“Mam ne m yasb bi-ribl moor n yõsge, tɩ d sũyã yik ne taab tɩ m sog a kokoɛyã. M da rat n kʋ-a lame.”—A Polle.

“M sã n da wa be zakẽ, bũmb bilf fãa tɩ m sũurã yikame, tɩ m wʋkd teedã, kambã reem-teed la bũmb ning fãa m sẽn paam n lobd yaare.”—A Marko.

Tõe tɩ tõnd yẽ pa na n tʋm tɩ nar woto ye. La wakat ninga, yaa toog ne tõnd ned kam fãa t’a yõk a menga. Sẽn kɩt tɩ yaa woto n tɩ yɩɩdã yaa d sẽn yaa a Ãdem yagense, n dogd ne yel-wẽnã. (Rom. 5:12) Yaa toog ne neb kẽere, wala a Poll ne a Marko tɩ b tõog b mens n da yik b sũy ye. Yaa toog ne neb a taab me tɩ b ra tags bõn-wẽns yell ye. Wala makre, b wae n tagsda bũmb sẽn tõe n koms b raood la sẽn kẽesd-b rabeem yelle. Leb n yaa toog ne neb kẽer tɩ b ra yo, tɩ b ra yũ rãam tɩ looge, wall b ra yũ dorg ye.

Neb nins sẽn pa tõogd n yõkd b mens b tagsa wã, b tʋlsmã la tʋʋm-tʋmdɩ wã pʋgẽ wã tõe n wãa b mense. La d yaool n tõe n põsa rẽ. Wãn to? Yaa d sẽn na n bɩɩs yõk-m-menga. Sẽn na yɩl n sõng-d tɩ d maan woto, bɩ d leok sogsg a tãabo: 1) Bõe n wilg tɩ ned tara yõk-m-menga? 2) Bõe yĩng tɩ yõk-m-meng yaa tɩlɛ? 3) Wãn to la d tõe n bɩɩs zʋg-sõng kãngã sẽn naag “vʋʋsem sõngã biis” sʋkã? (Gal. 5:22, 23) Rẽ poore, d na n yãa tõnd meng sẽn tõe n maane, d sã n wa mik tɩ d pa tar yõk-m-meng ye.

Ned sẽn tar yõk-m-meng pa yɩt tʋʋll-tʋʋll n tũud a sũurã tʋlsem wakat fãa ye. A pʋd n yõkda a meng n pa na n gom la a maan bũmb sẽn na n sãam Wẽnnaam sũur ye.

A Zeezi wilga tõnd yõk-m-meng sẽn dat n yɛɛlga. Biiblã yetame: “B sẽn wa n tʋʋd-bã, b pa tʋʋs n lebs ye. B sẽn wa n namsdẽ wã, b pa zab neb nins sẽn namsd bãmbã ye. B basa yellã ne Soab ning sẽn kaood bʋʋd tɩrgã.” (1 Pɩy. 2:23) B sẽn da wa n namsd a Zeezi ra-lukã zug tɩ kɩɩsdbã yaand-a wã, a talla yõk-m-meng a woto. (Mat. 27:39-44) Sẽn deng rẽ, tũudmã taoor dãmb sẽn wa n mak n na n bẽd-a a no-goamã pʋgẽ wã, a talla yõk-m-meng wʋsgo. (Mat. 22:15-22) Zʋɩf-rãmb kẽer sũy sẽn da yik tɩ b wʋk kug n na n lob-a wã, a leb n kõo mak-sõng me! A Zeezi pa bao n na maan-b wẽng n lebs ye. A pʋd “solgame n yi wẽnd-doogẽ wã n looge.”—Zã 8:57-59.

Tõnd tõe n dɩka a Zeezi togs-n-taar bɩ? Baa sã n pa zãng-zãnga, d tõeeme. Tʋm-tʋmd a Pɩyɛɛr yeelame: “Kirist meng namsa yãmb yĩng n bas mamsg sẽn na yɩl tɩ y tũ bãmb naoã neere.” (1 Pɩy. 2:21) Baa ne d sẽn pa zems zãngã, d tõe n tũu a Zeezi naoã neere, n tall yõk-m-menga. Bõe yĩng tɩ yaa tɩlɛ tɩ d tall yõk-m-meng wa a Zeezi?

D sã n dat n ta a Zeova yam, yaa tɩlɛ tɩ d tall yõk-m-menga. Baa d sã n tũuda a Zeova sõma hal sẽn kaoose, d sã n pa yõkd d meng d no-goamã la d tʋʋm-tʋmdɩ wã pʋgẽ, tõe n sãama tõnd ne a Zeova zoodã.

Tẽeg-y a Moyiiz kibarã. A wakatẽ wã, a “dag n yaa sik-m-meng soab hal wʋsgo, n yɩɩd ninsaalbã fãa sẽn be dũniyã zugã.” (Sõd. 12:3) A Moyiiz tõog n yõka a meng n kelg Israyɛll nebã yẽgengã n kaoos yʋʋma. La raar a ye, a pa tõog a meng ye. Israyɛll nebã sẽn wa n le yẽgem ne-a koom sẽn ka be yĩngã, a sũurã yikame. A zab-b lame, n yeel yaa: “Tõatbã, kelg-y-yã. Yãmb datame tɩ tõnd kɩt tɩ koom yi kug-kãnga pʋgẽ n kõ yãmb bɩ?”—Sõd. 20:2-11, Wẽnnaam Sebre, 1983.

A Moyiiz pa tõog a meng ye. A pa wilg tɩ yaa a Zeova n sõng yẽ t’a maan yel-solemdã tɩ b paam koomã ye. (Yɩɩn. 106:32, 33) Rẽ n so la a Zeova sẽn pa bas t’a kẽ kãabg tẽngẽ wã. (Sõd. 20:12) Hal n tãag a kũum, a Moyiiz tog n da maanda a bãngẽ, a sẽn pa tõog n yõk a mengã.—Tõo. 3:23-27.

Yam-bʋg la d tõe n dɩke? Baa d sã n tũuda a Zeova hal sẽn kaoose, d pa tol n segd n gom n paoog ned sẽn yik d sũuri, wall ned d sẽn segd n kibl ye. (Efɛ. 4:32; Kol. 3:12) Yaa sɩd tɩ d yʋʋmã sã n vẽsgdẽ tɩ d laafɩ wã me boogdẽ, yɩl n tõog n yõkd d mengã tõe n yɩɩ toogo. La d tẽeg a Moyiiz yelle. D pa tol n dat tɩ d sẽn maan bũmb nins fãa a Zeova tʋʋmdã pʋgẽ wã yɩ bõne, d sẽn pa tõog n yõk d meng yĩng ye. Bõe la d tõe n maan n bɩɩs zʋg-sõng kãngã sẽn yaa tɩlɛ wã?

D pʋʋs n kos vʋʋsem sõngã. Bõe yĩnga? Bala yõk-m-mengã yaa zʋg-sõng sẽn naag Wẽnnaam vʋʋsem sõngã biisẽ. A Zeova kõta a vʋʋsem sõngã neb nins sẽn kot-a wã. (Luk 11:13) Ne vʋʋsem sõngã maasem, a Zeova tõe n sõnga tõnd tɩ d tõog n bɩɩs yõk-m-menga. (Fili. 4:13) A tõe n sõng-d lame me tɩ d bɩɩs vʋʋsem sõngã biis a taabã, wala nonglem, tɩ sõng-d tɩ d maneg n tall yõk-m-menga.—1 Kor. 13:5.

D zãag ne bũmb nins fãa sẽn tõe n kɩt tɩ yɩ toog tɩ d tall yõk-m-mengã. Wala makre, d zãag d meng ne sɩt wɛɛb rãmb la reem sẽn wilgd yel-yoodo. (Efɛ. 5:3, 4) D pʋd n segd n gũusa ne bũmb nins fãa sẽn tõe n wa kɩt tɩ d rat n maan wẽnga. (Yel. 22:3; 1 Kor. 6:12) Wala  makre, ned yam sẽn kẽed yoob nana-nana segd n yãka yam n zãag a meng fasɩ ne sɛb la filim-dãmb sẽn nekd yoob tʋlsem.

D tõe n getame tɩ sagl-kãngã tũub yaa toogo. La d sã n modge, a Zeova na n kõ-d-la pãng tɩ d tõog n yõk d menga. (2 Pɩy. 1:5-8) A na n sõng-d lame tɩ d tall yõk-m-meng d tagsã wã, d goamã, la d tʋʋm-tʋmdɩ wã pʋgẽ. A Poll ne a Marko yell d sẽn gom tɩ loogã tõogame n bas zab la sũ-yikri. Rẽ wilgdame tɩ yãmb me tõeeme. D gom saam-biig a ye me yelle. A sã n da wẽnd a mobillã, a ra nong n yikda a sũur ne mobil a taabã rãmba, n zabd ne-ba. Bõe la a maan n tõog n toeeme? Ad a sẽn yeele: “Daar fãa m da pʋʋsda wʋsg yel-kãngã wɛɛngẽ. M zãmsa siglgã sɛb sẽn gomd yõk-m-mengã yelle, la m dɩk Biiblã vɛrse nins sẽn tõe n sõng-mã ne zugu. Baa ne m sẽn maood n na n bɩɩs yõk-m-mengã na maan yʋʋmã, yibeoog fãa m tẽegdame tɩ m segd n ket n modgdame. Sẽn paase, m sã n tar kẽn n segd n ta wakat takɩ, m yikda pĩnda, tɩ ra wa lebg kẽn-fõodem ye.”

Yell ning pʋgẽ, d pa tõogd n yõk d meng ye. Sã n wa yaa woto, d tõe n zoeta yãnd wʋsg a Zeova taoor n pa rat n pʋʋs-a ye. La yaool n yaa wakat kãng la d segd n kos a Zeova sõngr n tɩ yɩɩda. Rẽ wã, bɩ d pʋʋs a Zeova zĩig pʋgẽ, n bõos-a sugri, n kos a sõngre, la d yãk yam n da tol n le maan beeg-kãng buud ye. (Yɩɩn. 51:11-13) D ra tags t’a Zeova pa na n kelg d sẽn pʋʋsd ne d sũur fãa n kot sugrã ye. (Yɩɩn. 102:18) Tʋm-tʋmd a Zã tẽeg-d lame tɩ Wẽnnaam Bi-riblã zɩɩm “pekda tõnd n yiisd yel-wẽnd buud fãa.” (1 Zã 1:7; 2:1; Yɩɩn. 86:5) D tẽeg t’a Zeova yeela a nin-buiidã tɩ b kõt taab sugr wakat fãa. Dẽnd d tõe n basa d yam tɩ yẽ me na n kõo tõnd sugri.—Mat. 18:21, 22; Kol. 3:13.

A Moyiiz sẽn pa tõog n yõk a meng wakat bilf sasa rasempʋɩɩgẽ wã, sãama a Zeova sũuri. Baasgo, a Zeova kõ-a-la sugri. Wẽnnaam goma a Moyiiz yelle, n yeel t’a yaa mak-sõng tẽebã wɛɛngẽ. (Tõo. 34:10; Ebre. 11:24-28) Yaa sɩd t’a Zeova pa bas t’a Moyiiz kẽ kãabg tẽngẽ wã ye. La a na n wa vʋʋg-a-la tẽngã sẽn na n lebg arzãnã pʋgẽ, t’a tõe n paam n vɩɩmd wakat sẽn kõn sa. Tõnd me sã n ket n modgd n bɩɩsd yõk-m-meng sẽn yaa zʋg-sõng sẽn yaa tɩlɛ wã, d tõe n paama vɩɩm sẽn kõn sa wã.—1 Kor. 9:25.