A tekisi ya e taki fu neigin manii di wan Kelesten mu abi: ‘Den manii di a yeye e meke sama abi a lobi, piisii, freide, pasensi, switifasi, bunfasi, biibi, safu-ati, dwengi-iseefi.’ Ma dati á wani taki a den manii ya wawan a yeye fu Gadu e meke sama abi.

Fa u du sabi a sani ya? Luku san apostel Pawlesi taki aini den vers a fesi. A taki: ‘Den sani di a sondu sikin e du . . . a hululibi, tyobo sowtu libi, ogii di sama e du sondee fu sen, a dini di sama e dini falisi gadu, bonu, feyanti libi, kwali, dyalusu, hebi atiboon, toobi, paatibee, falisi leli, takuudu, a duungu di sama e duungu, gaan fesa, anga taa sani di de enke den wan ya’ (Gal. 5:19-21). A sani ya e soi taki taa sani de ete di a sondu sikin e meke sama du. A letiso a de anga den manii di a yeye e meke sama abi. Pawlesi á kai ala den manii di a yeye e meke sama abi.

Te u luku san Pawlesi be taigi Timotiyesi, wi e fusutan a sani ya moo bun. A be taigi en taki: ‘Meke moiti fu du san bun, dini Gadu fayafaya, meke moiti fu abi biibi, fu soi lobi, fu holidoo anga fu abi tyali-ati’ (1 Tim. 6:11). A sigisi manii Pawlesi kai aini a tekisi ya, ma a fu dii fu den namo (biibi, lobi, anga safu-ati) Galasiyasama 5:22, 23 e taki. Ma Timotiyesi be mu du den dii taa sani di Pawlesi be taki tu. A be mu du san bun, a be mu dini Gadu fayafaya, a be mu holidoo tu. A be o abi a santa yeye fu Gadu fanowdu fu man du den sani ya tu.​—Luku Kolosesama 3:12; 2 Peitilisi 1:5-7 tu.

Den sani ya e soi taki Galasiyasama 5:22, 23 nai taki fu ala den manii di wan Kelesten mu abi. A santa yeye fu Gadu sa yeepi u fu abi den neigin manii di a tekisi ya e taki. Ma taa manii de ete di ala tuu Kelesten mu abi. Ala u mu meke moiti fu kengi u manii fu u sa de enke fa Gadu wani. U mu meke moiti fu toon ‘bun-ati sama di e du san Gadu taki ala yuu’.​—Efe. 4:24.