“Ti ǁnurib ge tita ǀkha ǃkham tsoatsoa o, o ta ge tita dommi ǃnâ ǃkhō bi tsî ge ǁēdom bi. Tsî ta ge gere ǃgam bi ǂgao.”—Paul.

“Oms ai ta ga hâ o, o ta ge ǃhaese ra ǁaixa xū-i a ǀkhai ǃkhais ai. Tita ge oms ǃnāxūn, ǀhuru xūn tsî hō ǁkhā ta a xūn hoana ra khôa.”—Marco.

ǃNāsa khoen ge nē ǀgam khoekha khami ǃhaese ǁaixa tama hâ. Xawe da ge hoa da ǁaen ai ǃkhō-oasens ǃgomsina ūhâ. Nēs ge ra ī ǂguro khoeb Adamma xu da ge nēsa a ǀumi amaga. (Rom. 5:12) ǀNîn ge Pauli tsî Marco hâkha khami ǃkhō-oasens ǃgomsiba ūhâ. Tsî ǀnîn ge ǁîn di ǂâiǀgauga ǃkhō-oas ǀkhā ǃgomsiba ūhâ. Aiǁgausen ge ǃao kai nî tsî ra khôaǁnâ nî xūn xa ǃnāsa ǁaeba ra ǂâi. ǀNîn ge ǁgauoǃnâse ǁgoe-ūgus, ǂauxûiba ās tsî ǀhubuǀhubusen xūna sîsen-ūsa xu ǃkhō-oasens ǃgomsiga ūhâ.

ǁNān hîna ǁîn ǂâiǀgaugu, tsâsigu tsî dīn da xūn ǃnâ ǃkhō-oasen tama hân ge ǁîn di ûiga a ǃgomǃgom ǁkhā. Xawe sada ge nēsa xu a ǂgōsen ǁkhā. Mati da nēsa a dī ǁkhā? Nēsa da ge aitsama ǃkhō-oasensa ūhâs ǃnâ-ū a dī ǁkhā. Nēsa dīs ǀkha hui-es ǃaroma hā re i da ǃnona dîde ǃhoaǃgao: (1) ǃKhō-oasensa a tae? (2) Tae-i ǃaroma i ǃkhō-oasensa ūhâsa a ǂhâǂhâsa? (3) Nē ǀgaub hîna a ‘gagab di ǂûb’ di ǀguiba da mati a ūhâ ǁkhā? (Gal. 5:22, 23) Tsî da ge nî kō tae-e da a dī ǁkhāsa ǁaen ai da ga ǃkhō-oasen ǁoa o.

ǃKhō-oasensa ūhâ khoe-i ge mâ xū-i hoa-i ai ǁaixa tama hâ. ǁÎ-i ge Eloba a ǂkhîoǃnâ kai ǁkhā xū-e mî tsî dīsa xu ra ǃkhō-oasen.

Jesub ge ǃkhō-oasens taena ǃkhōǂgā hâ ǃkhaisa ge ǁgau da. Elobmîs ge ra mî: “ǁÎb, ǀauheb geo, ǀauǃoa tamab, tsî tsâb geo, ǁgoa tamab, xawe ǂhanuse ra ǀgoraǃgâba ge māǁnâb.” (1Pet. 2:23) Jesub ge ǃkhō-oasens ǀgauba ge ūhâ i ǁîb di mâǃoa-aon ge ǁgai xūna ǁîb xa gere ǃhoa o, ǃgâuhâib aib ge mâ i o. (Mat. 27:39-44) ǂGomdi ǂgaeǂgui-aogu ge ǂgui dîde dî bi îb ǂhanu tama xū-e mî, ǁaeb ais tsînab ge ǃkhō-oasensa gere ǁgau. (Mat. 22:15-22) ǁÎb ge ǃgâi aiǁgausa ge mā da ǁaixa hâ Jodeǁîn ge ǀuidi ǀkha ǂnoabi ǁaeb ai. ǁÎna ǃgâi tama ǀgaub ai hâ-ūs xab ge Jesuba gau tsî “tempela xu ge ǂoa.”—Jhn. 8:57-59.

Jesub aiǁgausa da a ǁgae ǁkhā? Î, nēsa da ge a dī ǁkhā hoana da dīhō tide xawe. Apostel Petrub ge ge xoa: “Xristub on ge sada tsâba amaga, tsîb ge aiǁgau-e ge ǃgoroba da, ǁîb di daoga da nî ǃkhōdaose.” (1Pet. 2:21) ǀOasa kurusa da ūhâ tama xawe da ge Jesub di aiǁgausa ǀgūse a ǁgae ǁkhā. Nē aiǁgausa ǁgaesa tae-i ǃaroma a ǂhâǂhâsa?

Jehovab xa da ga ūǃoa-e ǂgao o, o da ge ǃkhō-oasensa nî ūhâ. Nēsi da ga Jehovaba gaxuse ǂgomǂgomsase ǃoaba xawe mî tsî da ra dī xūn ǃnâ ǃkhō-oasen tama io, o da ge ǁîb ǀkha da ūhâ ǀhōsagusisa a ǂoa ǃnâ ǁkhā.

Moseb xa ǂâi re, “ǁnā aob, Moseb ge kaise tsamtsiǃnâ ge i, khoen, ǃhūbaib ai hân hoan ǃgâ-ai.” (Num. 12:3) ǂGui kurinab ge ûn hâ xūn ǀkha ǂâu tama Israelǁaesa a ǂgaeǂgui xaweb ge Moseba ǁae-i ai ǁîb ǃkhō-oasensa ge ǂoaǃnâ. ǁÎb ge ge ǁaixa ǁgam-e ūhâ tama is xan ge ǃgae tsoatsoa o. Tsîb ge ǁîna ǃoa ge mî: “ǃGâ ǁnâi re, sa ǁnâuǁoado, ǁgam-e xare ūǀkhība du khom nî?”—Num. 20:2-11.

Moseb ge ǃkhō-oasensa ūhâsa ge ǂoa ǃnâ. ǁÎb ge Jehovaba ǀō-aisa ǀgaub ǃnâ ǁgam-e mās di koasa ge mā tama hâ i. (Psa. 106:32, 33) Nēs xa ǃaroma-e hâseb ge Jehovaba Moseba mîmâisa ǃhūb ǃnâ ǂgâsa ge mâ-am tama hâ i. (Num. 20:12) Moseb ge ǁîb ûib hoaba ge ǃhausen aitsama ǃkhō-oasens ǃnâb ge dan tama hâ i amaga.—Deu. 3:23-27.

Tae-e da nēsa xu ra ǁkhāǁkhāsen? Gaxu ǁaeba da ga amab ǃnâ hâ xawe da ge tā ǁaixa kai da tsî hoaǁaen a ǂhanu di ra ǂâi khoen ǀkha ǃgâi tama ǀgaub ai nî ǃhoa. (Efe. 4:32; Kol. 3:12) Kaira da ra khami i ge a ǃgomba da ǁkhā ǃkhō-oasensa ūhâsa. Xawe Moseb xa ǂâiǃgâ re. Sada ǃgâi ǀhōsagusis hîna da Jehovab ǀkha ūhâsa da ge ǃkhō-oasensa ūhâ tama is ǃnâ-ū ǁgaiǁgai ǂgao tama hâ. Xawe mati da nē ǂhâǂhâsa ǀgauba ūhâsa a omkhâi ǁkhā?

ǃAnu gagaba ǀgoreba re. Tae-i ǃaroma? ǃKhō-oasens ge a gagab di ǂûgu di ǀgui tsî Jehovab ge ǁnān hîna ǃanu gagaba ra ǂgāna ra mā. (Luk. 11:13) ǁÎb ǃanu gagab ǃnâ-ūb ge Jehovaba ǂhâ da hâ ǀgaiba a mā da ǁkhā. (Fil. 4:13) ǁÎb ge nau ǀgaugu gagab ǂûgu digu ǀkha a hui da ǁkhā. Aiǁgause, ǀnammi hîna ǃkhō-oasensa ūhâsa a supu kai ǁkhāba.—1Kor. 13:5.

Xūn hîna sada di ǃkhō-oasensa a ǂkhabuǂkhabu ǁkhāna xu ǂgōsen re. Aiǁgause, ǀurixa internets ǂhawegu tsî ǃgâi tama xūna a ǂâi kai da ǁkhā ǁkhoaxa ǁaeba  xu ǂgōsen re. (Efe. 5:3, 4) ǃGâi tama xūna a dī kai da ǁkhā xūn hoana xu da ge nî ǂgōsen. (ǂKhm. 22:3; 1Kor. 6:12) Aiǁgause ǁgauoǃnâ ǁgoe-ūgu ǀgaub ǂâina ūhâ khoe-i ge ǁgoe-ūgub xa hâ ǂkhanin tsî movin tsîna xu nî ǂgōsen.

Nē daoǁgausa taniǂuis ge a ǃgomba da ǁkhā. Xawe da ga nēsa dīs ǃnâ ǁgutsâ o, ob ge Jehovaba ǀgaiba nî māda i da ǃkhō-oasen. (2Pet. 1:5-8) ǁÎb ge nî hui da i da sada ǂâidi, ǃhoa tsî da ra dī xūn hoan ǃnâ ǃkhō-oasensa ǁgau. Pauli tsî Marcob hîna ǀgapise ra ǃhoaǃgaohe kha ge ge ǁkhāǁkhāsen i kha tā ǃhaese ǁaixa. ǀNî ǃgâsab aiǁgausa ǃoa kō re hîna nau ǃnari-aon ǃoa-ai gere ǁâixa tsî ǁîn ǀkhas tsîna gere ǂkhababa. Nēs xab ǁîba tae-e ge dī? “Tsēs hoasa ta ge gere ǀgore nēs xa. ǃKhō-oasens xa hâ ǃâde da ge gere khomai tsî xoade gere ǂâiǃgâ. ǂGui kuriga ta nēs ai ra sîsen xawe ta ge tsēs hoasa ǃnomsase hâsa nî ǃkhamba. Nēs ǃaroma da ge ǁgoaǁaeb ai ti xūna ra dī i ta tā ǃhaeǃhaesen.”

ǁAen ai da ge ǃkhō-oasensa ūhâs ǃnâ dan tide. Nēs ga io, o da ge a tao ǁkhā Jehovab ǀkha ǀgores ǃnâ-ū ǃhoasa. Xawe nēb ge ǁaeb hîna da nî ǀgoreba. Nēs ǃaroma ǃhae ǁaeb ǃnâ Jehovaba ǃoa ǀgore re. ǀKhoma bi re ǀûba dusa, ǁîb hui ba ôa re tsî ǁkhā xū-e ǁkhawa dīsa xu ǂgōsen re. (Psa. 51:9-11) Tā ǂâi re Jehovab sadu ǀkhomas ǀgoresa ǃgâ tide di. (Psa. 102:17) Apostel Johaneb ge ra ǂâiǂâi ǃnâ da ǀaob Elob Ôab dib ge “ǁoren hoana xu ra ǃanuǃanu da.” (1Jhn. 1:7; 2:1; Psa. 86:5) ǂÂis ǃnâ ūhâ re Jehovab ge ǁîb di ǃoaba-aona ra mîba în hoaǁae ǀûba. Nēs ǃaroma da ge ǂgomǃgâsiba a ūhâ ǁkhā ǁîb ǁkhā xū-e nî dīsa.—Mat. 18:21, 22; Kol. 3:13.

Jehovab ge Moseb ǀkha ge ǂkhîǂâixa tama hâ i ǁaerobab ge ǃgaroǃhūb ǃnâ ǁîb di ǃkhō-oasensa a ǂoaǃnâ o. Xaweb ge Jehovaba ǁîba ge ǀûba. Elobmîs ge ra ǁguiǃā Moseb ge ǂgomǂgomsa khoe-isa tsî da ǁîb aiǁgausa a ǁgae ǁkhāsa. (Deu. 34:10; Heb. 11:24-28) Jehovab ge Moseba mîmâisa ǃhūb ǃnâ ǂgâs di aiǂhanuba ge mā tama hâ i xaweb ge Paradais ǃhūbaib ǃnâ khâisa nî mā bi ǀamose ûis ǀkhaeb ǀkha. Sada tsîn ge ǀamo ûib ǀkhaeba a hō ǁkhā nē ǂhâǂhâsa ǀgaub ǃkhō-oasens dib ai da ga sîsen o.—1Kor. 9:25.