Dehnya vers taak bowt nain Kristyan kwalitiz: lov, jai, pees, payshens, kainis, gudnis, fayt, wahn jentl haat, ahn self-kanchroal. Bot dehnya da noh di onli gud kwalitiz weh Gaad hoali spirit ku help wi fi koltivayt.

How wi noa dis? Wel bifoa di apasl Paal mi menshan di kwalitiz weh mek op di froot a di hoali spirit, hihn mi rait: “Ih playn fi si weh peepl en op di du wen dehn fala dehn sinful hyooman naycha: dehn sleep rong, dehn ga taats weh noh kleen, ahn get eena wail livin. Dehn wership aidal ahn du oabya; dehn ton enimi wid wan anada ahn kyaahn gree; dehn jelos wan anada, ahn ga bad tempa, ahn dehn selfish. Den dehn split op eena dehn oan lee groop dehn, ahn aala dehn groop deh gens wan anada. Dehn red dehn aiy aafa weh ada peepl ga; dehn jrink ahn jronk op ahn ga lata wail paati, ahn ting laik dehndeh.” (Gal. 5:19-21) Soh Paal kuda mi menshan moa tingz weh peepl du wen dehn fala dehn sinful hyooman naycha, laik di tingz weh ih menshan da Koloashanz 3:5. Ahn da di saym wid di lis a nain gud kwalitiz weh hihn mi menshan aftawodz. Paal neva mi-di chrai lis aaf aala di gud kwalitiz weh di hoali spirit ku help wi koltivayt.

Dis klyaa wen wi kompyaa di lis a gud kwalitiz weh Paal mi menshan wid weh hihn mi rait tu di kangrigayshan da Efisos: “Evriting weh gud ahn weh rait ahn weh chroo di kohn fahn di lait.” (Ifee. 5: 8, 9) Akaadn tu da vers, “evriting weh gud,” lang wid evriting weh rait ahn chroo, “kohn fahn di lait.” Bot gudnis da paat a di froot a di hoali spirit tu.

Saym way soh, Paal mi inkorij Timoti fi “chrai haad fi liv rait, ahn fi du weh Gaad waahn, fi chros Gaad ahn lov peepl. Ahn chrai haad fi bayr op wan anada eena evriting ahn chreet peepl wid wahn kain haat.” (1 Tim. 6:11) Som a dehnya kwalitiz da di saym kwalitiz weh Paal mi seh da paat a di froot a di hoali spirit, bot noh aala dehn. Bot Timoti wuda mi stil need di help a di hoali spirit fi koltivayt di ada kwalitiz weh Paal mi menshan.—Kompyaa Koloashanz 3:12; 2 Peeta 1:5-7.

Soh Galayshanz 5:22, 23 noh menshan aala di kwalitiz weh wahn Kristyan shuda koltivayt. Gaad hoali spirit ku help wi fi koltivayt di nain kwalitiz weh Paal mi seh da paat a di froot a di hoali spirit. Bot dehn ga moa kwalitiz weh wi haftu koltivayt if wi waahn bee machoar Kristyanz ahn “bihayv laik di nyoo persn weh Gaad mek fi bee laik hihn. Da nyoo persn wahn liv hoali, ahn du weh rait eena Gaad sait.”—Ifee. 4:24