Itre xötre celë a amamane la naen lao thiina: “Ame la wene ne la ua, tre, ihnim, me madrin, me tingeting, me atreine itreqe, me loi hni, me lolo thiina, me lapaun, me menyik, me xomehnöth.” Ngo tha celë hmekuje kö la itre thiina hna hamë së hnene la uati hmitrötre i Akötresie.

Öni Paulo aposetolo ngöne la itre xötr qëmeken: “Mama catre la itre huliwa ne ngönetrei; kola qaja la kuci ngazo, me thiina ka sis, me itre huliwa nyine hmahman, me kuci idrola, me kuci haze, me ihmönyinyi, me iwesitrë, me izalukeu, me tru trenge elëhni, me icilekeu, me thi lapa, me xötrethenge la itre ini i atr, me piin, me hmo hnei ka haitr, me feet qenahmo, me itre ewekë ka tune lai.” (Gal. 5:19-21) Ijije hi tro Paulo a nyixane la itre thiina ka ngazo celë memine lo itre hna qaja ngöne Kolose 3:5. Ceitune hi lai memine la “wene ne la ua.” Öni nyidrë: “Pëkö wathebo ka atreine cile kowe la itre ewekë cili.” Haawe, tha hnei Paulo kö hna qaja asë la itre thiina nyine tro sa eën jëne la uati hmitrötr.

Celë hi ka mama ngöne la easa ce xome la itre thiina ka lolo cili memine lo hnei Paulo hna qaja kowe la ekalesia ne Efeso. Öni nyidrë: “Ame la wene ne la lai, ej a xatua së troa loi hni ngöne la nöjei ewekë asë, me meköt, me nyipici.” (Efe. 5:8, 9) Ame la “loi hni” me meköt me nyipici, tre, itre igötranene la “wene ne la lai” memine fe la “wene ne la ua.”

Ketre, hnei Paulo hna ithuecatre koi Timoteo troa eënyine la sikisi lao thiina, ene la “meköt, me nyipici koi Akötresie, me lapaun, me ihnim, nge cile huti ju, me thiina ka menyik.” (1 Tim. 6:11) Ame thene la itre thiina cili, könitre hi (lapaun, ihnimi me thiina ka menyik) la ka mama ngöne la “wene ne la ua.” Ame pe, nyipiewekë fe tro Timoteo a sipone la ixatua ne la uati hmitrötr matre troa eënyine la köni xaa thiina: meköt, me nyipici koi Akötresie, nge troa cile hut.—Wange ju fe la Kolose 3:12; 2 Peteru 1:5-7.

Eje hi, tha hna qaja asë kö ngöne Galatia 5:22, la nöjei götranene la “wene ne la ua.” Uati hmitrötr a xatua së troa eënyine la naene lao thiina. Ngo hetre itre xaa thiina nyine tro sa eën, matre tro sa maca me “heetrëne la thiina ka hnyipixe, hna eköth thenge la aja i Akötresie, ngöne la thiina ka nyipi meköt me lapaun.”—Efe. 4:24.