„Кеда мло братучети почминѓа те распрајнел пе манцар, астарѓум ле тари мен хем почминѓум те тасавав ле. Ало манге те мударав ле“ (Пол).

„Кхере, хољанава сине бут сигате чак баши најтикни бути. Пхагава сине мебел, играчке, са со ка авел сине манге ко вас“ (Марко).

Амен шај на сием добором насилна сар акала дуј примерија. Сепак, понекогаш саринен амен иси амен проблеми те контролирина амен. И главно причина башо акава тано о грево кова со наслединѓем ле таро прво мануш, о Адам (Рим. 5:12). Несавенге, сар сој о Пол хем о Марко, тано пхаро те контролиринен пли холи. Јаверенге нане локхо те контролиринен пле мисле. Шај цело време размислинена башо буќа со даравкерена лен или, палем, мучинена пе негативна мисленцар. А иси асавке да коленге тано пхаро те издржинен те на керен неморал, те пиен или те користинен дрога.

Окола со на контролиринена пле мисле, желбе хем постапке шај те уништинен пло живото. Ама, на значинела кај аменцар да мора аѓаар те овел. Со шај те поможинел амен? И самоконтрола. Те шај те развина хем те сикава акаја особина, те дикха трин пучиба: 1) Сој тани и самоконтрола? 2) Соске тани добором важно? 3) Сар шај те развина акаја особина која со авела таро свети дух? (Гал. 5:22, 23). А пало адава ка дикха со шај те керел секова јекх амендар ако понекогаш тано аменге пхаро те сикава самоконтрола.

Околе со иси ле самоконтрола на перела ки секоја провокација. Наместо адава, пазинела те на керел лафи хем те на постапинел ко начин со на свиџинела пе е Девлеске.

Таро е Исусескоро пример сикљоваја со значинела те сикавел пе самоконтрола. И Библија вакерела: „Кеда вреџинена ле сине, на иранела сине вреџибаја. Кеда цидела сине муке, на заканинела пе сине, него мукхља о буќа ко васта е Судијаске кова со праведно судинела“ (1. Пет. 2:23). О Исус сикавѓа асавки самоконтрола кеда лескере душмања асана сине леске џикоте сине ковимо ко стубо (Мат. 27:39-44). Ов сикавѓа бари самоконтрола кеда о верска водачија пробинена сине „астарен ле ко лафи“ (Мат. 22:15-22). Хем кобор шукар пример денѓа амен кеда несаве хољаме Евреија леле бара те фрден ки лесте! Наместо те иранел ленге, о Исус гаравѓа пе хем иклило таро храми (Јован 8:57-59).

Шај ли амен да те постапина сар о Исус? Оја, шај џи негде. О апостол Петар пишинѓа: „О Христос цидинѓа муке туменге хем денѓа тумен пример ко са те џан пало лескере чекорија“ (1. Пет. 2:21). Спрема адава, иако сием несовршена, шај те џа пало лескоро пример хем те сикава самоконтрола. Соске акава тано бут важно?

Мора те овел амен самоконтрола ако мангаја те овел амен е Јеховаскири милост. Чак ако бершенцар верно служинаја е Јеховаске, шај те нашава амаро амалипе леа ако на контролиринаја амаре лафија хем постапке.

Размислин башо Мојсеј, кова со ко адава време сине „о најкротко таро са о мануша ки пхув“ (4. Мој. 12:3). Откеда бершенцар трпинѓа е Израелцонгоро жалибе, ки јекх прилика ов нашавѓа пли самоконтрола. Бут хољанѓа кеда ола палем жалинѓе пе кај нане доволно пани. Ов строго иранѓа е народоске, аѓаар со вакерѓа: „Шунен акана, тумен со сиен бунтовникија! Ваљани ли тари акаја карпа те икала туменге пани?“ (4. Мој. 20:2-11).

О Мојсеј на сикавѓа самоконтрола. На денѓа е Јеховаске и слава башо адава чудо преку кова со денѓа лен пани (Пс. 106:32, 33). Адалеске, о Јехова на дозволинѓа леске те кхувел ки Ветими пхув (4. Мој. 20:12). Џи ко крајо таро пло живото, о Мојсеј веројатно каинѓа пе со на сикавѓа самоконтрола (5. Мој. 3:23-27).

Со сикљоваја таро акава? Чак ако сием ко чачипе бут берша, никогаш на ваљани те кера лафи бизо поштовање околенцар со нервиринена амен или околенцар со ваљани ленге исправка (Еф. 4:32; Кол. 3:12). Точно тано кај, сар со пхујроваја, шај те овел аменге са попхаро те ова стрплива. Ама, сетин тут ко Мојсеј. На би мангаја те румина амаро шукар анав ко Јехова аѓаар со ка пропуштина те сикава самоконтрола. Со ка поможинел аменге те сикава акаја бут важно особина?

Молин тут башо свети дух. Соске? Адалеске со и самоконтрола тани особина со авела таро е Девлескоро духо, кова со о Јехова дела ле околенге со родена ле лестар (Лука 11:13). Преку пло духо, ов дела амен и потребно сила (Фил. 4:13). О Јехова шај те поможинел амен те развина о јавера да особине со авена таро духо сар, на пример, о мангипе, кова со ка керел те овел аменге полокхо те сикава самоконтрола (1. Кор. 13:5).

Избегин о буќа со ка керен те овел туке попхаро те сикаве самоконтрола. На пример, ма пхрав интернет-стране или те бирине забава коте со сикавела пе погрешно понашибе (Еф. 5:3, 4). Уствари, мора те аракха амен таро са со шај те чхивел амен те постапина погрешно (Изр. 22:3; 1. Кор. 6:12). Ако некаске нане локхо те контролиринел пле сексуална желбе,  на ваљани ни хари те читинел романтична лила или те дикхел романтична филмија.

Шај аменге пхаро те применина акава совет. Сепак, ако трудинаја амен, о Јехова ка дел амен сила те контролирина амен (2. Пет. 1:5-8). Ов ка поможинел амен те контролирина амаре мисле, лафија хем постапке. Доказ башо акава тане о Пол хем о Марко, кола со сине спомниме англедер. Секова јекх лендар сиклило те контролиринел пе хем те на хољанел сигате. Размислин башо јекх пхрал кова со често хољанела сине сигате џикоте возинела, па чак распрајнела пе сине е јавере возаченцар. Со керѓа ов башо адава? Ов вакерела: „Секова диве молинава ман сине искрено. Проучинава сине статие баши самоконтрола хем сиклиљум ки годи библиска стихија со шај те поможинен манге. Иако бершенцар керава бути ки акаја особина, секова сабај вакерава манге кобор тано важно те овав смиримо. Освен адава, трудинава ман те икљовав порано кхералдан те шај ма те сиѓарав“.

Понекогаш нане те сикава самоконтрола. Кеда ка случинел пе асавко нешто, шај ка лаџа те молина амен е Јеховаске. Ама, уствари, тегани и молитва тани аменге највише потребно. Адалеске, одма молин тут е Јеховаске. Молин ле те простинел туке, роде лестар те поможинел туке, хем ов одлучно те на кере и исто грешка (Пс. 51:9-11). Ма мислин кај о Јехова нане те шунел тли молитва ако искрено молинеа ле те простинел туке (Пс. 102:17). О апостол Јован сетинкерела амен кај о рат таро е Девлескоро Чхаво „чистинела амен таро секова грево“ (1. Јов. 1:7; 2:1; Пс. 86:5). Ма бистре кај о Јехова аџикерела пле слугендар ки Пхув секогаш те простинен е јаверенге. Адалеске, шај те ова увериме кај ов да ка керел о исто баши аменге (Мат. 18:21, 22; Кол. 3:13).

Е Јеховаске на сине мило кеда о Мојсеј ко јекх моменти нашавѓа самоконтрола ки пустина. Сепак, о Јехова простинѓа леске. Е Девлескоро Лафи вакерела кај о Мојсеј сине мануш коле со сине ле бут бари вера, хем кај тано пример аменге авдиве (5. Мој. 34:10; Евр. 11:24-28). О Јехова на дозволинѓа леске те кхувел ки Ветими пхув, ама ка дозволинел леске те живинел вечно ко рај ки Пхув. Амен да ка шај те живина вечно ако трудинаја амен те развина хем те сикава акаја бут важно особина — самоконтрола (1. Кор. 9:25).