“Omwe aha banyabuzaare bangye ku yaatandikire kurwana naanye, nkamukwata omumiro naatandika kumuniga. Nkaba niinyenda kumwita.”​—Paul.

“Omuka nkaba ninkira kutaburwa obushonga bukye munonga. Nkaba mpenda ebibaizirwe, eby’okuzaanisa, na buri kimwe ekyabaire kiba kiriho.”​—Marco.

Nitubaasa kutarengyesereza tutyo. Kwonka, twena obumwe nitugumirwa kwerinda. Enshonga nkuru erikureetera eki kubaho n’okugira ngu tukahungura ahari Adamu omuze gw’okushiisha. (Rom. 5:12) Abamwe nka Paulo na Marco, nibagumirwa kurinda ekiniga kyabo. Abandi nikibagumira kurinda ebiteekateeko byabo. Nibata omutima aha kutiina kwabo nari obumwe nibateganisibwa emiteekateekyere yaabo etahikire. Kandi abamwe nikibagumira kwangira ekyetengo ky’okushambana, okukoresa kubi amaarwa, nari emibazi.

Abarikuremwa kurinda emiteekateekyere yaabo, ebyetengo byabo, n’ebikorwa byabo nibabaasa kushiisha amagara gaabo. Kwonka ekyo nitubaasa kukyetantara. Tuta shi? Turikugira omutwarize gw’okwerinda. Kutuhwera kukora ekyo, ka tushwijume ebibuuzo bishatu ebi: (1) Okwerinda niki? (2) Ahabw’enki n’omutwarize mukuru? (3) Nitubaasa kugira tuta omutwarize ogu ‘ogw’omwoyo gurikwera’? (Gal. 5:22, 23) Bwanyima nituza kureeba eki buri omwe ahariitwe arikubaasa kukora obumwe yaaremwa kwerinda.

Omuntu oine okwerinda tarikugyendera ahari buri nyehurira ye. Omu mwanya gw’ekyo, naayezibira kugamba nari kutwaza omu miringo etarikushemeza Ruhanga.

Yesu akatworeka ekirikutwarirwa omu kwerinda. Baibuli neegira eti: ‘Ku yaajumirwe, tiyaabagaruriza, ku yaabonabonesiibwe, tiyaabahayira, kureka akeehayo ahari ogwo orikucwa emanja z’amazima.’ (1 Pet. 2:23) Yesu akagira okwerinda nk’okwo obu abahakanisa baabaire nibamushungisa ari aha muti gw’okubonabona. (Mat. 27:39-44) Enyima, akaba yaayorekire okwerinda kw’omutaano obu abeebembezi b’ediini abataine saasi baabaire nibateeraho kumutegyera omu migambire ye. (Mat. 22:15-22) Kandi ka yaateireho eky’okureeberaho kirungi obu Abayudaaya b’ekiniga abamwe baamurekyera amabaare! Yesu omu mwanya gw’okweshashuza, ‘akeeshereka yaashohora omuri hekalu.’​—Yoh. 8:57-59.

Nitubaasa kutooreza eky’okureeberaho kya Yesu? Nitubaasa kuteeraho kumutooreza. Entumwa Petero akahandiika ati: “Kristo akabonabonesibwa ahabwanyu, yaabatsigira eky’okureeberaho, ngu mutoore omuhanda ogu yaarabiremu.” (1 Pet. 2:21) N’obu turaabe tutahikiriire, nitubaasa kuteeraho kutooreza Yesu turikuba abeerinzi. Ahabw’enki ni kikuru kukora eki?

Twine kugira okwerinda kubaasa kusiimwa Yehova. N’obu twakuba tuheereize Yehova obwire buraingwa turi abeesigwa, nitubaasa kufeerwa omukago gwaitu nawe twaba tuteerinzire omu bi turikukora n’ebi turikugamba.

Teekateeka ahari Musa, owaabaire “ari omucureezi, okukira abantu boona ab’omu nsi” obunaku obwo. (Kub. 12:3) Bwanyima y’emyaka, Musa arikugumisiriza okwetomboita kw’Abaisraeli, akahika yaaremwa kwerinda. Akagira ekiniga ku baagarukire bakeetomboita ahabw’eibura ry’amaizi. Akagambira kubi abantu, arikugira ati: “Muhurire, imwe bagomi ‘mwe; tubaihire amaizi omuri oru rukiri?”​—Kub. 20:2-11.

Musa akaremwa kwerinda. Tarahimbiise Yehova owaabaire ari obukomooko bw’eky’okutangaaza ky’okubaha amaizi. (Zab. 106:32, 33) N’ekyarugiremu, Yehova taraikiriize Musa kutaaha omu Nsi Eyaaraganisiibwe. (Kub. 20:12) Musa ahari haihi kufa, akeefuuza ahabw’okuremwa kwerinda akagira ekiniga.​—Bir. 3:23-27.

Nitukyegyeraho ki eki? N’obu twakuba tumazire obwire buraingwa omu mazima, titwine kugambira kubi abarikutukora kubi nari abaine kuhanwa. (Efe. 4:32; Kol. 3:12) N’amazima, twayeyongyera kukura omu myaka, obumwe okwerinda kwaitu nikubaasa kutuuba. Kwonka twijukye ebyahikire ahari Musa. Titurikwenda kushiisha eiziina ryaitu ery’okuba abeesigwa kumara obwire buraingwa turikuremwa kwerinda. Nitubaasa kukora ki kugira omutwarize mukuru ogu?

Shaba omwoyo gurikwera. Ahabw’enki? Ahabw’okugira ngu okwerinda n’omutwarize gw’omwoyo gurikwera, kandi Yehova naaha omwoyo gurikwera abarikumushaba. (Luk. 11:13) Yehova arikukoresa omwoyo gurikwera, naabaasa kutuha amaani agarikwetengyesa. (Fil. 4:13) Kandi naabaasa n’okutuhwera kugira emitwarize endiijo ey’omwoyo gurikwera, nka rukundo, eraatuhwere kwongyera kwerinda.​—1 Kor. 13:5.

Yetantare ekintu kyona ekirikubaasa kutuubya okwerinda kwawe. Nk’eky’okureeberaho, yetantare emikura ya Intaneeti n’eby’okweshemeza ebirimu emitwarize mibi. (Efe. 5:3, 4) Nangwa, twine kwetantara ekintu kyona ekirikubaasa kutureetera kwohibwa kukora ekigwire. (Enf. 22:3; 1 Kor. 6:12) Nk’eky’okureeberaho, omuntu orikubaasa kurahuka kwohibwa kugwa omu bushambani nikibaasa kumwetengyesa  kwetantara vidiyo n’ebitabo ebirikukwata ahari rukundo y’omushaija n’omukazi.

Nikibaasa kutugumira kugyendera aha buhabuzi obu. Kwonka twateeraho munonga, Yehova naija kutuha amaani agarikwetengyesa kugira okwerinda. (2 Pet. 1:5-8) Naija kutuhwera kurinda ebiteekateeko byaitu, emigambire yaitu, n’ebikorwa byaitu. Eki kihikire ahakuba Paul na Marco, abaaba baagambirweho bakabaasa kutegyeka ebiniga byabo. Kandi yetegyereze eky’okureeberaho ky’ow’eishe-emwe owaabaire naakira kugira ekiniga yaaba naavuga emotoka, kandi akatongana n’abandi. Oburemeezi obu akabukorera ki? “Nkaba nshaba munonga buri izooba. Nkeega ebicweka ebirikukwata aha kwerinda, kandi emishororongo ya Baibuli erikugamba aha kwerinda nkagikwata omu mutwe. N’obu ndaabe ntwire ninkora eki kumara emyaka, nikimpwera kutandika buri izooba nyine ekigyendererwa ky’okuguma nyikaikaine. Kandi ningyenda bukiri kare naba nyine ahu ndikuza kugira ngu ntaba nindahukiiriza.”

Obumwe twena nituremwa kwerinda. Ekyo kyabaho, nitubaasa kugira enshoni z’okushaba Yehova. Kwonka obwo nibwo turikuba twine kushaba munonga. N’ahabw’ekyo, kyabaho shaba Yehova ahonaaho. Mweshengyereze kukusaasira, mushabe obuhwezi, kandi mariirira kutagaruka kukora enshobe niyo emwe. (Zab. 51:9-11) Yehova tarikubaasa kwanga kugarukamu okushaba kwawe kuruga aha mutima. (Zab. 102:17) Entumwa Yohaana naatwijutsya ngu eshagama y’Omwana wa Ruhanga, “neetwozyaho ebibi byona.” (1 Yoh. 1:7; 2:1; Zab. 86:5) Ijuka ngu Yehova naagambira abaheereza be kuguma nibasaasirana. N’ahabw’ekyo nitubaasa kugira obuhame ngu nawe naija kutusaasira.​—Mat. 18:21, 22; Kol. 3:13.

Yehova tarashemereirwe obu Musa yaaremwa kwerinda omu ihamba. Kwonka akamusaasira. Kandi Ekigambo kya Ruhanga nikigamba ahari Musa nk’eky’okureeberaho ky’omutaano eky’okwikiriza. (Bir. 34:10; Heb. 11:24-28) Yehova taraikiriize Musa kutaaha omu Nsi Eyaaraganisiibwe, kwonka naija kumwikiriza kuza omu Paradiso ey’omu nsi, kandi amuhe amatsiko g’okutuuraho ebiro byona. Naitwe nitubaasa kugira amatsiko nigo gamwe twaguma nituteeraho kugira omutwarize mukuru ogw’okwerinda.​—1 Kor. 9:25.