Biblu’n nun ndɛ mma sɔ’m be nun’n, be kannin nzuɛn ngwlan m’ɔ fata kɛ Klisifuɛ’m be yi i nglo’n, be ndɛ. Be yɛle “Ɲanmiɛn nin sran klolɛ, aklunjuɛ dilɛ, alaje dilɛ, awlɛn tralɛ, klun ufue yolɛ, sran ye yolɛ, Ɲanmiɛn sulafilɛ, wɛtɛɛ yolɛ, be wun su nianlɛ.” Sanngɛ nán nzuɛn sɔ’m be ngunmin yɛ Ɲanmiɛn wawɛ’n uka e naan y’a yi be nglo-ɔ.

Like nga ti yɛ e se sɔ’n, yɛle kɛ ka naan Pɔlu w’a kan nzuɛn sɔ’m be ndɛ’n, ɔ seli kɛ: “Klɔ sran nzuɛn’n [...] yɛle bla nin bian kunndɛlɛ sukusuku nin i wunsu ɲannzuɛn sa mun, nin sa kainkain’m be yolɛ, nin ɲin kekle ayeliɛ mun ɔ nin amuin sɔlɛ, nin bae dilɛ, nin sran kpɔlɛ, nin utre dilɛ, nin klunngbɔ tulɛ, nin ya falɛ tikatika, nin be nuan m’ɔ sɛman’n, nin be wun nun bubulɛ, nin like nga klɔ sran’m be kle’n i su falɛ, ɔ nin aɲinblɔɛ, nin nzanbɔɛ, nin cɛn mɔ be di i sinnzin su’n, ɔ nin i wunsu sa tɛtɛ wie mun ekun.” (Gal. 5:19-21) Kɛ Pɔlu gúɛ i ndɛ’n i bo’n ɔ seli kɛ “i wunsu sa tɛtɛ wie mun ekun.” I sɔ’n kle kɛ nán “klɔ sran nzuɛn’n” i ngba yɛ ɔ boboli be su-ɔ. Ɔ boboli nzuɛn sɔ’m be nun wie’m be su Kolɔsufuɛ Mun 3:5 nun. I wafa kunngba’n, kɛ ɔ wieli nzuɛn kpakpa ngwlan be bobo’n, ɔ seli kɛ: “Mmla fi tanninman ninnge sɔ’m be yolɛ.” I sɔ’n kle kɛ nán nzuɛn kwlaa nga Ɲanmiɛn wawɛ’n kwla uka e naan y’a yi be nglo’n be ngba yɛ Pɔlu kannin be ndɛ-ɔ.

Kɛ e fa nzuɛn ng’ɔ boboli be su Galasifuɛ Mun fluwa nun’n, e sunnzun nzuɛn ng’ɔ boboli be su Efɛzifuɛ Mun fluwa’n nun’n, e wun i sɔ liɛ’n i wlɛ weiin. Efɛzifuɛ Mun fluwa’n nun’n, ɔ seli kɛ: “Sran ng’ɔ tran lika m’ɔ kpaja’n nun’n, sa kwlaa nun’n ɔ yo klun ufue. Yɛ ɔ yo sa’n i nuan su sɛsɛ, kpɛkun ɔ fa ndɛ nanwlɛ’n su.” (Efɛ. 5:8, 9) E wun kɛ ‘klun ufue’n’ nin sa nuan su sɛsɛ yolɛ’n, ɔ nin ndɛ nanwlɛ’n i su falɛ’n, be o nzuɛn nga “sran ng’ɔ tran lika m’ɔ kpaja’n nun’n,” yi i nglo’n be nun. Sanngɛ klun ufue’n o “nzuɛn nga Ɲanmiɛn wawɛ’n yo maan klɔ sran yi i nglo’n” i nun wie.

Pɔlu wlali Timote i fanngan kɛ ɔ yi nzuɛn kpakpa nsiɛn be nglo. Be yɛle ‘sa kpa yolɛ, be wun Ɲanmiɛn fa manlɛ, Ɲanmiɛn sulafilɛ, Ɲanmiɛn nin sran klolɛ, awlɛn tralɛ, yɛ wɛtɛɛfuɛ yolɛ.’ (1 Tim. 6:11) Sanngɛ nzuɛn sɔ’m be nun nsan cɛ yɛ be o “nzuɛn nga Ɲanmiɛn wawɛ’n yo maan klɔ sran yi i nglo’n” nun-ɔn. Yɛle Ɲanmiɛn su lafilɛ’n nin Ɲanmiɛn nin sran klolɛ, ɔ nin wɛtɛɛ yolɛ’n. Sanngɛ sɛ Timote kunndɛ kɛ ɔ́ yí nzuɛn nsan nga be kalɛ’n be nglo’n, ɔ fata kɛ Ɲanmiɛn wawɛ’n ukɛ i. Be yɛle sa kpa yolɛ nin be wun mɔ be fa mantan Ɲanmiɛn’n ɔ nin be awlɛn tralɛ’n.—An nian Kolɔsufuɛ Mun 3:12 nin 2 Piɛli 1:5-7 be nun.

Ndɛ kwlaa sɔ’n kle kɛ nán nzuɛn kwlaa ng’ɔ fata kɛ Klisifuɛ kun yi be nglo’n, be ngba yɛ be o Galasifuɛ Mun 5:22, 23 nun-ɔn. I yo, Ɲanmiɛn wawɛ’n kwla uka e naan y’a yi nzuɛn ngwlan nga be kan be ndɛ’n ndɛ mma sɔ’n nun’n, be nglo. Sanngɛ sɛ e kunndɛ kɛ é tín Ɲanmiɛn ninnge’m be nun’n naan é ‘fá nzuɛn uflɛ mɔ Ɲanmiɛn yili i kɛ i bɔbɔ fa klo’n sa’n, naan y’a yo sɛsɛfuɛ nin nanwlɛfuɛ’n,’ nzuɛn kaka kpa ekun be o lɛ m’ɔ fata kɛ e yi be nglo-ɔ.—Efɛ. 4:24.