Asiikpịgh phọ ipẹ phọ egoolhạ esugha araagharạ aKristẹn: ‘Eemuma uwaloor iigbia phọ pọ ephomoghiạn, ibo, eephọ, okparạm, onmạ ighirigiir, onmo inmo, omheeraam, oyoghoyoghọ, ophamaghạn-aloor.’ I/wạ mọ yira ootughiạn mọ ogina ipẹ bịn kụ imạ araagharạ dị uwaloor phọ Enhaạn katue ulhoghonhaạn iyira ḍighaạgh omhoọgh.

Yira ulhegheri ika? Kụ aPọl agbi bọ ogoolhạ araagharạ eemuma uwaloor iigbia phọ, odị agẹ mọ: “Torobọ oye ramiịn ghan ni odọ eḍighinom iyaạr dị iphulupul phọ reḍighi ghan ole emạ r’owạ anmariịr, ipesi, elegheri umugholoor, ooḅereghị aruru, aghamạ, amulọgh ḍien, iruonụ, eḍịm, ophin ologhi, ikaạgh, igbagharạn, okarạph otul, oIoghi osẹph osighenọm, ookọ amiim, iipheeny, r’inọn odọ araraạr phọ iphẹn.” (Gal. 5:19-21) Kụ iḍighi kụ aPọl mutue ni agọ inhọn araraạr dị eḍighi “iIọ isiẹn aḅirini phọ,” idiphọ ipẹ oghaạph bọ oghol siphẹ Kolosị 3:5. Iniin phọ kẹn ni r’amem mọ odị agoolhạ bọ esugha araagharạ eemuma uwaloor iigbia phọ. Odị aḅẹm mọ: “Ologh dị aghel iphẹn phọ o/lo.” Kụ iḍighi kụ aPọl o/goolhạ omhạn oomo imạ araagharạ eemuma uwaloor iigbia phọ.

Yira kotue onaghanhạn iphẹn phọ mem dị yira osighẹ raagharạ phọ aPọl agoolhạ bọ ophoghom ipẹ odị agẹ bọ aghiomnaạn ookpomhoghan phọ Efesọs, mọ: “Ephalaḅaạl phọ kụ remuum ghan iimuma [onmo inmo] r’aruukuan r’igey kirokirọ.” (Efẹ. 5:8, 9) Ii, “onmo inmo,” elhiom eḍighinhom iyaạr r’igey, eḍighi aani iniin araagharạ dị “ephalaḅaạl phọ . . . remuum ghan,” kuolọ eḅilhẹ kẹn eḍighi eegharạ ‘eemuma uwaloor iigbia phọ.’

Ḅilhẹ kẹn aPọl aroma Timoti mọ awạ ghan “ruukuan, r’oIegheri Enaạn, r’omeeraam, r’ephomoghiạn, r’okparạm, [r’oyoghoyoghọ],”—odiiny imạ araagharạ. (1 Tim. 6:11) Iraạr phọ iphẹn phọ (omeeraam, ephomoghiạn, [r’oyoghoyoghọ]) bịn kụ edị ogholhom aani idiphọ apakirị ‘eemuma uwaloor iigbia phọ.’ Toroboiperolbọ, aTimoti kawạ ni olhoghonhaạn aḍighaạgh uwaloor iigbia phọ, orue omhoọgh ipheriphọ araagharạ phọ ogholhom aani bọ, eḍighi bọ: ruukuan, oIegheri Enhaạn, ḅilhẹ r’okparạm.—Poghom Kolosị 3:12; 2 Pita 1:5-7.

Esi iduọn phọ, aGaletia 5:22, 23 i/goolạ oomo araagharạ phọ ewạ bọ mọ onyọ aKristẹn amhoọgh phọ. Uwaloor iigbia phọ Enhaạn katue ni ulhoghonhaạn iyira ḍighaạgh omhoọgh esugha araagharạ phọ eḍighi bọ ‘eemuma uwaloor iigbia phọ.’ Kuolọ inhọn araagharạ edi ni dị rewạ mọ yira omhoọgh idiphọ aKristẹn dị mophoph omhanhạm, kụ “[okpologhiạn] imoom igey aroozọ phọ olẹm bọ oghighemiọm Enaạn kụ eganana bọ esi akugey aghuḍum mọ akuphẹ aakuan bọ aseleman.”—Efẹ. 4:24.