“Muzukuru wangu paakatanga kutakana na inini, ndakamubata musipa ndomutikinya. Condaida i kumuuraiya.”​—Pauro.

“Pamuzi ndaikasika maningi kunyangajwa pacina thangwe rinozika. Izvi zvandiita kuti ndiphwanye mujiyo no zviri zvese zvandaivona pambeji pangu.”​—Marko.

Kunasa kunanga, kangaije itusu atingagumi pa kuita zviro zvakadaro. Asi nguva jimweni zvinganesa kuzvibata. Ngenyi? Ngokuti takatora utaka wo ushaishi wa Adhamu. (VaRoma 5:12) Inga ndi Pauro na Marko, vamweni vanganesehwa kujibata pavanonga vakanyangajwa. Ku vamweni, cineso ngo cokutama kungwarira zvavanorangarira. Izvo zvinovaita kuti vathye no kuva no murangariro jakashata. Kuveni vamweni zvinovanesera kungwarira zvouhure, kumwa maningi doro no kushandisa mutombo jinodhakwisa.

Kutama kungwarira murangarijo, zvido no zviito kungakhuvaza upenyu wo mundhu. Asi itusu tingaita kuti izvi zvitame kuitika. Kuitisa kudini? Ngo kusakurira umwe wo mugariro wo mucero wo mujimu, kujibata. (VaGalàsia 5:22, 23, Shanduro yeNyika Itsva) Kuitira kutibesera kuti tisakurire mugariro uu, ngatende tidavire muvhunjo mutatu: (1) Icinyi kujibata? (2) Ngenyi kujibata kunosisira? (3) Tingasakuririsa kudini mugariro uu? Pejisire tinozovona zvatingaita kudari nguva jimweni atikhombiji kujibata.

Mundhu anojibata, anongwarira zvaanovereketa. Kusiyapo izvo, iyena anongwarira kuti atame kuvereketa no kuita zvinonyangaja Mwari.

Jesu wakakhombija revo yo kuzvibata. Bhaibheri rinoti: “Pakutukwa, aacihwirijirepi ngo kutuka; pakutambujwa aacaithusepi. Kaveta waijipira kwa wiya anotonga ngo urungami.” (1 Pedru 2:23) Jesu wakakhombija kujibata uku paakashohwa ngo vavengi vake paainga pa danda rokutambujikira. (Mateu 27:39-44) Pakutanga, iyena wakakhombija kuti waijibata vatungamiriri vakashata vo zviara pavakamuita muvhunjo jakawanda kuti iyena averekete zvakashata. (Mateu 22:15-22) Cimwenizve, Jesu wakatisiira muezaniso wakanaka maningi wo kujibata. Inga muezaniso, Vajudha pavaida kumufura ngo mapuwe iyena kusiyapo kuhwirijira, “wakafindara wobuda mu nyumba ya Mwari.”​—Johani 8:57-59.

Kunanga kuti tingatevejera muezaniso wa Jesu? Hina, mbhera patinokwanisa. Mupostori Pedhru wakatara kudari: “Kristu wakatambujwa, ngo ndava yenyu, ecimusiira fakazi, kuti muteveje gwanja rake.” (1 Pedru 2:21) Pikija atizivi kukwana, tingakwanisa kutevejera ngo phedo muezaniso wakatisiira Jesu wo kujibata. Ngenyi zvinosisira kuva no mugariro uu?

Kudari tinoda kudakajisa Jehovha, tinodikana kujibata. Azvinenyi dangani taano makore mangana  tecishandira Jehovha, tingaruza ushamwari hwedo naye, kudari tikatama kungwarira zvatinovereketa no zvatinoita.

Ambovonanyi zvakaitika na Mosi, mu nguva yake iyena “wainga mundhu wakapfavisisa, kupinda vandhu vese vo nyika.” (Bziverengo 12:3) Nopapera makore akati kuti ecicungirira kung’ung’uta kwaiita Vaiziraeri, Mosi aazivi kukwanisazve kujibata. Vandhu pavakatangazve kung’ung’uta ngo kutama kumwa, iyena wakanyangajwa. Ecivereketa ngo hasha iyena wakavavhunja kudari: ‘Izwanyi bzino vamukiri. [Munoda kuti] timuthumbukise kumwa mu zibuwe iri, here?’​—Bziverengo 20:2-11.

Mosi aazivi kukwanisa kujibata. Jehovha ndiyena wakaita mushamaiso wo kubudisa kumwa ngo pa buwe, asi Mosi aazivi kumukuja. (Nduyo 106:32, 33) Ngo ndava yazvo, Jehovha aazivi kumutendera kuti anghwine mu Nyika Yocipikihwa. (Bziverengo 20:12) Mbhera pa njiku yaakafa kangaije Mosi wakajidemba ngo kutama kwake kujibata pa nguva iya.​—Deuteronòmio 3:23-27.

Tinojijenyi? Pikija tiri kushandira Jehovha ko makore akawanda atidikana kubhuya mu njira icikana nderemejo no mundhu anotinyangajisa. (VaEfeso 4:32; VaKolosi 3:12) Patinonga teciita vasharuka, nguva jimweni zvinotinesera kuti tive vanosengerera. Asi ceujanyi zvakaitika na Mosi. Atidikani kuphwanya mugariro wedu wakanaka na Jehovha ngokuti atizivi kukhombija kujibata. Tingasakuririsa kudini mugariro uu unosisira?

Kumbiranyi mujimu mucena. Ngenyi? Ngokuti kujibata i divi ro mucero wo mujimu mucena wa Mwari, Jehovha anopa mujimu mucena kwa vaya vanoukumbira. (Luka 11:13) Ecishandisa mujimu wake, Jehovha angatibesera kuti tikwanise kujibata. (VaFilipi 4:13) Iwona ungatibeserazve kusakurira mugariro umweni wo mucero wo mujimu unovangisa kujibata kwedu inga rudo.​—1 VaKorinto 13:5.

Rambanyi zvese zvinomuita kuti mutame kujibata. Inga muezaniso, mucanghwina mu saite kana mu mabungaijo anokhombija mugariro wakashata. (VaEfeso 5:3, 4) Ngokudaro, ticadokara no ciri-cese cinotikwevera kuti tiite zviro zvakashata. (Mazwi Akangwara 22:3; 1 VaKorinto 6:12) Inga muezaniso, kudari mundhu anozviziva kuti wakapeamira po zvovatano, zvaizova zvakanaka kuti atame kubata mabhuku no kuvona vhidhiyo jinomusijira zvo ruvatano.

 Zvingavoneka inga zvinonesa kutevera ndhungamiriro iyi. Asi kudari tikavangisira, Jehovha anozotipa simba ratinoda kuti tive vandhu vanojibata. (2 Pedru 1:5-8) Iyena anozotibesera kungwarira murangariro wedu, magama no zviito. Hama Pauro na hama Marko vanangwaya pakutanga, vakazvivonavo izvi. Ivona vakajijira kujibata, amborangariranyi ngo pamusoro po muezaniso wo hama imweni inokasa kunyangajwa panonga pakaima karu jakawanda, yoguma pakutukana no mamotorista amweni. Zvicinyi zvavakaita kuti vakwanise kujibata? Ivona vakati: “Ndaiita mukumbiro muzinji pa njiku. Ndaijija shiro jaibhuya ngo pamusoro po kujibata, cimwenizve ndaiviga vhesi jo Bhaibheri. Pikija hazvo paano makore ndecieja kuitisa nane mugariro wangu, mukuvo wese ndinotanga njiku yangu ngo kujivhunja kudari: ‘Nyamasi ndiri kuda kuva mundhu wakathiva.’ Pandinonga ndakasungisana ciri-cese no ariwese ndinofumiririsa maningi, izvi zvinondiita kuti nditame kukasika kunyangajwa panonga pakaima karu jakawanda.”

Nguva jimweni zvinonesa kujibata. Izvi pazvinoitika, kangaije tingava no nyowa yo kuita mukumbiro kuna Jehovha. Asi iyi, ndiyona nguva kwayo kamare yo kuita mukumbiro. Ngokudaro, itanyi mukumbiro ngokukasika. Kumbiranyi kuregerehwa ndi Jehovha, cimwenizve, kumbiranyi besero kwaari. Sunganyi kuti mutamezve kuphinda kuposa kondhoko. (Nduyo 51:9-11) Jehovha aazoramwi mukumbiro wenyu unovha ngo mukati mo mwoyo kamare. (Nduyo 102:17) Mupostori Johani anoticeuja kuti sangi yo Mwana wa Mwari “inosuka uxaixi hwedu.” (1 Johani 1:7; 2:1; Nduyo 86:5) Ceujanyi kuti Jehovha anotivhunja kuti tinodikana kuregerera vamweni mukuvo wese. Ngokudaro, ivanyi no cokwadi cokuti iyena anozoitavo zvakafanana na imwimwi.​—Mateu 18:21, 22; VaKolosi 3:13.

Jehovha wakasuruvara Mosi paakatama kujibata pa mukuvo wiya. Pikija zvakadaro, Jehovha wakamuregerera. Bhaibheri rinonanga kuti Mosi i muezaniso wakanaka wo kuva no rutendo watingatevejera. (Deuteronòmio 34:10; Vaheberi 11:24-28) Jehovha aazivi kutendera kuti Mosi anghwine mu Nyika Yocipikihwa, iyena ano cidakajiso cokuzomumusa no kumupa mukana wo kuzorarama kwenda no kwenda mu paradhiso pasi pano. Jehovha anopavo mukana wondhowo ku vese vanovangisira kuti vakhombiji mugariro uu unosisira wo kujibata.​—1 VaKorinto 9:25.