Mi myemba mi mato̱pea bede̱mo ba kriste̱n dibua: “Bepuma ba Mudī be nde: Ndolo, muńe̱nge̱, musango, we̱lisane̱, muyao, bwam, jemea, pī, ko̱nji.” Nde seto̱ be bede̱mo ba bwam buka te̱ nde mudī ma Loba mweno̱ ná mongwane̱ biso̱ o sa.

Maka nje ńamuloloma Paulo a tilino̱ o myemba mi se̱le̱ na mi, mo̱ ná: “Bebolo b’eyobo be nde: Ka ni titi ko̱nji, mbindo, mbamba, jowe̱ la losango, bolane̱ la myanga, bosinga, mitango, ko̱di, malinga, kwandane̱, jabane̱, pandisane̱, eko̱n, so̱ki, mudesi, na nika mambo.” (Gal. 5:19-21) Byala besukan ba Paulo be malee̱ ná a wusa jinge̱le̱ mambo mape̱pe̱ o muso̱ngi ma “bebolo b’eyobo,” ka be bena Kolose 3:5 e mato̱peano̱. Mulemlem pe̱ nde a bolino̱ ponda a to̱pedino̱ ońola bede̱mo ba bwam dibua, a bo̱le̱ nde na ben byala ná: “mbenda e si mate̱nge̱ne̱ mo̱ [nika mambo].” Paulo a si to̱pedi so̱ bede̱mo ba bwam be̱se̱ jeno̱ ná di sa na jongwane̱ la mudī musangi.

Nika e me̱ne̱ne̱ ke̱ di kobisane̱ ni list na nje Paulo a tiledino̱ mwemba ma Efeso: “Bepuma ba mwe̱ne̱n be nde ńai a bwam ye̱se̱ na te̱me̱ la sim na mbale̱.” (Efe. 5:8, 9) E, “bwam,” mwemba na te̱me̱ la sim na mbale̱, bwe nde ede̱mo ewo̱ ya “bepuma ba mwe̱ne̱n,” nde bo be̱ pe̱ ede̱mo ewo̱ ya bepuma mudī.”

Mulemlem pe̱ nde Paulo ome̱le̱no̱ Timoteo ná: “Bupe̱ nde te̱me̱ la sim, dube̱ la Loba, jemea, ndolo, we̱lisane̱ na pī”​—bede̱mo ba bwam mutoba. (1 Tim. 6:11) Bede̱mo belalo (jemea, ndolo, na pī) buka te̱ nde be kwalabe̱ ka “bepuma ba Mudī.” E ta pe̱ e pula Timoteo jongwane̱ la mudī ná a se bene̱ bede̱mo be kwalabe̱: te̱me̱ la sim, dube̱ la Loba, na we̱lisane̱.​—Kobisane̱ Kolose 3:12; 2 Petro 1:5-7.

Galatia 5:22, 23 e si mato̱pea so̱ bede̱mo be̱se̱ kriste̱n ńangame̱nno̱ sa. Mudī ma Loba mwe ná mongwane̱ biso̱ o sa bede̱mo ba bwam dibua be belabe̱ ná “bepuma ba Mudī.” Nde bede̱mo jita be jangame̱nno̱ sa niponda jeno̱ o ńaka o be̱ kriste̱n ńena ńou na ‘bo̱to̱ mot’a peńa nu wekabe̱ kaponda Loba o te̱me̱ la sim na bosangi ba mbale̱.’​—Efe. 4:24.