Paul nagamba ati: “Omwana wa nyinarumi nyowe obuyatandikire kunkunganiza, nkamukwata omumiro natandika kumuniga. Nkaba ningonza kumwita.”

Marco nauwe nagamba ati: “Obunabaga ndi muka n’ekintu ekitaito kyambihizaaga muno. Nasiisaga entebe, ebidole by’abaana bange, rundi ekintu kyona ekyambaga omu maiso.”

Nitusobora kutahika ha rulengo oru. Baitu, obwire obumu itwena kitugumira kwetanga. Kinu kibaho habwokuba tukagwetwa ekibi kuruga hali Adamu omuntu ow’okubanza. (Bar. 5:12) Kusisanaho Paul hamu na Marco, abantu abamu kibagumira kutanga ekiniga ky’abo. Abamu nikisobora kubagumira kuba n’okwetanga omu biteekerezo. Baikara nibatekerezaaho ebintu ebirukuberalikiriza rundi ebirukubamaramu amaani. Kandi abandi nikisobora kubagumira kuleka kwejumbira omu bikorwa by’obusihani, kunywa amarwa, rundi kukozesa ebitokooza bwongo.

Abantu abalemwa kwetanga omu bitekerezo, omu bintu ebibegomba, hamu n’omu bikorwa by’abo nibasobora kusiisa obwomeezi bw’abo. Nitusobora tuta kwerinda kukora ensobi nk’egi? Kuraba omu kukurakuraniza okwetanga. Leka tubazeeho ebikaguzo bisatu ebiratukonyera: (1) Okwetanga nikimanyisa ki? (2) Habwaki kukuru? (3) Nitusobora tuta kukurakuraniza omulingo gunu oguletwa “ekyana eky’omwoyo”? (Bag. 5:22, 23, NW) Hanyuma nitwija kurora kiki ekitusobora kukora kakuba obwire obumu tulemwa kwetanga.

Omuntu anyakwine okwetanga takora buli kimu kyona ekyaba atekeriize. Baitu ayerinda kukora rundi kubaza ekintu kyona ekisobora kubihiza Ruhanga.

Yesu akatwoleka okwetanga nikimanyisa ki. Baibuli n’egamba eti: “Obuyajumirwe, tiyajuma: obuyabonabonesiibwe tiyakanga; baitu akehayo wenka hali ogu arukucwa omusango ogwobulyo.” (1 Pet. 2:23) Yesu akooleka okwetanga abanyazingwa be obu bamusekeriize obwakaba ahanikirwe ha muti. (Mat. 27:39-44) Kandi enyumaho akaba ayolekere okwetanga okw’amaani abebembezi b’ediini obubalengereho kumusonasona abaze ebigambo ebiramurugirramu akabi. (Mat. 22:15-22) Kandi akatuteraho ekyokurorraho kirungi muno Abayudaaya abakaba baine ekiniga obubalengereho kumuteera amabaale! Omu kiikaro ky’okuhoora enzigu, ‘Yesu akesereka yaturuka omu yekaru.’​—Yoh. 8:57-59.

Nikisoboka kuhondera ekyokurorraho kya Yesu? Ego, nitusobora kulengaho. Omukwenda Petero akahandiika ati: “Kristo nauwe akabonabonesebwa habwanyu, nabasigira ekyokurorraho, nukwo mukuratire omu bigerebye.” (1 Pet. 2:21) Nobukiraaba ngu tituhikiriire, nitusobora kuhondera ekyokurorraho kya Yesu kandi naitwe tuketanga. Habwaki kikuru kwetanga?

Nitwetaaga kwetanga kusobora kusemeza Yahwe. Nitusobora kusiisa enkoragana yaitu na Yahwe  kakuba tulemwa kwetanga omu bigambo rundi omu bikorwa n’obukiraaba ngu tumazire akasumi kaingi nitumuheereza.

Tekerezaaho Musa, “akabali omuculezi muno, okukira abantu bona abali ha maiso gensi” omu kasumi ako. (Kubar. 12:3) Kiro kimu Musa akalemwa kwetanga n’obukiraaba ngu akaba amazire emyaka nyingi agumiire okuhyema kw’Abaisaleri. Akakwatwa ekiniga obubayongiire kuhyema habw’okuburwa amaizi. Akabaliza abantu n’ekiniga n’agamba ati: “Muhurre ‘nu, inywe abemi; itwe turabaletera amaizi okuruga omu mwandara gunu?”​—Kubar. 20:2-11.

Musa akalemwa kwetanga. Atahe Yahwe ekitiinisa habw’okukora ekyamahano batunga amaizi . (Zab. 106:32, 33) Ekyarugiremu, Yahwe akatanga Musa kutaaha omu Nsi ey’Ekaba Eraganizibwe. (Kubar. 20:12) Nikizooka ngu Musa akeijukya ekiyakozere obwomeezi bwe bwona.​—Bir. 3:23-27.

Kinu nikitwegesa ki? N’obuturaaba tumazire emyaka nyingi omu mananu titusemeriire kugarukamu kubi abantu abatubihiza rundi abarukwetaaga kuhaburwa. (Bef. 4:32; Bak. 3:12) Ky’amananu ngu obutweyongera kukura kandi tukaceka, kyeyongera kutugumira kwetanga. Baitu ijuka eky’ahikire hali Musa. Titwakugondeze kusiisa ibara erirungi eritwikaire nitukolerra kumara emyaka nyingi habw’okulemwa kwetanga habw’akaire kake. Kiki kitusobora kukora kusobora kukurakuraniza omulingo gunu omurungi?

Saba otunge omwoyo ogurukwera. Habwaki? Habwokuba kwetanga guli gumu ha miringo eretwa ekyana eky’omwoyo ogurukwera, kandi Yahwe aha omwoyo gwe abo abagumusaba. (Luk. 11:13) Yahwe nasobora kukozesa omwoyo gwe kutuha amaani agaturukwetaaga kusobora kwetanga. (Baf. 4:13) Kandi nasobora kutukonyera kukurakuraniza emiringo endi eyeretwa ekyana eky’omwoyo nk’okugonza, okusobora kutukonyera kwanguhirwa kwoleka okwetanga.​—1 Kol. 13:5.

Wetantale ekintu kyona ekisobora kukuletera kulemwa kwetanga. Ekyokurorraho, wetantale emikura ha intaneti rundi eby’okwesemeza ebirumu ebikorwa ebibi. (Bef. 5:3, 4) Kandi tusemeriire kwetantara ekintu kyona ekisobora kutuletera kukora ekintu ekibi. (Nfu. 22:3; 1 Kol. 6:12) Ekyokurorraho, omuntu owakira kutunga ebitekerezo eby’okusihana nasobora kucweramu kimu kuleka kusoma ebitabu rundi kurora filimu ezirukukwata ha ngonzi.

 Nikisobora kutugumira kuteeka omu nkora obuhabuzi obu. Baitu kakuba twekamba, Yahwe naija kutuha amaani agaturukwetaaga kusobora kwetanga. (2 Pet. 1:5-8) Naija kutukonyera kwetanga omu bitekerezo, omu bigambo, hamu n’omu bikorwa. Paul na Marco abatusangirwe tubalizeeho bakasobora kwega kutanga ekiniga kyabo, ekirukwoleka ngu mali nikisoboka kwega okwetanga. Tekerezaaho n’ekyokurorraho eky’ow’oruganda ayakiraga kukwatirwa ekiniga abavugi ba motooka abandi, kandi ayakunganaga n’abo. Kiki ekyamukonyire kwega kwetanga? Nagamba ati: “Nasabaga muno buli kiro. Nasomaga ebicweka kuruga omu bitabu byaitu ebirukukwata ha kwetanga, kandi nkakwata omu mutwe Ebyahandiikirwe ebisobora kunkonyera. N’obukiraaba ngu hati mazire emyaka nyingi nindegaho kwetanga, buli kiro nyeteraho ekigendererwa eky’okwetantara kukwatwa ekiniga. Kandi ngenda kara nambere nsemeriire kugenda nukwo ndeke kwanguhiriza ekisobora kundetera kutabukira abavugi abandi.”

Obwire obumu tulemwa kwetanga. Kinu obukibaho nitusobora kwehurra kubi muno tukatiina n’okusaba hali Yahwe. Baitu ako nuko akaire akatusemeriire kusaba muno Yahwe. Nahabweki aho naaho saba hali Yahwe. Mwesengereze akuganyire, musabe akukonyere, kandi cweramu kimu kutongera kukora ensobi niyo emu. (Zab. 51:9-11) Otatekereza ngu Yahwe tarukwija kukuhuliiriza obw’oramusaba akuganyire. (Zab. 102:17) Omukwenda Yohana natwijukya ngu esagama y’Omwana wa Ruhanga “etwogyaho ebibi byona.” (1 Yoh. 1:7; 2:1; Zab. 86:5) Oijuke ngu Yahwe atererra abaheereza be kwikara nibaganyira. Nahabweki tukimanye ngu nauwe naija kutuganyira.​—Mat. 18:21, 22; Bak. 3:13.

Yahwe akabihirwa Musa obuyalemerwe kwetanga omu irungu. Baitu Yahwe akamuganyira. Kandi Ekigambo kya Ruhanga kibazaaho Musa nk’omuntu ayatuteriireho ekyokurorraho ekirungi eky’okwikiriza. (Bir. 34:10; Baheb. 11:24-28) Ky’amananu ngu Yahwe ataikirize Musa kutaaha omu Nsi ey’Ekaba Eraganiziibwe, baitu naija kumwikiriza kwikara omu Rugonjo Orurungi omu nsi kandi amuhe omugisa ogw’okutunga obwomeezi obutahwaho. Naitwe nitwija kutunga omugisa nugwo gumu kakuba turaikara nitulengaho muno kwetanga.​—1 Kol. 9:25.