yehova mbo kahanaka mpeve’andi kwe bô bamulombaka yo. (Like 11:13) Mu nzila ya mpeve’andi, Yehova lendi tu hana ngolo ze neto nsatu. (Flp. 4:13) Lendi tu bakisa mpe mu sarila bifu bio biakaka bia mbutu ya mpeve, ntiana luzolo, bisa ti ka wubândi musamu wa mpasi kwe beto mu bâ na tifu tia tiyimina.​—1 Kor. 13:5.

Losa bima biabiansoni bisa ti wabâ musamu wa nguria mpasi mu sarila tifu tia tiyimina. Mu tifwani, losa site za internet na nsaka za mbi. (Efz. 5:3, 4) Wa matieleka, tufweti losa bima biabiansoni bitutuma mu yirika misamu  mia mbi. (Bin. 22:3; 1 Kor. 6:12) Mu tifwani, muntu we na mabanza ma bunsuza, fweti losa mabuku na video zizonzelaka misamu mihanaka bantu nsatu za vukasa nitu.

Tulendi wa mona musamu wa mpasi mu sarila malongi mo. Kâ, tamana sarila ngolo, Yehova mbo katuhana ngolo zifwanakane ngatu tasarila tifu tia tiyimina. (2 Pi. 1:5-8) Mbo katubakisa mu zabirila mabanza meto, nzonzolo’eto na ndiatulu’eto. Nti bilendi tu hana lukwikulu lo? Paul na Marco batuzonzele ku mbatukulu, balongoka mu zabirilaka miangu miawu. Tazonzela mpe mpangi yimosi yeri lembo vulu tiyiminaka bu keri nataka kaminio, mbo keri bakanaka na binati bia kaminio biakaka. Ngano nti kasa mu bungu dia musamu wo? Têle ti: “Bilumbu biabiansoni, mbo ndieri tomo sambilaka. Mbo ndieri longokaka mikanda mitariri tifu tia tiyimina mpe nayizi Iongoka verse za Bibila zi nafweti bambukila. Ni bu sa ti mvula zazingi zafwanakana mu bâ na tifu tio, pari batêle pari mbo ndieri bambukaka kani diani dia bâ wa dzuna. Mpe mbo ndieri katukaka ku nzo mu pari ngatu nalembo yirika misamu mu ntinu.”

Ntangu zakaka, beto bansoni mbo tulembanaka mu sarila tifu tia tiyimina. Bu wutulaka, tulendi lembana mu sambila Yehova. Kâ, yina ni ntangu yifwanakane mu sambila Yehova ngatu katubakisa. Kulu sambila Yehova mu ntangu yo. Mu lomba mulemvo, lomba lubakusu lwandi, mpe bonga nzengolo ya lembo vutu kârila. (Mik. 51:9-11) Kubanzandi ti Yehova ka wâ lusambulu lwaku lwa bunsungu ko lulombela mulemvo. (Mik. 102:17) Ntumwa Za watubambula ti menga ma Mwana Nzambi ‘matukusuna masumu mamakulu.’ (1 Za 1:7; 2:1; Mik. 86:5) Bambuka ti Yehova walomba kwe bantu bê bisari biandi balemvokelaka mbala zazingi. Ntiangu tulendi bâ na lukwikulu ti mbo katulemvokela mpe.​—Mat. 18:21, 22; Kol. 3:13.

Yehova nsayi ka yamubaka ko mu ntangu Mose kalembo sarila tifu tia tiyimina ku masese (désert). Kâ, Yehova wamulemvokela. Mpe Zu dia Nzambi mbo disongelaka ti Mose lukwikulu lwalwingi lweri nandi, mpe tufweti landa tifwani tiandi. (Lub. 34:10; Ebr. 11:24-28) Yehova ka hana Mose nzila ko ya kota ku Mutoto wa kani, kâ mbo kamuhana bweso bwa kota ku Paradi ya ha mutoto mpe mbo kamuhana luzingu lwa mankulu. Mbo tubaka mpe luzingu lo tala ti tusariri ngolo mu bâ na tifu tia tiyimina tie mfunu.​—1 Kor. 9:25.