Paul okijto: “Onikechpatskak noprimo ijkuak otimokualanijkej. Oniknekiaya nikmiktis”.

Marco okijto: “San niman onikualaniaya ijkuak onikatka nokalijtik. Oniktlajtlapanaya nochi tlen onikajsiaya”.

Xamo tejuan amo ijkon tikualanij. Pero tinochtin amo tikmoxikoltiaj tikualaniskej. ¿Tleka? Porque Adán otechpanoltili tlajtlakoli (Rom. 5:12). Miakej kualankamikij ijkon ken Paul uan Marco. Oksekimej momojtiaj uan amo kimatij tlen kichiuaskej. Miakej amo kimoxikoltiaj auilnemiskej, tlauanaskej uan kintekitiltiskej drogas.

Tlajyouiaj akinmej amo kimatij kuali monauatiskej. ¿Tlen techpaleuis amo ijkon ma tikchiuakan? Kuali ma timonauatikan. Ik non, ma timotlajtlanikan: ¿Tlen kijtosneki kuali timonauatiskej? ¿Tleka miak ipati ijkon ma tikchiuakan? ¿Ken uelis kuali timonauatiskej? (Gál. 5:22, 23). Satepan tikitaskej tlen tikchiuaskej tla amo tikmatij kuali timonauatiskej.

Akin kuali monauatia amo san niman itlaj kichijtikisa. Amo kijtoua nion kichiua itlaj tlen amo kipaktia toTajtsin Dios.

Jesús okiteititi ken kuali timonauatiskej. Biblia kijtoua: “Keman okiwijwikaltiayah, Ye amo okinnankiliaya, ijkuak okitlaijyowiltiayah, Ye amo okimiliaya kimokopilis, yej nochi okikawaya imak Dios, non teixkomaka kemi moneki” (1 Ped. 2:23). Jesús okiteititi kuali omonauati ijkuak okipilojkej itech tlaketsali uan okipinauijkej akinmej okikokoliayaj (Mat. 27:39-44, TNM). Noijki kuali omonauati ijkuak teopixkej okinekiayaj ma kijto itlaj amo kuali (Mat. 22:15-22). Ye amo okualanki uan oyajki ijkuak sekimej judíos okimojmotlakej tlen okatkaj ompa teokali (Juan 8:57-59, TNM).

¿Uelis tikchiuaskej ken Jesús? Kema pero moneki timochijchikauaskej. Tlatitlanil Pedro okijkuilo: “Cristo otlaijyowi topatka, ijkó otechititi kenijki tikchiwaskeh” (1 Ped.  2:21). Uelis timochijchikauaskej tikchiuaskej ken Jesús maski titlajtlakolejkej. ¿Tleka moneki ijkon ma tikchiuakan?

Moneki kuali timonauatiskej tla tiknekij tikyolpaktiskej Jehová. Tla amo kuali timonauatiaj, ayakmo iuan timouikaskej maski yiuejkika tiktekichiuiliaj.

Ma tikitakan tlen okipanok Moisés, ye “okatka okachi yolkuali itech nochi tlakamej tlen okatkaj nikan tlaltikpak” (Núm. 12:3). Ye miak xiuitl otlaxiko ijkuak israelitas san okualaniayaj. Pero se tonal amo kuali omonauati uan okualanki ijkuak israelitas okijtojkej amo okipiayaj atl. Ye okinmilui: “¡Axkan techkakikan namejuan akinmej amo nantetlakamatij! ¿Itech nin tepexitl timechkixtiliskej atl?” (Núm. 20:2-11).

Moisés amo kuali omonauati. Amo okiueyichi Jehová ijkuak okinkixtili atl israelitas (Sal. 106:32, 33). Ik non, Jehová amo okikauili ma kalaki itech tlali tlen okijto kinmakaskia (Núm. 20:12). Xamo Moisés nochipa okiyolkoko tlen okichi (Deut. 3:23-27).

¿Tlen techmachtia? Amo ma tikinmajuakan akinmej techkualaniaj maski yimiak xiuitl tiktekichiuiliaj Jehová (Efes. 4:32; Col. 3:12). Akinmej yikipiaj miak xiuitl okachi totoka kualanij. Pero ma tikilnamiktokan tlen okipanok Moisés. Tiknekij nochipa kuali timonauatiskej uan ijkon techselis Jehová. ¿Ken uelis kuali timonauatiskej?

Ma tikiluikan Jehová ma techmaka iespíritu santo. ¿Tleka? Porque iespíritu santo toTajtsin Dios techpaleuia kuali ma timonauatikan uan ye kinmaka akinmej kitlajtlaniliaj (Luc. 11:13). Ijkon Jehová techpaleuia ma titlaxikokan uan amo san niman ma tikualanikan (2 Cor. 4:7). Noijki techpaleuia okachi ma titetlasojtlakan uan non kichiuas kuali ma timonauatikan (1 Cor. 13:5).

 Ma tikixtopeuakan tlen amo kuali. Amo ma timoyolpaktikan ika tlen kichiuas ma titlajtlakolchiuakan (Efes. 5:3, 4). Ma tikixtopeuakan nochi tlen amo techpaleuis ma tikchiuakan tlen kuali (Prov. 22:3; 1 Cor. 6:12). Akinmej kinekij auilnemiskej amo ma kintlajtoltikan amochmej nion ma kinmitakan películas tlen tlajtouaj itech non tlamantli.

Xamo tikitaj oui ijkon tikchiuaskej. Pero tla timochijchikauaskej, Jehová techpaleuis kuali ma timonauatikan (2 Ped. 1:5-8). Ye techpaleuis kuali ma timokuayejyekokan, kuali ma titlajtokan uan ma tikchiuakan tlen kuali. Ye okipaleui Paul uan Marco ayakmo san niman ma kualanikan. Ma tikitakan tlen okipanok se tokni. Ye san niman okualaniaya uan okintsatsajtsiliaya oksekimej ijkuak okiuikaya icarro. ¿Tlen okipaleui ma kipatla iyelis? Ye okijto: “Nochipa onimotlatlaujtiaya. Onimomachtiaya ken kuali nimonauatis uan noijki textos tlen nechpaleuiskiaj. Yiuejkika nimochijchikaua uan nechpaleuia nikilnamiktos amo moneki nikualanis. Ijkuak kanaj nio, kualkan nikisa uan amo san nikualanti”.

Ualeua amo kuali timonauatiaj. Ik non, xamo tikmachiliaj amo technamiki tiktlatlaujtiskej Jehová. Pero moneki okachi ma timotlatlaujtikan ijkuak ijkon techpanoua. San niman ma tikiluikan Jehová ma techtlapojpolui, ma techpaleui uan ayakmo oksepa ma tikchiuakan tlen amo kuali (Sal. 51:9-11). Ye techkakis tla tikiluiaj ika nochi toyolo ma techiknomati (Sal. 102:17). Tlatitlanil Juan okijto: “Iesso n Jesús, Ikone n Totajtsi Dios, techchipawa nochteh totlajtlakolwah” (1 Juan 1:7; 2:1; Sal. 86:5). Jehová techiluia nochipa ma titetlapojpoluikan. Ik non, uelis tikneltokaskej ye noijki techtlapojpoluis (Mat. 18:21, 22; Col. 3:13, TNM).

Jehová amo okipakti ijkuak Moisés okualanki kanin tlauaki. Pero ye okitlapojpolui. Biblia kijtoua Moisés otlaneltokak uan tejuan noijki ijkon ma tikchiuakan (Deut. 34:10; Heb. 11:24-28). Jehová amo okikauili ma kalaki itech tlali tlen okijto kinmakaskia pero kikauilis ma yeto itech xochitlali uan ompa nochipa yoltos. Tejuan noijki tiyetoskej itech xochitlali tla kuali timonauatiskej (1 Cor. 9:25).