Бу ајәләрдә доггуз хүсусијјәт садаланыр: «Руһун бәһрәси исә будур: мәһәббәт, севинҹ, сүлһ, сәбир, хејирхаһлыг, јахшылыг, иман, мүлајимлик, өзүнә һаким олмаг». Амма дүшүнмәмәлијик ки, Аллаһын мүгәддәс руһу бизә јалныз бу доггуз хүсусијјәти јетишдирмәјә көмәк едир.

Һәвари Булусун бундан өнҹәки ајәләрдә нә јаздығына диггәт јетирәк: «Ҝүнаһлы бәдәнин әмәлләри... әхлагсызлыг, натәмизлик, азғынлыг, бүтпәрәстлик, ҹиндарлыг, әдавәт, мүнагишә, кин, гәзәб, нифаг, парчаланма, тәригәтчилик, пахыллыг, сәрхошлуг, кеф мәҹлисләри вә саирәдир» (Гал. 5:19—21). Һәвари Булусун «вә саирә» сөзүнү ишләтмәсиндән ҝөрмәк олар ки, о, ҝүнаһлы бәдәнин әмәлләринә дахил олан диҝәр хүсусијјәтләри, мәсәлән, Колослулара 3:5 ајәсиндәки хүсусијјәтләри дә садалаја биләрди. Ејни шеји руһун бәһрәси һагда да демәк олар. Булус доггуз хүсусијјәти садалајандан сонра демишди: «Бунлара гаршы чыхан ганун јохдур». Орижинал дилдә «бунлара» кими тәрҹүмә олунан сөзү «бу кими шејләрә» кими дә тәрҹүмә етмәк олар. Бәли, Булус мүгәддәс руһун көмәји илә јетишдирә биләҹәјимиз бүтүн јахшы хүсусијјәтләри садаламамышды.

Һәвари Булусун садаладығы хүсусијјәтләри Ефес јығынҹағына јаздыглары илә тутушдуранда бу, даһа да ајдын олур: «Нурун бәһрәси исә һәр ҹүр јахшылыг, салеһлик вә һәгигәтдир» (Ефес. 5:8, 9). Ҝөрдүјүмүз кими, «салеһлик вә һәгигәт» хүсусијјәтләри илә јанашы «јахшылыг» хүсусијјәти дә «нурун бәһрәси»нә дахилдир. «Јахшылыг» һәмчинин «руһун бәһрәси»нә дә дахилдир. Демәли, һәвари Булус Галатијалылара 5:22, 23 ајәләриндә «салеһлик вә һәгигәт» хүсусијјәтләрини дә гејд едә биләрди.

Диҝәр нүмунәјә бахаг. Һәвари Булус Тимутини «салеһлијә, мөминлијә, имана, мәһәббәтә, мәтинлијә вә мүлајимлијә» ҹан атмаға тәшвиг етмишди (1 Тим. 6:11). Ҝәлин бу алты хүсусијјәти «руһун бәһрәси» илә тутушдураг. Бунлардан јалныз үчү (иман, мәһәббәт, мүлајимлик) руһун бәһрәсинә дахил олан хүсусијјәтләрин сырасында садаланыр. Тәбии ки, Тимутијә салеһлији, мөминлији, мәтинлији өзүндә јетишдирмәк үчүн дә мүгәддәс руһун көмәји ҝәрәк иди. (Колослулара 3:12; 2 Бутрус 1:5—7 ајәләри илә тутушдурун.)

Ҝөрдүјүмүз кими, Галатијалылара 5:22, 23 ајәләриндә «руһун бәһрәси»нә дахил олан бүтүн хүсусијјәтләр садаланмајыб. Мүгәддәс руһ бизә «руһун бәһрәси»нә дахил олан доггуз хүсусијјәти јетишдирмәјә көмәк едир. Амма бир мәсиһи кими јеткинләшмәк вә «Аллаһын ирадәсинә әсасән вә һәгиги салеһликлә сәдагәтә ујғун јарадылмыш јени шәхсијјәтә» бүрүнмәк үчүн өзүмүздә даһа чох хүсусијјәт инкишаф етдирмәлијик (Ефес. 4:24).