“Vaava pirimu aka aakimaneiye, kaahinphara exiko, ni kipacerya omuhirikinya. Murima waakuuma kinachuna omwiipha.”—Paulo.

“Vaava kaakhalaaka owaani kaanaakuvela onyeenyeya naamwi ehirivo mathowa oophwanelela. Ophiyerya wi kaananyaanya ichu sa vaate ni soothatano sa anamwane.”—Marco.

Ancipale a hiyo tahi naachu a nlala ntoko Paulo ni Marco. Naamwi hiiha, mu ilukuluku ikina oothene ahu onnanivila wiivareryela. Eyo eneereya nthowa nawi noorava yoocheka ya muchu oopacerya, Atamu. (Aro. 5:12) Hiiha ntoko Paulo ni Marco, akina onnakhala woovila wa yaawo wiivareryela. Wa akina onakhala woovila ovareryela muupuwelo aya. Ntoko yootakiherya, awo annatitelela wuupuwela vooloca sa echu yeeyo ewuukhunle. Wa akina onakhala woovila okhooca vaavaa anakhinyereryiwaaya wi epake mararuwo, owuurya naari olya mirece.

Weemererya wi muupuwelo, nchuno, ni meerelo ohoolela okumi, onanwerya omunanariha muchu. Nyenya hiyaano nnanwerya osepa yeela. Mwawiihai? Moorweela wa wunnuwiha wiihiiha. Wi niwerye weerano yeela, hankooni nthokororye makoho mararu: (1) Wiihiiha tiheeni? (2) Ntakhara heeni wiihiiha oryaaya woochuneya? (3) Nni ninnuwihe hai mukhalelo yoola onapaka makupa a “yawiima ya munepa”? (Gal. 5:22, 23) Voocharela nnahaala othokororya yeeyo muchu ti muchu onaphwaneleiye opaka wakhala wi mu ilukuluku ikina hanakhala awiihiiha.

Muchu awiihiiha hanapaka ichu mookhinyereryeya. Opwaha yeeyo, owo onniivareryela wi ahipake echu yeeyo yaahaala omuhiciha Muluku.

Yesu oonooniherya tiheeni enataphulela wiihiiha. Piipiliya oni: “Vaavaa aaruwaniweiye haamuruwana muchu, ahooshiwaaka, haamoopopiha muchu, nto aaniiveeleela wa yoowo onathoriha mwa wookololowa.” (1 Ped. 2:23) Yesu aahooniherya wiihiiha yoola vaavaa amwiicani awe yaamunyemulaaya ari vamwirini woohooxiwavo. (Mat. 27:39-44) Woopaceryani, owo aahooniherya wiihiiha otokotoko vaavaa ahooleli a malapelo yampakelaaya makoho mancipale yeereryaka omphwanyerya mathowa. (Mat. 22:15-22) Navetho aahitikitherya yootakiherya yaphaama vaavaa Ayuta akina oonyeenyeya yaaconcaaya maluku ni epacerya omvonya! Ohiya waakookiherya yoonanara, “Yesu aahiipitha, akhumawo ompani ya Muluku.”—Yoh. 8:57-59.

Apwanne nnanwerya omutakiherya Yesu? Nnanwerya, mmikhalelo mincipale. Murummwa Petru oorepa: “Kristu tho ohoona ekoyi ntakhara a nyuwo wi mmutakiherye mucharihaka ephiro awe.” (1 Ped. 2:21) Naamwi nri achu oohiphaameya, nnanwerya ochariha vakhivirukhiviru yootakiherya ya Yesu ya okhala awiihiiha. Ntakhara heeni oryaaya woochuneya weerano eyo?

Wiihiiha ti woochuneya wi nimuhakalalihe Yehova. Naamwi nimurumenle Yehova mu iyaakha sincipale, nnanwerya oyeleela onthamwene ahu ni yoowo wakhala wi hinnavareryela yeeyo nnapakaahu ni nnalocaahu.

Nkamuupuweleeni Mose yoowo “àri awiyeviha wapwaha atxhu othene yàri mw’elapo ya vathi.” (Nam. 12:3, BNM) Amanle okhala oopisa murima mu iyaakha sincipale, elukuluku Aisarayeli yiikhupanyeryaaya, Mose aahiyeleela wiihiiha. Owo aahinyeenyeya vaavaa Aisarayeli yiikhupanyeryaaya nthowa na ohikhalano maahi. Moonyeenyeya, owo aahiloca wa Aisarayeli ariki: “Wiriyanani phaama aciyamaaru nyu! Munachuna wi nikumihe maahi vamwala vaava wi muwurye?”—Nam. 20:2-11.

Mose haawenrye okhala awiihiiha. Owo haamuciciminhe Yehova yoowo aapanke yootikhiniha ya ovahererya maahi. (Sal. 106:32, 33) Ntoko yookhumelela, Yehova haamweemerenrye Mose ovolowa mu Elapo ya Nlakano. (Nam. 20:12) Akhweya Mose aahikhalano ekeerelani nthowa na ohiwerya wiihiiha.—Malam. 3:23-27.

Tiheeni nnahuseryaahu? Naamwi nimalinhe iyaakha sincipale mu eparipari, hannaphwanela oloca moohicicimiha ni yaale aninyeenyeihale naari yaale anaphwanela wookololiwa. (Éfe. 4:32; Kol. 3:12) Mweeparipari, vaavaa nnunnuwaahu, mu ilukuluku ikina onamukhala woovila otitelela wooniherya opisa murima. Nyenya mmuupuwele Mose. Hinnachuna oyeleela miteko saphaama niphanraahu ntakhara Yehova nthowa na oyeleela wiihiiha. Tiheeni nnaphwanelaahu weera wi nunnuwihe mukhalelo yoola waphaama?

Mveke munepa waweela. Ntakhara heeni? Nthowa nawi wiihiiha, ti emoha ya yawiima ya munepa wa Muluku, nave owo onnaavaha yaale anamveka. (Luka 11:13) Moorweela wa munepa waweela Yehova onamunivaha ikuru seiho nnachunaahu. (Fil. 4:13) Owo tho onamunikhaviherya wunnuwiha makhalelo makina a yawiima ya munepa waweela, ntoko osivela, yoowo onanikhaviherya wooniherya wiihiiha.—1 Kor. 13:5.

Musepe echu vyakala yeeyo yaahaala oceecheiha wiihiiha wanyu. Ntoko yootakiherya, musepe mathatelo a mu interneti yaawo anavuwiha meecelo oonanara. (Éfe. 5:3, 4) Mweeparipari, nnaphwanela osepa echu eri yoothene enahaala oneeriha opaka echu yoonanara. (Masi. 22:3; 1 Kor. 6:12) Ntoko yootakiherya, wakhala wi muchu ookhalano yookhovelela ya opaka ichu sa  mwiikho, onaphwanela olakelela osepa owiriyana macipo naari woona ixilema seiho inavuwiha ocapaheya.

Akhweya onamukhala woovila opharihela ekano yeela. Naamwiihiiha, wakhala wi ninniilipiserya, Yehova onahaala onivaha ikuru nnachunaahu wi nooniherye wiihiiha. (2 Ped. 1:5-8) Owo onamunikhaviherya ovareryela muupuwelo, malocelo, ni meerelo ahu. Yawooniherya ya yeeyo, ti Paulo ni Marco, yaawo aromoliwe woopaceryani; awo yaahuserya ovareryela meerelo aya a nlala. Muthokororye yootakiherya ya munna mmoha yoowo aanyeenyen’ye ni alipa aweeciha ekaaro akina, ophiyerya waakhulana. Tiheeni owo enreiye? “Kaanavekela moohihiyererya nihiku ti nihiku. Kaanahuserya miyaha saaloca sa wiihiiha nave kaanakuha mmuruni iversikulu sa Mpiipiliyani. Naamwi ivinre iyaakha sincipale kinnuwihaka mukhalelo yoola, nihiku ti nihiku kinnaloca wa miyo meekhaaka kiriki: Yoolakelela aka olelo, ori okhala oomaaleleya. Nave mahiku oothene kinneererya opeherya wi keecihe ekaaro moochimaka.”

Mu ilukuluku ikina, oothene ahu ninnayeleela wooniherya wiihiiha. Wakhala wi ela yoheereya hannaphwanela wuuliwa muru omwaacamela Yehova mu nivekelo. Nyenya ela ti elukuluku nnaphwanelaahu ovekela moopwahaxa. Mwawiihiiha, mwawaakuveya mmwaacamele Yehova mu nivekelo. Mumveke nikhurumuwelo, mwaavye nikhaviheryo nawe, nave mulakelele ohipaka yoocheka emohamoha wanaawiili. (Sal. 51:9-11) Muhuupuwele wi Yehova hani awiriyane nivekelo nanyu nookhumela vathi va murima ni woomorelaani ikharari. (Sal. 102:17) Murummwa Yohani oonuupuserya wi, nikhami na Mwaana a Muluku ‘noonirapiha wa soocheka soothene.’ (1 Yoh. 1:7; 2:1; Sal. 86:5) Muupuwele wi Yehova onnaaleela alapeli awe mwawuuluulela wi ekhurumuwelaneke mukina ni mukhwaawe. Mwawiihiiha, nnaphwanela ororomela wi Yehova onahaala weera emohamoha ni hiyaano.—Mat. 18:21, 22; Kol. 3:13.

Yehova haahakalanle vaavaa Mose aayeleenleiye wiihiiha mu elukuluku vakhaani mutakhwani. Naamwiihiiha Yehova aahimulevelela. Nave Masu a Muluku analoca wi Mose aari muchu oororomeleya yoowo nnaphwanelaahu omutakiherya. (Malam. 34:10; Ahe. 11:24-28) Yehova haamweemerenrye Mose ovolowa mu Elapo ya Nlakano. Nyenya Yehova onahaala omweemererya Mose okhala mu Parataiso veelaponi yavathi okhala wookhala. Hiyaano tho nnanwerya opuha ekumi yoohimala wakhala wi ninnunnuwiha mukhalelo yoola woochuneya wa wiihiiha.—1 Kor. 9:25.