“Keman noprimo peuak nouan motajtolteuia, peuak nikechpatska. Niknekia nikmiktis.” (Paul)

“Keman niyetoya nochan, ika tein yeski taman niman nikualania. Nikuejuelouaya mesas, sillas, auilmej... tein yeski tein nikajsia.” (Marco)

Tejuan xa amo keman tikchiuanij kemej Paul uan Marco. Sayoj ke, kemansa tinochin ouij techkisa timotsakuiliskej. ¿Keyej? Okachiok porin Adán techpanoltilij tajtakol uan yejua ika techyoltilana tein amo kuali (Rom. 5:12). Sekin, kemej Paul uan Marco, ouij kinkisa amo niman kualaniskej. Oksekin ouij kinkisa amo kisentokaskej itech tanemiliskej tein kimouiliaj oso tein kichiua maj kinekikan mosenkauaskej. Uan oksekin ouij kinkisa amo auilnemiskej, amo tauanaskej oso kikuiskej drogas.

Akin kikauaj maj kinyekana inintanemililuan, tein kinejnekij uan tein kichiuaj, uelis semi tajyouiskej. ¿Toni techpaleuis maj amo techpano nejon? Komo tikmatij timotsakuiliskej. Maj tikitakan eyi netajtanilmej tein techpaleuiskej maj tikchiuakan nejon. Yekinika, ¿toni kijtosneki se motsakuilis? Ojpatika, ¿keyej semi moneki? Uan expatika, ¿keniuj uelis tikpiaskej nejin kualneskayot tein “[y]ektikatsin [e]spíritu kichiualtijtok ma onka”? (Gál. 5:22, 23.) Ompa tikitaskej toni uelis tikchiuaskej komo kemansa amo ueli timotsakuiliaj.

Akin kimati motsakuilis amo kichiua tein kinemilia oso tein kinejneki. Amo kijtoua nion kichiua tein Dios amo kiyolpaktia.

Ika tein kichiuak, Jesús technextilij tein kijtosneki se motsakuilis. Biblia kijtoua: “Kuak kikejkeloayaj Cristo, ijkuakon Yejuatsin amo teyika kinnankiliaya ika takejkelolis. Uan kuak kitajyouiltiayaj [...] amo kinilij ke satepan no momakuepas. Ta [...] kimaktilij Dios nitajyouilis porin kimatik ke Totajtsin Dios teixkomakas sayo ika yolchipaualis” (1 Ped. 2:23). IKonetsin Dios kinextij nejin kualneskayot keman pilkatoya itech se kouit uan akin kitauelitayaj kikejkelouayaj (Mat. 27:39-44). No kinextijka keman tayekananij itech taneltokalis kitajtanijkaj miak taman porin kinekiaj kiitaskej “xa tensa kijtoskia ten amo kuali” (Mat. 22:15-22). Uan kikauak se kuali neskayot keman miakej judíos akin semi kualantoyaj kinekiaj kitetemaskej. Amo momakepak, ta “motaatito de yejuan uan niman kisak de ne tiopanijtik” (Juan 8:57-59).

Maski amo uelis senkis tikchiuaskej kemej Jesús, uelis tiktojtokaskej ineskayo. Tatitanil Pedro kijkuiloj: “Cristo [...] tajyouiko por tejuan totajtakoluan. Uan Yejuatsin technextilijteuak de keniu no tejuan tikijyouijtiyaske” (1 Ped. 2:21). Maski titajtakolejkej, uelis timochikauaskej timotsakuiliskej kemej kichiuak Jesús. ¿Keyej moneki maj tikchiuakan?

Komo tiknekij tikyolpaktiskej Jiova, moneki timotsakuiliskej. Maski xa miak xiujmejya tiktakamatinij, amo uelis timouikaskejok iuan komo tikijtouaj uan tikchiuaj tein amo kiyolpaktia.

Maj tikitakan tein kichiuak Moisés, akin “katka  okachi yolnejmach ke nochi okseki takamej akin nemiaj itech taltikpak” (Núm. 12:3). Miak xiujmej taxikoj keman israelitas kualaniaj uan kijtouayaj tein amo kiuelitayaj. Sayoj ke se tonal amo motsakuilij uan semi kualanik porin israelitas oksepa kijtojkej miak taman porin amo onkaya at. Moisés kinchikaujkailuij: “¡Axkan xikakikan, taixnamikinij! ¿Nankinekij maj tejuan tamechkixtilikan at itech nejin tepejxit?” (Núm. 20:2-11).

Moisés amo uelik motsakuilij. Amo kiueyitalij Jiova, akin kichiuak maj kisani at itech tepejxit (Sal. 106:32, 33). Yejua ika, Jiova amo kikauak maj kalaki itech Tal tein kijtojka kinmakaskia (Núm. 20:12). Xa hasta keman Moisés momikilij kisentokaya kinemiliaya maj amo kualanini (Deut. 3:23-27).

¿Toni techmachtia tein kipanok Moisés? Ke maski miak xiujmejya tiktekitilijtokej Jiova, moneki nochipa tikinnojnotsaskej ika poujkaitalis oso mouiskaitalis akin techkualantiaj oso akin moneki se kinmelauas (Efes. 4:32; Col. 3:12). Kemansa, keman se xiuejya okachi niman se kualani. Sayoj ke maj tikelnamikikan tein kipanok Moisés. Jiova kuali techita porin miak xiujmejya timochikauanij tiktekitiliskej uan tiktakamatiskej, uan amo tiknekij maj poliui nejon sayoj porin amo uelik timotsakuilijkej. Yejua ika, ¿keniuj uelis tikpiaskej nejin kualneskayot tein semi moneki?

Maj tiktajtanikan Jiova iyektikatsin espíritu. ¿Keyej? Porin se motsakuilis moajsi itech kualneskayomej tein iespíritu Dios kitemaka, uan Jiova kinmaka iespíritu akin kitajtaniaj (Luc. 11:13). Ika iespíritu, Jiova techmaka chikaualis tein techpaleuia maj tiknextikan nejin kualneskayot (2 Cor. 4:7). Uan no, uelis techpaleuis maj tiknextikan okseki kualneskayomej tein kitemaka iespíritu Dios, kemej netasojtalis, tein techpaleuis maj amo ouij techkisa timotsakuiliskej (1 Cor. 13:5).

Maj tikixtopeuakan nochi tein kichiuas maj ouij techkisa timotsakuiliskej. Kemej neskayot, maj amo tikitakan itech Internet nion maj ika timoixpetanikan tein amo kuali (Efes. 5:3, 4). Tein melauj, moneki tikixtopeuaskej nochi tein uelis kichiuas maj tiknekikan tikchiuaskej tein amo kuali (Prov. 22:3; 1 Cor. 6:12). Kemej neskayot, se taltikpaknenkej akin ouij kikisa amo auilnemis xa monekis amo kiixtajtoltis amatajkuilolmej nion kiitas películas kampa monextia keniuj se takat uan se siuat motasojtaj.

Xa ouij techkisas tikchiuaskej nejin. Sayoj ke  komo timochikauaj, Jiova techpaleuis maj ueli tiktsakuilikan toamo kuali tanejnekilis (2 Ped. 1:5-8). Techpaleuis maj timoijkuanilikan tein amo kuali tein tiknemiliaj, maj kuali tiknemilikan toni tikijtouaj uan maj amo tikchiuakan tein amo kuali. Se taman tein kinextia ke kichiuas nejon, yejua tein panok iuan Paul uan Marco, akin ininka titajtojkej ipeujyan nejin tamachtilis. Axkan yejuan amo niman kualanijok. Maj itech titanemilikan se tokniuj akin niman kualania keman teisa panouaya ijkuak yaya itech icarro. Hasta motajtolteuiaya iniuan oksekin akin no yayaj itech inincarro. ¿Toni kipaleuij maj mopata? Kijtoua: “Mojmostaj semi niktataujtiaya Jiova. Nikitaya tamachtilismej tein ika tajtouaj keniuj se motsakuilis uan nimomamachtiaya tajkuilolmej tein ueliskiaj nechpaleuiskej. Maski miak xiujmejya nimochikauani amo niman nikualanis, nechpaleuiaok mojmostaj nikixtalis niyolseujtos. Uan niman niyouj keman ixyetok toni hora moneki niajsis kansaika”.

Kemansa ouij techkisas timotsakuiliskej. Keman panos nejon, xa tiknemiliskej ke amo technamiki tiktataujtiskej Jiova. Sayoj ke ijkuak moneki okachi tiktataujtiskej. Maj niman tikchiuakan. Maj tiktataujtikan Jiova maj techtapojpolui, maj tiktajtanikan maj techpaleui uan maj tikixtalikan amo oksepa tikchiuaskej nejon tein amo kuali (Sal. 51:9-11). Yejuatsin amo techixtopeuas komo semi tiktataujtiaj maj techikneli (Sal. 102:17). Tatitanil Juan techelnamiktia ke iesyo iKonetsin Dios “techchipautinemi de nochi totajtakol” (1 Juan 1:7; 2:1; Sal. 86:5). Maj amo tikelkauakan ke Jiova techiluia ke nochipa moneki titetapojpoluiskej. Yejua ika uelis titakuaujtamatiskej ke yejuatsin no techtapojpoluis (Mat. 18:21, 22; Col. 3:13).

Jiova amo kiyolpaktij maj Moisés kualanini keman yetoya itech taluakyan. Sayoj ke kitapojpoluij. Uan itech iTajtol Dios moijtoua ke Moisés kikauak se kuali neskayot porin semi takuaujtamatik (Deut. 34:10; Heb. 11:24-28). Maski Jiova amo kikauak maj kalakini itech Tal tein kijtojka kinmakas israelitas, kikauas maj yeto itech Xochital uan maj nemi nochipaya. Tejuan no uelis tikseliskej nejon komo tiksentokaj timochikauaj timotsakuiliskej. Nejin se kualneskayot tein semi moneki (1 Cor. 9:25).