Lidan bérusu burí le, iridúati 9 igaburi le harufudubei kristiánugu. Ariñagati: “Ánheinti igaburi le líchugubei [s]ífiri: Ínsiñehabuni, ugundani, darangilaü, gaguraasuni, areiduni, lubuidun igaburi, [afiñeni], ǘnabuguni, ragüguaü unguaü”. Mámarügüñein lau igaburi le líderaguawa lani Bungiu sífiri sandu.

Ariha waméi le labürüdübei apostolu Pábulu lidan burí bérusu le lubaragiñebei le. Ariñagati anihán layumahabei ǘgürügü: “Agabarahani, gámariguatiña hámagua mamarieidunga, adaaguatiña burí katei wíyeti; mabusigaritiña lau hasalufurin; huduguatiña houn guáriua; abiñaraha hagía. Anihein iyereehabúni hadan, gáganiguaü, luma emeidini. Ménrengunti hagañidun; hawouguarügüñein haritagua súnwandan; fánreinguagüda hamuti adamurini. Gimugatiña, gáfarahadi, gátadi, wéinamu heigin; adüga hagía amu burí katei lenege burí le” (Gal. 5:19-21). Lau lariñagun Pábulu “amu burí katei lenege burí le”, másiñati layanuhaña lan luagu amu burí luwuyeri layumahan ǘgürügü kéiburi le ariñawagúbei lidan Kolosana 3:5. Aban katei libe le asuseredubei lidan Galasiana 5:22, 23 dan le layanuhabei Pábulu luagu nefu lubuidun igaburi le. Tidan lísüta to, mama láluguña labürüdüni sun igaburi le gayaraabei gagaburi wamani lau lídehan sífiri sandu.

Wasaminarubei ítara dan le wagoubaguagüdünun lísüta to tídanboun gárada houn Galasiana tuma to labürüdüboun Pábulu lun damuriguaü le Éfesubei: “Gürigia ha éibugubaña lidan larugounga. Gürigia hagía, areidatiña, suruti habagari, hínsiñeti inarüni houn” (Efe. 5:8, 9). Kei aubei warihei ‘areiduni’, ibagari suruti, luma línsiñewa inarüni ligía aban lídangiñe igaburi lánina “larugounga”, ani ligía giñe aban lídangiñe “igaburi le líchugubei sífiri”. Ligíati, íbini míridun lani Pábulu ibagari suruti luma línsiñewa inarüni lidan Galasiana 5:22, 23, gayaraati hamuga meha ladügüni.

Ítarameme, ariñagati Pábulu lun Timotéu lun gagaburi lani sisi igaburi le: “Ibagari le suruti, le lánina gúnfuli luma Bungiu, afiñeni, ínsiñeni, gaguraasuni luma areiduni” (1 Tim. 6:11). Gádürügüñein lídangiñe “igaburi le líchugubei [s]ífiri” adarirúa tidan lísüta to, kei burí: “afiñeni, ínsiñeni, gaguraasuni luma areiduni”. Gama lumoun megei lumuti meha giñe Timotéu ladundehan sífiri sandu lun larufuduni amu burí igaburi le líridubei Pábulu, kei burí: ibagari le suruti luma gúnfuli luma Bungiu (ariha huméi giñe Kolosana 3:12; 2 Féduru 1:5-7).

Ligíati, tidan gárada houn Galasiana 5:22, 23 mayanuhounti luagu sun igaburi le lunbei harufuduni kristiánugu lau lídehan lani Bungiu sífiri sandu. Íderagua lumutiwa lani Bungiu sífiri sandu arufudei nefu “igaburi le líchugubei sífiri”. Lau sun lira, anihein amu burí igaburi le gayaraabei warufuduni lun aban wamá kristiánugu ha derebuguti hafiñen luma lun warufudun “iseri igaburi, igaburi le ladügübei Bungiu kei ligaburi guánarügü, lidan irichaü le tímatimaati luma arumani” (Efe. 4:24).