“Quando mi e el me primo èrino drio barufar, mi lo go ciapà par el col e go proà sofegarlo. Quel che mi volea I’era coparlo.” — Paul.

“Quando mi ero casa l’era fàcile vegner su le fumane. Mi spachea tuto quel che mi vedea davanti.” — Marco.

Fursi questa no la ze una situassion che la va suceder con noantri. Ma te ga belche sucedesto de perder el autocontrolo? L’è fàcile par i umani no gaver autocontrolo parché semo imperfeti. (Rom. 5:12) Ma, par persone come Paul e Marco, pol esser fadiga controlar la ràbia. Ma par altri fursi el problema l’è controlar i pensamenti, par no gaver pensamenti negativi o gaver massa paura. E par tanti altri, l’è fadiga gaver autocontrolo sora le so voie, de no doperar droghe, no far imoralità sessual o no bever tanto.

Se no semo boni de controlar quel che pensemo, quel che volemo e quel che femo, questo pol risultar in tanto sofrimento. Ma noantri podemo controlarse. Come? Ghe ocore gaver una dele qualità del fruto del spìrito che la ze el autocontrolo. (Gàl. 5:22, 23) Par giutarne a far questo ndemo veder tre punti: (1) Cossa che l’è el autocontrolo? (2) Parché che l’è importante gaverlo? (3) Cossa far par gaverlo? Dopo, anca ndaremo veder cossa far quando l’è fadiga gaver autocontrolo.

La persona che la ga el autocontrolo, sempre la pensa vanti de far qualcossa. La pensa in contentar a Dio in tuto quel che ela la parla e in quel che la fà.

Gesù el ga mostrà cossa che l’è gaver autocontrolo. La Bìblia la dise: “Quando l’era ofendesto, lu no’l ofendea mia. Quando el sofria, no el replichea mia, ma el se assea nele man de quel che giudica de maniera giusta.” (1 Pie. 2:23) Un dei esempi de che Gesù el ga bio autocontrolo l’è stà quando che lu l’era nel pal de tortura e le persone le ghe ridea drio. (Mat. 27:39-44) Nantra ocasion la ze stata quando che i lìderi religiosi i fea domande a Gesù spetando che lu el parlesse qualcossa che l’era mia giusto. (Mat. 22:15-22) Ancora nantra ocasion la ze stata quando arquanti giudei i ga ciapà sassi par trar in Gesù. Invesse de lu parlar qualcossa “lu l’è sol ndato via del témpio”. — Gioani 8:57-59.

Stesso che semo imperfeti, podemo imitar el esémpio de Gesù? El apòstolo Piero el ga scrito: “Cristo el ga sofrio par valtri assàndove un esémpio par valtri ndarghe drio dei so passi atentamente.” (1 Pie. 2:21) Noantri no saremo boni de imitar a Gesù de maniera perfeta ma podemo ndarghe drio dei so  passi atentamente. Parché che l’è importante gaver questa qualità?

L’è importante gaver el autocontrolo se volemo contentar a Geovà. No importa quanto tempo che servimo a Geovà, se noantri no semo boni de controlar quel che parlemo e quel che femo, podemo perder la nostra amicìssia con Lu.

Proa pensar nel esémpio de Mosè. Nela so època, “Mosè l’era de pi de che qualche altro, el omo pi manso de tuta la tera.” (Nùm. 12:3) Mosè el ga soportà el pòpolo de Israel tanti ani brontolando. Fin che l’è rivà un giorno che el se ga mia controlà. Nte un giorno el pòpolo el ga brontolà nantra volta che no ghen’era mia àqua, e in quel momento lì, el se ga mia controlà. L’è restà tanto inrabià e el ga dito ai israeliti: “Scolteme testardi! Valtri volé che femo vegner fora àqua de questo sasso?” — Nùm. 20:2-11.

Mosè no’l ga bio autocontrolo. Lu no’l ga dito che l’è stà Geovà che el ga fato vegner fora àqua del sasso. (Sal. 106:32, 33) Par causa de quel che Mosè el ga fato, Geovà no’l ga assà che lu el fusse rento dela Tera Prometesta. (Nùm. 20:12) Podemo dir che fin el giorno dela so morte Mosè el se ga ciamà gramo de perder el autocontrolo in quel momento. — Deu. 3:23-27.

Cossa che podemo imparar? Mai ghemo de mancar con rispeto con una persona che ne assa inrabià o che la ga bisogno de coression. (Efe. 4:32; Col. 3:12) Ma ricòrdate che, cossita come Mosè, se te perdi el autocontrolo te pol sporcar el to servìssio a Geovà. Come podemo gaver ancora de pi autocontrolo?

Domanda spìrito santo in orassion. Parché? Parché el autocontrolo la ze una qualità del fruto del spìrito santo de Dio e Geovà el dà spìrito santo a quei che lo domanda. (Luc. 11:13) Geovà el pol darne la forsa che ghemo de bisogno par meso del so spìrito santo. (Fil. 4:13) Lu anca pol giutarne a gaver ancora altre qualità del fruto del spìrito che le ndarà giutarne a gaver autocontrolo, come el amor. — 1 Cor. 13:5.

Ghemo de star distante de qualche roba che la ne fà gaver voia de far quel che  l’è sbalià. Alora, stà mia vardar site e altre tipi de diversion che insentiva questo. (Efe. 5:3, 4; Pro. 22:3; 1 Cor. 6:12) Par esémpio, se una persona la sa che la ga una fiachessa cola imoralità sessual, saria meio che ela restasse distante dei libri e filmi romàntichi.

Pol esser fadiga far questo, ma se femo sforso Geovà el ndarà darne la forsa che ghemo de bisogno par gaver autocontrolo. (2 Pie. 1:5-8) Lu el va giutarne a controlar quel che pensemo, quel che parlemo e quel che femo. Paul e Marco, che ghemo parlà vanti, i ga imparà a controlar la so personalità violenta. Varda el esémpio de nantro fradel, che el restea inrabià nela strada e fin el disea su ai altri motoristi. Cossa che lu el ga fato par gaver de pi autocontrolo? Lu el dise: “Mi fea pròpio tante orassion tuti i giorni. Anca mi studiea artìcoli che i parlea sora el autocontrolo e me ricordea de versìcoli bìblichi che i me giutea. Ancora che fà ani che mi fao questo sforso, sempre scomìnsio el giorno parlando a mi stesso: ‘Ancoi mi vao mantégnerme tranquilo.’ E quando mi go qualcossa de far, mi vao via de casa pi bonora, cossita l’è pi fàcile de no restar inrabià nela strada.”

Anca se ghemo vergogna parché ghemo perso el autocontrolo, l’è tanto importante far orassion a Geovà. In questo momento l’è ancora pi importante far orassion. Suplica che Geovà el te perdone e el te giute. E sìpia determinà a no far el medèsimo sbàlio. (Sal. 51:9-11) Sicuro che Geovà el te perdonarà. (Sal. 102:17) El apòstolo Gioani el ne ricorda: “El sangue de Gesù, el so Fiol, ne purifica de tuti i pecati.” (1 Gio. 1:7; 2:1; Sal. 86:5) Geovà el ne domanda de sempre perdonar i altri, alora questo ne fà esser sicuri che anca Lu el ne perdonarà. — Mat. 18:21, 22; Col. 3:13.

Geovà l’è restà pròpio disgustà con Mosè parché el ga perso el autocontrolo, ma lo ga perdonà. E la Bìblia la dise che lu l’è un grando esémpio de fede. (Deu. 34:10; Ebr. 11:24-28) Geovà el ga mia assà che el fusse rento dela Tera Prometesta. Ma el sarà tanto contento de ricéverlo par viver qua nela Tera. Anca noantri podaremo ricever questa benedission se semo boni de gaver el autocontrolo. — 1 Cor. 9:25.