Ili versículo tac miʼ taj ti tʼan nueve melbal tac. Miʼ yʌl: «I wut muʼ bʌ i yʌcʼ jiñi espíritu jiñʌch cʼuxbiya, tijicñʌyel, ñʌchʼtʌlel, pijt, wenlel, i yutslel lac pusicʼal, ñopoñel, utslel, i ticʼol lac bʌ». Pero mach cojach ili melbal tac miʼ coltañonla lac pʌs jiñi chʼujul bʌ i yespíritu Dios.

Laʼ laj qʼuel chuqui tsiʼ ñaxan tsʼijbu jiñi apóstol Pablo: «Tsiquil i mul lac tsucul pusicʼal. Jini muʼ bʌ i jacʼob [...] miʼ chaʼleñob tsʼiʼlel, miʼ melob chuqui bibiʼ. Miʼ chʼujutesañob dios tac, miʼ chaʼleñob wujt, yujilob tsʼaʼleya yicʼot leto. Tsʌytsʌyña jax i pusicʼal chaʼan chubʌʼañʌl. Yujilob michʼajel yicʼot aʼleya. Miʼ tʼoxob i bʌ ti leto yicʼot ti yambʌ i ñopbal. Tsʌytsʌyña i pusicʼal chaʼan i wenlel yañoʼ bʌ. Miʼ chaʼleñob jontolil, yicʼot yʌcʼʌjel, yicʼot leco bʌ qʼuiñijel yicʼot yan tac bʌ mach bʌ wenic» (Gá. 5:19-21). Pablo maʼañic tsiʼ luʼ taja ti tʼan jiñi i melbal tac jiñi «lac tsucul pusicʼal», cheʼ bajcheʼ miʼ yʌl yaʼ ti Colosenses 3:5. Jin chaʼan, yaʼ ti Gálatas 5:22, 23 (TNM) maʼañic tsiʼ ñopo i luʼ taj ti tʼan jiñi wem bʌ melbal tac mejl bʌ lac taj tiʼ coltaya jiñi chʼujul bʌ espíritu.

Cheʼʌch miʼ cʼotel lac ñaʼtan cheʼ mi lac lajeʼ jiñi Gálatas yicʼot cheʼ bʌ Pablo tiʼ tsʼijbube jiñi congregación am bʌ ti Éfeso ili: «Come i yʌcʼbal jini Espíritu [«sʌclel», TNM] jiñʌch pejtelel chuqui utsʼat yicʼot pejtelel chuqui toj yicʼot pejtelel chuqui isujm» (Ef. 5:8, 9). Cheʼ bajcheʼ mi laj qʼuel, jiñi pejtelel chuqui utsʼat o jiñi i yutslel lac pusicʼal yaʼ ochem tiʼ yʌcʼbal jiñi «sʌclel», pero ochem jaʼel tiʼ «wut muʼ bʌ i yʌcʼ jiñi espíritu». Jin chaʼan, anquese Pablo maʼañic tsiʼ taja ti tʼan jiñi pejtelel chuqui toj yicʼot pejtelel chuqui isujm yaʼ ti Gálatas 5:22,23 (TNM), tsaʼʌch mejli i yʌl yubil.

Cheʼ jaʼel, Pablo tiʼ sube Timoteo chaʼan yom miʼ taj ili seis melbal tac: «Tsajcan chuqui toj yicʼot chuqui chʼujul [o chʼujutesan Dios]. Chʌn ñopo Dios ti xucʼul yicʼot cʼuxbiya yicʼot i cuchol wocol ti utsʼat yicʼot uts bʌ a pusicʼal» (1 Ti. 6:11). Ti ili uxchajp cojach jiñi ñopoñel, jiñi cʼuxbiya yicʼot jiñi utslel mi lac taj yaʼ tiʼ «wut muʼ bʌ i yʌcʼ jiñi espíritu». Pero i cʼʌjñibal i chaʼan jaʼel jiñi Timoteo i coltaya jiñi chʼujul bʌ espíritu chaʼan miʼ pʌs jiñi yambʌ melbal tac tsaʼ bʌ i taja ti tʼan Pablo: I melol chuqui toj, cheʼ miʼ chʼujutesan Dios yicʼot cheʼ miʼ cuch wocol (laja yicʼot Colosenses 3:12; 2 Pedro 1:5-6; 1:7, TNM).

Jin chaʼan, Gálatas 5:22, 23 (TNM) maʼañic mi luʼ taj ti tʼan jiñi melbal tac yom bʌ mi lac taj jiñi xñoptʼañonbʌla tiʼ coltaya jiñi chʼujul bʌ i yespíritu Dios. Ili miʼ mejlel i coltañonla chaʼan mi lac pʌs jiñi nueve i melbal i «wut muʼ bʌ i yʌcʼ jiñi espíritu». Pero an yambʌ melbal tac mejl bʌ lac pʌs chaʼan mi lac sujtel ti xñoptʼan añix bʌ i colel yicʼot chaʼan mi lac xoj jiñi ‹tsijiʼ bʌ lac pusicʼal melbil bʌ ti toj ti isujm chaʼan chʼujul mi laj cajñel cheʼ bajcheʼ Dios› (Ef. 4:24).