«Одӥг пол мынам ӵыжы-выжые монэн споръяськыны кутскиз. Соку мон сое чыртытӥз кутӥ но кекатыны кутски. Мынам сое виеме потэ вал» (Пол).

«Дорам мон нокыӵе мугтэк пурӟисько вал. Мон тӥясько вал мебельмес, нылпиосмылэсь шудонъёссэс — ваньзэ, мар ки улам сюриз» (Марко).

Тросэз ми пӧлысь сокем лекесь ӧвӧл, вылды. Озьы ке но милемлы ваньмылы куддыръя секыт луэ асьмеды киямы кутыны. Валтӥсь муг, малы озьы луыны быгатэ — со сьӧлык, кудӥз милемлы выжиз нырысетӥ адямилэсь, Адамлэсь (Рим. 5:12). Куд-огъёсызлы, кылсярысь, Поллы но Марколы сямен, секыт асьсэды киязы возьыны. Мукетъёсызлы малпанъёссэс чакланы капчи ӧвӧл. Кылсярысь, соос ялан малпасько со сярысь, мар соосты кышкатэ но сюлмаськытэ. Куинетӥосызлы ялан нюръяськоно луэ мылпотонъёсынызы, кудъёсыз герӟаськемын азон-калгонэн, вина юонэн яке наркотикъёсын.

Адями, кудӥз ассэ кияз кутыны уг быгаты, аслыз ик урод каре. Нош мар кароно, озьы медаз луы шуыса? Будэтоно возиськыны быгатон сямез, кудӥз святой «духлэн емышез» пӧлы пыре (Гал. 5:22, 23). Со понна эскеромы куинь юанъёсты: 1) мар со сыӵе возиськыны быгатон? 2) Малы со туж кулэ? 3) Кызьы милемлы та сямез будэтоно? Озьы ик малпаськомы, мар кароно, куке милемлы секыт асьмеды киямы кутыны.

Адями, кудӥз возиськыны быгатэ, аслаз мылпотонъёсызъя гинэ уг улы. Со уг вера но уг лэсьты номыре, мар Инмарез ӝоже уськытыны быгатысал.

Иисус умой возьматӥз, кызьы астэ кияд кутыны луэ. Библиын гожтэмын: «Сое урод кылын тышкаськизы, нош Со пумитазы урод кылъёс ӧз вера. Курадӟытыкузы но пунэмзэ берыктонэн ӧз кышкаты — ваньзэ шонер Судить Карисьлэн кияз сётӥз» (1 Пётр 2:23). Иисус ассэ кияз возьыны быгатӥз, куке со кортӵогамын вал но куке сое тушмонъёсыз серем каризы (Матф. 27:39—44). Талэсь азьвылгес, куке религиозной кивалтӥсьёс Иисуслэн «вераськонысьтыз шексэ утчаса улӥзы», со соосын ӧз споръяськы (Матф. 22:15—22). Нош кыӵе умой адӟем карон возьматӥз милемлы Иисус, куке иудейёс со вылэ лекомыса изъёс зӥръяны малпазы! Иисус соослы пунэмзэ берыктыны ӧз тыршы, нош соослэсь ватӥськиз но «храмысь потыса кошкиз» (Иоанн 8:57—59).

Быгатӥськомы-а ми асьмеды Иисус сямен возьыны? Быгатӥськомы. Апостол Пётр гожтӥз: «Христос но асьме понна курадӟон чидаз, Солэн пытьы кузяз мед мыномы шуыса, асьмелы адӟем карон кельтӥз» (1 Пётр 2:21). Тырбыдэстэмесь луиськомы ке но, ми тыршиськомы Христослэн пытьы кузяз мыныны но асьмеды киямы кутыны. Малы со туж кулэ?

Та сямтэк Иеговалы ярамон луыны уг луы. Ми Иеговалы трос аръёс ӵоже ужаськомы-тыршиськомы ини ке но, кылъёсмес но ужъёсмес чаклатэк, милям соин кусыпъёсмы сӧриськыны быгато.

Тодамы ваёмы Моисеез, кудӥз «дунне вылысь вань адямиослэсь зӥбыт-востэм вал» (Лыд. 12:3). Кӧня ке дасо аръёс ӵоже со чидаса кылзӥз Израиль калыклэсь ӝожтӥськемзэ, нош одӥг пол ассэ кияз кутыны ӧз быгаты. Моисейлэн вожез потӥз, куке адямиос нош ик ӝожтӥськыны кутскизы, ву уг тырмы шуыса. Со йыркуръяськыса соослы вераз: «Тэрытскисьтэм калык, кылзӥське монэ, та изгурезьысь тӥледлы юыны ву поттоно ке шат?» (Лыд. 20:2—11).

Моисей ассэ кияз кутыны ӧз быгаты. Со Иеговаез ӧз данъя, куке паймымон амалэн ву потӥз (Пс. 105:32, 33). Соин сэрен Иегова ӧз лэзьы солы Сӥзем музъеме пырыны (Лыд. 20:12). Моисей вань улытозяз ассэ пыкылӥз, вылды, соку возиськыны ӧз быгаты шуыса (К. Зак. 3:23—27).

Малы дышетэ милемыз та учыр? Ми зэмлыкез кемалась тодӥськомы ини ке но, милемлы ноку уг яра гажатэк вераськыны соосын, кинъёс йырмес кур каро яке асьсэды шонертэм возё (Еф. 4:32; Кол. 3:12). Зэм но, арлыд трос луэмен но висёнъёсын сэрен, секытгес чиданэз возьматыны. Нош тодамы возёмы Моисейлэсь учырзэ. Милям уг поты, асьмеды киямы возьыны быгатымтэенымы, Иеговалы трос аръёс ӵоже ужам-тыршеммы юнме мед луоз шуыса. Кызьы милемлы та кулэ луись сямез будэтоно?

Святой дух курыса вӧсяське. Малы? Возиськыны быгатон Инмарлэн духезлэн емышез пӧлы пыре но, ми сое куриськомы ке, со милемлы сое сётэ (Лука 11:13). Иегова святой духез пыр сётэ милемлы кужым, кудӥз юрттэ асьмеды киямы возьыны (2 Кор. 4:7). Со сяна, Инмар юрттэ милемлы будэтыны святой духлэн емышез пӧлы пырись мукет сямъёсты но (озьы ик яратонэз), кудъёсызлы луыса ми быгатӥськомы асьмеды киямы кутыны (1 Кор. 13:5).

Палэнске ваньмызлэсь, мар тӥледлы люкетыны быгатэ асьтэды кияды кутыны. Кылсярысь, палэнске сайтъёслэсь но шутэтскон амалъёслэсь, кудъёсыз Инмарлы ярамон уг луо но мылкыдэз ӝуто шонертэм ужъёсын вырыны (Еф. 5:3, 4). Мукет сямен вераса, палэнсконо ваньмызлэсь, мар сьӧлыке вуттыны быгатэ (Мад. 22:3; 1 Кор. 6:12). Кылсярысь, азон-калгонлэсь утиськон понна, кин ке но ужпум кутоз, вылды,  палэнскыны книгаослэсь но фильмъёслэсь, кудъёсаз пиосмурт но кышномурт вискын кусыпъёс сярысь вераське.

Та визь-кенешез уже кутыны котьку ик капчи ӧвӧл. Нош ми лэсьтӥмы ке ваньзэ, мае быгатӥськомы, Иегова милемлы кужым сётоз, ми асьмеды киямы кутыны мед быгатомы шуыса (2 Пётр 1:5—8). Со юрттоз милемлы малпанъёсмес, кылъёсмес но ужъёсмес чакласа возьыны. Ӵапак озьы ик луиз Поллэн но Марколэн учыръёсазы, кудъёсыз сярысь статьялэн кутсконаз вераськиз: соос быгатӥзы лекъяськон сямзэс чакласа возьыны. Нош тани мукет агайлэн учырез, кудӥз, машинаен ветлыкуз, йыркуръяське вал но мукет водительёсын споръяськыны кутске вал. Мар со кариз? Агай вера: «Мон котькуд нунал ӟырдыт вӧсяськи. Мон эскери возиськыны быгатон сярысь статьяосты но та темая Библиысь кылбуръёсты дышетӥ. Та сямез будэтыны мон кӧня ке аръёс ӵоже тыршисько ини. Озьы ке но котькуд ӵукна мон аслым тодам вайытӥсько, макем кулэ астэ кияд кутыны. Со сяна, мон тыршисько дорысьтым вазьгес потыны, кулэ интые дыртытэк вуон понна».

Куддыръя ми ум быгатӥське асьмеды киямы возьыны. Сыӵе учыръёсы Иеговалы вӧсяськыны милемлы туж возьыт луылэ. Нош ӵапак со дыре милемлы тужгес но кулэ солы вазиськыны. Соин ик тырше ӝоггес Иеговалы вӧсяськыны. Инмарез сюлворыса куре, со тӥледыз простить мед кароз но тӥледлы мед юрттоз шуыса, озьы ик тырше азьланяз та янгышез лэсьтытэк улыны (Пс. 50:11—13). Эн малпалэ, Иегова тӥледыз уз кылзы шуыса (Пс. 101:18). Апостол Иоанн тодамы вайытэ, Иисус Христослэн вирыз «котькыӵе но сьӧлыклэсь асьмеды сузя» шуыса (1 Иоанн 1:7; 2:1; Пс. 85:5). Тодады возе: Иегова милесьтым мылкыдмес ӝутэ мукетъёсты простить карыны, кӧня гинэ соос милемлы пумит медам сьӧлыкалэ. Соку ми оскыны быгатомы, Инмар милемыз но простить кароз шуыса (Матф. 18:21, 22; Кол. 3:13).

Иегова туж ӝоже усиз, куке Моисей ассэ кияз кутыны ӧз быгаты. Но Инмар сое простить кариз. Библиын но гожтэмын, Моисейлэн туж юн осконэз вал шуыса. Милемлы солэсь адӟем кароно (К. Зак. 34:10; Евр. 11:24—28). Янгышез сэрен Моисей Сӥзем музъеме ӧз пыры ке но, ӝоген Иегова сое рай музъем вылын улыны улӟытоз но солы пырак улон кузьмалоз. Ми но оскыны быгатомы пырак улыны, асьмеды киямы возьыны тыршиськомы ке (1 Кор. 9:25).