Kestyon lekter
Eski zis sa bann kalite dan Galat 5:22, 23 ki form parti “fri lespri sen”?
Sa bann verse i mansyonn nef kalite ki bann Kretyen i bezwen devlope: “Fri lespri sen se lanmour, lazwa, lape, pasyans, labonte, fer sa ki byen, lafwa, ladouser, kontrol lo son lekor.” Me zot pa bann sel kalite ki lespri sen Bondye i kapab ed nou devlope.
Ki mannyer nou konnen? Avan ki zapot Pol ti koz lo fri lespri sen, i ti ekri: “Bann move kondwit lekor enparfe i . . . imoralite seksyel, lenpirte, vis, ador zidol, pratik demonyak, laenn, kankan, zalouzi, bann lakoler, dispit, divizyon, sekt, groker, bwar pour sou, parti san kontrol ek lezot kondwit parey.” (Gal. 5:19-21) Vi ki Pol ti dir “ek lezot kondwit parey,” sa i montre ki i annan lezot keksoz ki form parti “bann move kondwit lekor enparfe” parey i ganny mansyonnen dan Kolosyen 3:5. I ti fer en keksoz parey ler i mansyonn sa nef bon kalite. Dan verse 23, i ti dir: “Napa okenn lalwa ki anpes fer sa bann keksoz.” Alor Pol pa ti mansyonn tou bann bon kalite ki nou kapab devlope avek led lespri sen.
Nou konpran sa ler nou konpar sa lalis avek sa ki Pol ti ekri kongregasyon Efez: “Fri lalimyer i tou sort keksoz ki byen, drwat e vre.” (Efe. 5:8, 9, not) Alor, bann keksoz ki “byen, ” ansanm avek bann keksoz ki drwat e vre, i form parti “fri lalimyer” me i osi bann kalite ki lespri sen i kapab ed nou devlope.
Pareyman, Pol ti osi ankouraz Timote pour “fer zefor pour devlop ladrwatir, devosyon pour Bondye, lafwa, lanmour, landirans ek ladouser.” (1 Tim. 6:11) Parmi sa sis zoli kalite, zis lafwa, lanmour ek ladouser ki form parti “fri lespri sen.” Me Timote ti osi bezwen devlop ladrwatir, devosyon pour Bondye ek landirans. I ti konnen ki i ti pou bezwen led lespri sen pour devlop sa bann kalite.—Konpar Kolosyen 3:12; 2 Pyer 1:5-7.
Alor Galat 5:22, 23 pa mansyonn tou bann kalite ki bann Kretyen i bezwen devlope. Lespri sen Bondye i kapab ed nou devlop sa nef kalite ki form parti “fri lespri sen.” Me i annan lezot kalite nou bezwen devlope pour nou vin bann Kretyen matir e pour nou kapab “devlop sa nouvo personnalite ki’n ganny kree dapre lavolonte Bondye e ki an armoni avek ladrwatir ek fidelite Bondye.”—Efe. 4:24.
