“Kan mo kouzin ti rod lager ar mwa, mo ti trangle li. Mo ti anvi touy li.”​—Paul.

“Lakaz, souvan mo ti sap lor kal, mem pou enn sinp ti zafer. Mo ti kraz bann meb, bann zouzou, tou seki mo ti gagne anba mo lame.”​—Marco.

Kitfwa nou pa sa kantite violan-la, me parfwa nou tou nou kapav trouv sa difisil pou kontrol noumem. Kifer? Parski nou finn erit pese ar premie zom, setadir Adan. (Rom. 5:12) Sertin dimounn, kouma Paul ek Marco, gagn difikilte pou kontrol zot koler. Ena osi ki gagn difikilte pou kontrol zot bann panse. Par exanp, zot kontign pans lor bann kitsoz ki fer zot per ouswa ki dekouraz zot. Ena lezot osi ki gagn difikilte pou reziste kont limoralite sexiel, lalkol, ouswa ladrog.

Bann ki pena kontrol lor zot bann panse, dezir, ek aksion, zot kapav gat zot lavi. Me nou kapav evit sa. Kouma? Kan nou manifeste metriz lor noumem. Pou ki nou reisi fer sa, anou examinn trwa kestion: (1) Ki ete metriz lor noumem? (2) Kifer li inportan? (3) Kouma nou kapav kiltiv sa kalite-la, ki form parti “frwi lespri”? (Gal. 5:22, 23, NW) Apre sa, nou pou gete seki nou kapav fer kan nou pa reisi metriz noumem.

Enn kikenn ki metriz limem li pa azir lor enn kout tet. Li pa koz ouswa azir dan enn fason ki Zeova pa kontan.

Zezi finn montre nou seki savedir ena metriz lor noumem. Labib dir: “Kan li finn gagn insilte, li pa finn rann laparey; kan li finn soufer, li pa finn menas personn, me li finn met so konfians dan Bondie ki ziz bien.” (1 Pier 2:23) Kan Zezi ti lor poto, li ti kontrol limem kan so bann lennmi ti boufonn li. (Mat. 27:39-44, NW) Li ti osi kontrol limem kan bann sef relizie ti poz li boukou kestion pou esey piez li. (Mat. 22:15-22) Li finn osi les enn bon lexanp kan sertin Zwif ki ti bien ankoler ti donn li kout ros. Olie ki li ti tret zot dan enn move fason, “Zezi [ti] kasiet e li [ti] sorti dan tanp.”​—Zan 8:57-59.

Eski nou kapav imit lexanp Zezi? Wi nou kapav, dan enn sertenn mezir. Lapot Pier ti ekrir: “Kris limem finn soufer pou zot, li finn donn zot enn lexanp pou zot swiv li.” (1 Pier 2:21) Zezi ti ena metriz lor limem ek nou kapav  swiv so lexanp, mem si nou inparfe. Kifer li inportan nou fer sa?

Nou bizin ena metriz lor noumem si nou anvi gagn faver Zeova. Mem si sa fer lontan ki nou pe servi Zeova avek fidelite, nou riske perdi nou lamitie avek Li si nou pa kontrol seki nou dir ek fer.

Anou pran lexanp Moiz, ki ti “ena boukou plis douser ki tou bann dimounn ki ti ena lor later” sa lepok-la. (Nonb 12:3) Kan bann Izraelit ti plengne pandan plizir dizenn lane, Moiz ti ekout zot avek pasians. Me enn zour, li pa ti reisi kontrol limem. Kan bann Izraelit ti plengne ankor enn fwa akoz pa ti ena ase delo, Moiz ti ankoler. Li ti koz brit ar lepep ek li ti dir zot: “Ekout sa, bann rebel! Eski se dan sa ros-la ki nou bizin fer delo sorti pou zot?”​—Nonb 20:2-11.

Moiz pa ti reisi kontrol limem. Li pa ti donn loner Zeova, ki ti fer sa mirak-la. (Ps. 106:32, 33) Akoz sa, Zeova pa ti les li rant dan Later Promiz. (Nonb 20:12) Ziska so lamor, sirman Moiz ti regrete ki li pa ti reisi kontrol limem.​—Det. 3:23-27.

Ki leson nou aprann? Mem si sa fer lontan ki nou dan laverite, kan enn kikenn agas nou ouswa kan nou bizin donn enn kikenn enn konsey, nou bizin touletan ena respe kan nou koz ar li. (Efe. 4:32; Kol. 3:12) Kan nou vinn vie, parfwa li pli difisil pou ena pasians. Me rapel lexanp Moiz. Nou pa anvi gat nou lamitie avek Zeova zis parski nou pa finn kapav metriz noumem. Ki nou bizin fer pou kiltiv sa kalite bien inportan la?

Priye pou gagn lespri sin. Kifer? Parski “metriz lor noumem” form parti frwi lespri Bondie, ek Zeova donn so lespri sin bann dimounn ki demann Li. (Lik 11:13) Gras-a so lespri sin, Zeova kapav donn nou lafors ki nou bizin. (Fil. 4:13, NW) Zeova kapav osi ed nou pou kiltiv bann lezot kalite ki form parti frwi lespri, kouma lamour. Sa kalite-la kapav ed nou pou ena plis metriz lor noumem.​—1 Kor. 13:5.

Evit tou kitsoz ki kapav fer twa perdi metriz lor tomem. Par exanp, pa al lor bann sit Internet ek pa swazir bann divertisman ki ankouraz enn move kondwit. (Efe. 5:3, 4)  An realite, nou bizin rezet tou bann kitsoz ki kapav tant nou pou fer lemal. (Prov. 22:3; 1 Kor. 6:12) Par exanp, enn kikenn ki vit-vit les li tante pou fer bann kitsoz imoral, kitfwa pou bizin evit lir bann liv ouswa get bann fim ki romantik.

Nou kapav trouv sa difisil pou aplik sa konsey-la. Selman, si nou fer zefor, Zeova pou donn nou lafors ki nou bizin pou kontrol noumem. (2 Pier 1:5-8) Li pou ed nou pou kontrol nou panse, nou parol, ek nou bann aksion. Se seki ti ariv Paul ek Marco ki nou ti mansione dan koumansman sa lartik-la. Zot ti aprann kontrol zotmem pou ki zot pa azir ar violans. Anou get osi lexanp enn frer ki souvan ankoler ar lezot sofer kan li kondir. Parfwa, li mem diskit avek zot. Ki finn ed li? Li dir: “Toulezour mo ti sipliy Zeova pou ed mwa. Mo ti etidie bann lartik ki koz lor ‘metriz lor noumem’ ek mo ti aprann par-ker bann verse Labib ki kapav ed mwa. Mem si sa fer plizir lane ki mo pe travay lor la, kanmem sa toule gramatin mo fer zefor pou rapel ki mo bizin gard mo kalm. Ek kan mo ena bann randevou, mo sorti lakaz pli boner pou ki mo pa bizin rape lor sime.”

Parfwa, li pou arive ki nou pa pou reisi metriz noumem. Lerla, kitfwa nou pou telman onte ki nou pa pou rod priye Zeova. Me se dan sa bann moman lamem ki nou plis bizin priye. Alor, priye Zeova deswit. Sipliy Li pou pardonn twa, rod so led, ek fer zefor pou pa refer mem erer ankor. (Ps. 51:9-11) Kan to priye Zeova pou demann Li pardon, pa panse ki Li pa pou ekout to bann lapriyer sinser. (Ps. 102:17) Lapot Zan rapel nou ki disan Garson Bondie “lav tou nou pese.” (1 Zan 1:7; 2:1; Ps. 86:5) Pa bliye ki Zeova demann so bann serviter pou pardone touletan. Alor, nou kapav sir ki Li pou fer parey pou nou osi.​—Mat. 18:21, 22; Kol. 3:13.

Kan Moiz pa ti reisi kontrol limem dan dezer, Zeova pa ti kontan. Kanmem sa, Zeova ti pardonn li. Anplis, Labib dir nou ki Moiz ti enn zom fidel ki nou bizin imite. (Det. 34:10; Ebre 11:24-28, NW) Zeova pa ti les Moiz rant dan Later Promiz, me Li pou donn Moiz lokazion pou viv dan Paradi ek posibilite pou viv pou touletan. Nou osi nou kapav atann pou gagn lavi eternel si nou fer zefor pou kiltiv sa kalite bien inportan la, setadir metriz lor noumem.​—1 Kor. 9:25.