Paulmi willakun: “Primoy qaqchayta qallaykuwaptinmi kunkanmanta hapirurqani wañurachinaypaq”, nispa.

Marcosmi kaynata willakun: “Imachallawanpas piñakuqmi kani, piñakuruspayqa mesakunata, warmaypa pukllanankunata, hinaspa imapas hapisqaytam pakiq kani”, nispa.

Ichapas ñuqanchikqa mana chay ruwaykunamanqa chayasunchu. Ichaqa pantaq kasqanchikraykum wakinpiqa chaylla piñakuruchwan (Rom. 5:12). Wakin runamasinchikqa Paul hinaspa Marcos hinam sasachakunku genionku controlayta. Wakinñataqmi chaylla manchakuq kanku utaq imawanpas chaylla hukmanyarunku. Wakin runamasinchikkunañataqmi chaylla huchapakuyman, trago tomayman utaq drogakuymanpas wichiykunku.

Mana genionta controlakuyta yachaqqa hinaspa aychankupa munasqankuwan apachikuqkunaqa mana allinmanmi chayanku. Ñuqanchikpas mana allinman mana wichiykunapaqqa controlakuqmi kananchik. Controlakuyta yachanapaqmi kay yachachikuypi kaykunamanta yachasunchik: ¿Imaynataq controlakuyta yachaq runaqa? ¿Imanasqataq controlakuyninchikqa allin? ¿Imaynatam yachachwan controlakuyta? (Gal. 5:22, 23). Chaymantapas yachachkasunmi wakinpi mana controlakuspaqa imata ruwanamanta.

Controlakuyta yachaq runaqa manam aychanpa hinaspa sunqunpa munasqanwanqa aysachikunchu. Aswanmi kallpanchakun Diospa chiqnisqan kaqkunata mana rimananpaq nitaq ruwananpaq.

Jesusqa controlakuyta yachaqmi karqa, bibliam chayna kasqanmanta nin: “Waknataña trataptinkupas manam kutipakurqachu, ñakarichiptinkupas manam amenazarqachu, aswanqa payqa derechonpi juzgaq juezpa makinmanmi churakuykurqa”, nispa (1 Ped. 2:23). Jesusqa controlakurqam qirupi warkusqa kachkaptin paymanta chiqniqninkuna asikuptinkupas (Mat. 27:39-44). Jesusqa controlakurqataqmi religionpi punta apaqkuna rimasqanwan pantarachiyta munaptinkupas (Mat. 22:15-22). Chaymantapas chiqniqnin runakuna rumikunawan chamqaptinkupas manam kutipakurqachu, aswanqa ayqikurqam (Juan 8:57-59).

¿Yaqachu Jesus hina controlakuq kachwan? Arí. Apostol Pedrom kaynata nirqa: “Cristopas qamkunaraykum ñakarirqa hinaspam qatipakunaykichikpaq hina kawsakurqa, chaynapi imayna kasqanta allintapuni qatipakunaykichikpaq”, nispa (1 Ped. 2:21). Pantaq runa kachkaspanchikpas Jesus hina controlakuytaqa atichwanmi. ¿Imanasqataq Jesus hina controlakuyninchikqa allin?

Achka wataña Diosta yupaychaspanchikpas, rimasqanchikta hinaspa ruwasqanchikta mana controlakuspaqa Diostam llakichichwan.

Moisesmanta yachaykusun, payqariki “llapallan runakunamantapas llumpay uchuychakuqmi karqa” (Num. 12:3). Watan-watan Israel runakuna piñachiptinpas Moisesqa manam paykunawanqa piñakuqchu. Ichaqa huk kutipim paykunawan llumpa-llumpayta piñakururqa yaku mana kasqanmanta rimapakusqankurayku. Chaymi piñasqallaña paykunata kaynata nirqa: ‘Uyariychik rumi sunqu runakuna: ‘¿Kay qaqamantachu tomanaykichikpaq yakuta hurqurusaqku?’, nispa (Num. 20:2-11).

Chay kutipiqa Moisesqa piñakururqam, manataqmi taytanchik Jehovatapas hatuncharqachu yaku qusqankumantaqa (Sal. 106:32, 33). Chayraykum taytanchik Jehova nirqa Israelpa mirayninkunaman qunan allpaman mana yaykunankumanta (Num. 20:12). Maynatachiki Moisesqa wañukunan punchawkama ñakakullarqa chay kutipi piñakusqanmantaqa (Deut. 3:23-27).

¿Imatam kaymanta yachachwan? Achka wataña Diosta yupaychaspapas manam haykapipas piñachiwaqninchikkunataqa nanay simiwanqa imatapas ninanchikchu (Efes. 4:32; Col. 3:12). Wakinpiqa yuyaqña kasqanchikraykum imawanpas chaylla piñakuchwan. Ichaqa Moises hina piñakuruspaqa, una-unay wata Dios yupaychasqanchiktam yanqacharuchwan. Chaynaqa, ¿imam yanapawasun controlakuq kanapaq?

Taytanchik Jehovatayá mañakusunchik atiyninwan yanapaykuwananchikpaq. Diosqa munanmi runankuna controlakuq kanankuta. Chayna kanankupaqmi yanapan (Luc. 11:13). Diosqa yanapawasunchikmi atiyninwan controlakuq kanapaq (Filip. 4:13). Taytanchik Jehovaqa yanapawasuntaqmi kuyakuq kanapaqpas. Kuyakuq kayninchikmi yanapawasun controlakuq kanapaq (1 Cor. 13:5).

Controlakunanchikpaq mana yanapawaqninchik kaqkunamantayá karunchakusun. Amayá internetpipas nitaq imapipas yanqa kaqkunataqa qawasunchu. Chaykunaqa tanqawanchik mana allinta ruwanallapaqmi (Efes. 5:3, 4). Karunchakunanchikmá mana allinta ruwanapaq tanqawaqninchikkunamantaqa (Prov. 22:3; 1 Cor. 6:12). Punta vidanpi huchapakuypi puriq runaqa manañamá qawananchu chaymanta rimaq qillqakunataqa nitaq videokunatapas.

 Wakinpiqa sasachakusunpaschá controlakuq kanapaq. Ichaqa kallpanchakuspanchikqa hinaspa taytanchik Jehovapa yanapakuyninwanqa atisunmi (2 Ped. 1:5-8). Taytanchikqa yanapawasunmi mana allinkunata atipanapaq, rimayninchikta hinaspa ruwayninchikta controlakunapaq. Chaynatam Paultawan Marcosta yanaparqa mana chaylla piñakuq kanankupaq. Huk iñiqmasinchikpas chaylla piñakuqmi karqa, wakin carro apaqkunawanmi qaqchanakuqku. ¿Imataq yanaparqa mana chaylla piñakuq kananpaq? Paymi willakun: “Sapa punchawmi taytanchik Jehovata mañakurqani yanapaykuwananpaq, controlakuymanta rimaq qillqanchikkunatapas ñawincharqanim, umallamantataqmi yachaq kani bibliapi controlakuymanta rimasqankunatapas. Kunankamapas hinallam sapa punchaw kallpanchakuchkani mana chaylla piñakuq kanaypaq. Chaymantapas, imamanpas rinay kaptinqa tiempochawanraqmi rini, chaynapi utqayman rispa mana piwanpas qaqchanakunaypaq”, nispa.

Wakinpi mana controlakuspaqa manapaschá munasunchu Diosta mañakuytaqa. Ichaqa chayna kaspaqa astawanmi Diosta mañakunanchik. Mañakusunyá pampachaykuwananchikpaq, controlakuq kanapaq yanapaykuwananchikpaq, hinaspa amaña yapamanta chay pantayman wichiykunanchikpaq (Sal. 51:9-11). Sunqumanta mañakuptinchikqa taytanchikqa uyariykuwasunmi (Sal. 102:17). Apostol Juanmi nirqa Jesusqa yawarninwan lliw huchanchikkunata mayllawasqanchikta (1 Juan 1:7; 2:1; Sal. 86:5). Taytanchik Jehovaqa niwanchikmi runamasinchikkunata haykakamapas pampachanapaq. ¿Imanasqa? Chayna pampachakuq kasqanraykum. Chaymi mana iskayrayananchikchu pampachawananchikmantaqa (Mat. 18:21, 22; Col. 3:13).

Taytanchik Jehovaqa manam allinpaqchu qawarqa chunniqpi Moisespa piñakusqantaqa. Ichaqa pampachaykurqam. Chaymi bibliapas nin Moisesqa qatipakunapaq hina kasqanmanta (Deut. 34:10; Heb. 11:24-28). Taytanchik Jehovaqa manamá Moisestaqa saqirqachu Israelpa mirayninkunaman qusqan allpaman yaykunantaqa. Ichaqa hamuq tiempopim kay allpa pachanchik sumaq huerta kaptin kawsarichinqa wiña-wiñaypaq kawsakunanpaq. Ñuqanchikpas controlakuq kanapaq kallpanchakuspaqa kay pachapim wiña-wiñaypaq kawsakusunchik (1 Cor. 9:25).