Paul utsi: “Ngesikhatsi umzala wami alwa nami, ngambamba ngabhongwane futsi ngamekhama, bengifuna kumbulala.”

Marco utsi: “Ekhaya bengitfukutseliswa yintfo lencane. Bengivele ngitfukutsele nje ngaphandle kwesizatfu. Bengiphihlita yonkhe itfo lesembikwami.”

Akusitsi sonkhe lesitfukutsela ngelizinga lelifana nelalaba lababili. Nobe kunjalo, sonkhe sinabo bumatima bekutibamba ngaletinye tikhatsi. Sizatfu lesiyinhloko kutsi sinesono lesasitfola ku-Adamu. (Rom. 5:12) NjengaPaul naMarco labanye banayo inkinga yekutibamba. Labanye bakutfola kumatima kulawula indlela labacabanga ngayo. Sibonelo saloko kutsi bahlale bacabanga ngetintfo letibetfusako nobe letibacedza emandla. Labanye kungenteka babe nebumatima bekubalekela kutiphatsa lokubi, kusebentisa kabi tjwala nekusebentisa kabi tidzakamiva.

Bantfu labangalawuli indlela labacabanga ngayo, tifiso tabo nendlela labenta ngayo tintfo bangalimata kuphila kwabo. Nobe kunjalo, singayibalekela lemiphumela lemibi. Kanjani? Ngekutsi sitibambe. Kuze sikhone kukwenta loko asesicoce ngemibuto lemitsatfu: (1) Kuyini kutibamba? (2) Kungani kubalulekile? (3) Singabusebentela njani lobuntfu lobuyincenye ‘yetitselo temoya’? (Gal. 5:22, 23) Sitawubese sicoca ngaloko lesingakwenta nangabe ngaletinye tikhatsi singakhoni kutibamba.

Umuntfu lokhonako kutibamba akatsatsi sinyatselo ngaso sonkhe sikhatsi nakwenteka lokutsite. Kunaloko uyakugwema kukhuluma nobe ente tintfo ngendlela lengeke imjabulise Nkulunkulu.

Jesu wasikhombisa kutsi kusho kutsini kutibamba. LiBhayibheli litsi: “Naketfukwa akazange aphindzisele ngekwetfuka. Nangesikhatsi ahlushwa akazange asongele, kodvwa watibeka kuloyo lowehlulela ngekulunga.” (1 Phet. 2:23) Jesu watibamba ngesikhatsi titsa takhe tihlekisa ngaye nakaselugodvweni lwekuhlushwa. (Mat. 27:39-44) Waphindze wakhombisa kutibamba ngesikhatsi baholi benkholo bambuta imibuto leminyenti kuze bamente asho intfo lekabi. (Mat. 22:15-22) Wasibekela sibonelo lesihle nangesikhatsi emaJuda latfukutsele amjikijela ngematje! Kunekutsi awaphatse kabi, “Jesu wabhaca futsi waphuma ethempelini.”—Joh. 8:57-59.

Singakhona yini kulingisa sibonelo saJesu? Yebo, singakhona ngelizinga lelitsite. Umphostoli Phetro wabhala watsi: “Khristu wahlupheka ngenca yenu, wanishiyela sibonelo sekutsi nilandzele tinyatselo takhe edvute.” (1 Phet. 2:21) Ngisho nobe sinesono, singakhona kusilandzela edvute sibonelo saJesu sekutibamba. Kubaluleke ngani kutsi sitibambe?

Kufanele sitibambe kuze semukelwe nguJehova. Ngisho nobe sesikhonte Jehova ngekwetsembeka sikhatsi lesidze, bungani betfu naye bungasilahlekela nangabe singayilawuli indlela lesenta ngayo tintfo futsi singayilawuli indlela lesikhuluma ngayo.

Cabanga ngaMosi ‘lobekangumuntfu lotfobekile kwendlula wonkhe umuntfu labekhona emhlabeni’ ngaleso sikhatsi. (Num. 12:3) Ngemuva kweminyaka leminyenti abeketelela kukhonona kwema-Israyeli, Mosi wehluleka kutibamba. Waphindze watfukutsela ngesikhatsi bakhonona ngekutsi kute emanti. Wakhuluma kabi kulabantfu watsi: “Lalelani-ke, nine mahlubuka, sinikhokhele yini emanti kulelidvwala?”—Num. 20:2-11.

Mosi wehluleka kutibamba. Futsi akazange amdvumise Jehova njengobe kunguye lowaniketa labantfu emanti ngalokusimangaliso. (Hla. 106:32, 33) Umphumela waloko waba kutsi Jehova akazange amvumele Mosi kutsi angene eveni lesetsembiso. (Num. 20:12) Kungenteka Mosi watisola kuphila kwakhe konkhe ngenca yekwehluleka kutibamba.—Dut. 3:23-27.

Ngusiphi sifundvo lesisitfolako? Ngisho nobe sesikhonte Jehova sikhatsi lesidze, akukafaneli sibakhulumise kabi labo labasedzelelako nobe labadzinga kulungiswa. (Ef. 4:32; Khol. 3:12) Njengobe sikhula, ngaletinye tikhatsi kuba matima kubeketela. Khumbula Mosi. Asifuni kona buhlobo betfu lobuhle naJehova ngenca yekutsi siyehluleka kutibamba. Yini lesingayenta kuze sisebentele lobuntfu lobubaluleke kangaka?

Thantaza ucele umoya longcwele. Leni? Ngobe kutibamba kuyincenye yetitselo temoya longcwele waNkulunkulu, futsi Jehova uwuniketa labo labuwucelako. (Luk. 11:13) Jehova angasiniketa emandla lesiwadzingako asebentisa umoya wakhe longcwele. (Fil. 4:13) Jehova angaphindze asisite sikhone kutfutfukisa letinye tincenye tetitselo temoya, njengelutsandvo lolungasisita sikhone kutibamba.—1 Khor. 13:5.

Gwema nobe yini lengenta kube matima kutsi utibambe. Wabalekele ema-websites kanye netekutijabulisa letikhutsata kutiphatsa lokubi. (Ef. 5:3, 4) Liciniso likutsi kufanele sigweme nobe yini lengasilinga kutsi sente intfo lembi. (Taga 22:3; 1 Khor. 6:12) Nasi  sibonelo, umuntfu losheshe alingekele ekutiphatseni lokubi, kungafanele atigweme tincwadzi letikhutsata kutiphatsa kabi kanye nema-movie.

Kungase kube matima kulalela leseluleko. Nobe kunjalo, nangabe senta imetamo, Jehova utasiniketa emandla lesiwadzingako kuze sikhone kutibamba. (2 Phet. 1:5-8) Utasisita sikhone kulawula tintfo lesiticabangako, lesitishoko kanye netintfo lesitentako. Bufakazi baloko kutsi Paul naMarco lesikhulume ngabo ekucaleni bafundza kungabi neludlame nakwenteka intfo letsite. Cabanga ngemzalwane lobekavame kutfukutsela nakashayela, bekaze alwisane nalabanye. Yini layenta ngalesimo sakhe? Utsi: “Bengithantaza ngalokusuka enhlitiyweni onkhe malanga. Bengifundza tihloko letikhuluma ngekutibamba futsi bengetama kuwabamba ngenhloko emavesi eliBhayibheli lalusito. Ngisho nobe sekuphele iminyaka leminyenti solo ngetama kutibamba, ngihlale ngitikhumbuta njalo ekuseni kutsi ngifuna kwetama kuba nemoya lophasi. Nyalo sengisheshe ngisuke nangabe kukhona lapho ngijake khona.”

Ngaletinye tikhatsi sitawehluleka kutibamba. Nakwenteka loko singahle sitive sinemahloni ekuthantaza kuJehova. Kodvwa lesi kungaba sikhatsi sekutsi sithantaze mbamba kuJehova. Ngako thantaza kuJehova ngekushesha, mncenge kutsi akucolele. Cela kutsi akusite futsi utimisele kutsi ungaphindzi liphutsa lelifanako. (Hla. 51:9-11) Ungacabangi kutsi Jehova angeke ayilalele imithantazo yakho lesuka enhlitiyweni. (Hla. 102:17) Umphostoli Johane uyasikhumbuta kutsi ingati yeNdvodzana yaNkulunkulu “iyasihlanta kuto tonkhe tono.” (1 Joh. 1:7; 2:1; Hla. 86:5) Khumbula kutsi Jehova utjela tikhonti takhe kutsi tihlale ticolelana. Ngako singaciniseka kutsi natsi utasicolela.—Mat. 18:21, 22; Khol. 3:13.

Jehova weva buhlungu ngesikhatsi Mosi ehluleka kutibamba ehlane. Nobe kunjalo, wamcolela. LiVi laNkulunkulu lichaza Mosi ngekutsi bekayindvodza lenekukholwa futsi lokufanele siyilingise. (Dut. 34:10; Heb. 11:24-28) Jehova akazange amvumele Mosi kutsi angene eveni lesetsembiso, kodvwa utamvumela kutsi aphile epharadisi emhlabeni futsi amnikete kuphila lokuphakadze. Singakulangatelela kuphila phakadze nangabe sichubeka sisebenta kamatima kuze sikhone kutibamba.—1 Khor. 9:25.