«Κάνα μο ξάδελφος χαλάς-πες μάντζαρ, ασταρντόμ-λες κατά κουρλό για τι τασαβάβ-λες. Αβέλας-μαν τι μουνταράβ-λες».​—Πολ.

«Κχερέ, πφανγκιόνας μπουτ εύκολα μο νεύρα. Πφανγκάβας έπιπλα, παιχνίδια, σο αρακχάβας ανγκλά-μάντε».​—Μάρκο.

Αμέν μπορεί μα τι αβάς αζόμ άγριοι σαρ ανταλά ντούι τζενέ. Όμως, σαρέ δυσκολίντιβασα μπάζιμα τι κεράς κουμάντος αμαρό νεαυτός. Πιο μπουτ, ανταβά αβέλα-πες σόσκε λιντάμ ι αμαρτία κατά πρώτος τζενό, κατά Αδάμ. (Ρωμ. 5:​12) Μερικοί, σαρ ο Πολ ντα ο Μάρκο, δυσκολίντιβενα τι ατσσικιαρέν πουμαρέ νεύρα. Γιαβερένγκε μπορεί τι αβέλ δύσκολος τι κερέν κουμάντος οντουλά σο σκεφτίνενα. Ναστί νικαβένα πουμαρέ γκοντιάταρ ο πράγματα σο νταραβένα-λεν ή λένα λένγκι ζορ. Γιαβερά πάλι μπορεί τι δυσκολίντιβενα τι ατσσικιαρέν-πες για μα τι κερέν λουμνιπέ, τι πιν ή τι λεν ναρκωτικά.

Οντουλά σο να κερένα κουμάντος οντουλά σο σκεφτίνενα, οντουλά σο μανγκένα ντα οντουλά σο κερένα κα καταστραφίνεν πουμαρί ζωή. Όμως, αμαρέ βαστέστε ισί μα τι αβέλ-πες ανταβά αμένγκε. Σαρ; Κάνα τθεράσα εγκράτεια, δηλαδή κάνα ατσσικιαράσα αμαρό νεαυτός. Για τι βοηθίντιβας τι κεράς-λες ανταβά, κα ντικχάς τριν ερωτήσεις: (1) Σο μανγκέλα τι βακερέλ τι ατσσικιαράς αμαρό νεαυτός; (2) Σόσκε ισί σημαντικός ανταβά; (3) Σαρ κα τθεράς ανταγιά ιδιότητα, σο ισί αντρέ κο “καρπός κι πνευμάσκο”; (Γαλ. 5:​22, 23) Σοράν, κα ντικχάς σο μπορίνασα τι κεράς άμα μπάζιμα ναστί ατσσικιαράσα αμαρό νεαυτός.

Ο τζενό σο ατσσικιαρέλα πο νεαυτός να κερέλα οντουβά σο αβέλα λέσκε πρώτα. Αλλά κερέλα κουμάντος πο λάφια ντα οντουλά σο κερέλα για μα τι στεναχωρίνελ ι Ντεβλές.

Ο Ιησούς σικαντάς αμένγκε σο μανγκέλα τι βακερέλ τι ατσσικιαράς αμαρό νεαυτός. Η Αγία Γραφή βακερέλα: «Κάνα προσβαλίνενας-λες, να προσβαλίνελας βοβ-ντα. Κάνα ταλαιπωρίντιβελας, να νταραβέλας, αλλά μουκχλάς-πες Οντουλέστε σο κρίνελα δίκαια». (1 Πέτρ. 2:​23) Ο Ιησούς σικαντάς ότι ατσσικιαρέλας πο νεαυτός κάνα οντουλά σο τζάνας λέσαρ κόντρα πρασάνας-λες καζόμ ισινέ ιμπλαντό κο κας. (Ματθ. 27:​39-44) Πιο τζανγκλέ ανταλέσταρ, σικαντάας καζόμ μπουτ ατσσικιαρέλας πο νεαυτός κάνα ο παπάζια σο μισίνενας-λες πουτσένας-λες μπουτ πράγματα για τι κερέν-λες τι βακερέλ κάτι λάθος. (Ματθ. 22:​15-22) Ντα σο σουκάρ παράδειγμας μουκχλάς κάνα μερικοί Ιουδαίοι σο ισινέ χολιαμέ λιντέ μπαρά για τι ντεν-λες! Αντίς τι κερέλ λένγκε βοβ-ντα κάτι ασακό, «ο Ιησούς γκεραντάς-πες ντα νικίστιλο αβρί κατά ναός».​—Ιωάν. 8:​57-59.

Μπορίνασα τι κεράς οντουβά σο κερντάς ο Ιησούς; Βα. Ο απόστολος Πέτρος γραφιντάς: «Ο Χριστός-ντα τσσιντιντάς μπουτ τουμένγκε ντα μουκχλάς τουμένγκε παράδειγμας για τι ακολουθίνεν λέσκε βήματα πιστά». (1 Πέτρ. 2:​21) Παρόλο σο ισινάμ ατελείς, μπορίνασα τι ατσσικιαράς αμαρό νεαυτός σαρ κερντάς ο Ιησούς. Σόσκε ισί σημαντικός ανταβά;

Πρέπει τι ατσσικιαράς αμαρό νεαυτός για τι τθεράς ι ευλογία ι Ιεχωβάσκι. Ατζέ-ντα άμα υπηρετίνασα πιστά ι Ιεχωβάς μπουτ καιρός, κα μπορίναας τι χασαράς αμαρί φιλία λέσαρ άμα να κεράσα κουμάντος οντουλά σο κεράσα ντα βακεράσα.

Ανέν τουμαρέ γκοντιάτε ι Μωυσής, σο «τθερέλας μπουτ πιο κοβλό γκι σαρέ κατά τζενέ οπράλ κι πφουβ» αζομάν. (Αριθ. 12:3) Αφού νταϊντίνελας με υπομονή μπουτ μπρεσά ο παράπονα ι Ισραηλιτένγκε, εκ φαρ ναστί ατσσικιαρντάς-πες. Χολιασάλο κάνα αρχισάλε τι κερέν πάλι παράπονα ι πανίσκε. Βακερντάς μπέτι τροπόσαρ κο λαός: «Ασουνέν, ακανά, τουμέν σο τζάνα κόντρα κο Ντεβέλ! Τι νικαβάς τουμένγκε αμέν πανί ακαλέ βραχόσταρ;»​—Αριθ. 20:​2-11.

Ο Μωυσής να κερντάς κουμάντος πο νεαυτός. Να ντινάς ι δόξα κο Ιεχωβά ι πανίσκε σο ντινάς-λεν με θαύμας. (Ψαλμ. 106:​32, 33) Οτθάρ, ο Ιεχωβά να μουκχλάς-λες τι τσσουβέλ-πες κο Υποσχεμέ Τθεμ. (Αριθ. 20:​12) Μέχρι κο ντιβές σο μουλό, ο Μωυσής μάλλον μετανιώνελας σο ναστί ατσσιλό ήρεμος.​—Δευτ. 3:​23-27.

Σο σικλιάσα-αμέν; Ατζέ-ντα άμα ισινάμ μπουτ καιρός κι αλήθεια, δεν πρέπει ποτές τι κεράς λάφι χωρίς σεβασμός οντουλένγκε σο χολιασκιαρένα-αμέν ή οντουλένγκε σο χρειαζίντιβενα διόρθωση. (Εφεσ. 4:​32· Κολ. 3:​12) Ισί μπαγιά ότι, καζόμ μπαριάσα, μπορεί μα τι τθεράσα μπουτ υπομονή μπάζιμα. Αλλά τι ντεν-τουμέν γκοντί ι Μωυσής. Ποτές να κα μανγκάας τι χαλαβάς ο λατσσό ναβ σο κερντάμ κι Ιεχωβάσκε γιακχά επειδή να κα ατσσικιαράς αμαρό νεαυτός. Σαρ κα τθεράς ανταγιά σημαντική ιδιότητα;

Τι προσευχίντιβεν για τι τθερέν άγιος πνεύμας. Σόσκε; Επειδή κάνα ατσσικιαράσα αμαρό νεαυτός σικαβάσα εκ ιδιότητα σο ισί αντρέ κο καρπός κι Ντεβλέσκε πνευμάσκο, ντα ο Ιεχωβά ντέλα πο πνεύμας οντουλέντε σο μανγκένα-λες λέσταρ. (Λουκ. 11:​13) Αντράλ πι πνευμάσταρ, ο Ιεχωβά ντέλα-αμέν ι ζορ σο χρειαζίντιβασα. (Φιλιπ. 4:​13) Επίσης, βοηθίνελα-αμέν τι τθεράς γιαβερά-ντα ιδιότητες σο ισί αντρέ κο καρπός κι πνευμάσκο, σαρ ισί η αγάπη, σο κα βοηθίνελ-αμέν τι ατσσικιαράς πιο μπουτ αμαρό νεαυτός.​—1 Κορ. 13:5.

Τι νασέν ντουρ σαρέ οντουλέ πραγματένταρ σο κερένα-τουμέν μα τι ατσσικιαρέν τουμαρό νεαυτός. Για παράδειγμας, τι ατσσόν ντουρ κατά ιστότοποι ντα κατά διασκεδάσεις σο νακχαβένα λάθος πράγματα. (Εφεσ. 5:3, 4) Κι πραγματικότητα, πρέπει τι νασάς σαρέ οντουλέ πραγματένταρ σο μπορεί τι τσσουβέν-αμέν κο πειρασμός τι κεράς κάτι γκεραλό. (Παρ. 22:3· 1 Κορ. 6:​12) Για παράδειγμας, εκ τζενό  σο ισί δύσκολος λέσκε τι ατσσικιαρέλ-πες για μα τι κερέλ λουμνικανέ πράγματα μπορεί τι χρειαζίντιβελ μα τι διαβάνελ ντα μα τι ντικχέλ ιτς βιβλία ντα ταινίες σο τθερένα τι κερέν ι μερακίντζαρ.

Μπορεί τι αβέλ αμένγκε δύσκολος τι κεράς ανταγιά συμβουλή. Όμως, άμα κεράσα προσπάθεια, ο Ιεχωβά κα ντελ-αμέν ι ζορ σο χρειαζίντιβασα για τι κεράς κουμάντος αμαρό νεαυτός. (2 Πέτρ. 1:​5-8) Κα βοηθίνελ-αμέν τι κεράς κουμάντος οντουλά σο σκεφτίνασα, οντουλά σο βακεράσα ντα οντουλά σο κεράσα. Ανταβά ντικχλάμ-λες τι αβέλ-πες κο Πολ ντα κο Μάρκο, σο σικλιλέ τι κερέν κουμάντος πουμαρό άγριος χαρακτήρας. Σκεφτίνεν ο παράδειγμας-ντα εκχέ πφραλέσκο σο ναστί ατσσόλας μπουτ φαρ ήρεμος κάνα οδηγίνελας, ερεσέλας μέχρι κο σημείος τι χαλ-πες. Σο κερντάς ανταλέσκε; «Κεράβας κάθε ντιβές προσευχή αντράλ μι γκίσταρ. Διαβάναβας μαθήματα σο βακερένα σαρ τι ατσσικιαράβ μο νεαυτός ντα ατσσικιαράβας μι γκοντιάτε εδάφια σο τθερένας σχέση ανταλέ πραγμάσαρ. Παρόλο σο μαράβα-μαν μπουτ μπρεσά, ατζέκ ατζέκ ανάβα μι γκοντιάτε κάθε πρωί ότι πρέπει τι ατσσάβ ήρεμος. Επίσης, κάνα τθεράβα εκ ραντεβού, νασάβα νωρίς για μα τι σιγκιαράβ κο ντρομ».

Ισί φαρ σο ναστί ατσσικιαράσα αμαρό νεαυτός. Κάνα αβέλα-πες ανταβά, μπορεί τι λατζάσα μπουτ τι κεράς προσευχή κο Ιεχωβά. Αλλά αζομάν ισί σο πρέπει τι κεράς πιο μπουτ προσευχή. Οτθάρ, κερέν σουγκό προσευχή κο Ιεχωβά. Μολίνεν-λες τι συγχωρίνελ-τουμέν, μανγκέν λέσταρ βοήθεια ντα τι αβέν αποφασισμέ μα τι κερέν ο ίδιος λάθος. (Ψαλμ. 51:​9-11) Μα τι νακχέλ τουμαρέ γκοντιάταρ ότι ο Ιεχωβά να κα ασουνέλ-τουμέν κάνα προσευχίντιβενα τι σικαβέλ τουμένγκε έλεος. (Ψαλμ. 102:​17) Ο απόστολος Ιωάννης ανέλα αμαρέ γκοντιάτε ότι ο ρατ ι Ντεβλέσκε Τσσαβέσκο «καθαρίνελα-αμέν σαρέ κατά αμαρτίες». (1 Ιωάν. 1:7· 2:1· Ψαλμ. 86:5) Τι ντεν-τουμέν γκοντί ότι ο Ιεχωβά βακερέλα πι υπηρετόνγκε τι συγχωρίνεν μπουτ φαρ. Οτθάρ, μπορίνασα τι αβάς σίγουροι ότι κα κερέλ βοβ-ντα ο ίδιος αμέντζαρ. ​—Ματθ. 18:​21, 22· Κολ. 3:13.

Ο Ιεχωβά στεναχωρισάλο κάνα για χάνικ ο Μωυσής να ατσσικιαρντάς πο νεαυτός κι έρημος. Όμως, συγχωριντάς-λες. Ντα ο Λάφι ι Ντεβλέσκο βακερέλα ότι ο Μωυσής ισινέ μπουτ πιστός τζενό. (Δευτ. 34:​10· Εβρ. 11:​24-28) Ο Ιεχωβά να μουκχλάς ι Μωυσής τι τσσουβέλ-πες κο Υποσχεμέ Τθεμ, αλλά κα μουκχέλ-λες τι τζουβντιόλ κο Παράδεισος κι πφουβ ντα κα ντελ-λες ζωή για πάντα. Αμέν-ντα μπορίνασα τι τθεράς ζωή για πάντα άμα μαράσα-αμέν τι ατσσικιαράς αμαρό νεαυτός σο ισί εκ μπουτ σημαντική ιδιότητα.​—1 Κορ. 9:25.