“Ho gumere azingi ni ki tona paya na mi, mi ati goko yo ki tona ka pirõho. Mi aida ka imoko kindi.”—Paul.

“Kpuraniyo mi anaazinga niipo nikerehe. Mi anaakuodi abasungo, aũmbaro, ai guhe naanidu mbembedi na mi.”—Marco.

Badungu rani kinaho gaani zinga atadanga wa agi akpiapai du ue re ya. Wa vura duhe wo, ani dunduko duhe furani ni mbumbuhe tipa kadu na zatise ti kura aregbo. Gipai re wo gbe mbiko ani adi ingapai ti gu bambata kumba nga, Adamu. (Rom. 5:12) Gu kura aboro kinaho duhe fuyo ni mbumbuhe tipa ka banda gayo zinga wakina aPaul na Marco. Si rengbe kadu ni mbumbuhe fu kura aboro tipa i banda gayo aberã. Ni kpiapai, i nanye kuti berãkurii agu apai nafu gunde fuyo watadu nafu gberãrago fuyo. Berewe a, si rengbe kadu ni mbumbuhe fu kura aboro tipa i du na zatise ti nyemu manga kodaba, mbira bakere buba, watadu dia kere angua kutii kpotoyo yo.

Agu aboro nambu gayo aberã, nyemuapai, na gayo mangaapai si du zanga du na zatise nagberesa gayo raka. Ono ani ima rengba ka bandatirani ti gu gbegberẽ sangbanapai re. Rogo gini gene? Ni sonosa ani gu sino nga ga rugatise watadu zatise. Tipa ani mangi gipai re, ani wisigingo asanahe biata: (1) Ginihe nga zatise? (2) Tipagine duhe ti ni na nyanyakipaha? (3) Waigu rengbe ani ka sonosa gi sino nga papara “zuzu Toro” re? (Gara. 5:22, 23) Fuoho, ani nika sakapai tipa ginipai rengbe ani ka mangaha ka ani zanga ka yugo zatise ti kura aregbo.

Gu boro du na zatise amanganga apai dunduko kuti gani nyemuapai te. Kuba gure, ni nafura na kini mangiapai ngba agu agene afunga gberãrago fu Mbori ya.

Yesu ayugu wai furani rengbe ani kadu na zatise. Baibiri naya: “Ho i agberã ngbayo yo ni fu ko, ko agberã nga ngbako yo fu yo te; ho ko aima ni, ko aserã nga yo a te, ono ko afu tiko ku be gu ko nasapa ngbanga nzunzu.” (1 Pet. 2:23) Yesu ayugu rugatise watadu zatise ho avurako aamoma ko ni wa ko adu ni asiasiko ti ngua. (Mt. 27:39-44) Mbata kusayo, ko ayugu bakere zatise a ho abarumbatayo rogo apambori aasana ko ni na dungu asanahe tipa ka sako ko gumba irairapai. (Mt. 22:15-22) Na nairiwo gu bawene kpiapai ko amoihe ho zingizingi aYudo arogodi ambia ni ka zumudo ko na ni! Kuba gupai nga ko mangi fuyo a gbegberẽ, ‘Yesu abirikpo, ki kuru yekaru yo.’—Yo. 8:57-59.

Ya mo ani rengbe ka wirika ga Yesu kpiapai? Ani ima rengba ka asadaha ku gene. Gu mokedi nangia Petero akepai nga: “Kristo ahi pai a tigako tipa roni, ki he kpia pai fu roni, oni peke fuo ko.” (1 Pet. 2:21) Wa vura duhe nga ani nga kpakpa aboro, ani ima rengba ka wirika ga Yesu kpiapai nga ga du na zatise teketeke. Tipagine duhe ti ni ni nyanyakipa pai ani mangi gupai re?

Ka ani aida Yekova du na ngbarago na ani, si naida ani du na gu sino nga ga zatise. Ka si vura du vurũ nga ani ima iriso Yekova ni rururani tipa gbanga  regbo, ani ima rengba ka zanga gaani pagume na ko ka ani adunga na zatise rogo gupai yo ani agumbaha na kini mangihe ya.

Mo bingo gupai naadu tipa Moize, nga gu kumba ‘nangia bayee boro ni rengo, ki susi agu aboro nadu ri kpotosende dunduko’ ti gu regbo re. (Geda 12:3) Moize adegetuko ni zerangbaduse kuti ga aYisaraere kpakanahe tipa dungu agarã. Ono rogo gu kura uru sa ko azanga ka yugo gu sino nga ga zatise. Ko azingi ti gu regbo aboro akpakanahe berewe tipa zanga ime. Ko afura ni zinga fu aboro ki gumba gupai nga: “Oni gi he awere, oni airasamungu; ani kusi ime fu roni ti gi mbia re?”—Geda 20:2-11.

Moize azanga kadu na rugatise watadu zatise. Ko aafunga taarimo fu Yekova nangia mburu gu iiriwopai ko amangihe nga ga kusa ime re te. (Tam. 106:32, 33) Ni sangbana gipai re, Yekova aambunga ko ko rimi ku Ringara Mokido yo te. (Geda 20:12) Si nawira gupai awira nga da kuho Moize akpi ni, ko anaabira tiko abira nga ka ko aini wo ka ko azanganga du na rugatise ya.—Pa Rug. 3:23-27.

Ginipai ani awirikaha ti gipai re? Ka si vura du vurũ nga ani ima dia gbanga regbo ku rogo rengo yo, si aidanga ani naafura na zanga irisa fu agu aboro naimisa rani watadu agu aboro si aida ani fu rugute fuyo te. (Ef. 4:32; Koro. 3:12) Rengo ngaha nga, ho garã rani ange ni, si ima rengba kadu ni mbumbuhe gbe kadu na zerangbaduse. Ono mo tingidipa Moize. Si aidanga ani gberesipa gaani wene rimo na Yekova mbiko gupai nga ani ayugongo gu sino nga ga rugatise watadu zatise te te. Gini apai rengbe ani ka mangaha tipa ka sonosa gi nyanyakipa sino re?

Mo mangi kparakpee tipa ziazia toro. Tipagine? Bambiko rugatise nga papara zuzu ga Mbori ziazia toro, na Yekova nafu gako toro fu agu aboro nasanako tipaha. (Rk. 11:13) Vurube ga Yekova toro, ko ima rengba ka fu gu ome furani ani aidaha tipa ka yugo gu sino nga ga rugatise. (Frp. 4:13) Ko ima rengba ka undo rani a ani sonosi kura apapara zuzu toro, wa gu nga nyemuse, nga gu rengbe ka undo rani ani nyakasi gu gaani sino nga ga rugatise.—1 Kor. 13:5.

Mo ne ai gupai rengbe ka saha foro ni kpakarakpakaraha gbe tipa ka yugo gu sino nga ga rugatise. Ni kpiapai, mo banda tiro ti agu abangiriaba nga ga Internet gbiati agu aũngbarago du na wasiwasi mangaapai rogoho. (Ef. 5:3, 4) Nirengo, si naida ani ne ai gupai rengbe ka asada ra ni ani mangi gupai du ni irairaha. (Snz. 22:3; 1 Kor. 6:12) Ni kpiapai, gu boro rengbe kadu ni asadiasadi ni ipo ka manga wasiwasi kodaba ima rengba ka diaberã ka  ne agu abuku gbiati avidio nafura tipa gu nyemuse du dagba kumba na dee.

Si ima rengba kadu ni mbumbuhe furani ani mangipai kuti gipai re. Ono tie, ka ani mangi nyanyaki asadatise, Yekova nika fu gu ome furani ani aidaha tipa kadu na zatise rogo apai yo. (2 Pet. 1:5-8) Ko nika undo rani ani du na zatise rogo gaani aberã, afugo, gbiati mangaapai. Gu gopai nayugo gipai re nga, aPaul na Marco i nifura tipa yo kusayo i ni basasa aima wirika wai ka za tiyo ti zinga. Oni bingo kpiapai a nga ga kura wirina sa nga guko nanaazizinga ni ipo ho ko anaagbe tarambiri ni, na zavura kini poi na aboro. Ginipai ko amangihe tipa gipa re? “Mi anaamanga kakaka kparakpee na aˈuru dũ. Mi anaageda kekeapai tipa gu sino nga ga rugatise na kini zi agu averesi ku rire yo rengbe ka undo. Wa vura duhe nga mi aima digo nimangi gipai re tipa agarã, mi naatingida tire na awiso dũ na gupai nga mi naida ka asada ka nye ni zezeredi re. Na mi naaguari mbu regbo koyo kindi ka ndu ba gimi apai yo tipa gupai nga ka zanga kaa manga apai gbakirigbakiri.”

Ti kura aregbo, ani ima rengba ka zanga du na rugatise watadu zatise. Ho gupai re amanga ni, zee ima rengba kaa manga rani ni kerehe na manga kparakpee fu Yekova. Ono gi regbo re du si aida ani mangi kparakpee fu Yekova gbe. Sidu, mo kpari fu Yekova nibasa. Mo zungodi ko ko mbupai foro, mo gbata gako undo, na ki diberã ka zanga manga kina gu bangisa ingahe re berewe. (Tam. 51:9-11) Yekova azanganga mangapai kuti gu gamo kparakpee naye kina boro ngbaduroyo tipa inapai re te. (Tam. 102:17) Gu mokedi nangia Yoane atingidi rani na gupai nga kure Wiri Mbori ‘nagiriso rani ti ingapai dũ.’ (1 Yo. 1:7; 2:1; Tam. 86:5) Mo tingidi gupai nga Yekova nape gupai fu gu gako amoyambu du auru kpotosende nga i naambupai ambu kindi. Sidu, ani ima rengba kadu na gu kido nga ko nikaa mbupai ambu furani kindi a.—Mt. 18:21, 22; Koro. 3:13.

Rago aangbanga ti Yekova na Moize ho ko azanga kadu na zatise ni tipa bete regbo ngbakungba yo te. Ono wa si avura duwo, Yekova aima mbupai fuko. Na Fugo Mbori nafura tipa Moize ki ya ko angia gu kumba naadu na bakere idapase ti ko nga guko si aida ani wiriki gako kpiapai. (Pa Rug. 34:10; Eb. 11:24-28) Yekova aambunga Moize ko rimi ku Ringara Mokido yo te, ono Ko nika mbu Moize ambu ko rimi ku rogo paradizo kpotosende na ki fu gu maabangirise fuko nga ga raka nyeanye kindi. Ani ima rengba ka ngera kumbatayo a tipa ka raka nyeanye kindi ka ani aamanga nyanyaki asadatise ka sonosa gu nyanyakipa sino nga rugatise.—1 Kor. 9:25.