“Nap’an ni yib e cousin rog ni be guy rogon ni nggu chamgow, ma aram mug malle’ nga k’angan nggu dun’uf. Gu baadag ni nggu li’ nge yim’.”​—Paul.

“Ra gu bay u tabinaw, mab mom ni gu ma damumuw ni yugu aram rogon ndariy ban’en nib kireb ni ke rin’ be’. Gu ma kirebnag e chugum u lan e naun, nge toys, fa yugu demtrug e n’en bay u paag mug kirebnag.”​—Marco.

Sana gathi er feni gel e damumuw ni ma yib ngodad. Machane, gad gubin ni bay yu ngiyal’ nib mo’maw’ ni ngad t’ared lanin’dad u boch ban’en. Re n’ey e bochan ni ke af e denen rok Adam ngodad ni ir e bin som’on e girdi’ ni immoy. (Rom. 5:12) Bay boch e girdi’ ni taareb rogorad ngak Paul nge Marco nib mo’maw’ ni ngar gagiyegnaged e damumuw rorad. Ma boch e girdi’ e ba mo’maw’ ni ngar gagiyegnaged rogon e tin yad ma lemnag. Bod ni, yugu yad ma lemnag boch ban’en ni ma k’aring e marus ngorad ara ma muleg lanin’rad. Ma boch e girdi’ e ba mo’maw’ ngorad ni ngar taleged yad ndab kur uned ko ngongol ndarngal, ara muun rrum nib pag rogon, ara ngaur fanayed boch e falay ni kireb.

Piin darur guyed rogon ni ngar gagiyegnaged rogon e lem, nge ar’ar, nge ngongol rorad e rayog ni ngar kirebnaged rogon e par rorad. Machane, rayog ni ngad taleged e re n’ey ndabi buch. Ni uw rogon? Aram e ngad guyed rogon ni ngaud t’ared lanin’dad u boch ban’en. Ngad weliyed e fulweg u dalip e deer nra ayuwegdad ni ngad rin’ed e re n’ey ni aram e: (1) Mang e t’ar laniyan’? (2) Mang nib ga’ fan e re n’ey? (3) Uw rogon ni ngad maruweliyed e re fel’ngin ney ni aram bang u “wom’engin gelngin Got nib thothup”? (Gal. 5:22, 23, NW) Tomur riy e gad ra weliy e n’en rayog ni ngad rin’ed ni faanra bay yu ngiyal’ nder yag ni ngad t’ared lanin’dad u boch ban’en.

Be’ ni manang rogon ni nge t’ar laniyan’ e gathi yug ra suk’ ban’en ngan’, me rin’ ni ka chingiyal’ nem. Bin riyul’ riy e, be’ ni aray rogon e der ma non ara ngongol u boch e kanawo’ nde m’agan’ Got ngay.

Ke dag Jesus ngodad rogon ni ngaud t’ared lanin’dad. Be gaar e Bible: “Ma faan nog e thin nib kireb ngak ma de ta’ puluwon ni thin nib kireb; ma faan nni gafgownag ma de gaar e bayi fulweg taban ngak e piin ni yad be gafgownag, machane me pag fan urngin ban’en ngak Got, ni ir fare Tapufthin nib mat’aw.” (1 Pet. 2:23) I t’ar Jesus laniyan’ u nap’an ni i moningnag e pi toogor rok u nap’an ni kan tining ko fare ley i gek’iy. (Matt. 27:39-44) U m’on riy miki t’ar laniyan’ u nap’an ni fith e pi tayugang’ ko teliw ngak boor e deer ni bochan e yad be guy rogon ni nge yog ban’en nde puluw. (Matt. 22:15-22) Kub manigil e kanawo’ ni dag nrayog ni ngan folwok riy u nap’an ni guy boch e Jew ni kar damumuwgad rogon ni ngar malangnaged! I “mithag Jesus ir nge chuw u lan fare tempel” ko bin nge guy rogon ni nge sulweg taban e kireb rorad.​—John 8:57-59.

Rayog ni ngad folwokgad rok Jesus, fa? Rayog ni ngad rin’ed e re n’ey u boch e kanawo’. I yoloy apostal Peter ni gaar: “Kristus e ir e gafgow ni bochmed me dag ngomed rogon ni ngam folwokgad rok, ni aram e nguum leked luwan ay.” (1 Pet. 2:21) Yugu aram rogon ndawor da flontgad, ma rayog ni ngaud leked luwan ay Jesus ni aram e ngaud folwokgad rok u rogon ni i t’ar laniyan’. Mang nib ga’ fan ni ngad rin’ed e re n’ey?

Faanra gad baadag ni ngad fel’gad u wan’ Jehovah, mab t’uf ni ngaud t’ared lanin’dad. Mus ni faanra ke  n’uw nap’an ni kad pigpiggad ngak Jehovah, ma rayog ni nge kireb e tha’ u thildad ni faanra darud gagiyegnaged e ngongol nge thin rodad.

Am lemnag Moses ni “ir e th’abi sobut’an’ u fithik’ e girdi’ nu fayleng” ko ngiyal’ nem. (Num. 12:3) Tomuren boor e duw ni k’adan’ u puluwon piyu Israel ko gun’gun’ ni yad be tay, machane me yan i tomur riy ma daki yag ni nge k’adan’. I damumuw u nap’an nra gun’gun’gad bayay ni bochan e de gaman e ran ni ngar unumed. Ma aram me non ngorad nib gel e thin ni yog ni be gaar: “Gimed e pi tatogopuluw nir, mu telmed! Mogned, gimed be lemnag ni nggu fekew e ran ko re war ney ngam unumed?”​—Num. 20:2-11.

De yag ni nge gagiyegnag Moses e damumuw rok. De yog ni Jehovah e Ir e ke ngongliy e re maang’ang nem ni nge pi’ e ran ngar unumed. (Ps. 106:32, 33) Ere bochan e re n’ey, ma aram e de pag Jehovah ni nge un nga lan fare Nam ni Kan Micheg. (Num. 20:12) Dabisiy ni i par Moses u n’umngin nap’an e yafos rok ni be kalngan’ ko n’en ni rin’ nde yag ni nge t’ar laniyan’.​—Deut. 3:23-27.

Mang e gad be fil ko re n’ey? Mus ni faanra ke n’uw nap’an ni kad uned ko tin riyul’, ma faanra ke rin’ ara ke yog be’ ban’en ni ke kirebnag lanin’dad ara ba t’uf ni ngad yal’uweged be’ ma susun e dab da nonad ngak u reb e kanawo’ nra m’ug riy ni gad be darifannag. (Efe. 4:32; Kol. 3:12) Riyul’ nnap’an ni gad ra pilibthir i yan ma rayog ni nge gel boch e mo’maw’ riy ni ngaud gum’an’gad yu ngiyal’. Machane dab mu pagtalin e n’en ni buch rok Moses. Dubdad ni ngad kirebnaged thidad u wan’ Jehovah ni bochan e de yag ni ngad t’ared lanin’dad. Ere uw rogon ni ngad maruweliyed e re fel’ngin ney nrib ga’ fan?

Mu yibilay gelngin Got nib thothup. Mang fan? Ya t’ar laniyan’ e aram bang u wom’engin gelngin Got nib thothup, ma Jehovah e ma pi’ gelngin nib thothup ngak e piin yad ma ning ngak. (Luke 11:13) Rayog ni nge fanay Jehovah gelngin nib thothup ni nge ayuwegdad ni ngaud t’ared lanin’dad. (2 Kor. 4:7) Ku rayog ni nge ayuwegdad ni ngad maruweliyed yugu boch e fel’ngin ni kub muun nga wom’engin gelngin nib thothup ni bod rogon e t’ufeg, ya aram e n’en nra momnag ngodad ni ngaud t’ared lanin’dad.​—1 Kor. 13:5.

Mu siyeg e pi n’en nra mo’maw’nag ngom ni ngam t’ar lanin’um. Bod ndab um man nga boch e website ko Internet ara um chuweg e chalban rom nga boch ban’en ni bay yaan e ngongol ni kireb riy. (Efe. 5:3, 4) Bin riyul’ riy e, thingar da siyeged urngin ban’en nrayog ni nge waliydad ni ngad rin’ed ban’en nib kireb. (Prov. 22:3; 1 Kor. 6:12) Bod ni be’ nib mom ngak ni nge un ko ngongol ndarngal e susun e dab i beeg e babyor ara i yaliy e kachido ni murung’agen e adag u thilin l’agruw ni’.

 Sana rayog ni nge mo’maw’ ni ngad folgad ko re fonow ney. Machane faan gad ra athamgil, ma ra pi’ Jehovah gelngidad ya nge yag nda nanged rogon ni ngaud gagiyegnaged gadad u boch ban’en. (2 Pet. 1:5-8) Ra ayuwegdad ni ngad gagiyegnaged rogon e lem, nge thin, nge ngongol rodad. Paul nge Marco ni faan kan weliy murung’agrow e ra filew rogon ni ngar gagiyegnagew e damumuw rorow. Ere ireray reb e ban’en ni be micheg nrayog ni ngad rin’ed e re n’ey. Kum lemnag e n’en ni buch rok reb e walag ni pumoon ni kub papey ni ma yib e damumuw ngak u nap’an ni be yan u karrow, mab ga’ ni yad ma tugthin yugu boch e girdi’ ni ku yad be yan u karrow. Ere mang e rin’ ko biney e magawon ni bay rok? I gaar: “Ba gel e meybil ni gu ma tay ni gubin e rran. Ug beeg ma gu be fil boch e article ni be weliy murung’agen rogon ni ngan t’ar lanin’uy, mug guy rogon ni nge mit ngog boch e thin nu Bible nrayog ni nge ayuwegeg. Yugu aray rogon ni ke yoor e duw ni gu ma rin’ e re n’ey, machane gubin e kadbul ni gu ma puguran ngog nib t’uf ni ngguy rogon ni nggu par ni gub gapas. Ma faanra bay bang ni nggu wan ngay, ma gu ma guy rogon ni nggu wan u m’on riy ya nge dab gu wan ni gu be gur ni nggu taw ngaram.”

Bay yu ngiyal’ ndabiyog ni ngad t’ared lanin’dad. Nap’an nra buch e re n’ey, ma sana gad ra magagawon ni ngad nonad ngak Jehovah u daken e meybil. Machane bin riyul’ riy e, ireray e ngiyal’ nrib fel’ ni ngad meybilgad. Ere mmeybil ngak Jehovah ni ka chingiyal’ nem. Mu wenig ngak ni nge n’ag fan e kireb rom, mag ning e ayuw ngak, mag dugliy u wan’um ndab kum sul ko kireb ni kam rin’. (Ps. 51:9-11) Ra motoyil Jehovah ko meybil ni ga be tay ni keb u gum’irchaem ni ga be wenig ngak ni nge runguyem. (Ps. 102:17) Ke puguran apostal John ngodad ni rachaen Fak Got e ra “beechnagdad u urngin e denen rodad.” (1 John 1:7; 2:1; Ps. 86:5) Dab mu pagtalin ni gubin ngiyal’ ni ma yog Jehovah ko pi tapigpig rok ni ngaur n’aged fan e kireb u wan’rad. Ere rayog ni nge pagan’dad ni ku aray rogon e n’en nra rin’ ni fan ngodad.​—Matt. 18:21, 22; Kol. 3:13.

I kireban’ Jehovah u nap’an nde yag rok Moses ni nge t’ar laniyan’ u nap’an ni yad bay piyu Israel u daken e ted. Machane, i n’ag Jehovah fan e kireb rok u wan’. Ma be yog e Thin rok Got ni Moses e ir be’ nrib yul’yul’ nsusun e ngad folwokgad rok. (Deut. 34:10; Heb. 11:24-28) De pag Jehovah Moses ni nge un nga lan fare Nam ni Kan Micheg. Machane ra pag ni nge un ko par u Paradis u fayleng miki pi’ fare tow’ath ngak ni yafos ni manemus. Ku rayog ni nge yag e re tow’ath ney ngodad ni faan gad ra athamgil ni ngad maruweliyed e re fel’ngin ney nrib ga’ fan ni aram e t’ar laniyan’.​—1 Kor. 9:25.