Paul u ri: “Musi muzwala wanga a tshi nndevhela, ndo mbo ḓi mu khaṱhamedza nga mukulo nda mu tzhipa. Ndo vha ndo ḓivhudza u fhedza ngae.”

Marco u ri: “Musi ndi hayani, ndo vha ndi na mbilu ṱhukhu. Ho vha hu tshi duba buse, ndi tshi kwashekanya thundu, dzithoyi na tshiṅwe na tshiṅwe tshi re phanḓa hanga.”

Vhunzhi hashu ri nga si kaludze zwithu u fana na Paul na Marco. Fhedzi roṱhe ri nga balelwa u ḓifara nga zwiṅwe zwifhinga. Zwi itiswa ngauri roṱhe ri na tshivhi tshe ra tshi mamela kha Adamu. (Vharoma 5:12) Vhaṅwe u fana na Paul na Marco, vha a balelwa u ḓifara musi vho ḽa nyala. Vhaṅwe vha balelwa u langa zwine vha zwi humbula. Sa tsumbo, vha anzela u humbula nga ha zwithu zwine zwa vha tshuwisa kana zwine zwa vha kula nungo. Ngeno kha vhaṅwe, u sa ḓifara luvhi nga zwa vhudzekani, u sa nwesa na u sa shumisa luvhi zwidzidzivhadzi i tshi tou vha nndwa.

Hu nga vha na masiandoitwa a si avhuḓi kha vhane vha balelwa u langa zwine vha zwi humbula, nyemulo dzavho na zwine vha zwi ita. Fhedzi ri nga ita hani uri ri si welwe nga eneo masiandoitwa? Ri tea u ḓifara. Kha ri ambe nga ha mbudziso tharu dzine dza ḓo ri thusa: (1) Zwi amba mini u ḓifara? (2) Ndi ngani zwi zwa ndeme? (3) Ri nga ṱahulela hani u ḓifara samusi hu tshiṅwe tsha “zwi aṋwiwaho nga muya mukhethwa”? (Vhagal. 5:22, 23) Nga murahu, ri ḓo kona u vhona uri ri nga ita mini musi ri tshi kundelwa u ḓifara.

Muthu ane a ḓifara ha fhinduli nga u semana kana u ita zwithu zwine zwa ḓo sinyusa Mudzimu.

Yesu o vha tsumbo ya u ḓifara. Bivhili i ri: “Musi a tshi semiwa, ho ngo lifhedza. A tshi tambudzwa, ho ngo shushedza muthu, fhedzi o kumedzela zwoṱhe kha Ane a haṱula nga nḓila yo teaho.” (1 Pet. 2:23) O ḓifara musi a tshi khou goḓwa e kha danda ḽa tshengedzo. (Mat. 27:39-44) O ḓifara musi vharangaphanḓa vha vhurereli vha tshi mu vhudzisa mbudziso lunzhi-lunzhi u itela u mu fasha. (Mat. 22:15-22) O vha tsumbo yavhuḓi vhukuma ya u ḓifara musi a tshi poswa nga matombo nga Vhayuda vho sinyuwaho. Nṱhani ha u vha lifhedza, “Yesu a dzumbama, a bva thembeleni.”—Yoh. 8:57-59.

Naa ri nga edzisa tsumbo ya Yesu? Ee! Ri nga zwi kona. Muapostola Petro o ri: “Kristo o tambudzelwa inwi, a ni vhetshela tsumbo ine na tea u i tevhela nga vhuronwane.” (1 Pet. 2:21) Naho ri na tshivhi, ri nga ita zwoṱhe zwine ra nga kona u itela u edzisa tsumbo yawe ya u ḓifara nga vhuronwane. Ndi ngani ri tshi tea u edzisa tsumbo yawe?

Arali ri tshi ṱoḓa u takadza Yehova, ri tea u ḓifara. Ri nga xelelwa nga vhushaka hashu na Yehova arali ri sa langi zwine ra zwi ita na u zwi amba naho ro no fhedza tshifhinga tshilapfu ri tshi khou mu shumela.

Humbulani nga ha Mushe we a vha e “munna o vuḓaho u fhira vhanna vhoṱhe kha ḽifhasi” nga tshenetsho tshifhinga. (Num. 12:3) O konḓelela musi Vhaisiraele vha tshi gungula lwa miṅwaha minzhi. Fhedzi ḽiṅwe ḓuvha o kundelwa u ḓifara. O ḽa nyala musi vha tshi dovha vha gungula uri a hu na maḓi. O vha sema a ri: “Zwino thetshelesani inwi mashandukwa! Naa ri ni bvisele maḓi kha iḽi tombo ḽihulu?”—Num. 20:2-11.

Mushe o kundelwa u ḓifara. Ho ngo hulisa Yehova sa ene we a ita uri maḓi a vhe hone nga lwa vhuṱolo. (Ps. 106:32, 33) Zwenezwo zwo ita uri Yehova a si mu tendele a tshi dzhena Shangoni ḽo Fhulufhedziswaho. (Num. 20:12) Mushe a nga vha o ḓisola u vhuya u swika a tshi fa.—Dot. 3:23-27.

Ri guda mini? Naho ro no fhedza tshifhinga tshilapfu ri tshi khou shumela Yehova, musi vhaṅwe vhathu vha tshi ri dina kana vha tshi tea u kaidzwa, a ro ngo tea u amba navho nga lunyadzo. (Vhaef. 4:32; Vhakol. 3:12) Ngoho ndi uri musi ri tshi khou aluwa, ri a thoma u vha na mbilu ṱhukhu. Samusi hu kale ri tshi khou shumela Yehova, a ri ṱoḓi uri u sa ḓifara hashu zwi tshinye vhushaka hashu nae u fana na Mushe. Ri nga ṱahulela hani u ḓifara?

Rabelani ni humbele muya mukhethwa. Ndi ngani? Ndi ngauri u ḓifara ndi tshiṅwe tsha zwi aṋwiwaho nga muya mukhethwa nahone Yehova u u ṋea vhane vha mu humbela. (Luka 11:13) Wonoyu muya mukhethwa u nga ni thusa uri ni ḓifare. (Vhafil. 4:13) Yehova a nga dovha a ri thusa uri ri vhe na zwiṅwe zwi aṋwiwaho nga muya mukhethwa zwi ngaho sa lufuno nahone lwonolu lufuno lu nga ita uri zwi ri lelutshele u ḓifara.—1 Vhakor. 13:5.

Ni songo ita zwithu zwine zwa ita uri zwi ni konḓele u ḓifara. Sa tsumbo, iledzani website dza Inthanethe na vhuḓimvumvusi vhu re na vhuḓifari vhu songo kunaho. (Vhaef. 5:3, 4) Zwavhuḓi-vhuḓi, ni tea u iledza zwoṱhe zwine  zwa nga ita uri ni ite vhukhakhi. (Mir. 22:3; 1 Vhakor. 6:12) Muthu ane zwa mu lelutshela u ḓifara luvhi nga zwa vhudzekani, u tea u iledza u vhala dzibugu kana u vhona mimuvi ine ya karusa maḓipfele a zwa vhudzekani.

Zwi nga ri konḓela u ita zwenezwi zwithu. Fhedzi arali ra finya dza khwaṱha, Yehova a nga ri thusa uri ri kone u ḓifara. (2 Pet. 1:5-8) U ḓo ri thusa uri ri kone u langa zwine ra zwi humbula, zwine ra amba na zwine ra zwi ita. Yehova a nga ri thusa ngauri o thusa Paul na Marco uri vha kone u langa mbiti dzavho. Kha ri ambe nga ha muṅwe wahashu we a vha a tshi sinyuwa na u sema vhaṅwe musi a tshi khou reila. O guda hani u ḓifara? U ri: “Ndo vha ndi tshi rabela zwi tshi bva mbiluni ḓuvha ḽiṅwe na ḽiṅwe. Ndo vhala khandiso dzi ambaho nga ha u ḓifara na u rwela ngomani ndimana dzine dza nga nthusa. Naho ho no fhela miṅwaha ndi tshi khou lwisana nazwo, ndi a ḓihumbudza matsheloni maṅwe na maṅwe uri ndi dzule ndo dzika. Nahone musi ndi tshi khou ya huṅwe fhethu, ndi ita vhungoho ha uri ndi bve hu tshee na tshifhinga.”

Nga zwiṅwe zwifhinga, ri ḓo kundelwa u ḓifara. Zwi nga ita uri ri shone na u rabela. Fhedzi hetshi ndi tshone tshifhinga tshine ra tea u rabela ngatsho. Nga zwenezwo, rabelani nga u bonya ha iṱo. Ni humbele u farelwa lufhanga nga zwanḓa zwivhili, ni humbele thuso nahone ni ḓiimisele u sa tsha dovha na zwi ita. (Ps. 51:9-11) Yehova u ḓo thetshelesa yeneyo thabelo yaṋu i bvaho mbiluni. (Ps. 102:17) Ni songo hangwa uri muapostola Yohane uri malofha a Murwa wa Mudzimu a ri “ṱanzwa kha zwivhi zwoṱhe.” (1 Yoh. 1:7; 2:1; Ps. 86:5) Yehova u ṱoḓa vhashumeli vhawe vha tshi hangwela vha sa neti, zwi tou vha khagala uri na riṋe u ḓo ri hangwela.—Mat. 18:21, 22; Vhakol. 3:13.

Yehova ha ngo zwi takalela na luthihi musi Mushe a tshi balelwa u ḓifara sogani. Fhedzi o mu farela. Bivhili i amba uri ri tea u edzisa Mushe ngauri o vha a tshi fhulufhedzea nga maanḓa. (Dot. 34:10; Vhahev. 11:24-28) Yehova ho ngo tendela Mushe a tshi dzhena Shangoni ḽo Fhulufhedziswaho, fhedzi u ḓo mu tendela a tshi tshila Pharadisoni. Na riṋe ri nga wana vhutshilo vhu sa fheli arali ra ita zwoṱhe zwine ra nga kona u itela u ḓifara.—1 Vhakor. 9:25.