“Egu kasin na e ura lau baine heatu henigu neganai, aiona ai na abi bena na gigia. Na ura baina hamasea.”​—Paul.

“Ruma ai lau na na badu haraḡamu, bona nega haida na badu kavamu. Sea, teibolo, gadara ḡaudia, eiava dahaka ḡau na itava, na abi isiva gabu na hodolaiva.”​—Marco.

Reana ita na idia raruosi e kara heḡereḡerena na basita karamu. To, ita iboudai na nega haida siboda baita hebiagu na auka. Badina kara dika na tau ginigunana Adam ena amo ta abia. (Roma 5:12) Haida na Paul bona Marco heḡereḡeredia ediai na e aukamu edia badu bae biagu totona. A haida na e hekwarahimu edia lalohadai bae biagu. Heḡereḡere, e hagaridiamu eiava e hamanokadiamu ḡaudia e lalo momomu. A haida be ediai e aukamu matabodaḡa urana, inuinu kekero, eiava drag ani karadia bae dadarai.

Edia lalohadai, ura bona kara asie biagumu taudia ese edia mauri na bae hadikaia diba. To ita edai una basine vara totona dahaka baita kara? Boga-auka baita hahedinaraia. Unu baita kara toma totona mani ini henanadai toi aita herevalai: (1) Boga-auka anina be dahaka? (2) Dahaka dainai una na mai anina bada? (3) Edena dalai una “lauma huahuana” baita hahedinaraia? (Gal. 5:22, 23) Bena baita itaiamu ita be dahaka baita kara bema nega haida boga-auka ihahedinaraina na auka.

Boga-auka tauna na nega iboudiai e lalohadai namonamomu. Bona Dirava ihabaduna daladiai se herevamu eiava se karamu.

Baita boga-auka dalana na Iesu ese e hahedinaraia. Baibul na e gwaumu: “E ere dika henia, to se hedava. Hisi e ani, to se daḡedaḡe. A Hahemaoro Diravana maoromaorona e abidadama henia.” (1 Pet. 2:23) Iesu na au ai e kokoa neganai inaina ese e kirikirilaia to e boga-auka. (Mat. 27:39-44) Matamanai, tomadiho igunalaidia taudia na e urava ena hereva amo bae tarapua neganai, ia na e boga-auka. (Mat. 22:15-22) Bona Iuda taudia haida na e badu dainai nadi e abi ia bae hodoa neganai, ia na se hadava to “e komu, bena Dubu Helaḡa amo e raka lasi.”​—Ioa. 8:57-59.

Iesu ena haheitalai baita tohotohoa diba, a? Oibe. Aposetolo Petero na e gwa: “Keriso umui daimui ai e hisihisiva, emui raka dalana e henimui, ia aena gabudia ai ba raka helaoreana.” (1 Pet. 2:21) Ena be ita na dia ḡoḡoevadadae, to Iesu ena haheitalai boga-auka karana ai baita tohotohoa diba. Dahaka dainai una na mai anina bada?

Iehova ena lalo namo baita abia totona, namona na baita boga-auka. Ena be laḡani momo  lalodiai Iehova vada ta hesiai henia, to bema eda kara bona hereva basita biagudiamu eda hetura karana ia ida na baita hadikaiamu.

Mani Mose a laloa, iena negai “tanobada taudia iboudiai bogaraḡidiai ia mo sibona manau herea.” (Num. 12:3) Ia na laḡani momo lalodiai Israel taudia edia maumau herevadia e haheaukalai, to nega ta ia na se boga-auka. Idia edia ranu na dia heḡereḡere dainai e maumauva neganai, ia na e badu. Mai baduna ida e gwau henidia, eto: “Gwau-edeede taumui e, a hakala; emui ranu na ina nadi hagahagana amo baia ha-arua lasi a?”​—Num. 20:2-11.

Mose na sibona se hebiagu. Ia ese Iehova, una hoa karana e karaia tauna, na se imodaia. (Sal. 106:32, 33) Una dainai, Iehova ese e hamaoroa Gwauhamata Tanona ai na basine vareai. (Num. 20:12) Mose na ena kara dainai, reana ena mauri ibounai lalonai e lalohisihisi.​—Deu. 3:23-27.

Una ese dahaka e hadibadamu? Ena be laḡani daudau lalonai hereva momokani ai ta noho, to e habadudamu eiava sisiba baine abia na namo tauna na baita hereva henia namonamo. (Efe. 4:32; Kol. 3:12) Momokani, laḡani e bada e laomu neganai, nega haida haheauka ihahedinaraina na e auka. To namona na Mose baita laloa. Ita na asita uramu boga-auka karana basita hahedinaraia dainai Iehova ida eda hetura karana baine dika. To, boga-auka karana be ede baita hahedinaraia toma?

Lauma helaḡa totona ba ḡuriḡuri. Dahaka dainai? Boga-auka na Dirava ena lauma helaḡa huahuana ta, bona Iehova ese e noiamu taudia e henidiamu. (Luka 11:13) Iehova na ena lauma helaḡa amo ita baine hagoadada diba, boga-auka karana baita hahedinaraia totona. (Flp. 4:13) Bona baine duruda lauma helaḡa ena huahua ma haida heḡereḡere, lalokau baita hahedinaraia amo baita boga-auka diba.​—1 Kor. 13:5.

Boga-auka karana e tohoamu ḡaudia baita dadarai. Heḡereḡere, kara kereredia e hahedinaraimu intanet websait eiava moale karadia baita dadarai. (Efe. 5:3, 4) Kara dika ikarana totona lalo veri ḡaudia iboudiai baita dadarai na namo. (Her. 22:3; 1 Kor. 6:12) Heḡereḡere, bema ta na matabodaḡa hahetohona idadaraina enai na auka, namona na kara unu bamodia  e hahedinaraimu bukadia na basine duahi eiava muvidia na basine ita.

Reana una sisiba ibadinana edai na be aukamu. To bema baita hekwarahimu, Iehova ese be hagoadadamu siboda baita hebiagu totona. (2 Pet. 1:5-8) Ia ese be durudamu eda lalohadai, hereva, bona kara baita biagudiamu. Matamanai tame herevalaidia taudia, Paul bona Marco, na Iehova ena heduru amo edia badu bona daḡedaḡe karadia e biagu. Danu, tadikaka ta na nega momo e taritariva neganai ena badu na se biaguava bona ma haida ida e heaiva. Una tadikaka be dahaka ese e durua? Ia na e gwa: “Lau na dina iboudiai na ḡuriḡuriva. Boga-auka e herevalai stadi atikol haida na stadilaiva bona bae durugu Baibul siridia na lalotaova. Ena be laḡani momo lalodiai lau na unu na kara toma, to lau e durugumu ḡauna na lalogu na hadaiamu daba iboudiai lalogu na baine maino. Bema lau na mai egu lao gabuna ta, ruma na rakatania haraḡamu unu amo basina ḡava.”

Nega haida ita na asita boga-aukamu. Una neganai reana Iehova iḡuriḡuri henina na baita hemaraimu. To nega unu bamodiai Iehova baita ḡuriḡuri henia goadagoada na namo. Una dainai Iehova ba ḡuriḡuri henia haraḡa. Ba noia emu dika baine gwautao, iena heduru ba tahua, bona lalomu ba hadaia una kerere na ma basio karaia lou. (Sal. 51:9-11) Basioto Iehova ese oi na basine bogamu hisimu bona emu ḡuriḡuri na basine hakalamu. (Sal. 102:17) Aposetolo Ioane ese e hadibadamu Dirava Natuna “rarana ese eda dika iboudiai baine huri oho.” (1 Ioa. 1:7; 2:1; Sal. 86:5) Ba helalotao Iehova ese ena hesiai taudia na e hamaorodiamu ma haida edia dika na bae gwautao loulou. Bona ta diba momokanimu ia danu unu be kara tomamu.​—Mat. 18:21, 22; Kol. 3:13.

Mose na tano ḡaḡaena ai sibona se hebiagu neganai, Iehova na se moale. To, Iehova ese ena dika na e gwauatao. Bona Iena Hereva lalonai Mose na e gwauraia abidadama tauna. (Deu. 34:10; Heb. 11:24-28) Iehova ese Mose na se havareaia Gwauhamata Tanona ai, to ia ese tanobada Paradaisona ai be hatorea isi loumu bena be mauri hanaihanaimu. Bema ina kara namona, boga-auka baita hahedinaraiamu, ita danu una helaro namona baita moalelaiamu.​—1 Kor. 9:25.